Hiẹ Sọgan Duto Ṣokẹdẹninọ Ji

MẸNU wẹ sọgan sọalọakọ́n dọ emi ma ko tindo numimọ awufiẹsa he ṣokẹdẹninọ nọ hẹnwa tọn pọ́n gbede? Nususu wẹ sọgan hẹn mí tindo numọtolanmẹ ṣokẹdẹninọ tọn. Ṣigba, ṣokẹdẹninọ yọnnu he ma wlealọ pọ́n, kavi heyin asuṣiọsi kavi yin gbigbẹdai lẹ tọn sọgan sinyẹn taun.

Di apajlẹ, Klistiani awhlivu de he nọ yin Frances dọmọ: “To whenuena yẹn do owhe 23, e taidi dọ họntọn ṣie lẹpo wẹ ko wlealọ, bọ yẹn kẹdẹ wẹ pò.”a Numọtolanmẹ ṣokẹdẹninọ tọn sọgan jideji dile owhe lẹ to jujuyi bọ nukundido alọwle tọn lẹ to didepo. “Yẹn ma lẹn gbede nado gbọṣi tlẹnmẹ gba, podọ yẹn gbẹ́ jlo nado wlealọ eyin dotẹnmẹ lọ hundote,” wẹ Sandra, he tin to adà godo tọn owhe 40 etọn tọn lẹ mẹ dọ. Angela, he ko tin to owhe 50 etọn lẹ mẹ, dọmọ: “Yẹn ma basi nudide taun nado nọ tlẹnmẹ gba, ṣigba lehe ninọmẹ lẹ wá yin do niyẹn. Mẹmẹsunnu tlẹnnọ vude wẹ tin to lẹdo he mẹ yẹn yin azọ́ndena yì taidi gbehosọnalitọ titengbe de.”

E jẹna pipà, dọ Klistiani yọnnu susu nọ dè ma nado wlealọ na yé gbọn nugbonọ-yinyin dali setonuna ayinamẹ Jehovah tọn lọ nado wlealọ “to Oklunọ mẹ kẹdẹ” wutu. (1 Kọlintinu lẹ 7:39) Mẹdelẹ diọada sọgbe hẹ tlẹnmẹninọ ganji, ṣigba mẹdevo lẹ mọdọ ojlo alọwiwle po ovi lẹ tintindo po tọn nọ jideji dile owhe lẹ to yìyì. “Nùvo numọtolanmẹ tọn de, heyin hinhẹnwa gbọn alọwlemẹ de ma tindo dali, nọ tin hẹ mi to whepoponu,” wẹ Sandra yigbe dọ.

Whẹwhinwhẹ́n devo, taidi nukunpipedo mẹjitọ mẹhomẹ lẹ go, sọgan hẹn numọtolanmẹ ṣokẹdẹninọ tọn sinyẹn deji. “Na yẹn ma wlealọ wutu, whẹndo ṣie donukun dọ yẹn na penukundo mẹjitọ mẹhomẹ mítọn lẹ go,” wẹ Sandra dọ. “Yẹn hẹn adà he klo hugan azọngban sinsinyẹn ehe tọn na owhe 20, dile etlẹ yindọ yẹn yin dopo to ovi ṣidopo lẹ mẹ. Gbẹzan na ko bọawu taun eyin yẹn ko tindo asu de he na nọ nọgodona ojlo ṣie lẹ wẹ.”

Frances donu adà devo he hẹn ṣokẹdẹninọ etọn sinyẹn deji go. E dọmọ: “Gbẹtọ lẹ nọ kanse mi tlọlọ to whedelẹnu dọ, ‘Etẹwutu hiẹ ma ko wlealọ?’ Hodidọ mọnkọtọn lẹ nọ hẹn mi tindo numọtolanmẹ lọ dọ owhẹ̀ ṣie wẹ e yin dọ yẹn ma wlealọ. Diblayin to hùnwhẹ alọwle tọn he tẹnmẹ yẹn yì lẹpo, wẹ mẹde nọ kàn kanbiọ ahungbadonamẹ tọn lọ se dọ, ‘Eyọn whetẹnu wẹ hiẹ na wlealọ?’ Podọ yẹn jẹ nulẹnpọn ji dọ, ‘Eyin mẹmẹsunnu he onú gbigbọmẹ tọn nọ duahunmẹna lẹ ma tindo ojlo to yẹn mẹ, be na yẹn ma tindo jẹhẹnu dagbe Klistiani tọn lẹ kavi na yẹn ma yọnwhanpẹ wutu wẹ.’ ”

Nawẹ numọtolanmẹ kadaninọ po ṣokẹdẹninọ tọn lẹ po sọgan yin dududeji gbọn? Be nudepope tin he mẹdevo lẹ sọgan wà nado gọalọ ya?

