Kanbiọ lẹ sọn Wehiatọ lẹ Dè — WESẸDOTẸN INTẸNẸT JI TỌN Watchtower Tọn

Kanbiọ lẹ sọn Wehiatọ lẹ Dè

Etẹwẹ yin “gbọjẹ” heyin alọdlẹndo to Heblu lẹ 4:9-11 mẹ, podọ nawẹ mẹde nọ “biọ gbọjẹ lọ mẹ” gbọn?

Apọsteli Paulu wlanwe hlan Klistiani owhe kanweko tintan Heblu tọn lẹ dọmọ: “Gbọjẹ de pò hlan omẹ Jiwheyẹwhe tọn lẹ. Na ewọ mẹhe ko biọ gbọjẹ etọn mẹ, ewọ ga ko dealọ sọn azọ́n mẹ, dile Jiwheyẹwhe de sọn etọn mẹ do. Enẹwutu mì gbọ mí ni jẹtukla nado biọ gbọjẹ lọ mẹ.”—Heblu lẹ 4:9-11.

To whenuena Paulu dọ dọ Jiwheyẹwhe gbọjẹ sọn azọ́n Etọn lẹ mẹ, e họnwun dọ e to alọdlẹndo nuhe yin didọ to Gẹnẹsisi 2:2 mẹ, fie mí hia te dọmọ: “To azán ṣinawetọ gbè Jiwheyẹwhe dotana azọ́n etọn he e basi; e sọ gbọjẹ to azán ṣinawetọ gbè sọn azọ́n etọn lẹpo mẹ he e ko basi.” Etẹwutu Jehovah do zindonukọn ‘nado gbọjẹ to azán ṣinawetọ gbè’? Na jide tọn e mayin nado gọ̀ huhlọn yí na ‘azọ́n etọn lẹpo he e ko basi’ wutu wẹ gba. Wefọ he bọdego wleawuna kunnudenu de dọmọ: “Jiwheyẹwhe sọ dona azán ṣinawetọ bosọ klan ẹn do wiwe: na e mẹ wẹ e ko gbọjẹ te sọn azọ́n etọn mẹ he Jiwheyẹwhe dá bo basi wutu.”—Gẹnẹsisi 2:3; Isaia 40:26, 28.

“Azán ṣinawetọ” gbọnvona azán ṣidopo he jẹnukọn lẹ, na e yin azán de he Jiwheyẹwhe dona bo hẹnzun wiwe, enẹwẹ yindọ, azán de heyin kinklandovo, kavi yin kinklandowiwe na lẹndai vonọtaun de. Etẹwẹ yin lẹndai enẹ? Jiwheyẹwhe ko de lẹndai etọn hia gando gbẹtọvi lẹ po aigba po go jẹnukọn. Jiwheyẹwhe dọna sunnu tintan po asi etọn po dọmọ: “Mì yin sinsẹ́nnọ, bo sudeji, bosọ gọ́ aigba ji, bo dugán do e ji: bo duahọlu to whèví ohù tọn ji, podọ to ohẹ̀ aga tọn ji, po to onú he to ogbẹ̀ lẹpo ji he nọ lìn to aigba ji.” (Gẹnẹsisi 1:28) Dile etlẹ yindọ Jiwheyẹwhe ko hẹn gbẹtọvi lẹ po aigba po tindo bẹjẹeji dagbe de, e na biọ whenu na aigba lọ blebu nado yin gandudeji bosọ yin hinhẹnzun paladisi de he mẹ gbẹtọ pipé lẹ gọ́, dile Jiwheyẹwhe ko lẹndai do. Enẹwutu, to “azán ṣinawetọ gbè,” Jiwheyẹwhe gbọjẹ, kavi doalọte, sọn azọ́n nudida tọn mẹ nado na dotẹnmẹ nuhe e ko dá lẹ nado jideji to kọndopọmẹ hẹ ojlo etọn. To vivọnu “azán” enẹ tọn, lẹndai Jiwheyẹwhe tọn lẹpo na ko yin hinhẹndi. Nawẹ gbọjẹ enẹ na dẹnsọ?

Eyin mí lẹkọyi hogbe Paulu tọn lẹ hlan Heblu lẹ ji, mí doayi e go dọ e dlẹnalọdo dọ “gbọjẹ de pò hlan omẹ Jiwheyẹwhe tọn lẹ,” bọ e sọ na tuli Klistiani hatọ etọn lẹ nado wà nuhe go yé pé lẹpo nado “biọ gbọjẹ lọ mẹ.” Ehe dohia dọ to whenuena Paulu wlan ohó ehelẹ, “azán ṣinawetọ” heyin gbọjẹ Jiwheyẹwhe tọn, he ko bẹjẹeji sọn owhe 4 000 jẹnukọn, gbẹpo to nukọnzindo. E na zindonukọn kakajẹ whenuena lẹndai Jiwheyẹwhe tọn gando gbẹtọvi lẹ po aigba po go na yin hinhẹndi mlẹnmlẹn to vivọnu Gandudu Owhe Fọtọ́n Jesu Klisti tọn, mẹhe yin “Oklunọ gbọjẹzan tọn.”— Matiu 12:8; Osọhia 20:1-6; 21:1-4.

