Nọ Nukle, Zindonukọn po Adọgbigbo Po! — WESẸDOTẸN INTẸNẸT JI TỌN Watchtower Tọn

Nọ Nukle, Zindonukọn po Adọgbigbo Po!

Linlin Do Opli Vonọtaun lẹ Ji

MẸDEPOPE ma sọgan gbẹ́ dọ mí ma to gbẹnọ to ‘ojlẹ awusinyẹn tọn lẹ mẹ’ gba. Taidi Kunnudetọ Jehovah tọn lẹ, mí ma gán sọn kọgbidinamẹ gbẹninọ to ‘azán godo tọn lẹ’ mẹ tọn lẹ si gba. (2 Timoti 3:1-5) Ṣigba mí yọnẹn dọ gbẹtọ lẹ tindo nuhudo alọgọ tọn. Yé ma mọnukunnujẹ nuhe nujijọ aihọn tọn lẹ zẹẹmẹdo mẹ gba. Yé tindo nuhudo homẹmimiọn po todido po tọn. Azọngban tintan tẹwẹ mí tindo to alọgigọna gbẹtọ hatọ mítọn lẹ mẹ?

Mí tindo azọ́ndenamẹ de sọn Jiwheyẹwhe dè nado má wẹndagbe Ahọluduta he ko yin didoai Jiwheyẹwhe tọn tọn. (Matiu 24:14) Gbẹtọ lẹ dona yọnẹn dọ Ahọluduta olọn mẹ tọn ehe wẹ yin todido dopo akàn he gbẹtọvi tindo. Ṣigba, owẹ̀n mítọn ma nọ yin alọkẹyi ganji to whepoponu gba. Azọ́n mítọn ko yin alọhẹndotena bọ mẹmẹsunnu mítọn lẹ ko yin homẹkẹndo to fidelẹ. Etomọṣo, mí ma nọ gbọjọ gba. Po jidide mlẹnmlẹn to Jehovah mẹ po, mí magbe nado nọ nukle, to nukọnzindo po adọgbigbo po, bo na to wẹndagbe lọ lá po zohunhun po.—Owalọ lẹ 5:42.

Gbemima dolido enẹ sọawuhia to opli vonọtaun he yin bibasi to octobre 2001 mẹ lẹ ji. To samedi 6 octobre, opli whemẹwhemẹ Watch Tower Bible and Tract Society of Pennsylvania tọn yin bibasi to Plitẹnhọ Plidopọ Kunnudetọ Jehovah tọn lẹ tọn mẹ to Jersey City, New Jersey, to États-Unis.a To wunkẹngbe, opli dogọ lẹ yin bibasi to nọtẹn ẹnẹ mẹ, atọ̀n to États-Unis podọ dopo to Canada.b

To hodidọ bẹjẹeji etọn tọn to opli whemẹwhemẹ tọn ji mẹ, azinponọ lọ, yèdọ Samuel F. Herd, heyin dopo to Hagbẹ Anademẹtọ Kunnudetọ Jehovah tọn lẹ tọn mẹ, dlẹnalọdo Psalm 92:1, 4 bo dọ to enẹgodo dọ: “Onú dagbe wẹ e yin nado dopẹ́.” Na nugbo tọn, whẹwhinwhẹ́n he wutu mí dona dopẹ́ lẹ yin nina to linlin atọ́n he wá sọn adà voovo aihọn tọn mẹ lẹ mẹ.

Linlin lẹ sọn Adà Aihọn Tọn Lẹpo Mẹ

Mẹmẹsunnu Alfred Kwakye na linlin dó nukọnyiyi azọ́n yẹwhehodidọ tọn ji to Ghana, heyin yinyọnẹn dai taidi Gold Coast. Azọ́n mítọn yin alọhẹndotena na owhe delẹ to aigba enẹ ji. Gbẹtọ lẹ nọ kanse dọ: “Etẹwẹ hẹn alọhẹndotenamẹ lọ wá? Etẹwẹ mì wà?” Ehe hùn dotẹnmẹ dote nado dekunnu, wẹ Mẹmẹsunnu Kwakye dọ. To 1991 he alọhẹndotenamẹ lọ yin didesẹ, Kunnudetọ Jehovah tọn 34 421 wẹ tin to Ghana. To août 2001, sọha lọ yin 68 152—heyin jideji 98 to kanweko ji tọn. Tito lẹ to yinyin bibasi nado gbá Plitẹnhọ Plidopọ tọn de he na nọ hẹn gbẹtọ 10 000. E họnwun dọ, mẹmẹsunnu gbigbọmẹ tọn mítọn he tin to Ghana lẹ to mẹdekannujẹ sinsẹ̀n tọn yetọn yizan ganji.

