Osẹ́n Jiwheyẹwhe Tọn lẹ Tin Na Alemọyi Mítọn
“Ṣo na yẹn ka yiwanna osẹ́n towe dole!”—PSALM 119:97.
1. Linlẹn tẹwẹ gbayipe gando tonusise hlan osẹ́n Jiwheyẹwhe tọn lẹ go?
TONUSISENA osẹ́n Jiwheyẹwhe tọn lẹ ma gbayipe to egbehe gba. Na mẹsusu, taliliaina aṣẹpipa mayinukundomọ he yiaga de nọ taidi nuhe ma yọn-na-yizan. Mí to gbẹnọ to ojlẹ de he mẹ walọdagbe yin nudide mẹdopodopo tọn, dogbó họnwun de matin to dagbe po oylan po ṣẹnṣẹn, bọ bẹwlu ko biọ nujinọtedo dagbe po oylan po yinyọnẹn tọn mẹ. (Howhinwhẹn lẹ 17:15; Isaia 5:20) To dido aliho nulẹnpọn tọn he gbayipe to lẹdo susu mẹ hia mẹ, hokansemẹ agọe tọn de dohia dọ “suhugan Amelikanu lẹ tọn nọ jlo nado de nuhe sọgbe, yin dagbe, bo tindo zẹẹmẹ lẹ na yedelẹ.” Yé nọ jlo “Jiwheyẹwhe he mayin hẹngogonọ de. Osẹ́n he mayin hẹngogo tọn lẹ. Nukọntọ he mayin hẹngogonọ to walọyizan mẹ kavi to aliho devo mẹ lẹ.” Nuplọnmẹtọ lẹdo tọn de doayi e go dọ to egbehe “mẹdopodopo yin nukundo nado de nuhe gbẹzan dagbe po wiwe de po zinzan zẹẹmẹdo na ede.” E zindonukọn dọmọ: “Aṣẹpipa he yiaga depope dona diọadana gbedide etọn lẹ nado sọgbe hẹ nuhudo omẹ etọn lẹ tọn.”
2. Nawẹ alọdlẹndonu tintan hlan osẹ́n to Biblu mẹ tindo kọndopọ pẹkipẹki hẹ dona po nukundagbe Jiwheyẹwhe tọn po gbọn?
2 To whenuena e yindọ mẹsusu wẹ to ayihaawe tindo do nuhọakuẹ-yinyin osẹ́n Jehovah tọn lẹ tọn ji, mí dona hẹn nujikudo mítọn lodo dọ nujinọtedo Jiwheyẹwhe tọn lẹ tin na dagbe mítọn. E na yọ́n dọ mí ni gbadopọnna kandai he mẹ osẹ́n yin nùdego te tintan to Biblu mẹ. To Gẹnẹsisi 26:5, mí hia hogbe Jiwheyẹwhe tọn lẹ dọmọ: “Ablaham . . . sọ yìn aṣẹ ṣie, gbedide ṣie, osẹ́ndoai ṣie, po osẹ́n ṣie lẹ po.” Ohó enẹlẹ yin didọ owhe kanweko susu whẹpo Jehovah do na todohukanji osẹ́n tọn de kúnkan Ablaham tọn lẹ. Nawẹ Jiwheyẹwhe suahọ na tonusise Ablaham tọn, he bẹ tonusisena osẹ́n Etọn lẹ hẹn gbọn? Jehovah Jiwheyẹwhe dopagbe na ẹn dọmọ: “Okún towe mẹ wẹ yè na dona akọta aigba ji tọn lẹpo [te].” (Gẹnẹsisi 22:18) Gbọnmọ dali, tonusisena osẹ́n Jiwheyẹwhe tọn lẹ yin kinkọndopọ pẹkipẹki hẹ dona po nukundagbe Jiwheyẹwhe tọn po.
3. (a) Numọtolanmẹ tẹwẹ psalm-kàntọ dopo dohia gando osẹ́n Jehovah tọn go? (b) Kanbiọ tẹlẹ wẹ e jẹ dọ mí ni gbadopọnna?
