Lehe Visunnu de Gọalọna Otọ́ Etọn Do
JAMES, he wá sọn Angleterre, he tin to owhe 30 etọn lẹ mẹ, tindo oblọ sinsinyẹn apọ̀nmẹ tọn de bo masọ nọ dọho ganji. Etomọṣo, e ko hodo onọ̀ po mẹdaho etọn yọnnu po yì opli Kunnudetọ Jehovah tọn lẹ tọn na owhe susu. Ṣigba, otọ́ etọn ma ko do ojlo hia to nuyise yetọn mẹ pọ́n. To whèjai dopo to opli de he ji wadohia yin bibasi te he do lehe yè na basi oylọ na mẹyinyọnẹn lẹ wá Oflin okú Klisti tọn ji de godo, James yì abò etọn mẹ to niyaniya mẹ. Onọ̀ etọn hodo e bo mọdọ e to vọkan Atọ̀họ̀-Nuhihọ́ Lọ Tọn po Réveillez-vous! po hoho lẹ keje pọ́n kitokito. E de dopo he tindo vọkan oylọ basinamẹ Oflin tọn to weda godo tọn ji bosọ ze e yì otọ́ etọn dè to niyaniya mẹ. E dlẹnalọdo yẹdide lọ whẹ́ enẹgodo e dlẹn alọ hlan otọ́ etọn bo dọmọ “Hiẹ!” Onọ̀ po otọ́ etọn po pọ́n yede po nupaṣamẹ po na yé yọnẹn dọ James to oylọ basina otọ́ etọn nado yì Oflin lọ wẹ. Otọ́ etọn dọ dọ emi sọgan yì.
To whèjai Oflin lọ tọn, James yì fie otọ́ etọn nọ bẹ avọ̀ etọn lẹ do, de avọ̀ dopo tọ́n, ze e yì na otọ́ etọn, bosọ yí agbasa do basi dohia dọ e ni dó e. Otọ́ lọ gblọn dọ emi ma na yì opli lọ gba. Enẹwutu, James po onọ̀ etọn po kẹdẹ wleali bo yì Plitẹnhọ Ahọluduta tọn lọ mẹ.
Ṣigba, to ojlẹ de godo James ma nọ kọngbedopọ ba to whenuena onọ̀ etọn tẹnpọn nado sọ́nuna ẹn nado yì opli agun tọn lẹ, bo nọ de nado nọ whégbè hẹ otọ́ etọn. Enẹgodo to Dimanche afọnnu dopo, James sọ gbẹ́ ga dile onọ̀ etọn to tintẹnpọn nado sọ́nuna ẹn na opli. Hlan nupaṣamẹ onọ̀ lọ tọn, otọ́ James tọn lẹhlan ẹn bo dọmọ, “James, eyin yẹn yì opli lọ to egbehe, be hiẹ lọsu na yì ya?” Nukunmẹ James tọn họ́n. E plasikọ na otọ́ etọn bo yigbe dọ “Mọwẹ!” bọ yé omẹ atọ̀n lẹ sọ yì Plitẹnhọ Ahọluduta tọn mẹ.
Sọn gbenẹgbe gbọ́n, otọ́ James tọn zindonukọn nado to opli Dimanche tọn lẹpo yì bosọ doayi e go to madẹnmẹ dọ eyin emi na yinukọn ganji, emi dona nọ yì opli devo lẹ lọsu. (Heblu lẹ 10:24, 25) E wà ehe, bosọ jẹ Biblu plọn ji to gbesisọmẹ to osun awe godo. E basi nukọnyiyi niyaniya tọn, basi diọdo he jẹ lẹ to gbẹzan etọn mẹ to niyaniya mẹ, bosọ jẹ mahẹ tindo ji to azọ́n yẹwhehodidọ Ahọluduta lọ tọn mẹ to madẹnmẹ. To owhe dopo godo he e jẹ Biblu plọn ji, e klan gbẹzan etọn dowiwe hlan Jehovah bo basi yẹhiadonu ehe tọn gbọn baptẹm osin mẹ tọn dali. E to devizọnwa todin taidi devizọnwatọ lizọnyizọnwiwa tọn de to agun etọn mẹ. Todin whẹndo lọ blebu to Jehovah sẹ̀n dopọ.