Naegbọn Hiẹ Nado Yin Bibaptizi?
“Mì yì, bo hẹn akọta lẹpo zun nuplọntọ, bosọ nọ baptizi yé.” —Matiu 28:19.
1, 2. (a) Ninọmẹ tẹlẹ glọ wẹ baptẹm delẹ ko yin bibasi te? (b) Kanbiọ tẹlẹ wẹ fọndote gando baptẹm go?
AHỌLU CHARLEMAGNE Franc-nu lẹ tọn hẹn Saxon-nu he ji e gbawhàn te lẹ gánnu-gánnu nado yin bibaptizi to pọmẹ to owhe 775 jẹ 77 W.M. Whenuho-kàntọ John Lord wlan dọmọ: “E hẹn yé po huhlọn po nado diọzun Klistiani to aliho mọmọ tọn de mẹ.” Mọdopolọ, to alọwiwle hẹ ahọsi ṣọṣi orthodoxe Glẹki tọn de po godo to owhe 987 W.M., togán Russie tọn lọ Vladimir I lọsu sọ basi nudide dọ tovi etọn lẹ dona lẹzun “Klistiani.” E de gbedide baptẹm pọmẹ tọn tọ́n na omẹ etọn lẹ—bọ mẹhe gbẹ́ lẹ tlẹ sọgan yin hùhù!
2 Be baptẹm mọnkọtọn lẹ sọgbe ya? Be yé tindo zẹẹmẹ nujọnu tọn ya? Be mẹdepope wẹ dona yin bibaptizi ya?
Nawẹ Baptẹm Dona Yin Bibasi Gbọn?
3, 4. Naegbọn osin húnhún kavi kinkọ̀n dota ma do sọgbe na baptẹm Klistiani tọn?
3 To whenuena Charlemagne po Vladimir I po hẹn gbẹtọ lẹ po huhlọn po nado yin bibaptizi, togán nẹlẹ ma to nuyiwa sọgbe hẹ Ohó Jiwheyẹwhe tọn gba. Na nugbo tọn, dagbe de ma nọ wá sọn e mẹ eyin baptẹm bẹ osin húnhún do mẹ go, osin kọ̀n do ota namẹ, kavi etlẹ yin yinylọ́n mẹhe ma ko yin nugbo Owe-wiwe tọn plọn depope do osin mẹ gba.
4 Lẹnnupọndo nuhe jọ to whenuena Jesu Nazalẹti tọn yì Johanu Baptizitọ lọ dè to 29 W.M. ji. Johanu to baptẹm basi na gbẹtọ lẹ to Tọ̀sisa Jọdani tọn mẹ. Yé de sọn ojlo mẹ do wá ewọ dè nado yin bibaptizi. Be e dọna yé nado nọte to otọ̀ Jọdani tọn mẹ bọ e bà osin vude do ota yetọn kavi húnhún osin do yé go wẹ ya? Etẹwẹ jọ to whenuena Johanu baptizi Jesu? Matiu na linlin dọ to baptẹm yíyí etọn godo Jesu “tọ́n jẹ agé to afọdoponẹji sọn osin mẹ.” (Matiu 3:16) E ko tin to otọ̀ glọ, bo yin yinylọ́n do Tọ̀sisa Jọdani tọn mẹ. Mọdopolọ, ojọ̀ Etiopianu lọ yin bibaptizi to ‘fihe osin sù te.’ Fihe osin sù te mọnkọtọn lẹ yin dandan na baptẹm Jesu po devi etọn lẹ po tọn bẹ mẹylọ́n-do-sinmẹ mlẹnmlẹn hẹn wutu.—Owalọ lẹ 8:36.