Mahopọnna bẹwlu tonudidọ tọn, mẹmẹsunnu mítọn Irlande tọn lẹ to mahẹ tindo to lizọnyizọn lọ mẹ po zohunhun po, podọ yé nọ yin sisi na kadaninọ yetọn. Irlande tindo agun 115 to lẹdo 6 mẹ, wẹ azinponọ Wedegbẹ́ Alahọ tọn Peter Andrews dọ. Mẹmẹsunnu Andrews dọ numimọ de gando Liam, visunnu owhe 10-mẹvi he nọ yí adọgbigbo do dekunnu to wehọmẹ go. Liam do Owe Ṣie heyin Otan Biblu Tọn, heyin zinzinjẹgbonu gbọn Kunnudetọ Jehovah tọn lẹ dali, 25 gbonu na klasigbẹ́ etọn lẹ gọna mẹplọntọ etọn. Liam jlo nado yin bibaptizi, ṣigba mẹde kanse eyin ewọ ma whè hugan. Liam gblọn dọmọ: “Owhe ṣie ma dona yin pinpọn gba ṣigba owanyi ṣie na Jehovah wẹ dona do enẹ hia. Baptẹm ṣie na do lehe yẹn yiwanna ẹn sọ hia.” Yanwle Liam tọn wẹ nado lẹzun mẹdehlan de.

Wẹnlatọ wẹndagbe tọn 5 400 wẹ tin to Venezuela to 1968. Ṣigba e ko hugan 88 000 todin, wẹ Stefan Johansson, heyin azinponọ Wedegbẹ́ Alahọ tọn dọ. Podọ yọnbasi tin na jideji dogọ na hugan gbẹtọ 296 000 wẹ wá Oflin to 2001. To décembre 1999, jikun wududu hẹn osó de nado túntún ogbọ̀n miyọnawu jẹgbonu bo hù nudi gbẹtọ 50 000, gọna Kunnudetọ sọha delẹ. Ogbọ̀n gọ́ Plitẹnhọ Ahọluduta tọn dopo bọ mẹtlu odaa poun wẹ e pò na e nido jẹ ozà lọ go. To whenuena gbẹtọ lẹ dọ dọ ohọ̀ lọ ni yin jijodo, mẹmẹsunnu lẹ gblọn dọmọ: “Paali! Plitẹnhọ Ahọluduta tọn mítọn die, podọ mí ma jlo na jo e do todin gba.” Yé jẹ azọ́nwa ji, bo bẹ ogbọ̀n, zannu, po susugege ogbó devo lẹ po tọ́n. Ohọ̀ lọ yin vivọjlado, bọ mẹmẹsunnu lẹ dọ dọ e sọ yọnwhanpẹ taun todin hugan lehe e te whẹpo nugbajẹmẹji lọ do jọ!

Ogbè po akọgbè po 87 wẹ nọ yin didó to Philippines, wẹ Mẹmẹsunnu Denton Hopkinson, heyin azinponọ Wedegbẹ́ Alahọ lọ tọn dọ. To owhe sinsẹ̀nzọn tọn he wayi whenu, Les Saintes Écritures—Traduction du monde nouveau to blebu mẹ yin didetọn to ogbè tangan atọ̀n otò lọ tọn lẹ mẹ—Cebuano, Iloko, po Tagalog po. Mẹmẹsunnu Hopkinson dọ numimọ visunnu owhe 9-mẹvi de tọn he hia owe Wẹndagbe Nado Hẹn We Jaya, heyin zinzinjẹgbonu gbọn Kunnudetọ Jehovah tọn lẹ dali. E yí owe devo lẹ sọn alahọ lọ mẹ, bo hia yé, ṣigba whẹndo etọn diọnukunsọ ẹ. To owhe lẹ godo he e tin to wehọmẹ dotozọ́n pinplọn tọn mẹ, e dọnsẹpọ alahọ lọ bo biọ plọnmẹ Biblu de. E yin bibaptizi to 1996 bosọ biọ lizọnyizọn whenu-gigọ́ tọn mẹ to madẹnmẹ. Todin ewọ po asi etọn po to sinsẹ̀nzọnwà to wekantẹn alahọ lọ tọn.

Porto Rico nọ “do Kunnudetọ lẹ” hlan otò devo lẹ mẹ, wẹ azinponọ Wedegbẹ́ Alahọ tọn Ronald Parkin dọ. Nudi wẹnlatọ 25 000 wẹ tin to lopo lọ ji, bọ sọha lọ ko yin dopolọ na owhe susu. Etẹwutu? Eyọn, e yin sọha-yí-na dọ Porto Rico “nọ dó” nudi wẹnlatọ 1 000 hlan États-Unis to owhe dopodopo mẹ, he suhugan yetọn nọ sẹtẹn na whẹwhinwhẹ́n akuẹzinzan tọn lẹ wutu. Mẹmẹsunnu Parkin dọ numimọ whẹdida ayidego de tọn he gando Luis, heyin Kunnudetọ owhe 17 mẹvi he to azọ̀n leucémie tọn jẹ go. Na Luis gbẹ́ ma nado dó ohùn wutu, whẹho etọn yin hinhẹn yì whẹdatẹn. Whẹdatọ lọ jlo nado dọho hẹ ẹ tlọlọ, enẹwutu e dla ẹ pọ́n to dotowhé. Luis kanse e dọ: “Etẹwutu hiẹ na dawhẹna mi taidi mẹhomẹ de eyin osẹ́n sinsinyẹn de wẹ yẹn gbà, ṣigba bo na yinuwa hẹ mi taidi ovivu de, to whenuena yẹn jlo nado setonuna Jiwheyẹwhe?” Whẹdatọ lọ yin dududeji dọ ovivu he ko whẹ́n he penugo nado basi nudide na ede de wẹ e yin.

