Hiẹ Sọgan Tindo Yise Nujọnu Tọn

To whenuena Sarah Jayne yin owhe 19 mẹvi, e yọnẹn dọ emi ko bẹ azọ̀n agbasa wiwọ̀ tọn he nọ dù vidọ namẹ. To whenuena e ko yin zizẹ godo, ninọmẹ etọn pọnte taun bọ e sọ tindo pọndohlan dagbe gando sọgodo go. E yin pọndohlan dagbenọ sọmọ bọ to whenuena e pé owhe 20 mẹvi, e biọ gbemima alọwle tọn mẹ bosọ jẹ tito basi na alọwle etọn ji. Ṣigba azọ̀n lọ lẹkọwa to owhe enẹ dopolọ mẹ, bọ e sọ yọnẹn dọ osẹ vude poun wẹ emi tindo nado nọgbẹ̀ na. Sarah Jayne kú to juin 2000, yèdọ ojlẹ kleun de whẹpo e ni do pé owhe 21 mẹvi.

NUHE yinuwado mẹhe dla Sarah Jayne pọ́n to adọ́zan etọn ji to dotowhé lọ lẹ wẹ abọẹninọ po jidide he e tindo gando sọgodo go po, gọna yise sisosiso he e tindo to Jiwheyẹwhe po Ohó etọn, Biblu po mẹ. Mahopọnna nugbajẹmẹji ylankan he tin to nukọn etọn, e tindo jidide to todido fọnsọnku tọn mẹ—dọ emi nasọ wá mọ họntọn emitọn lẹpo whladopo dogọ. (Johanu 5:28, 29) “Yẹn na mọ mìmẹpo to aihọn yọyọ Jiwheyẹwhe tọn mẹ,” wẹ e dọ.

Mẹsusu gbẹkọ yise wunmẹ enẹ go dọ oklọ de poun wẹ. Ludovic Kennedy kanse dọmọ: “Etẹwẹ fọnsọnku sọ yin, adavo linlẹn mẹhe yise yetọn ma lodo lẹ tọn de dọ ninọmẹ dagbe lẹ na tin to pẹnkunkun godo tọn whenu, bọ núdùdù dagbe lẹ na tin ga, bọ yé na duvivi ojlẹ dagbe tọn hẹ mẹhe ko kú jẹnukọnna yé po mẹhe na kú bọdo yé go lẹ po to lẹdo he taidi Edẹni tọn de mẹ?” Mí dona fọ́n kanbiọ agọjẹdonu tọn de dote sọta hodidọ enẹ. Etẹ wẹ sọgbe hẹ lẹnpọn dagbe hugan—nado yise dọ “ogbẹ̀ ehe kẹdẹ wẹ yin nuhe tin lẹpo, enẹwutu mí dona yí i zan to aliho he yọnbasi lẹpo mẹ,” dile Kennedy dọ do, kavi nado yise to Jiwheyẹwhe po opagbe fọnsọnku tọn etọn po mẹ? Sarah Jayne de nado yise to Jiwheyẹwhe po opagbe fọnsọnku tọn etọn po mẹ. Nawẹ e wleawuna yise mọnkọtọn gbọn?

“Dín Jiwheyẹwhe . . . Bosọ Mọ Ẹn Nugbonugbo”

Nado wleawuna yise po jidide po to mẹde mẹ, hiẹ dona yọ́n omẹ lọ bosọ plọn lehe e nọ lẹnnupọn bo nọ yinuwa do. Mọwiwà nọ bẹ ahun po ayiha po hẹn. Nudopolọ pẹpẹ wẹ nọ jọ e yin e wá jẹ awuwiwlena yise nujọnu tọn to Jiwheyẹwhe mẹ ji. Hiẹ dona yọ́n ewọ, plọnnu gando jẹhẹnu etọn lẹ go, plọn lehe e yin mẹhe go yé sọgan dejido bo ganjẹ e go to nuhe e ko dọ bo ko wà lẹ mẹ.—Psalm 9:10; 145:1-21.