5. Nawẹ Klistiani fliflimẹ tọn lẹ baptizi gbẹtọ lẹ gbọn?
5 Hogbe Glẹki tọn heyin lilẹdogbedevomẹ “baptizi,” “baptẹm,” po mọmọ po sọyi, dlẹnalọdo yinylọ́n-do-sinmẹ, nado whè-adín kavi nado biọ tọ̀glọ́. Wezẹhomẹ de Smith’s Bible Dictionary dọmọ: “Na paa tọn podọ to aliho he sọgbe de mẹ baptẹm zẹẹmẹdo mẹylọ́n-do-sinmẹ.” Enẹwutu lẹdogbedevomẹ basitọ Biblu tọn delẹ dlẹnalọdo “Johanu Mẹylọ́n-do-sinmẹtọ.” (Matiu 3:1, Rotherham, Diaglott, interlinear) To owe etọn History of the Christian Religion and Church, During the Three First Centuries mẹ, Augustus Neander dọmọ: “Baptẹm nọ yin bibasi to dowhenu gbọn mẹylọ́n-do-sinmẹ dali.” Wezẹhomẹ he diyin Flansegbe tọn lọ Larousse du XXe Siècle (Paris, 1928) dọmọ: “Klistiani tintan lẹ yin bibaptizi gbọn yinyin yinylọ́n-do-sinmẹ to fidepope he osin yin mimọ te dali.” Podọ otanwe lọ New Catholic Encyclopedia dọmọ: “Kunnudenu dohia dọ Baptẹm to Ṣọṣi flifli tọn mẹ yin gbọn mẹylọ́n-do-sinmẹ dali.” (1967, Bladopọ II, weda 56) Mọdopolọ to egbehe, yinyin bibaptizi taidi dopo to Kunnudetọ Jehovah tọn lẹ mẹ yin afọdide sọn ojlo mẹ wá de he bẹ mẹylọ́n-do-sinmẹ mlẹnmlẹn hẹn.
Whẹwhinwhẹ́n Yọyọ de na Baptẹm
6, 7. (a) Lẹndai tẹ wutu wẹ Johanu do basi baptẹm? (b) Onú yọyọ tẹwẹ tin to baptẹm he hodotọ Jesu tọn lẹ basi mẹ?
6 Lẹndai baptẹm heyin bibasi gbọn Johanu dali tọn gbọnvona hodotọ Jesu tọn lẹ tọn. (Johanu 4:1, 2) Johanu baptizi gbẹtọ lẹ taidi ohia gbangba tọn de na lẹnvọjọ yetọn do ylando he yé wá sọta Osẹ́n lẹ. a (Luku 3:3) Ṣigba onú yọyọ de tin to Baptẹm he hodotọ Jesu tọn lẹ basi mẹ. To Pẹntikọsti 33 W.M., apọsteli Pita na tuli todoaitọ etọn lẹ dọmọ: “Mí lẹnvọjọ, na yè ni sọ baptizi dopodopo mìtọn to oyín Jesu Klisti tọn mẹ na desẹ̀ ylando tọn.” (Owalọ lẹ 2:37-41) Dile etlẹ yindọ Ju po Ju he ma gbowhẹ̀ lẹ po wẹ e to hodọ hlan, Pita ma to hodọ gando baptẹm heyin yẹhiadonu lẹnvọjọ tọn na ylando heyin wiwà sọta Osẹ́n lẹ go gba; mọjanwẹ e ma to didọ dọ baptẹm to oyin Jesu tọn mẹ zẹẹmẹdo ylando kiklọ́ sẹ̀ do niyẹn.—Owalọ lẹ 2:10.