Ganjẹ Jehovah Go

Psalm-kàntọ jihàn dọ: “Ze agbàn towe dlan OKLUNỌ ji, ewọ nasọ hẹn we dote. Ewọ ma na dike dodonọ ni yin sisẹtẹnna.” (Psalm 55:22) Hogbe lọ “agbàn” to nukinkan Heblugbe tọn mẹ to paa mẹ nọ zẹẹmẹdo “mimá mẹtọn,” podọ e dlẹnalọdo awubla po magbọjẹ he mí sọgan jiya etọn na ninọmẹ mítọn lẹ to gbẹ̀mẹ wutu. Jehovah yọ́n agbàn ehelẹ hugan mẹdevo depope bo sọgan na mí huhlọn nado hẹn yé. Ginganjẹ Jehovah Jiwheyẹwhe go ko gọalọna Angela nado duto numọtolanmẹ ṣokẹdẹninọ tọn ji. To alọdindlẹndo lizọnyizọn whenu-gigọ́ tọn etọn mẹ, e dọmọ: “To whenuena yẹn jẹ gbehosọnalitọ basi ji, azọ́nwatọgbẹ́ ṣie po yẹn po nọ nọ̀ fihe dẹn taun do agun he sẹpọ hugan lọ. Mí plọn nado nọ ganjẹ Jehovah go mlẹnmlẹn, bọ ginganjẹ ewọ go ehe ko gọalọna mi to gbẹzan ṣie lẹpo mẹ. Eyin yẹn tindo linlẹn agọ̀ lẹ, yẹn nọ dọho hẹ Jehovah bọ e sọ nọ gọalọna mi. Psalm 23 ko yin homẹmiọnnamẹnu na mi to whepoponu, podọ yẹn nọ hia ẹ gbọzangbọzan.”

Apọsteli Paulu tindo agbàn ayidego tọn de he e dona hẹn. E whè gbau whlaatọ̀n wẹ e ‘vẹ̀ Oklunọ na owùn he tin to agbasalan etọn mẹ ni yì sọn ewọ dè.’ Paulu ma yin alọgọna to azọ́njiawu-liho gba, ṣigba e mọ opagbe de yí dọ ojọmiọn Jiwheyẹwhe tọn na hẹn ẹn dote. (1 Kọlintinu lẹ 12:7-9) Paulu sọ mọ aṣli pekọ tintindo tọn. E wlan to godo mẹ dọmọ: “To onú popo mẹ wẹ yè plọn mi nado dù gọ́ho, podọ nado nọ nọ̀ huvẹ, nado sudeji, podọ nado jiya ohẹ́n tọn. Yẹn sọgan wà onú popo gbọn [ewọ] he to huhlọnna mi mẹ.”—Filippinu lẹ 4:12, 13.

Nawẹ mẹde sọgan mọ huhlọn Jiwheyẹwhe tọn yí to whenuena e to numọtolanmẹ gbigbọjọ kavi ṣokẹdẹninọ tọn tindo gbọn? Paulu wlan dọmọ: “Mì jẹtukla nudepope tọn blo; ṣigba to odẹ̀ mẹ to ovẹ̀ mẹ po pẹdido po mẹ, mì nọ yí kanbiọ mìtọn hia Jiwheyẹwhe to onú popo mẹ. Jijọho Jiwheyẹwhe tọn he hú nuyọnẹn lẹpo na whlá ayiha mìtọn po linlẹn mìtọn lẹ po to Klisti Jesu mẹ.” (Filippinu lẹ 4:6, 7) Sandra yí ayinamẹ ehe do yizan mẹ. E basi zẹẹmẹ dọmọ: “Na yẹn yin tlẹnnọ wutu, yẹn nọ yí ojlẹ susu zan to ṣokẹdẹninọ mẹ. Ehe nọ na mi dotẹnmẹ susu nado nọ hodẹ̀ hlan Jehovah. Yẹn sẹpọ ẹ taun bo sọgan dọho hẹ ẹ po awubibọ po gando nuhahun po ayajẹ ṣie lẹ po go.” Podọ Frances dọmọ: “Ahididihẹ linlẹn agọ̀ lẹ na dee ṣo yin avùnhiho gbọzangbọzan tọn de. Ṣigba numọtolanmẹ ṣie lẹ didọna Jehovah tlọlọ gọalọ tlala. Yẹn tindo nujikudo dọ Jehovah tindo ojlo to nudepope he sọgan gando dagbemẹ-ninọ gbigbọmẹ tọn po numọtolanmẹ tọn ṣie po go mẹ.”—1 Timoti 5:5.