Bọdo linlin he wá sọn aigba dindẹn ji lẹ go, Harold Corkern, heyin dopo to Wedegbẹ́ Alahọ Amelika tọn mẹ, kanhose devizọnwatọ whenu dindẹn tọn Jehovah tọn ẹnẹ. Arthur Bonno ko zan owhe 51 to sinsẹ̀nzọn whenu-gigọ́ tọn mẹ bosọ to sinsẹ̀nzọnwà todin to Wedegbẹ́ Alahọ Équateur tọn mẹ. Angelo Catanzaro ko zan owhe 59 to sinsẹ̀nzọn whenu-gigọ́ tọn mẹ, suhugan etọn taidi nugopọntọ tomẹyitọ. Richard Abrahamson yí gbedewema sọn Wehọmẹ Giliadi tọn to 1953, podọ e sọ tindo lẹblanulọkẹyi nado deanana azọ́n lọ to Danemark na owhe 26 whẹpo do lẹkọ do Bẹtẹli Brooklyn tọn. To godo mẹ, homẹ mẹlẹpo tọn hùn nado sehó sọn Carey W. Barber he ko tindo owhe 96 lọ dè. Mẹmẹsunnu Barber heyin bibaptizi to 1921, ko zan owhe 78 to lizọnyizọn whenu-gigọ́ tọn mẹ bo ko sọ yin dopo to Hagbẹ Anademẹtọ lọ mẹ sọn 1978 gbọ́n.

Togunmẹho He Whànmẹ Lẹ

Opli whemẹwhemẹ tọn bẹ hodidọ he hẹnmẹ lẹnnupọn delẹ hẹn. Mẹmẹsunnu Robert W. Wallen dọho do hosọ lọ ji “Gbẹtọ de na Oyín Etọn.” Mí yin omẹ Jiwheyẹwhe tọn lẹ, podọ mí sọgan yin mimọ to aigba he hugan 230 ji. Jehovah ko na mí ‘sọgodo de po todido de po.’ (Jẹlemia 29:11) Mí dona zindonukọn nado to Ahọluduta Jiwheyẹwhe tọn lá lẹdo pe, bo to owẹ̀n jiawu homẹmimiọn po kọgbọ po tọn má. (Isaia 61:1) Mẹmẹsunnu Wallen dotana dọmọ: “Mì gbọ mí ni to gbẹnọ sọgbe hẹ yinkọ mítọn, heyin Kunnudetọ Jehovah tọn lẹ egbesọegbesọ.”—Isaia 43:10.

Adà godo tọn tito-to-whinnu lọ tọn yin hómadọ de gbọn atọ̀n to Hagbẹ Anademẹtọ lẹ mẹ dali. Hosọ etọn wẹ “Din Wẹ Yin Ojlẹ lọ Nado Nọ Nukle, Nọte Gligli, bo Yin Huhlọnnọ Dogọ.”—1 Kọlintinu lẹ 16:13.

Tintan, Mẹmẹsunnu Stephen Lett dọho do hosọ lọ “Nọ Nukle to Ojlẹ Godo Tọn Ehe Mẹ” ji. Nunina de wẹ amlọn agbasa mẹ tọn yin, wẹ Mẹmẹsunnu Lett dọ. E nọ vọ́ huhlọn na mí. Ṣigba, amlọn gbigbọmẹ tọn ma yọ́n gba. (1 Tẹsalonikanu lẹ 5:6) To whelọnu lo, nawẹ mí sọgan gbọṣi nukle to gbigbọ-liho gbọn? Mẹmẹsunnu Lett slẹ “amasin-kún” gbigbọmẹ tọn atọ̀n: (1) Tindo nususu nado wà to azọ́n Oklunọ tọn mẹ. (1 Kọlintinu lẹ 15:58) (2) Nuhudo gbigbọmẹ tọn towe lẹ ni nọ duahunmẹ na we. (Matiu 5:3) (3) Nọ kẹalọyi ayinamẹ sinai do Biblu ji na hiẹ nido sọgan yinuwa po nuyọnẹn po.—Howhinwhẹn lẹ 13:20.

Mẹmẹsunnu Theodore Jaracz na hodidọ he whànmẹ de he hosọ etọn yin “Nọte Gligli to Whlepọn Glọ.” To alọdindlẹndo Osọhia 3:10 mẹ, Mẹmẹsunnu Jaracz kanse dọ: “Etẹwẹ ‘ojlẹ whlepọn tọn’ yin?” Whlepọn enẹ wá “to azán Oklunọ tọn gbè,” heyin ojlẹ he mẹ mí to gbẹnọ te todin. (Osọhia 1:10) Whlepọn lọ gando whẹho tangan lọ go—be adà Ahọluduta he ko yin didoai Jiwheyẹwhe tọn mẹ wẹ mí tin te kavi na titonu ylankan Satani tọn? Kaka ojlẹ whlepọn tọn mítọn na wá vivọnu, mí na nọ pannukọn whlepọn kavi awusinyẹnnamẹnu lẹ janwẹ. Be mí na gbọṣi nugbonọ-yinyin hlan Jehovah po titobasinanu etọn po ya? ‘Dopodopo mítọn dona do nugbonọ-yinyin mọnkọtọn hia,’ wẹ Mẹmẹsunnu Jaracz dọ.