7 To nujijọ enẹ whenu, Pita yí ‘họ̀nhungàn ahọludu tọn’ tintan zan. Na lẹndai tẹ? Nado sọgan do oyọnẹn he todoaitọ etọn lẹ tindo nuhudo etọn nado biọ Ahọluduta olọn tọn mẹ hia. (Matiu 16:19) To whenuena e yindọ Ju lẹ ko gbẹ́ Jesu dai taidi Mẹssia lọ, linlẹnvọjọ po yise didohia to ewọ mẹ po yin onú yọyọ de he sọ yin titengbe to jona Jiwheyẹwhe tọn dindin po mimọyi po mẹ. Yé sọgan do kunnudenu yise mọnkọtọn tọn hia to gbangba gbọn yinyin yinylọ́n-do-sinmẹ to oyín Jesu Klisti tọn mẹ dali. To aliho enẹ mẹ yé na do yẹhiadonu klandowiwe yetọn tọn hlan Jiwheyẹwhe hia gbọn Klisti gblamẹ. Mẹhe jlo nukundagbe Jiwheyẹwhe tọn to egbehe lẹpo dona yí yise dopolọ zan, klan yedelẹ do wiwe hlan Jehovah Jiwheyẹwhe, bo basi baptẹm Klistiani tọn to yẹhiadonu klandowiwe mlẹnmlẹn tọn hlan Gigogán Daho lọ yèdọ Jiwheyẹwhe mẹ.
Oyọnẹn He Pegan Yin Titengbe
8. Naegbọn baptẹm Klistiani tọn ma do yin na mẹlẹpo?
8 Baptẹm Klistiani tọn ma tin na mẹlẹpo gba. Jesu degbè na hodotọ etọn lẹ dọmọ: “Mì yì, bo hẹn akọta lẹpo zun nuplọntọ, bosọ nọ baptizi yé do oyín Otọ́ tọn, po Ovi tọn po, po gbigbọ wiwe tọn po mẹ: Na mì ni sọ nọ plọn yé nado nọ do ayi onú lẹpo go, nudepope he yẹn degbena mì.” (Matiu 28:19, 20) Jẹnukọnna baptẹm yíyí, gbẹtọ lẹ dona yin ‘pinplọn nado payi nuhe Jesu degbè na devi etọn lẹpo go.’ Enẹwutu, nado basi baptẹm gánnu-gánnu tọn na mẹhe ma tindo yise he sinai do Ohó Jiwheyẹwhe tọn ji de yin ovọ́ bo jẹagọdo gbedide he Jesu na hodotọ nugbonọ etọn lẹ.—Heblu le 11:6.
9. Etẹwẹ e zẹẹmẹdo nado yin bibaptizi ‘to oyín Otọ́ tọn mẹ’?
9 Etẹwẹ e zẹẹmẹdo nado yin bibaptizi ‘to oyin Otọ́ tọn mẹ’? E zẹẹmẹdo dọ mẹhe to na yí baptẹm lọ yọ́n azọngban po aṣẹpipa Otọ́ olọn mẹ tọn mítọn po. Gbọnmọ dali, Jehovah Jiwheyẹwhe nọ yin alọkẹyi taidi Mẹdatọ mítọn, “Gigogán to wẹkẹ lẹpo ji,” podọ Nupojipetọ Wẹkẹ lọ tọn.—Psalm 83:18; Isaia 40:28; Owalọ lẹ 4:24.
10. Etẹwẹ e zẹẹmẹdo nado yin bibaptizi ‘to oyín Ovi tọn mẹ’?
10 Nado yin bibaptizi ‘to oyin Ovi tọn mẹ’ zẹẹmẹdo nado yọ́n azọngban po aṣẹpipa Jesu tọn po taidi Ovi detọn dopo akàn Jiwheyẹwhe tọn. (1 Johanu 4:9) Mẹhe pegan na baptẹm lẹ nọ kẹalọyi Jesu taidi omẹ lọ he gblamẹ Jiwheyẹwhe wleawuna “ofligọ na omẹ susu.” (Matiu 20:28; 1 Timoti 2:5, 6) Baptẹm-yitọ lẹ sọ dona kẹalọyi ‘otẹn yiaga’ he mẹ Jiwheyẹwhe ze Visunnu etọn do.—Filippinu lẹ 2:8-11; Osọhia 19:16.