3 Psalm-kàntọ dopo—vlavo ahọvi Juda tọn de he na lẹzun ahọlu to godo mẹ—do numọtolanmẹ de he ma nọ saba yin didohia gando osẹ́n go hia. E dawhá hlan Jiwheyẹwhe dọmọ: ‘Ṣo na yẹn ka yiwanna osẹ́n towe dole!’ (Psalm 119:97) Ehe mayin hodidọ numọtolanmẹ tọn de poun gba. Dohia owanyi tintindo na ojlo Jiwheyẹwhe tọn dile e yin kinkàndai to osẹ́n etọn mẹ do wẹ e yin. Jesu Klisti, heyin Visunnu pipé Jiwheyẹwhe tọn tindo numọtolanmẹ mọnkọtọn. Jesu yin zẹẹmẹ basina to dọdai-liho dọmọ: “Homẹ ṣie hùn nado wà ojlo towe, Jiwheyẹwhe ṣie E: nugbo, osẹ́n towe tin to yẹn homẹ dọ́n.” (Psalm 40:8; Heblu lẹ 10:9) Etẹwẹ dogbọn míwlẹ dali? Be mí nọ hùnhomẹ to ojlo Jiwheyẹwhe tọn wiwà mẹ ya? Be mí yin nujikudonọ gando yọn-na-yizan po ale he nọ wá sọn osẹ́n Jehovah tọn lẹ mẹ po go ya? Otẹn tẹ mẹ wẹ tonusisena osẹ́n Jiwheyẹwhe tọn lẹ tin te to sinsẹ̀n-bibasi mítọn mẹ, to gbẹzan egbesọ mítọn mẹ, to nudide he mí nọ basi lẹ mẹ, podọ to haṣinṣan mítọn hẹ mẹdevo lẹ mẹ? Nado sọgan yiwanna osẹ́n Jiwheyẹwhe tọn lẹ, mí dona yọ́n nuhewutu Jiwheyẹwhe tindo jlọjẹ lọ nado de osẹ́n lẹ tọ́n bo hẹn gbẹtọ lẹ nado setonuna yé.
Jehovah—Osẹ́n-Namẹtọ Jlọjẹnọ Lọ
4. Etẹwutu Jehovah do yin Osẹ́n-namẹtọ he tindo jlọjẹ lẹpo?
4 Taidi Mẹdatọ, Jehovah wẹ yin Osẹ́n-namẹtọ he tindo jlọjẹ lẹpo to wẹkẹ mẹ. (Osọhia 4:11) Yẹwhegán Isaia dọmọ: “OKLUNỌ wẹ Osẹ́nnọ mítọn.” (Isaia 33:22) E ko ze osẹ́n jọwamọ tọn lẹ dai he to anadena nudida he tindo ogbẹ̀ po dehe ma tindo ogbẹ̀ lẹ po. (Job 38:4-38; 39:1-12; Psalm 104:5-19) Taidi nudida Jiwheyẹwhe tọn de, gbẹtọ tin to osẹ́n jọwamọ Jehovah tọn lẹ glọ. Podọ dile etlẹ yindọ gbẹtọ yin nudida he tin to ede kannu, bo penugo nado lẹnnupọn na ede, kiki eyin e litaina osẹ́n walọ dagbe po gbigbọmẹ tọn Jiwheyẹwhe tọn lẹ po kẹdẹ wẹ e na yin ayajẹnọ.—Lomunu lẹ 12:1; 1 Kọlintinu lẹ 2:14-16.