To tadona mẹ, Mẹmẹsunnu John E. Barr dọho do hosọ lọ ji “Yin Huhlọnnọ Dogọ Taidi Omẹ Gbigbọnọ De.” To alọdindlẹndo Luku 13:23-25 mẹ, e dọ dọ mí dona sinyẹnlin nado “gbọ̀n họntonu bibó mẹ biọ họmẹ.” Mẹsusu nọ gboawupo na yé ma whesọ ganji nado yin huhlọnnọ dogọ gba. Nado sọgan yin Klistiani he whẹ́n ganji lẹ, mí dona plọn nado nọ yí nunọwhinnusẹ́n Biblu tọn lẹ do yizan mẹ to adà gbẹzan tọn lẹpo mẹ. Mẹmẹsunnu Barr dọmọ: “Yẹn deji dọ hiẹ na yigbe dọ ojlẹ lọ die nado (1) dike Jehovah ni tin to otẹn tintan mẹ; (2) whẹ́n bo yin huhlọnnọ dogọ; bosọ (3) sinyẹnlin to ojlo Jehovah tọn wiwà mẹ. To aliho ehe mẹ, mí na penugo nado gbọ̀n họntonu bibó he planmẹ yì gbẹzan jiawu he madopodo mẹ.”

Dile opli whemẹwhemẹ tọn to sisẹpọ vivọnu, kanbiọ dopo gbẹ́ tin he ma ko mọ gblọndo: Etẹwẹ yin wefọ owhe sinsẹ̀nzọn 2002 tọn? Kanbiọ enẹ mọ gblọndo to wunkẹngbe.

Opli Dogọ

Nukundido lẹ yiaga taun to sẹgbe afọnnu dile tito-to-whinnu opli dogọ tọn lọ bẹjẹeji. E bẹjẹeji po bladopọ oplọn Atọ̀họ̀-Nuhihọ́ Lọ Tọn osẹ lọ tọn po, ehe godo nuagokun opli whemẹwhemẹ tọn lẹ yin zizedonukọnnamẹ te to kleun mẹ. Enẹgodo, homẹ mẹlẹpo tọn hùn nado se hodidọ de do wefọ owhe 2002 tọn ji: heyin ‘Mì wá dè e, . . . yẹn nado fakọna mì.’ (Matiu 11:28) Hodidọ lọ yin zize sinai do hosọ oplọn tọn heyin zinzinjẹgbonu to godo mẹ to Atọ̀họ̀-Nuhihọ́ Lọ Tọn 15 décembre 2001 tọn mẹ ji.

Enẹgodo, mẹhe ko yin afọzedaitọ he yì Plidopọ Agbegbe vonọtaun “Ohó Jiwheyẹwhe Tọn Plọnmẹtọ Lẹ” tọn to France po Italie po to août 2001 delẹ dọ numọtolanmẹ yetọn lẹ.c To tadona mẹ, taidi bladopọ tito-to-whinnu azán lọ tọn, hodidọ godo tọn awe yin didọ gbọn hodọtọ jonọ he wá sọn Bẹtẹli Brooklyn tọn lẹ dali.

Hosọ tintan tọn wẹ “Adọgbigbo Yíyí do Dejido Jehovah Go to Ojlẹ Awusinyẹn Tọn Ehelẹ Mẹ.” Hodọtọ lọ dọhodo nuagokun ehelẹ ji: (1) Adọgbigbo yíyí do dejido Jehovah go ko nọ saba yin nujọnu na omẹ Jiwheyẹwhe tọn lẹ. Biblu bẹ apajlẹ susu mẹhe do adọgbigbo po yise po hia to whlepọn nukọn lẹ tọn hẹn. (Heblu lẹ 11:1–12:3) (2) Jehovah nọ wleawuna dodonu dolido de na mí nado dejido ewọ go mlẹnmlẹn. Azọ́n etọn lẹ po Ohó etọn po namẹ nujikudo dọ e nọ penukundo devizọnwatọ etọn lẹ go bo ma nasọ wọnji yé go gbede. (Heblu lẹ 6:10) (3) Adọgbigbo po jidide po yin dandannu to egbehe. Mí na ‘yin wangbẹna,’ dile Jesu dọ dọdai etọn do. (Matiu 24:9) Nado sọgan doakọnnanu, mí dona ganjẹ Ohó Jiwheyẹwhe tọn go, deji dọ gbigbọ etọn tin hẹ mí, bosọ gboadọ nado to wẹndagbe etọn lá zọnmii. (4) Apajlẹ lẹ dohia dọ mí to nukọnpan nukundiọsọmẹ lẹ todin. Mẹlẹpo wẹ yin whinwhàn dile hodọtọ lọ dọ nuhe mẹmẹsunnu mítọn lẹ ko doakọnna to Arménie, France, Géorgie, Kazakhstan, Russie po Turkménistan po. Na nugbo tọn, din wẹ ojlẹ lọ nado do adọgbigbo po jidide po hia to Jehovah mẹ!