“Mì Nọ Hẹn Agbàn Mìnọzo Tọn”

To mẹmẹsunnu-yinyin Klistiani tọn ṣẹnṣẹn, yè ma dona hẹn agbàn lọ lẹ mẹdeṣo gba. “Mì nọ hẹn agbàn mìnọzo tọn, na mì nido hẹn osẹ́n Klisti tọn di,” wẹ yin tudohomẹnamẹ apọsteli Paulu tọn. (Galatianu lẹ 6:2) Gbọn gbẹdido hẹ Klistiani hatọ lẹ mítọn gblamẹ, mí sọgan mọ ‘hogbe dagbe’ tulinamẹ tọn he sọgan hẹn agbàn ṣokẹdẹninọ mítọn tọn lẹ fua yí.—Howhinwhẹn lẹ 12:25.

Lẹnnupọndo nuhe Owe-wiwe dọ gando viyọnnu Jefta, heyin whẹdatọ Islaeli tọn tọn go ga. Whẹpo e do gbawhàn Ammọni heyin kẹntọ etọn lẹ tọn, Jefta dopà dọ emi na yí omẹ tintan he na wá sọn whédo emitọn mẹ nado dokuavọna emi hlan Jehovah. Enẹ wá yin viyọnnu dopo akàn etọn. (Whẹdatọ 11:30, 31, 34-36) Dile ehe tlẹ zẹẹmẹdo dọ e na gbọṣi tlẹnmẹ bo na gbọ̀ ojlo he sọgbe whẹndo de tintindo tọn go, viyọnnu Jefta tọn ze ede jo sọn ojlo mẹ hlan opà ehe bosọ sẹ̀n to fiwiwe Ṣilo tọn mẹ na pipotọ gbẹzan etọn tọn. Be avọ́sinsan etọn yin jìwọn e go wẹ ya? Paali wẹ: “[Viyọnnu] Islaeli tọn lẹ nọ yì to whemẹwhemẹ nado nọ pà viyọnnu Jefta Giliadinu tọn họ̀ azán ẹnẹ to owhe dopo mẹ.” (Whẹdatọ 11:40) Mọwẹ, pipà sọgan na tuli mẹhe mọ ẹn yí lẹ. Enẹwutu, mì gbọ mí ni ma gboawupo nado nọ na pipà mẹhe jẹ na ẹn lẹ blo.

Mí nasọ wà dagbe nado gbadopọnna apajlẹ Jesu tọn. Dile e ma tlẹ yin aṣa sunnu Ju lẹ tọn nado dọho hẹ yọnnu lẹ do, Jesu yí whenu zan hẹ Malia po Malta po. Vlavo, asuṣiọsi kavi yọnnu he ma wlealọ lẹ wẹ yé yin. Jesu jlo dọ yé omẹ awe lẹ ni duvivi alemọyi gbigbọmẹ họntọnjihẹmẹ etọn tọn. (Luku 10:38-42) Mí sọgan hodo apajlẹ Jesu tọn gbọn mẹmẹyọnnu gbigbọmẹ tọn mítọn he ma wlealọ lẹ yíyí dogọ nuyiwa pọmẹ tọn mítọn lẹ dali podọ gbọn tito bibasi nado tindo mahẹ to azọ́n kunnudide tọn mẹ hẹ yé dali. (Lomunu lẹ 12:13) Be yé nọ yọ́n pinpẹn ayidonugo mọnkọtọn lẹ tọn ya? Mẹmẹyọnnu dopo dọmọ: “Yẹn yọnẹn dọ mẹmẹsunnu lẹ yiwanna mi bosọ yọnẹn dọ yẹn họakuẹ, ṣigba yẹn nọ yọ́n pinpẹn etọn taun eyin yé do ojlo mẹdetiti tọn hia to yẹn mẹ dogọ.”

