Kanbiọ lẹ sọn Wehiatọ lẹ Dè
To pọndohlan mẹ na ojlo tintindo Jehovah tọn nado jo ylando lẹ namẹ to dodonu avọ́sinsan ofligọ tọn ji, etẹwutu e do yin dandannu na Klistiani lẹ nado yigbe ylando tọn na mẹho lẹ to agun lọ mẹ?
Dile e sọgan yin mimọ to whẹho Davidi po Bati-ṣeba po tọn mẹ do, dile ylando Davidi tọn tlẹ sinyẹn sọ, Jehovah jo na ẹn, na lẹnvọjọ sọn ahun mẹ wá Davidi tọn wutu. To whenuena yẹwhegán Natani dọnsẹpọ ẹ, Davidi yigbe ylando tọn tlọlọ dọmọ: “Yẹn ko waylando do OKLUNỌ go.”—2 Samuẹli 12:13.
Ṣigba, e mayin dọ Jehovah nọ kẹalọyi gbeyiyi ylando tọn ylandonọ de tọn bo nọ dlẹnkan jona tọn poun wẹ gba ṣigba e sọ nọ basi awuwledainanu owanyinọ lẹ nado gọalọna mẹhe waylando lọ nado zindonukọn nado jẹgangan to gbigbọmẹ. To whẹho Davidi tọn mẹ, alọgọ wá gbọn yẹwhegán Natani gblamẹ. To egbehe, sunnu mẹhomẹ he whèwhín lẹ, kavi mẹhe yin mẹho to gbigbọ-liho lẹ, tin to agun Klistiani tọn mẹ. Devi Jakobu basi zẹẹmẹ dọmọ: “Mẹdepope jẹazọ̀n [gbigbọmẹ tọn] to mì mẹ? Mì gbọ ni ylọ mẹho agun tọn lẹ, na yé ni hodẹ̀ do e ji, bo kọ̀n amisisa do ota na ẹn to oyín Oklunọ tọn mẹ: podọ odẹ̀ yise tọn na whlẹn azọ̀ntọ gán, Oklunọ nasọ ze e tite; eyin e ko sọ waylan de, yè na jona ẹn.”—Jakobu 5:14, 15.
Mẹho numimọnọ lẹ sọgan yí nususu wà nado de awufiẹsa he ahun he jẹflumẹ ylandonọ lọ tọn nọ tindo numimọ etọn pò. Yé nọ dovivẹnu nado hodo apajlẹ Jehovah tọn to nuyiwa yetọn lẹ hẹ ylandonọ lọ mẹ. Yé ma nọ jlo nado yin fifiẹtọ pọ́n gbede, yèdọ eyin mẹplọnlọ-domẹgo sinsinyẹn tlẹ yin nuhe sọgbe. Kakatimọ, yé nọ gbọn awuvẹmẹ dali lẹnnupọndo nuhudo afọdopolọji tọn omẹ lọ tọn lẹ ji. Yé nọ gbọn sọwhiwhe dali dovivẹnu nado vọ́ nulẹnpọn ylanwatọ lọ tọn jlado gbọn Ohó Jiwheyẹwhe tọn yiyizan dali. (Galatianu lẹ 6:1) Yèdọ eyin mẹde ma tlẹ yigbe na ylando etọn sọn ahun mẹ wá, ewọ sọgan yin whinwhàn nado lẹnvọjọ to whenuena mẹho lẹ dọnsẹpọ ẹ, dile Davidi wà do to whenuena Natani dọnsẹpọ ẹ. Gbọnmọ dali godonọnamẹ heyin nina gbọn mẹho lẹ dali nọ gọalọna mẹhe ṣinuwa lọ nado dapana owù vivọ́ ylando lọ wà tọn po kọdetọn sinsinyẹn lilẹzun ylandonọ he tliji de tọn po.—Heblu lẹ 10:26-31.
Na nugbo tọn e ma nọ bọawu nado yigbe nuyiwa he yè mọdọ e huwinyan tọn na mẹdevo lẹ bosọ dín jona gba. E nọ biọ huhlọn homẹ tọn. Nalete, lẹnnupọn na ojlẹ de do adà awetọ lọ ji. Dawe de he gboawupo nado de ylando sinsinyẹn etọn hia mẹho lẹ to agun lọ mẹ dọmọ: “Yẹn tindo numọtolanmẹ awufiẹsa tọn he ma jlo na busẹ sọn ahun ṣie mẹ. Yẹn hẹn vivẹnudido ṣie to azọ́n kunnudide tọn mẹ jideji, ṣigba numọtolanmẹ whẹhuhu tọn lọ gbọṣi aimẹ.” Linlẹn etọn wẹ yindọ gbeyiyi ylando tọn hlan Jiwheyẹwhe to odẹ̀ mẹ ko pé, ṣigba e họnwun dọ e ma pé gba, na ewọ tindo numọtolanmẹ he taidi Ahọlu Davidi tọn lẹ. (Psalm 51:8, 11) Lehe e yọ́n hugan nado kẹalọyi alọgọ owanyinọ he Jehovah wleawuna gbọn mẹho lẹ gblamẹ do sọ!