Be Hiẹ Ko Mọ “Gbigbọ Nugbo Tọn” Yí Ya?
‘Otọ́ . . . nasọ na mì alọgọtọ devo nado tin to mì dè kakadoi, yèdọ gbigbọ nugbo tọn.’—JOHANU 14:16, 17.
1. Nudọnamẹ titengbe tẹwẹ Jesu dọna devi etọn lẹ to ganhiho godo tọn he e yizan hẹ yé to abò aga tọn mẹ whenu?
“FIE wẹ hiẹ jei, Oklunọ?” Enẹ yin dopo to kanbiọ he apọsteli Jesu tọn lẹ kanse e to ganhiho godo tọn he e yizan hẹ yé to abò aga tọn de mẹ to Jelusalẹm. (Johanu 13:36) Dile opli lọ to yìyì, Jesu dọna yé dọ ojlẹ ko wá todin na emi ni jo yé dó bo lẹkọyi Otọ́ emitọn dè. (Johanu 14:28; 16:28) E ma nasọ tin to agbasa mẹ hẹ yé nado nọ plọnnu yé bo na gblọndo na kanbiọ yetọn lẹ ba. Ṣogan, e vọ́ jide na yé dọ: ‘Yẹn na hodẹ̀ hlan Otọ́, e nasọ na alọgọtọ [kavi homẹmiọnnamẹtọ] devo mì, na e nido tin to mì dè kakadoi.’—Johanu 14:16.
2. Etẹwẹ Jesu dopagbe nado dohlan devi etọn lẹ to yìyì etọn godo?
2 Jesu do nuhe alọgọtọ enẹ yin hia bosọ basi zẹẹmẹ lehe e na gọalọna devi etọn lẹ do. E dọna yé dọmọ: “Yẹn ma dọ onú helẹ hlan mì sọn whẹwhẹwhenu gba, na yẹn tin to mì dè wutu. Ṣigba dinvie yẹn jei ewọ he do mi hlan dè . . . E tin jẹ na mì dọ yẹn ni yì: na eyin yẹn ma yì, [alọgọtọ] lọ ma na wá mì dè gba: ṣigba eyin yẹn yì, yẹn na do e hlan mì. . . . Whenuena ewọ, gbigbọ nugbo tọn wá, ewọ na plan mì biọ nugbo lẹpo mẹ.”—Johanu 16:4, 5, 7, 13.
3. (a) Whetẹnu wẹ “gbigbọ nugbo tọn” yin didohlan Klistiani fliflimẹ tọn lẹ? (b) Aliho titengbe dopo tẹmẹ wẹ gbigbọ lọ yin ‘alọgọtọ’ de na yé te?
3 Opagbe ehe yin hinhẹndi to Pẹntikọsti owhe 33 W.M., dile apọsteli Pita dekunnu na do dọ: “Jesu he lọ wẹ Jiwheyẹwhe ze tite, kunnudetọ ehe tọn mí omẹ po yín. Enẹwutu mẹhe yè ko yí adusilọ Jiwheyẹwhe tọn do ze daga, bọ e ko sọ mọ opagbe [gbigbọ wiwe] tọn yí sọn Otọ́ dè, e túntún ehe jẹgbonu, ehe mì to mimọ, bosọ to sisè to dinvie.” (Owalọ lẹ 2:32, 33) Dile mí na mọ do to godo mẹ, gbigbọ wiwe heyin kinkọn jẹgbonu to Pẹntikọsti wà nususu na Klistiani fliflimẹ tọn lẹ. Ṣigba Jesu dopagbe dọ “gbigbọ nugbo tọn” na ‘hẹn nuhe e dọ hlan yé lẹpo wá oflin yetọn mẹ.’ (Johanu 14:26) E na hẹn yé penugo nado flin lizọnyizọn po nuplọnmẹ Jesu tọn lẹ po, yèdọ hogbe taun he e yizan lẹ, nado wlan yé dai. Ehe yin alọgọnamẹnu taun na apọsteli Johanu yọnhonọ lọ to vivọnu owhe kanweko tintan W.M. to whenuena e jẹ kandai Wẹndagbe tọn etọn wlan ji. Kandai enẹ bẹ ayinamẹ họakuẹ he Jesu na to whenuena e ze Oflin okú etọn tọn dai lẹ hẹn.—Johanu, weta 13-17.