Mẹdelẹ lẹndọ ehe ma yọnbasi. Yé dọ dọ eyin Jiwheyẹwhe tlẹ tin, be e dẹn do mí hugan, bosọ dabla tlala. “Eyin Jiwheyẹwhe yin omẹ nujọnu tọn na Klistiani lẹ dile e yin na Sarah Jayne do, naegbọn e ma hẹn ede zun yinyọnẹn na mí mẹhe pò lẹ,” wẹ mẹhe tindo ayihaawe lẹ nọ kanse. Ṣigba be Jiwheyẹwhe dẹn do mí hugan bosọ yin dinmamọdona nugbonugbo wẹ ya? To hodidọ hlan tamẹnuplọnmẹtọ po weyọnẹntọ Atẹni tọn lẹ po mẹ, apọsteli Paulu dọ dọ “Jiwheyẹwhe he basi aihọn po nuhe tin to e mẹ lẹpo po” ko sọ wleawuna nuhe mí tindo nuhudo etọn nado ‘dín in bosọ mọ ẹn nugbonugbo’ lẹpo. Na nugbo tọn, Paulu dọmọ: “E ma tlẹ dẹn sọn dopodopo mítọn dè gba.”—Owalọ lẹ 17:24-27.

Whelọnu lo, nawẹ hiẹ sọgan ‘dín Jiwheyẹwhe bosọ mọ ẹn nugbonugbo’ gbọn? Mẹdelẹ ko wà ehe gbọn wẹkẹ gblagada he lẹdo yé pé lọ pinpọn dali poun. Na mẹsusu, wẹkẹ lọ kẹdẹ ko na kunnudenu he pé nado duto yé ji dọ Mẹdatọ de dona tin.a (Psalm 19:1; Isaia 40:26; Owalọ lẹ 14:16, 17) Yé tindo numọtolanmẹ dopolọ hẹ apọsteli Paulu, dọ ‘jẹhẹnu mayinukundomọ Jiwheyẹwhe tọn lẹ yin mimọ hezeheze sọn didá aihọn tọn gbọ́n, na yè yọ́n yé gbọn nuhe yin didá lẹ, podọ huhlọn madopodo po Jiwheyẹwhe-yinyin etọn po gblamẹ wutu.’—Lomunu lẹ 1:20; Psalm 104:24.

Hiẹ Tindo Nuhudo Biblu Tọn

Ṣigba, nado wleawuna yise nujọnu tọn to Mẹdatọ lọ mẹ, hiẹ tindo nuhudo onú devo he e ko wleawuna tọn. Etẹwẹ yin onú lọ? Biblu—yèdọ Ohó Jiwheyẹwhe tọn, he mẹ e de ojlo po lẹndai etọn po hia te wẹ. (2 Timoti 3:16, 17) Ṣigba mẹdelẹ sọgan dọ dọ, “nọte whẹ́, nawẹ hiẹ sọgan yise to nuhe Biblu dọ depope mẹ do to whenuena hiẹ mọ onú ylankan he mẹhe sọalọakọ́n nado to Biblu hodo lẹ to wiwà?” Nugbo wẹ dọ Mẹylọhodotọklisti tindo kandai ylankan yẹnuwiwa, danuwiwa, po fẹnnuwiwa po tọn. Ṣigba gbẹtọ lẹnpọn dagbenọ depope sọgan mọdọ yẹnuwà wẹ Mẹylọhodotọklisti te dọ e to nunọwhinnusẹ́n Biblu tọn lẹ hodo.—Matiu 15:8.

Biblu lọsu na avase dọ mẹsusu na yigbe dọ yé to sinsẹ̀n-basi hlan Jiwheyẹwhe ṣigba, na taun tọn “na nọ mọ́ Oklunọ he họ̀ yé.” Apọsteli Pita dọ dọ ‘yè na nọ dọho ylankan do aliho nugbo tọn go na yewlẹ tọn wutu.’ (2 Pita 2:1, 2) Jesu Klisti dọ dọ omẹ ehelẹ yin “azọ́n ylankan wàtọ” he na yin yinyọnẹn hezeheze gbọn ylanwiwa yetọn lẹ dali. (Matiu 7:15-23) Gbigbẹ́ Ohó Jiwheyẹwhe tọn dai na nuhe Mẹylọhodotọklisti ko wà wutu na taidi zize wekanhlanmẹ he wá sọn họntọn dejidego de dè dlan na mẹhe hẹn ẹn wá mayin nugbonọ wutu.