5. Nawẹ nunọwhinnusẹ́n he tin to Galatianu lẹ 6:7 yin nugbo gando osẹ́n Jiwheyẹwhe tọn lẹ go gbọn?
5 Dile mí yọnẹn do, osẹ́n jọwamọ Jehovah tọn lẹ ma sọgan yin gbigbà gba. (Jẹlemia 33:20, 21) Eyin mẹde vẹtolina osẹ́n jọwamọ tọn delẹ, taidi osẹ́n nudọ̀nwá-odò tọn, e nọ jiya kọdetọn etọn lẹ tọn. Mọdopolọ, osẹ́n walọ dagbe Jiwheyẹwhe tọn lẹ ma sọgan yin didiọ gba podọ yé ma sọgan yin aliglọnna kavi yin gbigbà matin yasanamẹ. Na jide tọn yé tindo huhlọn kẹdẹdi osẹ́n jọwamọ tọn lẹ, dile etlẹ yindọ kọdetọn yetọn sọgan gọ̀n ma yin to afọdopolọji. “Jiwheyẹwhe mayin mẹvivlẹ gba; na nudepope gbẹtọ dó, enẹ wẹ e na gbẹ̀n ga.”—Galatianu lẹ 6:7; 1 Timoti 5:24.
Lehe Osẹ́n Jehovah Tọn Gbloada Sọ
6. Nawẹ osẹ́n Jiwheyẹwhe tọn lẹ gbloada sọ?
6 Dohia ayidego osẹ́n Jiwheyẹwhe tọn tọn wẹ Osẹ́n Mose tọn. (Lomunu lẹ 7:12) To ojlẹ sisọ mẹ, Jehovah Jiwheyẹwhe yí “osẹ́n Klisti tọn” do diọtẹnmẹna Osẹ́n Mose tọn.a (Galatianu lẹ 6:2; 1 Kọlintinu lẹ 9:21) Taidi Klistiani he tin to ‘osẹ́n pipé mẹdekannujẹ tọn’ glọ lẹ, mí mọnukunnujẹemẹ dọ Jiwheyẹwhe ma hẹn anademẹ etọn lẹ dote do adà gbẹzan mítọn tọn delẹ ji, taidi nuyise sinsẹ̀n-nuplọnmẹ tọn kavi nuyiwa hùnwhẹ tọn lẹ gba. Nujinọtedo etọn lẹ gando adà gbẹzan tọn lẹpo go, he bẹ whẹho whẹndo tọn, nuyiwa ajọwiwa tọn lẹ, walọyizan hlan omẹ vijinu awetọnọ lẹ, nuyiwa hlan Klistiani hatọ lẹ, po mahẹ tintindo to sinsẹ̀n-bibasi nugbo mẹ po hẹn.—Jakobu 1:25, 27.
7. Na apajlẹ osẹ́n titengbe Jiwheyẹwhe tọn lẹ tọn.
7 Di apajlẹ, Biblu dọmọ: “Galọtọ lẹ, kavi boṣiọ-sẹ̀ntọ lẹ, kavi ayọdetọ lẹ, kavi yọnnu-jọmẹ lẹ, kavi yé he nọ yí sunnu do hẹn yede gble lẹ. Kavi ajotọ lẹ, kavi nukunkẹnnọ lẹ, kavi ahànnumunọ lẹ, kavi mẹvlẹtọ lẹ, kavi alọslonamẹtọ lẹ de ma na dugu ahọludu Jiwheyẹwhe tọn.” (1 Kọlintinu lẹ 6:9, 10) Mọwẹ, ayọdide po galilọ po mayin “nuyiwa owanyi didohia tọn lẹ” poun gba. Kọndopọ zanhẹmẹ tọn to omẹ vijinu dopolọ lẹ ṣẹnṣẹn mayin “aliho gbẹzan tọn devo” de poun gba. Osẹ́n Jehovah tọn gbigbà wẹ yé yin. Podọ mọwẹ ajojijẹ, lalodido, po mẹnudidọ po yin do ga. (Psalm 101:5; Kọlọsinu lẹ 3:9; 1 Pita 4:15) Jakobu gblewhẹdo awagundido, bọ Paulu na mí ayinamẹ nado dapana hodidọ nululu tọn po aslan-yinyin agbàagba lẹ po. (Efesunu lẹ 5:4; Jakobu 4:16) Na Klistiani lẹ, osẹ́n walọyizan tọn ehe lẹpo yin apadewhe osẹ́n pipé Jiwheyẹwhe tọn tọn.—Psalm 19:7.