Hodọtọ godo tọn dọho do hosọ lọ ji “Nukọnzinzindo to Pọmẹ hẹ Titobasinanu Jehovah Tọn.” Hodidọ lọ zinnudo nuagokun he wá do ganmẹ delẹ ji. (1) Nukọnzinzindo omẹ Jehovah tọn lẹ tọn yin mimọ gbayipe. Azọ́n yẹwhehodidọ tọn mítọn po plidopọ agbegbe mítọn lẹ po nọ hẹn mí wá ayidonugo gbẹtọ lẹ tọn mẹ. (2) Jehovah ko do titobasinanu he tin to pọmẹ de ai. To 29 W.M., Jesu yin dide gbọn gbigbọ wiwe dali po pọndohlan lọ po nado hẹn “onú lẹpo”—mẹhe tindo todido olọn mẹ tọn po mẹhe tindo todido aigba ji tọn lẹ po—wá whẹndo he tin to pọmẹ Jiwheyẹwhe tọn mẹ. (Efesunu lẹ 1:8-10) (3) Plidopọ agbegbe lẹ yin dohia vonọtaun pọninọ akọjọpli tọn. Ehe sọawuhia hezeheze to plidopọ agbegbe vonọtaun heyin bibasi to France po Italie po to août he wayi mẹ ji. (4) Gbemima he whànmẹ de yin bibasi to France po Italie po. Hodọtọ lọ donu nuagokun vude go sọn gbemima he whànmẹ lọ mẹ. Gbemima lọ sọawuhia to gigọ́mẹ to odò.

To vivọnu hodidọ godo tọn, hodọtọ heyin nukunmọnu ogbẹ́ tọn lọ hia nulila he whànmẹ de heyin awuwlena gbọn Hagbẹ Anademẹtọ dali. Apadewhe etọn dọmọ: “Din wẹ ojlẹ lọ nado nọ nukle bosọ to aṣeji, bo to ayido lehe nujijọ aihọn tọn lẹ to jijọ do go. . . . Mí jlo na do owanyi sisosiso he Hagbẹ Anademẹtọ tindo na mì podọ na omẹ Jiwheyẹwhe tọn lẹpo hia. Na ewọ ni dona mì susugege to ojlo etọn wiwà po ahundopo po mẹ.” Omẹ Jehovah tọn lẹ to filẹpo magbe nado nọ nukle to ojlẹ awusinyẹn tọn ehelẹ mẹ bosọ to nukọnzindo po adọgbigbo po hẹ titobasinanu he tin to pọmẹ Jehovah tọn.

[Nudọnamẹ odò tọn]

a Tito-to-whinnu opli whemẹwhemẹ tọn lọ yin ṣiṣakadopọ hẹ nọtẹn devo lẹ gbọn alokan dali, bo hẹn sọha mẹhe wá lẹ tọn yin 13 757.

b Opli dogọ lẹ yin bibasi to Long Beach, Californie; Pontiac, Michigan; Uniondale, New York; po Hamilton, Ontario po. Sọha mẹplidopọ lẹ tọn, gọna mẹhe yin ṣiṣakadopọ gbọn alokan dali to fidevo lẹ tọn, yin 117 885.

c Plidopọ agbegbe vonọtaun atọ̀n yin bibasi to France—to Paris, Bordeaux, po Lyons po. To Italie, afọzedaitọ he wá sọn États-Unis lẹ yin dide yì Lomu po Milan po, dile etlẹ yindọ plidopọ ṣinẹnẹ wẹ yin bibasi to ojlẹ dopolọ mẹ.

[Apotin to weda 29-31]

Gbemima

Plidopọ agbegbe vonọtaun “Ohó Jiwheyẹwhe Tọn Plọnmẹtọ Lẹ” tọn lẹ yin bibasi to France po Italie po to août 2001. Gbemima he whànmẹ de yin zizedonukọnnamẹ to plidopọ enẹlẹ ji. Kandai gbemima ehe tọn lọ die.