11. Etẹwẹ yinyin bibaptizi ‘to oyin gbigbọ wiwe tọn mẹ’ nọtena?
11 Etẹwẹ yinyin bibaptizi ‘to oyín gbigbọ wiwe tọn mẹ’ zẹẹmẹdo? Ehe dohia dọ baptẹm-yitọ lọ yọnẹn dọ huhlọn-yido-wazọ́n Jehovah tọn wẹ gbigbọ wiwe yin, he nọ yin yiyizan to aliho voovo mẹ sọgbe hẹ lẹndai etọn. (Gẹnẹsisi 1:2; 2 Samuẹli 23:1, 2; 2 Pita 1:21) Mẹhe to nubiọtomẹsi baptẹm tọn kọ̀n jẹ lẹ nọ kẹalọyi dọ gbigbọ wiwe nọ gọalọna yé nado mọnukunnujẹ ‘onú sisosiso Jiwheyẹwhe tọn lẹ’ mẹ, nado zindonukọn to azọ́n yẹwhehodidọ Ahọluduta lọ tọn mẹ, podọ nado do sinsẹ́n gbigbọ tọn lẹ heyin “owanyi, ayajẹ, jijọho, linsinyẹn, homẹdagbe, dagbewà, nugbowa, walọmimiọn, mawazẹjlẹgo” hia.—1 Kọlintinu lẹ 2:10; Galatianu lẹ 5:22, 23; Joẹli 2:28, 29.
Nujọnu-yinyin Lẹnvọjọ po Didiọzun Klistiani po Tọn
12. Nawẹ baptẹm Klistiani tọn gando lẹnvọjọ go gbọn?
12 Gbọnvona baptẹm Jesu he ma tindo ylando tọn, ohia he Jiwheyẹwhe kẹalọyi he gando lẹnvọjọ go de wẹ baptẹm yin. Eyin mí lẹnvọjọ, mí nọ blawu do nuhe mí wà kavi gboawupo nado wà ji. Ju owhe kanweko tintan whenu tọn he jlo nado hẹn homẹ Jiwheyẹwhe tọn hùn lẹ dona lẹnvọjọ sọn ylando he yé ko wà do Klisti go lẹ mẹ. (Owalọ lẹ 3:11-19) Kosi yisenọ delẹ to Kọlinti lẹnvọjọ sọn galilọ, boṣiọ-sinsẹ̀n, ajojijẹ, po ylando sinsinyẹn devo lẹ po mẹ. Na lẹnvọjọ yetọn wutu, yé yin ‘kiklọwé’ to ohùn Jesu tọn mẹ; yin ‘lilẹ̀wé,’ kavi yin kinklandovo na sinsẹ̀nzọn Jiwheyẹwhe tọn; bosọ yin ‘lilá di dodonọ’ to oyin Klisti tọn mẹ podọ po gbigbọ Jiwheyẹwhe tọn po. (1 Kọlintinu lẹ 6:9-11) Lẹnvọjọ yin afọdide titengbe de nado tindo ayihadawhẹnamẹnu dagbe de podọ nado mọ kọgbọ he Jiwheyẹwhe nọ namẹ sọn whẹhuhu ylando tọn mẹ.—1 Pita 3:21