4. Nawẹ “gbigbọ nugbo tọn” gọalọna Klistiani yiamisisadode fliflimẹ tọn lẹ gbọn?
4 Jesu sọ dopagbe na devi fliflimẹ tọn enẹlẹ dọ gbigbọ lọ na ‘plọn yé onú lẹpo’ bosọ ‘deanana yé biọ nugbo lọ lẹpo mẹ.’ Gbigbọ lọ na gọalọna yé nado mọnukunnujẹ onú sisosiso Owe-wiwe tọn lẹ mẹ bosọ whlá dopo-yinyin linlẹn, nukunnumọjẹnumẹ, po lẹndai yetọn po. (1 Kọlintinu lẹ 2:10; Efesunu lẹ 4:3) Gbọnmọ dali gbigbọ wiwe na huhlọn Klistiani fliflimẹ tọn enẹlẹ nado yinuwa taidi “afanumẹ nugbonọ, nuyọnẹntọ” to pọmẹ nado na “núdùdù . . . osaa sisọ mẹ” tọn Klistiani yiamisisadode lẹ dopodopo.—Matiu 24:45.
Gbigbọ to Kunnude
5. (a) Todido yọyọ tẹwẹ Jesu dehia devi etọn lẹ to ozán Nisan 14, 33 W.M. mẹ? (b) Azọngban tẹwẹ gbigbọ wiwe na yiwà to opagbe Jesu tọn hinhẹndi mẹ?
5 To ozán Nisan 14 owhe 33 W.M. tọn mẹ, Jesu dọna devi etọn lẹ tlọlọ dọ emi na hẹn yé sọyi bọ yé nasọ nọhẹ emi po Otọ́ emitọn po to olọn mẹ to godo mẹ. E dọna yé dọmọ: “To owhé Otọ́ ṣie tọn gbè fininọ susu wẹ tin: eyin e mayin mọ, yẹn do ko dọ hlan mì, Yẹn jei nado wleawu otẹn de tọn dai na mì. Eyin yẹn yì bo wleawu otẹn de tọn dai na mì, yẹn nasọ lẹgọ, bo hẹn mì yì dee dè; na fihe yẹn te finẹ wẹ mì na nọ ga.” (Johanu 13:36; 14:2, 3) Yé na duahọlu hẹ ẹ to Ahọluduta etọn mẹ. (Luku 22:28-30) Nado sọgan mọ todido olọn mẹ tọn ehe yí, yé dona yin ‘jiji gbọn gbigbọ dali’ taidi visunnu gbigbọmẹ Jiwheyẹwhe tọn lẹ bo yin amisana nado sẹ̀n taidi ahọlu po yẹwhenọ lẹ po hẹ Klisti to olọn mẹ.—Johanu 3:5-8; 2 Kọlintinu lẹ 1:21, 22; Titu 3:5-7; 1 Pita 1:3, 4; Osọhia 20:6.
6. (a) Whetẹnu wẹ oylọ olọn mẹ tọn bẹjẹeji, podọ omẹ nẹmu wẹ mọ oylọ ehe yí? (b) Etẹ mẹ wẹ mẹhe yin yiylọ lẹ yin bibaptizi dó?
6 “Oylọ olọn tọn” ehe bẹjẹeji to Pẹntikọsti 33 W.M. podọ, adà tangan etọn sọawuhia nado wá vivọnu to gblagbla 1930 tọn lẹ mẹ. (Heblu lẹ 3:1) Sọha mẹhe yin hiadogona gbọn gbigbọ wiwe dali nado yin apadewhe Islaeli gbigbọmẹ tọn lẹ wẹ omẹ 144 000, he “yè fligọ sọn gbẹtọ lẹ mẹ.” (Osọhia 7:4; 14:1-4) Ehelẹ yin bibaptizi do agbasa gbigbọnọ Klisti tọn mẹ, do agun etọn mẹ, podọ do okú etọn mẹ. (Lomunu lẹ 6:3; 1 Kọlintinu lẹ 12:12, 13, 27; Efesunu lẹ 1:22, 23) To baptẹm osin mẹ tọn po dide gbọn gbigbọ wiwe dali yetọn po godo, yé biọ gbẹzan avọ́sinsan tọn de mẹ, yèdọ gbẹzan tenọgligo-hinhẹn kakajẹ okú tọn mẹ.—Lomunu lẹ 6:4, 5.