“Taidi Kunnudetọ Jehovah tọn lẹ, mí mẹhe pli dopọ to Plidopọ agbegbe ‘Ohó Jiwheyẹwhe Tọn Plọnmẹtọ Lẹ’ ehe ji lẹpo ko yin pinplọn gbọn nuplọnmẹ he nọ hẹn ale wá taun dali. Asisa nuplọnmẹ ehe tọn ko yin didohia mí hezeheze. Nuplọnmẹ lọ ma wá sọn gbẹtọ dè gba. Mẹhe yẹwhegán Isaia hohowhenu tọn ylọ dọ ‘Nuplọnmẹtọ Daho’ mítọn dè wẹ e wá sọn. (Isaia 30:20) Doayi nuflinmẹ Jehovah tọn go dile e yin didọ do to Isaia 48:17 dọmọ: ‘Yẹn wẹ OKLUNỌ Jiwheyẹwhe towe, he plọn we na ale, he plan we gbọn aliho he ji hiẹ na gbọ̀n.’ Nawẹ e nọ wà ehe dotana gbọn? Aliho tangan lọ wẹ gbọn owe heyin lilẹdogbedevomẹ bosọ yin mimá gbayipe hugan to aihọn mẹ lọ gblamẹ, yèdọ Biblu, to ehe mẹ mí yin didọna te madoadúdẹji dọ: ‘Owe-wiwe lẹpo gbingbọ́n sọn Jiwheyẹwhe mẹ yin alenọ.’—2 Timoti 3:16.

“To egbehe, gbẹtọvi tindo nuhudo nuplọnmẹ he nọ hẹn ale wá enẹ tọn tlala. Etẹwutu mí sọgan dọmọ? To nulinlẹnpọn do ninọmẹ he to didiọ, bosọ paṣamẹ aihọn ehe tọn ji, etẹwẹ nuyọnẹntọ lẹ dọ? Nuhe yé dọ poun die: Dile etlẹ yindọ omẹ livi susu wẹ ko yin pinplọn to wehọmẹ aihọn tọn lẹ mẹ, nujinọtedo dagbe lẹ po awugbopo nado yọ́n vogbingbọn to dagbe po ylando po ṣẹnṣẹn hán taun. (Isaia 5:20, 21) Wunvinọ-yinyin gando oyọnẹn Biblu tọn go gbayipe taun. Dile etlẹ yindọ azọ́n nuyọnẹn wintinwintin tọn nọ wleawuna nudọnamẹ susugege gbọn yizan zomọ nudọnamẹ-sẹdo tọn dali do sọ, fie wẹ mí sọgan mọ gblọndo te na kanbiọ titengbe lẹ taidi, Etẹwẹ yin lẹndai ogbẹ̀ tọn? Nawẹ mí na mọnukunnujẹ nujijọ ojlẹ mítọn tọn lẹ mẹ gbọn? Be todido dolido de tin na sọgodo ya? Be jijọho po hihọ́ po na wá gbede ya? Humọ, livi susu owe lẹ tọn wẹ tin to wesẹdotẹn lẹ he dọhodo diblayi adà gbẹzan gbẹtọvi tọn lẹpo ji. Etomọṣo, gbẹtọvi lẹ nọ vọ́ nuṣiwa dopolọ lẹ basi. Sẹ́nhẹngba to jijideji. Awutu he e taidi dọ yè ko sukúndona dai lẹ to awusọhia dogọ, bọ devo lẹ, taidi SIDA, to gbigbayipe to niyaniya mẹ. Whẹndo lẹ to gbigbakija to obá he dobunamẹ de mẹ. Nuhẹnflu to lẹdo lọ hẹngble. Nuwiwa nukunbianamẹ tọn gọna awhànfunnu he nọ hẹn vasudo pligidi wá lẹ to jijọho po hihọ́ po zedo owù mẹ. Nuhahun he ma tindo pọngbọ lẹ to susu deji. Etẹwẹ yin azọngban tangan mítọn to alọgigọna gbẹtọ hatọ mítọn lẹ mẹ to ojlẹ awusinyẹn tọn ehelẹ mẹ? Be nuplọnmẹ he basi zẹẹmẹ asisa ninọmẹ gbẹtọvi tọn lẹ tọn tin bo ma do aliho he na planmẹ yì ogbẹ̀ he pọnte hugan de mẹ kẹdẹ hia gba ṣigba he sọ ze todido deji-dego sọgodo tọn donukọnnamẹ ya?

“Azọ́ndenamẹ Owe-wiwe tọn mítọn wẹ nado ‘yì bo hẹn akọta lẹpo zun nuplọntọ, bosọ nọ plọn yé nado doayi nuhe Klisti degbè etọn lẹpo go.’ (Matiu 28:19, 20) Azọ́n ehe yin didenamẹ gbọn Jesu Klisti dali bọdo okú po fọnsọnku etọn po go, to whenuena e mọ aṣẹpipa he tin to olọn mẹ po aigba ji lẹpo po yí godo. E zẹ̀ nuwiwa gbẹtọvi tọn lẹpo go. Sọn pọndohlan Jiwheyẹwhe tọn mẹ, azọ́ndenamẹ mítọn, he zinnudo nuhudo gbigbọmẹ tọn mẹhe huvẹ dodowiwa tọn to hùhù lẹ tọn ji, dona tin to otẹn tintan mẹ. Mí tindo whẹwhinwhẹ́n dolido Owe-wiwe tọn lẹ nado yí nukun nujọnu tọn do pọ́n azọ́ndenamẹ enẹ.