13. Etẹwẹ didiọzun Klistiani tindo nado wà po baptẹm po?
13 Didiọzun Klistiani dona wá aimẹ jẹnukọnna baptẹm mítọn taidi Kunnudetọ Jehovah tọn lẹ. Didiọzun Klistiani yin nuyiwa sọn ojlo mẹ wá de he nọ yin bibasi gbọn mẹhe de sọn ahun mẹ nado hodo Klisti Jesu lọ dali. Omẹ mọnkọtọn lẹ nọ jó aliho ylankan yetọn dai tọn do bo magbe nado wà nuhe sọgbe to nukun Jiwheyẹwhe tọn mẹ. To Owe-wiwe mẹ, hogbe nuwiwa Heblu po Glẹki tọn po he gando didiọzun Klistiani go tindo linlẹn kọlilẹ, kavi agọjijo tọn. Afọdide ehe nọ do aliho ylankan jijodo bo lẹhlan Jiwheyẹwhe dè hia. (1 Ahọlu lẹ 8:33, 34) Didiọzun Klistiani biọ “azọ́n he jẹ na lẹnvọjọ” lẹ didohia. (Owalọ lẹ 26:20) E nọ biọ dọ mí ni gbẹ́ sinsẹ̀n lalo dai, yinuwa sọgbe hẹ gbedide Jiwheyẹwhe tọn lẹ, bo ze míde jo hlan Jehovah kẹdẹ. (Deutelonomi 30:2, 8-10; 1 Samuẹli 7:3) Didiọzun Klistiani nọ dekọtọn do diọdo lẹ bibasi to nulẹnpọn, yanwle, po gbẹtọ-yinyin mítọn po mẹ. (Ezekiẹli 18:31) Mí “lẹnvọjọ” dile gbẹtọ-yọyọ lọ diọtẹn na walọyizan he ma yin Jiwheyẹwhe tọn lẹ—Owalọ lẹ 3:19; Efesunu lẹ 4:20-24; Kọlọsinu lẹ 3:5-14.
Klandowiwe sọn Ahun mẹ Wá Yin Titengbe
14. Etẹwẹ klandowiwe hodotọ Jesu tọn lẹ tọn zẹẹmẹdo?
14 Klandowiwe sọn ahun mẹ wá sọ dona jẹnukọnna baptẹm hodotọ Jesu tọn lẹ tọn. Klandowiwe zẹẹmẹdo yinyin kinklandovo na lẹndai wiwe de. Afọdide ehe yin titengbe sọmọ bọ mí dona dọna Jehovah to odẹ̀ mẹ dọ nudide mítọn wẹ nado sẹ̀n ewọ dopo kẹdẹ kakadoi. (Deutelonomi 5:9) Nugbo wẹ dọ klandowiwe mítọn mayin na azọ́n kavi na gbẹtọvi de gba ṣigba hlan Jiwheyẹwhe lọsu.
15. Naegbọn mẹhe jlo nado yí baptẹm lẹ do nọ yin yinylọ́n-do-sinmẹ?
15 To whenuena mí klan míde dowiwe hlan Jiwheyẹwhe gbọn Klisti gblamẹ, mí do gbemima de hia nado yí ogbẹ̀ mítọn zan nado wà ojlo Jiwheyẹwhe tọn dile e yin titodohukanji to Owe-wiwe mẹ do. To yẹhiadonu klandowiwe enẹ tọn mẹ, baptẹm-yitọ lẹ nọ yin yinylọ́n-do-sinmẹ, dile Jesu yin bibaptizi to Tọ̀sisa Jọdani tọn mẹ do nado ze ede donukọnna Jiwheyẹwhe to yẹhiadonu-liho. (Matiu 3:13) E jẹ na ayidego dọ Jesu to dẹ̀ho to ojlẹ titengbe enẹ whenu.—Luku 3:21, 22.
16. Nawẹ ayajẹ mítọn sọgan yin didohia to aliho he sọgbe mẹ to whenuena mí mọ gbẹtọ lẹ to baptẹm yí?
16 Baptẹm Jesu tọn yin nujijọ titengbe de he gọna ayajẹ. Mọwẹ baptẹm Klistiani egbezangbe lẹ tọn lọsu nọ yin do. To whenuena mí mọ gbẹtọ lẹ to yẹhiadonu klandowiwe yetọn hlan Jiwheyẹwhe tọn basi, ayajẹ mítọn sọgan yin didohia gbọn pẹhiho sisi tọn po mẹpipa zohunhun tọn po dali. Ṣigba zingidi dúdú, ován kúnkún, po onú mọnkọtọn lẹ po nọ yin didapana nado na sisi wiwe-yinyin dohia yise tọn ehe. Ayajẹ mítọn nọ yin didohia to aliho yẹyi tọn de mẹ.
17, 18. Etẹwẹ nọ gọalọ nado dohia eyin mẹde pegan nado yin bibaptizi?