8. (a) Etẹwẹ yin wunmẹ osẹ́n Jehovah tọn tọn? (b) Etẹwẹ yin zẹẹmẹ tangan hogbe Heblu tọn na “osẹ́n”?
8 Gbedide tangan mọnkọtọn he tin to Ohó Jehovah tọn mẹ lẹ dohia dọ osẹ́n etọn mayin todohukanji aṣẹdai hẹngogo tọn lẹ poun gba. E nọ wleawuna dodonu gbẹzan he tin to jlẹkaji, he nọ de sinsẹ́n tọ́n de tọn, bo nọ yinuwado adà walọyizan tọn lẹpo ji na dagbe. Osẹ́n Jiwheyẹwhe tọn nọ jlọmẹdote, sọgbe, bo nọ plọnmẹ. (Psalm 119:72) Hogbe lọ “osẹ́n” dile psalm-kàntọ yí i zan do yin lilẹdogbedevomẹ sọn hogbe Heblu tọn toh·rahʹ mẹ. Weyọnẹntọ Biblu tọn dopo dọmọ: “Ohó ehe wá sọn hogbe nuyiwa tọn de mẹ he zẹẹmẹdo nado deanana, nado yí do basi yanwle, nado zindonukọn. To whelọnu lo . . . zẹẹmẹ etọn na yin nunọwhinnusẹ́n walọyizan tọn de.” Hlan psalm-kàntọ lọ, nunina he wá sọn Jiwheyẹwhe dè de wẹ osẹ́n lọ yin. Be mí ma dona yí nukun nujọnu tọn dopolọ do pọ́n ẹn, bo dike e ni nọ deanana gbẹzan mítọn ya?
9, 10. (a) Naegbọn mí tindo nuhudo anademẹ dejidego tọn? (b) Nawẹ mí sọgan tindo gbẹzan awuvivi po kọdetọn dagbe tọn po gbọn?
9 Nudida lẹpo wẹ tindo nuhudo anademẹ dejidego tọn. Ehe yin nugbo gando Jesu po angẹli devo, he yiaga hugan gbẹtọ lẹ po go. (Psalm 8:5; Johanu 5:30; 6:38; Heblu lẹ 2:7; Osọhia 22:8, 9) Eyin nudida pipé ehelẹ sọgan mọaleyi sọn anademẹ Jiwheyẹwhe tọn mẹ, nẹmunẹmu wẹ míwlẹ heyin gbẹtọvi mapenọ lẹ! Whenuho gbẹtọvi tọn po numimọ mẹdetiti tọn mítọn po ko do nugbo-yinyin ayidonugo yẹwhegán Jẹlemia tọn hia dọmọ: “OKLUNỌ E, yẹn yọnẹn dọ aliho gbẹtọ tọn matin to ewlọsu mẹ gba: e matin to mẹhe to zọnlinzin mẹ nado do afọdide etọn lẹ gba.”—Jẹlemia 10:23.
10 Eyin mí jlo na tindo gbẹzan awuvivi po kọdetọn dagbe po tọn de, mí dona ganjẹ Jiwheyẹwhe go na anademẹ. Ahọlu Sọlọmọni yọ́n owù he tin to gbẹninọ sọgbe hẹ nujinọtedo mẹdetiti tọn lẹ mẹ, matin anademẹ Jiwheyẹwhe tọn. E dọmọ: “Aliho de tin he taidimẹ e jlọ to gbẹtọ nukunmẹ, ṣigba podo etọn aliho okú tọn wẹ.”—Howhinwhẹn lẹ 14:12.