Sandra dọmọ: “Na mí ma tindo mẹde heyin whẹndo mídetiti tọn wutu, mí nọ tindo nuhudo owanyi dogọ tọn, yèdọ nado mọdọ mí yin apadewhe whẹndo gbigbọmẹ mẹmẹsunnu po mẹmẹyọnnu lẹ po tọn.” E họnwun dọ, Jehovah nọ penukundo omẹ mọnkọtọn lẹ go, podọ mí nọ kọngbedopọ hẹ ewọ to whenuena mí hẹn yé tindo numọtolanmẹ lọ dọ mí tindo ojlo na yé bosọ yiwanna yé. (1 Pita 5:6, 7) Mẹtọnhopọn mọnkọtọn ma na yin to ovọ́ mẹ gba, na “ewọ he walẹblanuna wamọnọ, OKLUNỌ wẹ e yàn na: onú he e wà e nasọ suahọ etọn ẹn”—Howhinwhẹn lẹ 19:17.

“Omẹ Dopodopo Wẹ na Hẹn Agbàn Ede Tọn”

Dile etlẹ yindọ mẹdevo lẹ sọgan gọalọ, bọ godonọnamẹ yetọn sọgan namẹ tuli taun, “omẹ dopodopo wẹ na hẹn agbàn ede tọn.” (Galatianu lẹ 6:5) Nalete, owù delẹ tin he mí dona họ́ míde sọta to agbàn ṣokẹdẹninọ tọn hinhẹn mẹ. Di dohia, ṣokẹdẹninọ sọgan duto mí ji eyin mí ma nọ dọho hẹ mẹdevo lẹ. To alọ devo mẹ, mí sọgan yí owanyi do gbawhàn ṣokẹdẹninọ tọn. (1 Kọlintinu lẹ 13:7, 8) Nunamẹ po mimọyi po wẹ yin aliho he yọnhugan lọ nado tindo jijọho—mahopọnna ninọmẹ mítọn lẹ. (Owalọ lẹ 20:35) “Yẹn ma tindo whenu susu nado to nulẹnpọn dọ yẹn tin to ṣokẹdẹ gba,” wẹ mẹmẹyọnnu gbehosọnalitọ azọ́n sinsinyẹnwatọ de dọ. “To whenuena yẹn mọdọ yẹn yọn-na-yizan bọ alọnu ṣie ján, yẹn ma nọ tindo numọtolanmẹ ṣokẹdẹninọ tọn gba.”

Mí sọ dona họ́ míde ga na ṣokẹdẹninọ ni ma sisẹ mí biọ kọndopọ alọwle tọn he ma tindo nuyọnẹn de mẹ blo. Di apajlẹ, lehe e na blawu sọ nado dike ojlo alọwiwle tọn ni glọnalina mí ma nado mọ nuhahun susu he nọ wá sọn alọwiwle hẹ mayisenọ de mẹ podọ na taun tọn ma nado hodo ayinamẹ Biblu tọn nado dapana kọndopọ mọnkọtọn de! (2 Kọlintinu lẹ 6:14) Klistiani yọnnu he ko yin gbigbẹdai de dọmọ: “Onú dopo tin he ylan taun hugan yinyin tlẹnnọ. Enẹ wẹ nado wlealọ hẹ mẹhe ma sọgbe lọ.”

Nuhahun he yè ma sọgan didẹ de dona yin akọndona wẹ poun, e whè gbau na ojlẹ de. Po alọgọ Jiwheyẹwhe tọn po, numọtolanmẹ ṣokẹdẹninọ tọn sọgan yin akọndona. Dile mí to Jehovah sẹ̀n zọnmii, mì gbọ mí ni deji dọ nuhudo mítọn lẹpo na tindo pekọ to aliho he yọnhugan de mẹ to gbèdopo.—Psalm 145:16.

[Nudọnamẹ odò tọn]

[Yẹdide to weda 28]

Yè sọgan duto ṣokẹdẹninọ ji gbọn nunamẹ po mimọyi po dali