17 To ma taidi mẹhe nọ húnhún osin do ovivu lẹ go kavi he nọ baptizi gbẹtọgun he ma tindo oyọnẹn Owe-wiwe tọn lẹ po huhlọn po lẹ mẹ, Kunnudetọ Jehovah tọn lẹ ma nọ yí huhlọn do hẹn mẹdepope nado yí baptẹm gba. Na nugbo tọn, yé ma nọ baptizi mẹhe ma pegan to gbigbọ-liho lẹ gba. Whẹpo mẹdepope ni tlẹ do lẹzun wẹnlatọ wẹndagbe lọ tọn he ma ko yí baptẹm, mẹho Klistiani tọn lẹ nọ mọdọ e mọnukunnujẹ nuplọnmẹ titengbe Biblu tọn lẹ mẹ, to gbẹnọ sọgbe hẹ yé, bo na gblọndo nujikudo tọn na kanbiọ he taidi ehe nkọtọn, “Be hiẹ jlo nado yin dopo to Kunnudetọ Jehovah tọn lẹ mẹ nugbonugbo ya?”
18 To whẹho susu mẹ, eyin mẹde ko to mahẹ tindo ganji to azọ́n yẹwhehodidọ Ahọluduta lọ tọn mẹ bo do ojlo hia nado yin bibaptizi, Klistiani heyin mẹho agun tọn lẹ nọ tindo hodọdopọ po yé po nado mọdọ yisenọ he ko basi klandowiwe hlan Jehovah bo ko sọ jẹ nubiọtomẹsi Jiwheyẹwhe tọn lẹ kọ̀n na baptẹm wẹ yé yin. (Owalọ lẹ 4:4; 18:8) Gblọndo dopodopo yetọn do kanbiọ nuplọnmẹ tọn he hugan 100 lẹ ji nọ gọalọna mẹho lẹ nado yọnẹn eyin mẹhe to obiọ basi lọ lẹ jẹ nubiọtomẹsi Owe-wiwe tọn lẹ kọ̀n na mẹylọ́n-do-sinmẹ. Mẹdelẹ ma nọ jẹ jẹhẹnu lọ lẹ kọ̀n gba podọ enẹwutu ma nọ yin alọkẹyi na baptẹm Klistiani tọn gba.
Be Nude to Alọhẹndote na We Wẹ Ya?
19. To pọndohlanmẹ na Johanu 6:44, mẹnu lẹ wẹ na yin whédutọgbẹ́ hẹ Jesu?
19 Suhugan mẹhe nọ yin hinhẹn po huhlọn po nado tindo mahẹ to baptẹm gbẹtọgun tọn mẹ lẹ sọgan ko yin didọna dọ yé na yì olọn mẹ to okú godo. Ṣigba to alọdindlẹndo hodotọ he hodo afọdòmẹ etọn lẹ mẹ, Jesu dọmọ: “Mẹdepope ma sọgan wá dee, adavo Otọ́ he do mi hlan dọ̀n ẹn.” (Johanu 6:44) Jehovah ko dọ̀n gbẹtọ 144 000 wá Klisti dè he na yin whédutọgbẹ́ hẹ Jesu to Ahọluduta olọn tọn mẹ. Baptẹm gánnugánnu tọn ma ko klọ́ mẹdepope wé na otẹn gigonọ mọnkọtọn to tito Jiwheyẹwhe tọn mẹ gba.—Lomunu lẹ 8:14-17; 2 Tẹsalonikanu lẹ 2:13; Osọhia 14:1.