7. Etẹwutu Klistiani yiamisisadode lẹ kẹdẹ wẹ tindo jlọjẹ nado dù to yẹhiadonu lẹ mẹ to Oflin lọ tẹnmẹ?
7 Taidi Islaelivi gbigbọmẹ tọn lẹ, Klistiani yiamisisadode ehelẹ tin to alẹnu yọyọ heyin bibasi to Jehovah po “Islaeli Jiwheyẹwhe tọn” po ṣẹnṣẹn mẹ. (Galatianu lẹ 6:16; Jẹlemia 31:31-34) Alẹnu yọyọ lọ yin hinhẹn lodo gbọn ohùn he Klisti sọndai dali. Jesu donu ehe go to whenuena e ze Oflin okú etọn tọn dai. Luku basi kandai dọmọ: “E sọ yí akla, whenuena e ko dopẹ́, e wẹ́n ẹn, bosọ yí na yé, dọmọ, Ehe wẹ agbasa ṣie he yè na mì: mì nọ basi ehe to oflin ṣie mẹ. Podọ kọfo ga to walọ mọnkọ mẹ, to tenu núdùdù godo, e dọmọ, Kọfo he wẹ alẹnu yọyọ to ohùn ṣie mẹ, yèdọ enẹ he yè kọ̀n na mì.” (Luku 22:19, 20) Pipotọ hagbẹ 144 000 lọ tọn he gbẹ́ tin to aigba ji lẹ wẹ nọ gbọn gbesisọ dali tindo mahẹ to akla po ovẹn yẹhiadonu Oflin okú Klisti tọn po mẹ.
8. Nawẹ mẹyiamisisadode lẹ nọ yọnẹn gbọn dọ yé ko mọ oylọ olọn mẹ tọn yí?
8 Nawẹ mẹyiamisisadode lẹ nọ yọnẹn gbọn dọ yé ko mọ oylọ olọn mẹ tọn yí? Yé nọ mọ kunnude he ma tindo nuṣiwa gbigbọ wiwe tọn yí. Apọsteli Paulu wlanwe hlan omẹ mọnkọtọn lẹ dọ: “Omẹ sọha he yè hlẹali gbọn [gbigbọ] Jiwheyẹwhe tọn dali, yé wẹ ovi Jiwheyẹwhe tọn. . . . Gbigbọ lọsu sọ to kunnude hẹ gbigbọ mítọn, dọ ovi Jiwheyẹwhe tọn wẹ mí; be eyin mí yin ovi, whenẹnu whédutọ; whédutọ Jiwheyẹwhe tọn, podọ whédutọ dopọ hẹ Klisti; eyin e yin mọ dọ mí jiya hẹ ẹ, na yè nido pagigona mí dopọ hẹ ẹ ga.” (Lomunu lẹ 8:14-17) Kunnude gbigbọ lọ tọn ehe tindo huhlọn sọmọ bọ mẹhe tindo ayihaawe vude poun gando oylọ olọn mẹ tọn mimọyi go lẹ sọgan gbọn gbesisọ dali wá tadona lọ kọ̀n dọ yé ma ko yin yiylọ gba, podọ yé nọ gbọnmọ dali doalọtena mahẹ tintindo to yẹhiadonu Oflin tọn lọ lẹ mẹ.
Gbigbọ lọ po Lẹngbọ Devo lẹ Po
9. Hagbẹ voovo awe tẹlẹ wẹ yin nudego to owe Wẹndagbe lẹ tọn po owe Osọhia tọn po mẹ?
9 Po sọha he tindo dogbó Klistiani heyin yiylọ nado wleawuna Islaeli gbigbọmẹ tọn lẹ po to ayiha mẹ, Jesu dlẹnalọdo yé taidi “lẹngbọpa pẹvi.” Yé yin alọkẹyi do “apó” alẹnu yọyọ tọn mẹ, to vogbingbọn mẹ na “lẹngbọ devo” he ma tindo sọha, he Jesu dọ dọ emi sọ dona bẹpli lẹ. (Luku 12:32; Johanu 10:16) Lẹngbọ devo heyin bibẹpli to ojlẹ opodo tọn mẹ lẹ na wleawuna “gbẹtọ susugege” he na lùn “nukunbibia daho” lọ tọ́n, he tindo todido gbẹninọ kakadoi to aigba ji to paladisi mẹ tọn lẹ. Po awuvivi po, numimọ he Johanu mọyi to vivọnu owhe kanweko tintan W.M. do vogbingbọn hia to gbẹtọ susugege lọ po hagbẹ 144 000 Islaeli gbigbọmẹ tọn lẹ po ṣẹnṣẹn. (Osọhia 7:4, 9, 14) Be lẹngbọ devo lẹ lọsu nọ mọ gbigbọ wiwe yí wẹ, podọ eyin mọwẹ, nawẹ e nọ yinuwado gbẹzan yetọn lẹ ji do?