Whẹwhinwhẹ́n lẹ He Wutu Mí Dona Wlebòna Osẹ́n Jehovah Tọn
11. Etẹwutu mí dona jlo nado mọnukunnujẹ osẹ́n Jiwheyẹwhe tọn mẹ?
11 Mí na wà dagbe nado wleawuna ojlo sisosiso na nukunnumimọjẹ osẹ́n Jehovah tọn mẹ. Psalm-kàntọ do ojlo vẹkuvẹku mọnkọtọn hia to whenue e dọmọ: “Hiẹ ni hùn nukun ṣie, na yẹn nido pọ́n onú jiawujiawu lẹ sọn osẹ́n towe mẹ.” (Psalm 119:18) Dile mí wá yọ́n Jiwheyẹwhe po aliho etọn lẹ po dogọ do, mọwẹ mí na mọnukunnujẹ nugbo-yinyin ohó Isaia tọn lẹ mẹ dogọ do niyẹn dọmọ: ‘Yẹn wẹ OKLUNỌ Jiwheyẹwhe towe, he plọn we na ale, he plan we gbọn aliho he ji hiẹ na gbọ̀n. Eyin dọ hiẹ na dotoai hlan gbedide ṣie lẹ!’ (Isaia 48:17, 18) Jehovah jlo vẹkuvẹku dọ omẹ etọn lẹ ni dapana nugbajẹmẹji bosọ duvivi ogbẹ̀ tọn gbọn tonusisena gbedide etọn lẹ dali. Mì gbọ mí ni gbadopọnna whẹwhinwhẹ́n tangan delẹ he wutu mí dona wlebòna osẹ́n Jiwheyẹwhe tọn.
12. Nawẹ oyọnẹn he Jehovah tindo gando mí go hẹn ewọ yin Osẹ́n-namẹtọ dagbe hugan lọ gbọn?
12 Osẹ́n Jiwheyẹwhe tọn lẹ wá sọn Omẹ lọ he yọ́n mí hugan dè. Na Jehovah wẹ dá mí wutu, e sọgbe hẹ lẹnpọn dọ e na yọ́n gbẹtọ lẹ mlẹnmlẹn. (Psalm 139:1, 2; Owalọ lẹ 17:24-28) Họntọn vivẹ́ lẹ, hẹnnumẹ lẹ, podọ etlẹ yin mẹjitọ lẹ ma sọgan yọ́n mí ganji dile Jehovah wà do gba. Etẹ, Jiwheyẹwhe tlẹ yọ́n mí hugan lehe mí yọ́n míde do! Didatọ mítọn yọ́n nuhudo gbigbọmẹ tọn, numọtolanmẹ tọn, apọ̀nmẹ tọn, po agbasamẹ tọn mítọn lẹ po hugan mẹdevo depope. Dile e ze ayidonugo etọn do mí ji, e nọ dohia hezeheze dọ emi mọnukunnujẹ gbẹtọ-yinyin mítọn, ojlo mítọn lẹ, po yanwle mítọn lẹ po mẹ. Jehovah yọ́n dogbó mítọn lẹ, ṣigba e sọ yọ́n nugopipe he mí tindo nado wà dagbe. Psalm-kàntọ dọmọ: “Ewọ yọ́n didá mítọn; e sọ flin dọ kọ́gudu wẹ mí.” (Psalm 103:14) Enẹwutu, mí sọgan tindo numọtolanmẹ hihọ́ gbigbọmẹ tọn dile mí to tintẹnpọn nado zinzọnlin to osẹ́n Jiwheyẹwhe tọn mẹ, bo desọn ojlo mẹ nado litaina anademẹ etọn lẹ.—Howhinwhẹn lẹ 3:19-26.
