Kanbiọ lẹ sọn Wehiatọ lẹ Dè

Be mapenọ-yinyin awhli alọji Malia tọn tindo nugandomẹgo agọ̀ de do ohò Jesu tọn mimọ ji wẹ ya?

Gando ‘jiji Jesu tọn’ go, kandai gbọdo lọ dọmọ: “Whenuena yè mọ onọ̀ etọn Malia na Josẹfu, whẹpo yé nado pli, yè mọ ẹn e mọhò gbọn [gbigbọ wiwe] mẹ.” (Matiu 1:18) Na nugbo tọn, gbigbọ wiwe Jiwheyẹwhe tọn yí adà titengbe de wà to hòmimọ Malia tọn mẹ.

Ṣigba, etẹwẹ dogbọn Malia dali? Be azin yọnnu tọn, kavi ovikun etọn yí adà depope wà to hòmimọ etọn mẹ ya? To pọndohlan mẹ na opagbe Jiwheyẹwhe tọn he yin didó hlan Ablaham, Isaki, Jakobu, Juda, po Ahọlu Davidi po—heyin tọgbo Malia tọn lẹ—ovi heyin jiji lọ dona yin kúnkan jọnwun yetọn. (Gẹnẹsisi 22:18; 26:24; 28:10-14; 49:10; 2 Samuẹli 7:16) Aliho devo tẹ mẹ wẹ ovi he Malia ji lọ sọgan gbọn jlọjẹ dali yin whédutọ opagbe Jiwheyẹwhe tọn te? E dona yin visunnu jọnwun ewọ tọn.—Luku 3:23-34.

Angẹli Jehovah tọn ko sọawuhia awhli alọji Malia, bo dọmọ: “A dibu blo, Malia, na hiẹ ko mọ nukundagbe to Jiwheyẹwhe dè. Bo doayi e go, hiẹ na mọho to ohò towe mẹ, bo nasọ ji visunnu de bosọ ylọ oyín etọn dọ Jesu.” (Luku 1:30, 31) Hòmimọ nọ biọ dọ azin yọnnu tọn de ni jẹ whinwhẹ́n ji. E họnwun dọ, Jehovah Jiwheyẹwhe hẹn azin yọnnu tọn de nado jẹ whinwhẹ́n ji to adọ̀ Malia tọn mẹ. E basi wadotana ehe tọn gbọn adadidiọ na ogbẹ̀ Visunnu dopo-akàn etọn tọn sọn olọn mẹ wá aigba ji dali.—Galatianu lẹ 4:4.

Be ovi he yè mọho etọn to aliho ehe mẹ gbọn yọnnu mapenọ de dali sọgan yin pipé bo vò sọn ylando si to agbasalan etọn mẹ ya? Nawẹ osẹ́n jẹhẹnu gududu tọn lẹ nọ yinuwa gbọn to whenuena pipé po mape po ṣakadopọ? Flindọ gbigbọ wiwe wẹ yin yiyizan nado diọadana huhlọn ogbẹ̀ pipé Visunnu Jiwheyẹwhe tọn tọn bosọ hẹn hòmimọ lọ yọnbasi. Ehe zẹ̀hudo mape he tin to azin Malia tọn mẹ ji, bo gbọnmọ dali wleawuna wunmẹ jẹhẹnu gududu tọn de heyin pipé sọn bẹjẹeji.

Depope he whẹho lọ yin, mí sọgan deji dọ lehe gbigbọ wiwe Jiwheyẹwhe tọn yinuwa do to ojlẹ lọ mẹ hẹn ẹn diun dọ lẹndai Jiwheyẹwhe tọn na tindo kọdetọn dagbe. Angẹli Gabliẹli ko lá hlan Malia dọ: “Gbigbọ wiwe na wá ojí we, huhlọn Gigogán tọn nasọ ṣinyọ́n oyẹ ojí we: enẹwutu ga onú wiwe he tin nado yin didetọ́n sọn hiẹ mẹ, Ovi Jiwheyẹwhe tọn yè na nọ ylọ ẹ.” (Luku 1:35) Mọwẹ, gbigbọ wiwe Jiwheyẹwhe tọn wleawuna aliglọnnamẹnu de na mape kavi nugandomẹgo awugblenamẹ tọn depope ni ma hẹn oblọ wá ovivu he ṣẹṣẹ to awuwle lọ ji sọn hòmimọ whenu sọyi blo.

E họnwun dọ, Otọ́ olọn mẹ tọn Jesu tọn wẹ hẹn ẹn tindo ogbẹ̀ pipé gbẹtọvi tọn, e mayin gbẹtọ depope gba. Jehovah ‘wleawuna agbasa de’ na ẹn—podọ sọn hòmimọ whenu sọyi—Jesu ‘mayin hinhẹnflu gba, podọ e sọ jẹla sọn ylandonọ lẹ dè’ na nugbo tọn.—Heblu lẹ 7:26; 10:5.

[Yẹdide to weda 19]

“Hiẹ na mọho to ohò towe mẹ, bo nasọ ji visunnu de”