“Ehe nọ biọ dọ mí ni ze nuwiwa enẹ do otẹn tintan mẹ to gbẹzan mítọn mẹ. Po dona gọna alọgọ Jiwheyẹwhe tọn po, azọ́n lọ na yin wiwà, mahopọnna nugandomẹgo ayihafẹsẹnamẹ tọn, aliglọnnamẹnu, po agọjẹdomẹtọ susugege lẹ po tọn, sọn nuyizan sinsẹ̀n tọn po tonudidọ tọn lẹ po, heyin awuwlena nado glọnalina nukọnyiyi tito-to-whinnu mẹpinplọn tọn lẹdo aihọn pé ehe mẹ. Mí deji bosọ yise dọ azọ́n ehe na to kọdetọn dagbe tindo zọnmii bo nasọ jẹ vivọnu etọn mlẹnmlẹn. Naegbọn mí sọgan deji sọmọ? Na Oklunọ Jesu Klisti dopagbe dọ emi na tin hẹ mí to lizọnyizọn-denamẹ Jiwheyẹwhe tọn mítọn mẹ kakajẹ vivọnu titonu ehe tọn wutu.

“Ojlẹ ko sẹpọ na mẹhe tin to ayimajai mẹ lẹ. Azọ́ndenamẹ mítọn dintọn dona yin hinhẹndi whẹpo opodo na wá. Enẹwutu, taidi Kunnudetọ Jehovah tọn lẹ, mí magbe dọ:

“Tintan: Taidi lizọnyizọnwatọ klandowiwe lẹ, mí ko magbe nado ze dagbenu Ahọluduta tọn lẹ do otẹn tintan mẹ to gbẹzan mítọn mẹ bo na to whinwhẹ́n deji to gbigbọ-liho. Nado sọgan wà enẹ, odẹ̀ mítọn sọgbe hẹ hogbe Psalm 143:10 tọn lẹ dọ: ‘Plọn mi nado wà ojlo towe: na hiẹ wẹ Jiwheyẹwhe ṣie.’ Ehe nọ biọ dọ mí ni yin nuplọntọ dagbe lẹ, he nọ dovivẹnu nado hia Biblu egbesọegbesọ, bo nọ tindo mahẹ to oplọn po dodinnanu mẹdetiti tọn po mẹ. Na nukọnyiyi mítọn nido sọgan sọawuhia hlan mẹlẹpo, mí dona dovivẹnu lẹnpọn dagbe tọn lẹpo nado nọ wleawuna bosọ nọ mọaleyi to gigọ́mẹ sọn wepinplọn yẹwhehọluduta tọn lẹ mẹ to opli agun tọn lẹ ji, to plidopọ lẹdo tọn lẹ ji, podọ to plidopọ agbegbe, akọta, po akọjọpli tọn lẹ po ji.—1 Timoti 4:15; Heblu lẹ 10:23-25.

“Awetọ: Nado sọgan yin pinplọn gbọn Jiwheyẹwhe dali, mí na nọ dùnú to tafo etọn kẹdẹ ji bo nasọ nọ yí sọwhiwhe do setonuna avase Biblu tọn gando nuplọnmẹ aovi tọn he nọ hẹnmẹ buali lẹ go. (1 Kọlintinu lẹ 10:21; 1 Timoti 4:1) Mí na nọ họ́ míde taun nado dapana nuhe nọ gbleawunamẹ lẹ, he bẹ lalodido sinsẹ̀n tọn, nulẹnpọn ovọ́, fẹnnuwiwa winyandomẹ tọn, azọ̀n ylankan yẹdide fẹnnuwiwa tọn, ayidedai he nọ demẹpò, gọna nuhe matin to ‘kọndopọmẹ hẹ nuplọnmẹ he pegan’ lẹpo hẹn. (Lomunu lẹ 1:26, 27; 1 Kọlintinu lẹ 3:20; 1 Timoti 6:3; 2 Timoti 1:13) Taidi sisi tintindo na ‘nunina to sunnu lẹ mẹ,’ yèdọ mẹhe pegan nado plọnmẹ nuhe sọgbe lẹ, mí na nọ na sisi vivẹnudido yetọn lẹ bosọ yí ahundopo do kọngbedopọ hẹ yé to walọyizan wiwe po dodowiwa po mẹ gọna nujinọtedo gbigbọmẹ Ohó Jiwheyẹwhe tọn tọn lẹ zizedaga mẹ.—Efesunu lẹ 4:7, 8, 11, 12; 1 Tẹsalonikanu lẹ 5:12, 13; Titu 1:9.

“Atọ̀ntọ: Taidi Klistiani mẹjitọ lẹ, vivẹnudido ahundoponọ mítọn ma na yin nado yí ohó kẹdẹ do plọn ovi mítọn lẹ gba ṣigba gbọn apajlẹ dali ga. Ahunmẹdunamẹnu tangan mítọn wẹ yin nado gọalọna yé sọn ovú whenu yetọn nado ‘plọn owe-wiwe nado lẹzun nuyọnẹntọ na whlẹngán.’ (2 Timoti 3:15) Mí na hẹn do ayiha mẹ dọ pinpọn yé go whẹ́n to mẹplọnlọ po anademẹ apọ̀nmẹ Jehovah tọn po mẹ na na yé dotẹnmẹ hundote he yọ́n hugan lọ nado tindo numimọ opagbe Jiwheyẹwhe tọn dọ ‘e na yin dagbe na yé bọ yé nasọ nọgbẹ̀ dẹn to aigba ji.’—Efesunu lẹ 6:1-4.