Na nukundido jiawu he to nukọn ja enẹ wutu, Paulu basi zẹẹmẹ lehe mẹde sọgan biọ gbọjẹ Jiwheyẹwhe tọn mẹ do. E wlan dọmọ: “Mẹhe ko biọ gbọjẹ [Jiwheyẹwhe tọn] mẹ, ewọ ga ko dealọ sọn azọ́n etọn mẹ.” Ehe dohia dọ dile etlẹ yindọ mí tindo bẹjẹeji pipé de, gbẹtọvi lẹ blebu ma ko biọ gbọjẹ Jiwheyẹwhe tọn mẹ gba. Ehe yinmọ na Adam po Evi po ma nọgbẹ̀ nado mọ gbọjẹ Jiwheyẹwhe tọn to “azán ṣinawetọ gbè” gbọn alọkikẹyi tito he e basi na yé dali wutu. Kakatimọ, yé ṣiatẹ bo jlo nado jẹ mẹdekannu sọn Jiwheyẹwhe dè. Na nugbo tọn, yé hodo tito Satani tọn kakati nado kẹalọyi anademẹ owanyinọ Jiwheyẹwhe tọn. (Gẹnẹsisi 2:15-17) Taidi kọdetọn de, yé hẹn nukundido gbẹninọ kakadoi to aigba paladisi tọn ji bu. Sọn whenẹnu gbọ́n, gbẹtọvi lẹpo ko tin to kanlinmọgbenu ylando po okú po tọn.—Lomunu lẹ 5:12, 14.

Atẹṣiṣi gbẹtọvi lẹ tọn ma glọnalina lẹndai Jiwheyẹwhe tọn gba. Gbọjẹzan etọn gbẹ́ zindonukọn. Jehovah basi awuwledainanu owanyi tọn de—yèdọ ofligọ lọ—gbọn Visunnu etọn, Jesu Klisti gblamẹ, na mẹhe kẹalọyi i to dodonu yise tọn mẹ lẹpo nido sọgan donukun tundote po gbọjẹ po sọn agbàn pinpẹn ylando po okú po tọn mẹ. (Lomunu lẹ 6:23) Nuhe zọ́n niyẹn bọ Paulu do na tuli Klistiani hatọ lẹ nado ‘gbọjẹ sọn azọ́n yetọn titi lẹ mẹ.’ Yé dona kẹalọyi awuwledainanu Jiwheyẹwhe tọn na whlẹngán, ṣigba bo ma dona tẹnpọn nado wazọ́n na sọgodo to aliho yedetiti tọn mẹ dile Adam po Evi po basi do. Yé sọ dona dapana afọdidona azọ́n whẹjijọ dindin na yedetiti tọn lẹ.

Yanwle ṣejannabi kavi ovọ́ tọn lẹ didapana nado sọgan wà ojlo Jiwheyẹwhe tọn yin kọfanamẹnu po gbọjẹ po na nugbo tọn. Jesu basi oylọ namẹ dọmọ: “Mì wá dee, mì he to tuklajẹ, bọ yè do agbàn pinpẹn na lẹ, yẹn nasọ na gbọjẹ mì. Mì yí zẹgẹ ṣie do okọ̀ mìtọn, na mì ni sọ plọn nupinplọn ṣie: na homẹmimiọnnọ podọ ayiha whiwhẹnọ wẹ yẹn: mì nasọ mọ gbọjẹ hlan alindọn mìtọn lẹ. Na zẹgẹ ṣie bọawu, agbàn ṣie sọ fua.”—Matiu 11:28-30.

Hodidọ Paulu tọn gando gbọjẹ Jiwheyẹwhe tọn po lehe mẹde sọgan biọ e mẹ do po go yin asisa tulinamẹ tọn de hlan Klistiani Heblu tọn he tin to Jelusalẹm lẹ, na yé ko doakọnna homẹkẹn po vlẹko yise tọn susu po wutu. (Owalọ lẹ 8:1; 12:1-5) Mọdopolọ, ohó Paulu tọn lẹ sọgan yin asisa tulinamẹ tọn de na Klistiani lẹ to egbehe. To yinyọnẹn dọ hẹndi opagbe Jiwheyẹwhe tọn nado hẹn paladisi aigba ji tọn de wá to Ahọluduta dodowiwa tọn etọn mẹ ko sẹpọ, mí lọsu dona gbọjẹ sọn azọ́n mítọn lẹ mẹ bosọ wà nuhe go mí pé lẹpo nado biọ gbọjẹ lọ mẹ.—Matiu 6:10, 33; 2 Pita 3:13.

[Yẹdide to weda 31]

Opagbe Jiwheyẹwhe tọn heyin paladisi aigba ji tọn na yin hinhẹndi to vivọnu azán gbọjẹ etọn tọn