13. Naegbọn mí sọgan deji dọ Jehovah jlo dagbe hugan mítọn?
13 Osẹ́n Jiwheyẹwhe tọn lẹ wá sọn Omẹ lọ he yiwanna mí dè. Dagbemẹ-ninọ tẹgbẹ̀ tọn mítọn nọ duahunmẹna Jiwheyẹwhe sisosiso. Be e ma basi avọ́sinsan daho nado na Visunnu etọn taidi “ofligọ na mẹsusu” ya? (Matiu 20:28) Be Jehovah ma ko dopagbe dọ ‘emi ma na dike mí ni yin whiwhlepọn zẹ̀ ehe mí sọgan doakọnna go’ ya? (1 Kọlintinu lẹ 10:13) Be Biblu ma na mí jide dọ e ‘nọ hò mítọn pọ́n’ ya? (1 Pita 5:7) Mẹdevo depope matin he jlo nado wleawuna anademẹ alenọ lẹ na gbẹtọvi lẹ hugan Jehovah gba. E yọ́n nuhe yọ́n na mí gọna dogbó he tin to nuhe nọ hẹn ayajẹ po awubla po wá na mí ṣẹnṣẹn. Dile etlẹ yindọ mí yin mapenọ bo nọ ṣinuwa, eyin mí dín dodo, e nọ do owanyi etọn hia mí to aliho he na dekọtọn do ogbẹ̀ po dona lẹ po mẹ.—Ezekiẹli 33:11.
14. Aliho titengbe tẹ mẹ wẹ osẹ́n Jiwheyẹwhe tọn gbọnvona linlẹn gbẹtọvi tọn lẹ te?
14 Osẹ́n Jiwheyẹwhe tọn ma nọ diọ gbede. To ojlẹ bẹwlu tọn he mẹ mí to gbẹnọ te ehelẹ, Jehovah yin osó he lodo de, bosọ tin sọn madopodo jẹ madopodo. (Psalm 90:2) E dọ gando ede go dọmọ: “Yẹn OKLUNỌ lọ ma [ko] diọ.” (Malaki 3:6) Nujinọtedo Jiwheyẹwhe tọn lẹ, dile yé yin kinkàndai to Biblu mẹ do, sọgan yin jide-dego mlẹnmlẹn—to ma taidi linlẹn gbẹtọvi tọn he ma lodo bo nọ to didiọ gbọzangbọzan lẹ. (Jakobu 1:17) Di apajlẹ, mẹhe nọ plọnmẹ walọyizan gbẹtọ tọn lẹ ko nọgodona ovi pinplọn alọ-vlẹkẹsẹ tọn na owhe susu, ṣigba delẹ to yé mẹ diọ linlẹn to godo mẹ bosọ yigbe dọ nuṣiwa de wẹ ayinamẹ yetọn yin. Nujinọtedo po anademẹ aihọn tọn lẹ po do whẹho ehe ji ma nọ nọ̀ onù dopo mẹ gba taidi dọ jẹhọn wẹ to yigọyigọ do na ẹn nkọtọn. Ṣigba, Ohó Jehovah tọn ma nọ sẹtẹn gba. Na owhe kanweko lẹ, Biblu ko wleawuna ayinamẹ do lehe yè na plọn ovi lẹ to owanyi mẹ do ji. Apọsteli Paulu wlan dọmọ: “Mì otọ́ emi, mì hẹn homẹgblena ovi mìtọn lẹ blo, ṣigba mì nọ plọn yé to hihò po hokọnamẹ Oklunọ tọn po mẹ.” (Efesunu lẹ 6:4) Lehe e vọ́ jide na mí do sọ nado yọnẹn dọ mí sọgan ganjẹ nujinọtedo Jehovah tọn lẹ go; yé ma na diọ gba!
Dona lẹ na Mẹhe to Tonusena Osẹ́n Jiwheyẹwhe Tọn Lẹ
15, 16. (a) Kọdetọn tẹwẹ mí na tindo eyin mí yí nujinọtedo Jehovah tọn lẹ do yizan mẹ? (b) Nawẹ osẹ́n Jiwheyẹwhe tọn lẹ sọgan yin anademẹ dagbe de to alọwle mẹ gbọn?
15 Gbọn yẹwhegán etọn Isaia gblamẹ, Jiwheyẹwhe dọmọ: ‘Ohó ṣie he tọ́n sọn onù ṣie mẹ na tindo kọdetọn dagbe.’ (Isaia 55:11) Mọdopolọ na jide tọn, eyin mí dovivẹnu vẹkuvẹku nado hodo nujinọtedo heyin mimọ to Ohó etọn mẹ lẹ, mí na tindo kọdetọn dagbe, basi wadotana dagbe lẹ, bosọ tindo ayajẹ.