20. Etẹwẹ sọgan gọalọna delẹ to mẹhe ma ko yin bibaptizi lẹ mẹ?
20 Na titengbe tọn sọn ṣẹnṣẹn owhe 1930 tọn lẹ gbọ́n, susu mẹhe tindo todido nado lùn “nukunbibia daho” lọ tọ́n bo na nọgbẹ̀ to aigba ji kakadoi lẹ ko kọnawudopọ hẹ pipli “lẹngbọ devo” Jesu tọn lẹ. (Osọhia 7:9, 14; Johanu 10:16) Yé jẹ nubiọtomẹsi baptẹm tọn kọ̀n na yé ko hẹn gbẹzan yetọn wá kọndopọmẹ hẹ Ohó Jiwheyẹwhe tọn bosọ yiwanna ẹn po ‘ahun, alindọn, hlọnhlọn, gọna ayiha yetọn lẹpo po’ wutu. (Luku 10:25-28) Dile etlẹ yindọ mẹdelẹ yọnẹn dọ Kunnudetọ Jehovah tọn lẹ nọ ‘sẹ̀n Jiwheyẹwhe to gbigbọ po nugbo po mẹ,’ yé ma ko hodo apajlẹ Jesu tọn bo ko do kunnudenu owanyi nujọnu tọn po mẹdezejo mlẹnmlẹn hlan Jehovah po hia to gbangba gbọn yinyin bibaptizi dali gba. (Johanu 4:23, 24; Deutelonomi 4:24; Malku 1:9-11) Odẹ̀ vẹkuvẹku podọ tlọlọ tọn gando afọdide titengbe ehe go sọgan whàn yé bo na yé tuli nado hẹn gbẹzan yetọn wá kọndopọmẹ mlẹnmlẹn hẹ Ohó Jiwheyẹwhe tọn, nado basi klandowiwe mlẹnmlẹn hlan Jehovah Jiwheyẹwhe, podọ nado yin bibaptizi.
21, 22. Whẹwhinwhẹ́n tẹlẹ wutu wẹ mẹdelẹ ma nọ jlo nado basi klandowiwe bo yí baptẹm?
21 Mẹdelẹ nọ yí klandowiwe po baptẹm po do nọ gbẹ̀n asáji-kàn na yé ko tlọ̀ biọ whẹho aihọn tọn lẹ kavi yanwle adọkun tọn mẹ sọmọ bọ ojlẹ vude wẹ yé nọ tindo na onú gbigbọmẹ tọn lẹ. (Matiu 13:22; 1 Johanu 2:15-17) Lehe yé na yin ayajẹnọ do sọ eyin yé diọ pọndohlan po yanwle yetọn lẹ po! Dindọnsẹpọ Jehovah na hẹn yé zun adọkunnọ to gbigbọ-liho, na gọalọna yé nado dè magbọjẹ pò, bo nasọ na yé jijọho po pekọ po he nọ dekọtọn sọn ojlo Jiwheyẹwhe tọn wiwà mẹ—Psalm 16:11; 40:8; Howhinwhẹn lẹ 10:22; Filippinu lẹ 4:6, 7.
22 Mẹdevo lẹ dọ dọ yé yiwanna Jehovah ṣigba ma nọ basi klandowiwe bo yin bibaptizi gba na yé lẹndọ yé na gbọnmọ dali dapana gbedido. Ṣigba dopodopo mítọn dona dogbè na Jiwheyẹwhe. Azọngban nọ wá mí ji to whenuena mí sè ohó Jehovah tọn. (Ezekiẹli 33:7-9; Lomunu lẹ 14:12) Taidi ‘mẹdide de,’ Islaelivi hohowhenu tọn lẹ yin jiji do akọta he ko yin kinklandowiwe hlan Jehovah de mẹ, bọ yé gbọnmọ dali tindo azọngban de nado nọ sẹ̀n ẹn po nugbonọ-yinyin po sọgbe hẹ nunọwhinnusẹ́n etọn lẹ. (Deutelonomi 7:6, 11) Mẹdepope mayin jiji do akọta mọnkọtọn mẹ to egbehe gba, ṣigba eyin mí ko mọ nuplọnmẹ Owe-wiwe tọn he sọgbe lẹ yí, mí dona yinuwa deji to yise mẹ.
23, 24. Obu tẹlẹ wẹ ma dona glọnalina gbẹtọ lẹ ma nado yin bibaptizi?