10. Nawẹ lẹngbọ devo lẹ nọ yin bibaptizi “do oyín Otọ́ tọn, po Ovi tọn po, po [gbigbọ wiwe] tọn po mẹ” gbọn?
10 Nugbo wẹ dọ gbigbọ wiwe nọ yí adà titengbe de wà to gbẹzan lẹngbọ devo lẹ tọn mẹ. Yé nọ basi yẹhiadonu klandowiwe yetọn tọn hlan Jehovah gbọn yinyin bibaptizi “do oyín Otọ́ tọn, po Ovi tọn po, po [gbigbọ wiwe] tọn po mẹ” dali. (Matiu 28:19) Yé yọ́n nupojipetọ-yinyin Jehovah tọn, litaina Klisti taidi Ahọlu po Mẹfligọtọ yetọn po, bosọ nọ litaina nuyiwa gbigbọ, kavi huhlọn-yido-wazọ́n Jiwheyẹwhe tọn, to gbẹzan yetọn mẹ. Egbesọegbesọ, yé nọ dovivẹnu nado wleawuna “sinsẹ́n gbigbọ tọn” lẹ, heyin “owanyi, ayajẹ, jijọho, linsinyẹn, homẹdagbe, dagbewà, [yise], walọmimiọn, mawazẹjlẹgo.”—Galatianu lẹ 5:22, 23.
11, 12. (a) Nawẹ mẹyiamisisadode lẹ nọ yin kiklọwé to aliho vonọtaun de mẹ gbọn? (b) Aliho tẹmẹ wẹ lẹngbọ devo lẹ nọ yin kiklọwé bo nọ yin hinhẹnzun wiwe te?
11 Lẹngbọ devo lẹ sọ dona na dotẹnmẹ Ohó Jiwheyẹwhe tọn po gbigbọ wiwe etọn po nado lẹ̀, kavi klọ́ yé wé. Mẹyiamisisadode lẹ ko yin kiklọwé to aliho tangan de mẹ, yèdọ yin whẹsuna taidi dodonọ po mẹwiwe po taidi asi Klisti tọn. (Johanu 17:17; 1 Kọlintinu lẹ 6:11; Efesunu lẹ 5:23-27) Yẹwhegán Daniẹli dọho yetọn taidi “mẹwiwe Gigogán tọn lẹ,” he ko mọ Ahọluduta yí to “visunnu gbẹtọ tọn,” Klisti Jesu glọ. (Daniẹli 7:13, 14, 18, 27) Jẹnukọn, gbọn Mose po Aalọn po gblamẹ, Jehovah lá hlan akọta Islaeli tọn dọmọ: “Yẹn wẹ OKLUNỌ lọ Jiwheyẹwhe mìtọn: enẹwutu mì ni hẹn mìde zun wiwe, bosọ yin wiwe; na wiwe wẹ yẹn.”—Levitiku 11:44.
12 Hogbe lọ “kinklandowiwe” na taun tọn zẹẹmẹdo “nuyiwa hinhẹn zun wiwe, kinklandovo, kavi dide dovo na sinsẹ̀nzọn kavi yizan Jehovah Jiwheyẹwhe tọn; yèdọ ninọmẹ yinyin wiwe, kinklandowiwe, kavi kiklọwé tọn.” To 1938, Atọ̀họ̀-Nuhihọ́ Lọ Tọn dọ dọ hagbẹ Jonadabi tọn lẹ, kavi lẹngbọ devo lẹ, “dona plọn dọ hinhẹnzun wiwe [klandowiwe] yin bibiọ sọn mẹdopodopo he na lẹzun apadewhe gbẹtọgun susugege he na nọ aigba ji lẹ tọn si.” To numimọ gbẹtọ susugege lọ tọn, heyin kinkàndai to owe Osọhia tọn mẹ, yé yin hodọ gandego taidi mẹhe “yàn aṣọ́vọ̀ yetọn bosọ hẹn yé zun wewe to ohùn Lẹngbọvu lọ tọn mẹ” bosọ to ‘sinsẹ̀n wiwe basi to okle po ozán po to tẹmpli mẹ’ hlan Jehovah. (Osọhia 7:9, 14, 15) Po alọgọ gbigbọ wiwe tọn po, lẹngbọ devo lẹ nọ wà nuhe go yé pé lẹpo nado sọgbe hẹ nubiọtomẹsi wiwe-yinyin Jehovah tọn lẹ.—2 Kọlintinu lẹ 7:1.