Matin Ohó Jiwheyẹwhe tọn, e ma na yọnbasi nado wleawuna yise he lodo gba. To Biblu mẹ kẹdẹ wẹ Jehovah ze adà whẹho lẹ tọn etọn donukọnnamẹ te. E tá hinhọ́n do kanbiọ tẹgbẹ̀ tọn lẹ ji, taidi nuhewutu e jo dotẹnmẹ do na yajiji po awufiẹsa po podọ nuhe e na wà gando ninọmẹ lọ go. (Psalm 119:105; Lomunu lẹ 15:4) Sarah Jayne wá yise dọ Biblu yin Ohó gbọdo Jiwheyẹwhe tọn. (1 Tẹsalonikanu lẹ 2:13; 2 Pita 1:19-21) Gbọnna? E mayin na mẹjitọ etọn lẹ dọmọ na ẹn poun wutu gba, ṣigba na e yí whenu zan nado gbeje kunnudenu he dohia dọ Biblu yin osọhia vonọtaun he wá sọn Jiwheyẹwhe dè lẹ pọ́n wutu. (Lomunu lẹ 12:2) Di apajlẹ, e doayi nuyiwadomẹji huhlọnnọ he Biblu ko tindo do gbẹzan mẹhe tẹdo nunọwhinnusẹ́n etọn lẹ go tọn lẹ ji. Po alọgọ owe taidi La Bible: Parole de Dieu ou des hommesb nkọtọn lẹ po, e sọ yí sọwhiwhe do gbadopọnna kunnudenu homẹ tọn susugege he dohia dọ e yin gbigbọdo sọn Jiwheyẹwhe dè.

“Yise Wá sọn Sisè Mẹ”

Ṣigba, e ma ko pé nado tindo Biblu poun kavi tlẹ yise dọ e yin gbigbọdo kẹdẹ gba. Apọsteli Paulu wlan dọmọ: “Yise wá sọn sisè mẹ.” (Lomunu lẹ 10:17) Biblu tintindo poun ma nọ wleawuna yise gba, ṣigba sisè nuhe Biblu dọ wẹ nọ wàmọ. Hiẹ nọ ‘se’ nuhe Jiwheyẹwhe to didọ gbọn Ohó etọn hihia po pinplọn po dali. Jọja lẹ lọsu tlẹ sọgan wà ehe. Paulu dọ dọ sọn “ovu gbọ́n” wẹ onọ̀ po onọ̀ daho Timoti tọn po ko plọn ẹn “owe wiwe.” Be ehe zẹẹmẹdo dọ yé yí mẹhẹn gánnugánnu delẹ zan wẹ ya? Lala! Timoti mayin hinhẹn gánnugánnu kavi yin kiklọ to aliho depope mẹ gba. E yin ‘linlẹndiọna nado tindo yise’ to nuhe e se bo hia lẹ mẹ.—2 Timoti 1:5; 3:14, 15.

Sarah Jayne yin linlẹndiọna to aliho dopolọ mẹ. Taidi Beleanu owhe kanweko tintan whenu tọn lẹ, e “kọnayiha dai do yí ohó [he wá sọn mẹjitọ etọn po mẹplọntọ devo lẹ po dè] lọ.” Taidi ovivu de, e tindo jidide jọwamọ tọn to nuhe mẹjitọ etọn lẹ dọna ẹn mẹ. To godo mẹ, to whenuena e ko whẹ́n, e ma yí ayihaawe kavi awuwhiwhle do kẹalọyi nuhe yè plọn ẹn lẹpo poun gba. E ‘yí sọwhiwhe do gbadopọnna Owe-wiwe egbesọegbesọ nado pọ́n eyin mọwẹ onú enẹ lẹpo yin.’—Owalọ lẹ 17:11.

Hiẹ Sọgan Wleawuna Yise Nujọnu Tọn

Hiẹ lọsu sọgan wleawuna yise nujọnu tọn—enẹ wẹ yise wunmẹ he apọsteli Paulu basi zẹẹmẹ etọn to wekanhlanmẹ etọn hlan Klistiani Heblu tọn lẹ mẹ. E dọ dọ yise mọnkọtọn yin ‘nukundido dejidego nuhe yè to todo lẹ tọn, heyin okunnu nuhe mí ma mọ lẹ tọn.’ (Heblu lẹ 11:1) Eyin hiẹ tindo yise mọnkọtọn, hiẹ na deji mlẹnmlẹn dọ todido po nukundido towe lẹpo po, gọna opagbe fọnsọnku tọn he Jiwheyẹwhe dó, na yin hinhẹndi. Hiẹ na yin dududeji dọ todido mọnkọtọn lẹ yin zize sinai do nujikudo sinsinyẹn ji, e mayin do linlẹn dọ onú mọnkọtọn lẹ sọgan jọ ji poun gba. Hiẹ na yọnẹn dọ Jehovah ma ko gboawupo pọ́n gbede nado hẹn opagbe etọn lẹ di. (Jọṣua 21:45; 23:14; Isaia 55:10, 11; Heblu lẹ 6:18) Aihọn yọyọ he Jiwheyẹwhe dopagbe etọn na yin nujọnu hlan we taidi dọ e ko tin tofi wẹ nkọtọn. (2 Pita 3:13) Podọ hiẹ na mọ hezeheze po nukun yise tọn po dọ Jehovah Jiwheyẹwhe, Jesu Klisti, po Ahọluduta Jiwheyẹwhe tọn po yin nujọnu, e mayin odlọ tata poun lẹ gba.