16 Lẹnnupọndo lehe osẹ́n Jiwheyẹwhe tọn lẹ yin anademẹ dagbe de na alọwle kọdetọn dagbenọ de do ji. Paulu wlan dọmọ: “Mì gbọ alọwle ni yin tintindo to gbégbigbò mẹ to omẹ popo mẹ, mì sọ dike yè hẹn adọ́ flu blo: na galọtọ po ayọdetọ lẹ po wẹ Jiwheyẹwhe na dawhẹna.” (Heblu lẹ 13:4) Alọwlemẹ lẹ dona nọ na sisi yede bosọ yiwanna ode awetọ: “Na dopodopo mìtọn ni yiwanna asi etọn domọ yèdọ di ede; na yọnnu ni yí yẹyi do gbògbéna asu etọn.” (Efesunu lẹ 5:33) Owanyi wunmẹ he yè tindo nuhudo etọn yin zẹẹmẹ etọn basi to 1 Kọlintinu lẹ 13:4-8 mẹ dọmọ: “Owanyi nọ jiya dẹn, e sọ jọmẹ; onú ma nọ vẹunna owanyi; owanyi ma nọ yigo, e masọ nọ kla. E ma nọ hẹn ede wà onú jẹagọ, e ma nọ dín onú etọn titi, yè ma nọ hẹn ẹn gblehomẹ aplà, e ma nọ lẹn ylankan; e ma nọ jaya to ylando mẹ, ṣigba e nọ jaya to nugbo mẹ; e nọ doakọnna onú lẹpo, e nọ yí onú lẹpo se, e nọ doto onú lẹpo, bosọ nọ sinyẹnlin na onú lẹpo. Owanyi ma nọ gbọ̀vọ́ gbede.” Alọwle he tindo owanyi ehe nkọtọn ma na gboawupo gbede.
17. Ale tẹlẹ wẹ nọ wá sọn tonusisena nujinọtedo Jehovah tọn lẹ do ahàn sinsinyẹn ji mẹ?
17 Kunnudenu devo he dohia dọ nujinọtedo Jehovah tọn lẹ nọ hẹn ale wá wẹ nugbo lọ dọ ewọ gbẹ́ ahànnumu. E tlẹ sọ gblewhẹdo ‘awujijo na ovẹn susu.’ (1 Timoti 3:3, 8; Lomunu lẹ 13:13) Susu mẹhe gbẹkọ nujinọtedo Jiwheyẹwhe tọn do whẹho ehe ji go lẹ nọ jiya awutu he ahànnu zẹjlẹgo nọ hẹnwa kavi nọ hẹn sinyẹn deji lẹ tọn. Na kọgbigbẹ́ avase Biblu tọn do jlẹkajininọ go wutu, mẹdelẹ ko tlọ̀ biọ walọ ahànnu zẹjlẹgo tọn nado “gọalọna yé nado voawu mẹ.” Nuhahun he ahànnu zẹjlẹgo nọ hẹnwa lẹ sù, he bẹ sisi hinhẹnbú, haṣinṣan whẹndo tọn hinhẹngble kavi gbakija whẹndo tọn, akuẹ hinhẹngú, po agbasazọ́n hinhẹnbú po hẹn. (Howhinwhẹn lẹ 23:19-21, 29-35) Be nujinọtedo Jehovah tọn lẹ do ahàn sinsinyẹn nùnù ji ma yin hihọ́ de ya?