“Ẹnẹtọ: To whenuena mí pehẹ magbọjẹ kavi nuhahun sinsinyẹn lẹ, tintan whẹ́, mí na ‘hẹn ovẹvivẹ mítọn lẹ zun yinyọnẹn hlan Jiwheyẹwhe,’ bo deji dọ ‘jijọho Jiwheyẹwhe tọn he zẹ̀ linlẹn gbẹtọ tọn lẹpo go’ na whlá mí. (Filippinu lẹ 4:6, 7) Na mí ko wá zẹgẹ Klisti tọn glọ wutu, mí na yin kọfana. To yinyọnẹn mẹ dọ Jiwheyẹwhe nọ hò mítọn pọ́n wutu, mí ma na whleawu nado ze magbọjẹ mítọn lẹ dlan ewọ ji gba.—Matiu 11:28-30; 1 Pita 5:6, 7.

“Atọ́ntọ: To pinpẹn-nutọn-yinyọnẹn mítọn didohia Jehovah na lẹblanulọkẹyi yinyin mẹplọntọ Ohó etọn tọn lẹ mẹ, mí na vọ́ vivẹnudido mítọn hẹn jẹ yọyọ nado ‘yí ohó etọn zan ganji’ bosọ ‘wà lizọnyizọn mítọn dotana hezeheze.’ (2 Timoti 2:15; 4:5) Na mí yọ́n nuhe e bẹhẹn lẹ ganji wutu, ojlo vẹkuvẹku mítọn wẹ e yin nado dín mẹhe jẹ lẹ mọ bosọ penukundo okún heyin didó lẹ go. Humọ, mí na hẹn mẹpinplọn mítọn pọnte gbọn anadidena plọnmẹ Biblu whégbè tọn susu dogọ po kọdetọn dagbe po dali. Ehe na hẹn mí wá kọndopọ pẹkipẹki mẹ hẹ ojlo Jiwheyẹwhe tọn dọ ‘gbẹtọ wunmẹ lẹpo ni yin whinwhlẹngán bosọ wá oyọnẹn he pegan nugbo lọ tọn kọ̀n.’—1 Timoti 2:3, 4.

“Ṣidopotọ: To owhe kanweko he wayi lọ gblamẹ podọ biọ ehe mẹ, Kunnudetọ Jehovah tọn lẹ tindo numimọ nukundiọsọmẹ po homẹkẹndomẹ voovo lẹ po tọn to aigba susu ji. Ṣigba Jehovah ko tin hẹ yé. (Lomunu lẹ 8:31) Ohó he ma nọ dolalo etọn na mí jide dọ ‘awhànfunnu depope he yin awuwlena sọta mí’ nado glọnalina, dekanpona, kavi doalọtena yẹwhehodidọ po mẹpinplọn Ahọluduta tọn mítọn po ma na tindo kọdetọn dagbe gba. (Isaia 54:17) Vlavo to ojlẹ dagbe po nuhahun tọn po mẹ, mí ma sọgan gọ̀n nugbo lọ ma lá gba. Gbemima mítọn wẹ e yin nado hẹn azọ́ndenamẹ yẹwhehodidọ po mẹpinplọn tọn po mítọn di to niyaniya mẹ. (2 Timoti 4:1, 2) Yanwle mítọn wẹ e yin nado má wẹndagbe Ahọluduta Jiwheyẹwhe tọn hẹ gbẹtọ lẹpo to gigọ́mẹ dile e sọgan yọnbasi do. Enẹwutu, yé na to dotẹnmẹ hundote tindo zọnmii nado to nuplọn gando awuwledainanu lẹ na ogbẹ̀ madopodo mimọyi to aihọn yọyọ dodowiwa tọn de mẹ go. Taidi Ohó Jiwheyẹwhe tọn plọnmẹtọ lẹ to pọmẹ, gbemima mítọn wẹ e yin nado to apajlẹ Mẹplọntọ Daho lọ tọn, yèdọ Jesu Klisti tọn hodo zọnmii, bosọ to jẹhẹnu dagbe etọn lẹ dohia. Mí na wà ehe lẹpo nado gbògbéna bosọ na sisi Nuplọnmẹtọ Daho po Gbẹ̀-Namẹtọ mítọn po, yèdọ Jehovah Jiwheyẹwhe.

“Mẹplidopọ he tin to plidopọ agbegbe ehe ji he kẹalọyi gbemima ehe lẹpo, ni jaale bo dọ MỌWẸ!”

To whenuena kanbiọ godo tọn gbemima lọ tọn yin kinkanse gbẹtọ 160 000 he pli dopọ to plidopọ agbegbe atọ̀n ji to France podọ 289 000 to nọtẹn ṣinẹnẹ to Italie lẹ, “Mọwẹ” ogbè lélé tọn yin didọ to ogbè susu he mẹ afọzedaitọ lẹ wá sọn lẹ mẹ.