Hiẹ mayin jijodo matin alọgọ to awuwiwlena yise nujọnu tọn mẹ gba. Gbọnvona dọ e hẹn Ohó etọn tin-to-aimẹ na mẹlẹpo, Jehovah sọ wleawuna agun lẹdo aihọn pé Klistiani tọn heyin azọ́ndena nado gọalọna omẹ ahunjijlọnọ lẹ to awuwiwle na yise to Jiwheyẹwhe mẹ. (Johanu 17:20; Lomunu lẹ 10:14, 15) Kẹalọyi alọgọ he Jehovah nọ na gbọn titobasinanu enẹ gblamẹ lẹpo. (Owalọ lẹ 8:30, 31) Podọ to whenuena e yindọ yise yin sinsẹ́n gbigbọ wiwe Jiwheyẹwhe tọn de, nọ hodẹ̀ gbọzangbọzan na gbigbọ enẹ nado gọalọna we nado wleawuna yise he lodo.—Galatianu lẹ 5:22.

Ma dike ayihaawe tindotọ he nọ vlẹ mẹhe to yise dohia to Jiwheyẹwhe po Ohó etọn po mẹ kò lẹ ni glọnalina we blo. (1 Kọlintinu lẹ 1:18-21; 2 Pita 3:3, 4) Na nugbo tọn, yise nujọnu tọn họakuẹ taun to gbemima towe hinhẹn lodo sọta mẹgbeyinyan mọnkọtọn lẹ mẹ. (Efesunu lẹ 6:16) Sarah Jayne mọdọ nugbo wẹ enẹ yin, podọ e nọ saba na tuli mẹhe dla ẹ pọ́n to dotowhé lẹ nado wleawuna yise yetọn lọsu. “Mì hẹn nugbo lọ zun mìde tọn” wẹ e nọ dọ. “Mì nọ plọn Ohó Jiwheyẹwhe tọn. Mì nọ̀ titobasinanu Jiwheyẹwhe tọn mẹ. Mì nọ hodẹ̀ gbọzangbọzan. Mì yin zohunhunnọ to sinsẹ̀nzọn Jehovah tọn mẹ.”—Jakobu 2:17, 26.

To ayidido yise he e tindo to Jiwheyẹwhe po fọnsọnku po go mẹ, doto mẹgopọntọ etọn dopo dọmọ: “Hiẹ tindo yise to ehe mẹ taun, kavi e mayin mọwẹ?” To whenuena yè kanse e nuhe na ẹn pọndohlan dagbe mọnkọtọn dile etlẹ tin to whlepọn sinsinyẹn mẹ, e gblọn dọmọ: “Yise tintindo to Jehovah mẹ wẹ. Ewọ yin họntọn nujọnu tọn hlan mi, bọ yẹn sọ yiwanna ẹn tlala.”

[Nudọnamẹ Odò Tọn Lẹ]

[Yẹdide to weda 6]

Sọn ‘ovu gbọ́n’ wẹ onọ̀ po onọ̀ daho Timoti tọn po ko plọn ẹn ‘owe wiwe.’

Sọn “Photo-Drame de la création” 1914 tọn mẹ

Beleanu lẹ yin pipà na dogbigbapọnna Owe-wiwe egbesọegbesọ

[Yẹdide to weda 7]

Sisè po tonusisena nuhe Biblu dọ po wẹ nọ wleawuna yise, e mayin tintindo e poun wẹ nọ wàmọ gba

“Yẹn na mọ mìmẹpo to aihọn yọyọ Jiwheyẹwhe tọn mẹ”