Kanbiọ lẹ sọn Wehiatọ lẹ Dè

Etẹwẹ e zẹẹmẹdo nado sẹ̀n Jehovah “to gbigbọ mẹ”?

To whenuena e to kunnudena yọnnu Samalianu de he wá nado dọ̀n osin to dòtọ Jakobu tọn tó sẹpọ tòdaho Sikali tọn, Jesu Klisti dọmọ: “Gbigbọ wẹ Jiwheyẹwhe: e jẹ yé he to sinsẹ̀n ẹn lẹ ni nọ sẹ̀n ẹn to gbigbọ mẹ podọ to nugbo mẹ.” (Johanu 4:24) Sinsẹ̀n-bibasi nugbo dona yin ‘to nugbo mẹ’ to enẹ mẹ dọ e dona tin to kọndopọmẹ hẹ nuhe Jehovah Jiwheyẹwhe dehia to Biblu mẹ gando ede po lẹndai etọn lẹ po go. Sinsẹ̀nzọn mítọn hlan Jiwheyẹwhe sọ dona yin to gbigbọmẹ to linlẹn lọ mẹ dọ e dona yin zohunhunnọ bo yin whinwhàn gbọn ahun he gọna owanyi po yise po dali. (Titu 2:14) Ṣigba, lẹdo hodidọ lọ tọn dohia dọ hodidọ Jesu tọn gando ‘sinsẹ̀n-bibasi hlan Jiwheyẹwhe to gbigbọ mẹ’ go yinukọn tlala zẹ̀ ninọmẹ apọ̀nmẹ tọn he mẹ mí nọ sẹ̀n Jehovah te go.

Hodọdopọ Jesu tọn hẹ yọnnu lọ to dòtọ lọ kọ̀n ma gando zohunhun tintindo kavi zohunhun matindo to sinsẹ̀n-bibasi mẹ go gba. Sinsẹ̀n lalo tọn lọsu sọgan yin bibasi to zohunhun po mẹdezejo po mẹ. Kakatimọ, to whenuena e ko dọ dọ e mayin osó Samalia tọn de ji kavi to tẹmpli Jelusalẹm tọn mẹ wẹ Otọ́ na yin sinsẹ̀n te godo—ofi awe lẹ yin ofi yinukundomọ—Jesu dlẹnalọdo aliho sinsẹ̀n-bibasi tọn devo heyin zize sinai do ninọmẹ taun Jiwheyẹwhe tọn ji. (Johanu 4:21) E dọmọ: “Omẹ gbigbọnọ de wẹ Jiwheyẹwhe yin.” (Johanu 4:24, Charles B. Williams) Jiwheyẹwhe nugbo lọ ma tindo agbasa gba podọ yè ma sọgan mọ ẹn kavi doalọ e go gba. Sinsẹ̀n-bibasi etọn ma nọ yin zize sinai do tẹmpli kavi osó yinukundomọ de ji gba. Enẹwutu, Jesu dlẹnalọdo adà sinsẹ̀n-bibasi tọn de he yinukọn zẹ̀ nuhe yè sọgan yí nukundomọ lẹ go.

Gbọnvona dọ e na yin bibasi to nugbo mẹ, sinsẹ̀n-bibasi he na yin alọkẹyi sọ dona yin anadena gbọn gbigbọ wiwe dali—enẹ wẹ huhlọn-yí-do-wazọ́n mayinukundomọ Jiwheyẹwhe tọn. Apọsteli Paulu wlan dọmọ: “Gbigbọ [wiwe] wẹ to dodinna onú lẹpo, mọwẹ, onú sisosiso Jiwheyẹwhe tọn lẹ.” E sọ yidogọ dọmọ: “Míwlẹ ko mọyi, e mayin gbigbọ aihọn tọn gba, adavo gbigbọ heyin Jiwheyẹwhe tọn: na mí nido yọ́n nuhe yè na mí vọnu gbọn Jiwheyẹwhe dali.” (1 Kọlintinu lẹ 2:8-12) Na Jiwheyẹwhe nido kẹalọyi sinsẹ̀n-bibasi mítọn, mí dona tindo gbigbọ etọn bosọ yin anadena gbọn gbigbọ lọ dali. Humọ, dandannu wẹ e yin dọ gbigbọ, kavi ninọmẹ apọ̀nmẹ tọn mítọn, ni yin hinhẹn wá gbesisọmẹ hẹ gbigbọ Jiwheyẹwhe tọn gbọn oplọn po Ohó etọn yíyí do yizan mẹ po dali.

[Yẹdide to weda 28]

Sẹ̀n Jiwheyẹwhe ‘to gbigbọ mẹ podọ to nugbo mẹ’