18. Be osẹ́n Jiwheyẹwhe tọn lẹ yọn-na-yizan to whẹho akuẹzinzan tọn lẹ mẹ ya? Basi zẹẹmẹ.
18 Nujinọtedo Jiwheyẹwhe tọn lẹ ko sọ yọn-na-yizan to whẹho akuẹzinzan tọn lẹ mẹ ga. Biblu dotuhomẹna Klistiani lẹ nado yin nugbonọ po azọ́n sinsinyẹn watọ po. (Luku 16:10; Efesunu lẹ 4:28; Kọlọsinu lẹ 3:23) Na yé hodo ayinamẹ ehe wutu, Klistiani susu ko yin zizedaga kavi ko hẹn agbasazọ́n yetọn lẹ go to whenue mẹdevo lẹ yin didote. Ale akuẹzinzan tọn lẹ sọ nọ wá ga to whenue mẹde dapana nuyiwa he ma sọgbe hẹ owe-wiwe lẹ taidi akọhiho, azọ̀-nùnù, po amasin adínọ ṣiṣizan po. Matin ayihaawe hiẹ sọgan lẹnnupọndo apajlẹ devo lẹ ji gando lehe nujinọtedo Jiwheyẹwhe tọn lẹ yọn-na-yizan to akuẹzinzan-liho do go.
19, 20. Naegbọn e do yin nuyiwa nuyọnẹn tọn nado kẹalọyi bosọ tẹdo osẹ́n Jiwheyẹwhe tọn lẹ go?
19 E bọawu na gbẹtọvi mapenọ lẹ nado buali sọn osẹ́n po nujinọtedo Jiwheyẹwhe tọn lẹ po ji. Lẹnnupọndo Islaelivi lẹ ji to Osó Sinai tọn ji. Jiwheyẹwhe dọna yé dọmọ: “Eyin mìwlẹ na yí ogbè ṣie se nugbonugbo, bo yìn alẹnu ṣie, whenẹnu wẹ mìwlẹ na yin adọkunnu vivẹ́ de hlan mi sọn ṣẹnṣẹn gbẹtọ lẹpo tọn.” Yé gblọn dọmọ: “Ehe OKLUNỌ ko dọ lẹpo wẹ mí na wà.” Ṣogan, lehe aliho he yé ze lọ jẹagọ do sọ! (Eksọdusi 19:5, 8; Psalm 106:12-43) To vogbingbọn mẹ, mì gbọ mí ni kẹalọyi nujinọtedo Jiwheyẹwhe tọn lẹ bosọ tẹdo yé go.
20 Nuyiwa nuyọnẹn po ayajẹ tọn po wẹ e yin nado tẹdo osẹ́n he ma tindo awetọ he Jehovah ko wleawuna nado gọalọ bo deanana gbẹzan mítọn lẹ go. (Psalm 19:7-11) Nado sọgan wà ehe po kọdetọn dagbe po, mí sọ dona yọ́n lehe nunọwhinnusẹ́n Jiwheyẹwhe tọn lẹ họakuẹ do. Ehe ji wẹ hosọ he bọdego na dọho do.
[Nudọnamẹ odò tọn]
a Na nudọnamẹ gigọ́ do “osẹ́n Klisti tọn” ji, pọ́n Atọ̀họ̀-Nuhihọ́ Lọ Tọn 1er septembre 1996, weda 21-31.
Be Hiẹ Flin Ya?
• Naegbọn mí sọgan deji dọ osẹ́n Jiwheyẹwhe tọn lẹ yin na dagbe mítọn?
• Whẹwhinwhẹ́n tẹlẹ wutu wẹ mí dona wlebòna osẹ́n Jehovah tọn?
• Aliho tẹlẹ mẹ wẹ mí nọ mọaleyi sọn osẹ́n Jiwheyẹwhe tọn lẹ mẹ te?
[Yẹdide to weda 13]
Ablaham yin didona susugege na e setonuna osẹ́n Jehovah tọn wutu
[Yẹdide to weda 15]
Magbọjẹ gbẹzan he ján egbehe tọn lẹ nọ fẹayiha mẹsusu tọn sẹ sọn osẹ́n Jiwheyẹwhe tọn ji
[Yẹdide to weda 17]
Taidi ohọ̀ he nọ tá miyọ́n he tin to osó ji de, osẹ́n Jiwheyẹwhe tọn lodo bo ma nọ diọ