Dagbe Wiwà Hlan Mẹmẹsunnu Klisti Tọn Lẹ
13, 14. (a) Sọgbe hẹ oló Jesu tọn heyin lẹngbọ lẹ po gbọgbọẹ lẹ po tọn, etẹ ji wẹ whlẹngán lẹngbọ lẹ tọn sinai do? (b) To ojlẹ opodo tọn ehe mẹ, nawẹ lẹngbọ devo lẹ ko wà dagbe hlan mẹmẹsunnu Klisti tọn lẹ gbọn?
13 Jesu zinnudo kọndopọ pẹkipẹki he tin to lẹngbọ devo lẹ po apó pẹvi lọ po ṣẹnṣẹn ji to oló etọn heyin lẹngbọ po gbọgbọẹ lẹ po tọn mẹ, gọna dọdai etọn do ‘vivọnu titonu ehe tọn’ ji. To oló enẹ mẹ, Klisti dohia hezeheze dọ whlẹngán lẹngbọ devo lẹ tọn yin kinkọndopọ pẹkipẹki hẹ nuyiwa yetọn hlan mẹyiamisisadode, he e ylọ dọ “mẹmẹsunnu ṣie” lẹ. E dọmọ: “Ahọlu na dọ hlan yé mẹhe to adusilọ etọn mẹ lẹ, dọmọ, Mì wá, mì donanọ Otọ́ ṣie tọn, mì dugu ahọludu he yè ko wleawu etọn dai na mì sọn dòdó aihọn tọn wá. . . . Nugbo wẹ yẹn dọ hlan mì, Le mìwlẹ basi i hlan dopo to mẹmẹsunnu ṣie helẹ mẹ, yèdọ pẹvi pete helẹ yẹn wẹ mì basi i hlan.”—Matiu 24:3; 25:31-34, 40.
14 Hodidọ lọ “le mìwlẹ basi hlan” dlẹnalọdo nuyiwa godonọnamẹ owanyi tọn heyin nina mẹmẹsunnu dide gbọn gbigbọ dali Klisti tọn lẹ, he aihọn Satani tọn ko yinuwa hẹ taidi jonọ, bo tlẹ ko bẹ delẹ dlan gànpamẹ to yé mẹ. Yé ko tin to nuhudo núdùdù, avọ̀dido, nukunpedomẹgo agbasalilo dagbe tọn mẹ. (Matiu 25:35, 36, NW, nudọnamẹ odò tọn) To ojlẹ opodo tọn ehe mẹ, sọn 1914 gbọ́n, susu mẹyiamisisadode lẹ tọn ko mọ yede to ninọmẹ mọnkọtọn lẹ mẹ. Whenuho egbezangbe Kunnudetọ Jehovah tọn lẹ tọn dohia dọ yé ko yin godonọna gbọn gbẹdohẹmẹtọ nugbonọ yetọn lẹ, yèdọ lẹngbọ devo lẹ dali, dile gbigbọ whàn yé do.
15, 16. (a) Nuyiwa tẹmẹ wẹ lẹngbọ devo lẹ ko gọalọna mẹmẹsunnu yiamisisadode Klisti tọn lẹ te taun to aigba ji? (b) Nawẹ mẹyiamisisadode lẹ ko do pinpẹn-nutọn-yinyọnẹn hia na lẹngbọ devo lẹ gbọn?