23 Obu dọ yé ma tindo oyọnẹn he pé sọgan glọnalina mẹdelẹ ma nado yin bibaptizi. Etomọṣo mímẹpo tindo nususu nado plọn na ‘gbẹtọvi ma sọgan mọdona nudida Jiwheyẹwhe nugbo lọ tọn lẹ sọn bẹjẹeji jẹ vivọnu gba.’ (Yẹwhehodọtọ 3:11) Lẹnnupọndo ojọ̀ Etiopianu lọ ji. Taidi mẹdiọzun Juvi de, e tindo oyọnẹn Owe-wiwe tọn jẹ obá de mẹ, ṣigba e ma sọgan na gblọndo kanbiọ lẹpo tọn gando lẹndai Jiwheyẹwhe tọn lẹ go gba. Ṣigba to nupinplọn dogbọn tito whlẹngán tọn he Jehovah basi gbọn avọ́sinsan ofligọ Jesu tọn dali godo, to afọdopolọji wẹ ojọ̀ lọ basi baptẹm osin tọn.—Owalọ lẹ 8:26-38.
24 Mẹdelẹ nọ whleawu nado basi klandowiwe hlan Jiwheyẹwhe na yé to budi dọ yé na jai wutu. Monique owhe 17 mẹvi dọmọ: “Yẹn ko to awuwhle nado yí baptẹm na yẹn to budi dọ yẹn ma na penugo nado hẹn klandowiwe ṣie di wutu.” Ṣigba eyin mí dejido Jehovah go po ahun mítọn lẹpo po, ‘ewọ na jlọ omọ́-liho mítọn.’ E na gọalọna mí nado ‘to zọnlinzin to nugbo lọ mẹ’ taidi devizọnwatọ klandowiwe nugbonọ etọn lẹ.—Howhinwhẹn lẹ 3:5, 6; 3 Johanu 4.
25. Kanbiọ tẹwẹ jẹ nado gbadopọnna todin?
25 Na jidide mlẹnmlẹn to Jehovah mẹ po owanyi sọn ahun mẹ wá na ẹn po wutu, mẹsusu nọ yin whinwhàn to owhe dopodopo mẹ nado basi klandowiwe bo yin bibaptizi. Podọ na jide tọn devizọnwatọ klandowiwe Jiwheyẹwhe tọn lẹpo wẹ jlo nado yin nugbonọ na ẹn. Etomọṣo, mí to gbẹnọ to ojlẹ awusinyẹn tọn lẹ mẹ, podọ mí nọ pannukọn whlepọn voovo yise tọn lẹ. (2 Timoti 3:1-5) Etẹwẹ mí sọgan wà nado hẹn klandowiwe hlan Jehovah mítọn di? Ehe ji wẹ mí na dọhodo to hosọ he na bọdego mẹ.
[Nudọnamẹ odò tọn]
a To whenuena e yindọ Jesu ma waylando, baptẹm etọn mayin yẹhiadonu lẹnvọjọ tọn gba. Yẹhiadonu ede zizejo na Jiwheyẹwhe nado wà ojlo Otọ́ etọn tọn wẹ baptẹm etọn yin.—Heblu lẹ 7:26; 10:5-10.
Be Hiẹ Flin Ya?
• Nawẹ baptẹm Klistiani tọn nọ yin bibasi gbọn?
• Oyọnẹn tẹwẹ mẹde dona tindo whẹpo do yin bibaptizi?
• Afọdide tẹlẹ wẹ Klistiani nugbo lẹ nọ ze whẹpo do yin bibaptizi?
• Naegbọn mẹdelẹ ma nọ jlo nado yin bibaptizi, ṣigba nawẹ yé sọgan yin alọgọna gbọn?
[Yẹdide to weda 14]
Be hiẹ yọ́n nuhe e zẹẹmẹdo nado yin bibaptizi ‘to oyín Otọ́ tọn, Ovi tọn, po gbigbọ wiwe tọn po mẹ’ ya?