15 Mẹmẹsunnu yiamisisadode Klisti tọn he tin to aigba ji to ojlẹ opodo tọn ehe mẹ lẹ ko mọ alọgọ lẹngbọ devo lẹ tọn yí na taun tọn to azọ́ndenamẹ Jiwheyẹwhe tọn heyin nado ‘dọyẹwheho wẹndagbe ahọluduta ehe tọn to aigba fininọ lẹpo mẹ na okunnu de hlan akọta lẹpo’ hinhẹndi mẹ. (Matiu 24:14; Johanu 14:12) To whenuena sọha mẹyiamisisadode lẹ tọn to didepo to aigba ji to owhe lẹ gblamẹ, sọha lẹngbọ devo lẹ tọn ko sù deji biọ livi susu mẹ. Fọtọ́n susu yetọn ko sẹ̀n taidi wẹndagbe-jlatọ whenu-gigọ́ tọn lẹ—gbehosọnalitọ po mẹdehlan lẹ po—bo to wẹndagbe Ahọluduta tọn hẹn gbayipe “jẹ opodo aigba tọn.” (Owalọ lẹ 1:8) Mẹdevo lẹ nọ wà nuhe go yé pé lẹpo to mahẹ tintindo to azọ́n kunnudide tọn mẹ bosọ nọ yí ayajẹ do nọgodona azọ́n titengbe ehe to akuẹzinzan-liho.
16 Mẹmẹsunnu yiamisisadode Klisti tọn lẹ yọ́n pinpẹn godonọnamẹ gbẹdohẹmẹtọ nugbonọ yetọn heyin lẹngbọ devo lẹ tọn ehe taun. Numọtolanmẹ yetọn yin didohia ganji to owe lọ Sécurité universelle sous le Règne du “Prince de paix,” heyin awuwlena gbọn hagbẹ afanumẹ lọ tọn dali to 1986 mẹ. E dọmọ: “Sọn Wẹkẹ Whàn II whenu gbọ́n, hẹndi dọdai Jesu tọn na ‘vivọnu titonu ehe tọn’ yin na adà daho he ‘gbẹtọ susugege’ ‘lẹngbọ devo’ lẹ tọn to yiyiwà wutu. . .. Enẹwutu, mí dopẹna ‘gbẹtọ susugege’ akọjọpli tọn, he wá sọn ogbè lẹpo mẹ lọ tlala na adà sẹhundaga he yé ko yiwà to hẹndi dọdai [Jesu] tọn to Matiu 24:14 mẹ!”
‘Mayin Hinhẹn Sọgbe Matin Míwlẹ’
17. Aliho tẹmẹ wẹ omẹ nugbonọ hohowhenu tọn he na yin finfọnsọnku do aigba ji lẹ ‘ma na yin hinhẹn sọgbe matin’ mẹyiamisisadode lẹ te?
17 To hodidọ taidi dopo to mẹyiamisisadode lẹ mẹ podọ to alọdindlẹndo sunnu po yọnnu po he nọgbẹ̀ jẹnukọnna Klisti lẹ mẹ, apọsteli Paulu wlan dọmọ: “Ehe lẹpo he mọ kunnude dagbe yí gbọn yise dali, ma mọ [hẹndi] opagbe lọ [tọn] yí: Jiwheyẹwhe ko sọ wleawuna nuhe yọnwhanpẹ humọ tọn dai na mí [mẹyiamisisadode lẹ], dọ to míwlẹ godo yè ma sọgan hẹn yé sọgbe gba.” (Heblu lẹ 11:35, 39, 40) To owhe Fọtọ́n lọ whenu, Klisti po mẹmẹsunnu 144 000 yiamisisadode etọn he tin to olọn mẹ lẹ po na yinuwa taidi ahọlu po yẹwhenọ lẹ po bo na hẹn alemọyi avọ́sinsan ofligọ Klisti tọn wá aigba ji. Gbọnmọ dali lẹngbọ devo lẹ na yin ‘hinhẹn sọgbe’ to agbasa po ayiha po mẹ.—Osọhia 22:1, 2.
18. (a) Etẹwẹ nugbo Biblu tọn lẹ dona gọalọna lẹngbọ devo lẹ nado yọnẹn? (b) Todido tẹmẹ wẹ lẹngbọ devo lẹ to tenọpọn “osọhia ovi Jiwheyẹwhe tọn lẹ tọn” te?
18 Ehe lẹpo dona yinuwado lẹnpọn lẹngbọ devo lẹ tọn ji, na nuhewutu Owe Wiwe Glẹki Klistiani tọn do ze ayidonugo susu mọnkọtọn do Klisti po mẹmẹsunnu yiamisisadode etọn lẹ po gọna azọngban titengbe yetọn to hẹndi lẹndai Jehovah tọn mẹ ji. Lẹngbọ devo lẹ na gbọnmọ dali pọ́n ẹn hlan taidi lẹblanulọkẹyi vonọtaun de nado nọgodona hagbẹ afanumẹ yiamisisadode lọ tọn lẹ to aliho lẹpo mẹ dile yé to tenọpọn “osọhia ovi Jiwheyẹwhe tọn lẹ tọn” to Amagẹdọni podọ to owhe Fọtọ́n lọ whenu. Yé sọgan to nukundo yinyin ‘whinwhlẹn sọn mẹmẹglọ hẹngble tọn mẹ do mẹdekannujẹ gigonọ ovi Jiwheyẹwhe tọn lẹ tọn mẹ.’—Lomunu lẹ 8:19-21.
Kọndopọ to Gbigbọmẹ to Oflin lọ Ji
19. Etẹwẹ “gbigbọ nugbo tọn” ko wà na mẹyiamisisadode lẹ po gbẹdohẹmẹtọ yetọn lẹ po, podọ nawẹ yé na yin kinkọndopọ na taun tọn to whèjai 28 mars tọn gbọn?
19 To odẹ̀ tadona tọn etọn mẹ to ozán Nisan 14 owhe 33 W.M. tọn mẹ, Jesu dọmọ: “Yẹn . . . hodẹ̀ . . . na yé omẹ pó nido yin dopo; yèdọ dile hiẹ, Otọ́, te to yẹn mẹ, bọ yẹn to hiẹ mẹ, na yewlẹ ga nido yin dopo to míwlẹ mẹ: na aihọn nido yise dọ hiẹ wẹ do mi hlan.” (Johanu 17:20, 21) Sọn owanyi mẹ, Jiwheyẹwhe do Visunnu etọn hlan nado na ogbẹ̀ etọn na whlẹngán mẹyiamisisadode lẹ po aihọn gbẹtọvi tonusetọ lẹ tọn po. (1 Johanu 2:2) “Gbigbọ nugbo tọn” ko kọ̀n mẹmẹsunnu Klisti tọn lẹ po lẹngbọ devo lẹ po dopọ. To whèjai 28 mars tọn, to họyiyi owhè tọn godo, hagbẹ awe lọ lẹ na pli dopọ nado basi hùnwhẹ oflin okú Klisti tọn bosọ flin nuhe Jehovah ko wà na yé gbọn avọ́sinsan Visunnu yiwanna etọn, Klisti Jesu tọn gblamẹ lẹpo. Na tintin to nujijọ titengbe enẹ tẹnmẹ yetọn ni hẹn kọndopọ yetọn lodo bosọ hẹn gbemima yetọn nado to ojlo Jiwheyẹwhe tọn wà zọnmii zun yọyọ, bo gbọnmọ dali dohia dọ homẹ yetọn hùn nado tin to mẹhe Jehovah yiwanna lẹ mẹ.
To Dogbapọn Mẹ
• Whetẹnu wẹ “gbigbọ nugbo tọn” yin didohlan Klistiani fliflimẹ tọn lẹ, podọ nawẹ e yin ‘alọgọtọ’ de gbọn?
• Nawẹ mẹyiamisisadode lẹ nọ yọnẹn dọ yé ko mọ oylọ olọn mẹ tọn yí gbọn?
• Aliho tẹlẹ mẹ wẹ gbigbọ Jiwheyẹwhe tọn nọ yinuwa do lẹngbọ devo lẹ ji te?
• Nawẹ lẹngbọ devo lẹ ko wà dagbe hlan mẹmẹsunnu Klisti tọn lẹ gbọn, podọ etẹwutu yé ‘ma na yin hinhẹn sọgbe matin’ mẹyiamisisadode lẹ?
[Yẹdide to weda 21]
“Gbigbọ nugbo tọn” yin kinkọn jẹgbonu do devi lẹ ji to Pẹntikọsti 33 W.M.
[Yẹdide to weda 23]
Lẹngbọ devo lẹ ko wà dagbe hlan mẹmẹsunnu Jesu tọn lẹ gbọn godoninọna yé nado hẹn azọ́ndenamẹ Jiwheyẹwhe tọn heyin yẹwhehodidọ di