Plọn Tonusise Dile Opodo to Sisẹpọ
“Hlan [Ṣilo] dali wẹ tonusise gbẹtọ lẹ tọn na te.”—GẸNẸSISI 49:10.
1. (a) To hohowhenu, etẹwẹ tonusisena Jehovah nọ saba zẹẹmẹdo? (b) Dọdai tẹwẹ Jakobu dọ gando tonusise go?
TONUSISENA Jehovah ko nọ saba zẹẹmẹdo tonusisena afọzedaitọ etọn lẹ. Ehelẹ ko bẹ angẹli, tọgbo, whẹdatọ, yẹwhenọ, yẹwhegán, po ahọlu lẹ po hẹn. Ofìn ahọlu Islaeli tọn lẹ tọn tlẹ yin yiylọdọ ofìn Jehovah tọn. (1 Otannugbo lẹ 29:23) Nalete, e blawu dọ ahọlu Islaeli tọn susu vẹtolina Jiwheyẹwhe, bo hẹn nugbajẹmẹji wá yede po mẹjidugando yetọn lẹ po ji. Ṣigba Jehovah ma jo nugbonọ etọn lẹ do matin todido gba; e miọnhomẹna yé po opagbe de po nado ze Ahọlu magble de, he dodonọ lẹ na setonuna po homẹhunhun po do ofìn ji. (Isaia 9:6, 7) Tọgbo Jakobu he to kukujei lọ dọ dọdai gando ahọlu sọgodo tọn ehe go, dọmọ: “Ogànpò ma na tọ́n yì sọn Juda, kavi opò ogán tọn sọn afọ etọn lẹ ṣẹnṣẹn, whẹpo Ṣilo do wá gba; hlan e dali wẹ tonusise gbẹtọ lẹ tọn na te.”—Gẹnẹsisi 49:10.
2. Etẹwẹ “Ṣilo” zẹẹmẹdo, podọ etẹwẹ gandudu etọn na bẹhẹn?
2 “Ṣilo” yin hogbe Heblu tọn de he zẹẹmẹdo “Ewọ Mẹhe Tọn E Yin.” Mọwẹ, Ṣilo na mọ jlọjẹ gandudu tọn lẹpo yí, dile e yin tenọna gbọn ogànpò lọ dali, podọ huhlọn lọ nado degbè, dile e yin tenọna gbọn opò ogán tọn lọ dali do. Humọ, gandudu etọn ma na bẹ kúnkàn Jakobu tọn lẹ kẹdẹ hẹn gba, ṣigba “gbẹtọ” lẹpo. Ehe tin to kọndopọmẹ hẹ opagbe he Jehovah dó na Ablaham dọmọ: “Okún towe lẹ wẹ nasọ yí họngbó kẹntọ yetọn lẹ tọn glodeji: to okún towe mẹ wẹ yè na dona akọta aigba ji tọn lẹpo.” (Gẹnẹsisi 22:17, 18) Jehovah do mẹhe “okún” ehe yin hia to owhe 29 W.M. to whenuena e yí gbigbọ wiwe do de Jesu Nazalẹti tọn.—Luku 3:21-23, 34; Galatianu lẹ 3:16.
Ahọluduta Tintan Jesu Tọn
3. Gandudu tẹwẹ Jesu mọyi to whenuena e hẹji yì olọn mẹ?
3 To whenuena Jesu hẹji yì olọn mẹ, e ma jẹ gandu do gbẹtọ aihọn mẹ tọn lẹ ji to afọdopolọji gba. (Psalm 110:1) Ṣigba, e mọ “ahọludu” de yí bo tindo mẹjidugando he setonuna ẹn lẹ. Apọsteli Paulu do ahọluduta enẹ hia to whenuena e wlan dọmọ: “[Jiwheyẹwhe] whlẹn mí [Klistiani he yè yí gbigbọ do de lẹ] sọn huhlọn zinvlu tọn mẹ, bosọ diọ mí do ahọludu Ovi vivẹ etọn tọn mẹ.” (Kọlọsinu lẹ 1:13, wekun flinflin lẹ yin mítọn.) Whlẹngán ehe bẹjẹeji to Pẹntikọsti owhe 33 W.M. to whenuena gbigbọ wiwe yin kinkọnjẹgbonu do hodotọ nugbonọ Jesu tọn lẹ ji.—Owalọ lẹ 2:1-4; 1 Pita 2:9.
4. Aliho tẹlẹ mẹ wẹ devi fliflimẹ Jesu tọn lẹ do tonusise yetọn hia te, podọ nawẹ Jesu do yé hia taidi pipli de gbọn?
4 Taidi “mẹdagun na Klisti tọn,” devi heyin dide gbọn gbigbọ dali lẹ yí tonusise do jẹ mẹdevo he na lẹzun “tòdopomẹnu” to ahọluduta gbigbọmẹ tọn enẹ mẹ lẹ bẹpli ji. (2 Kọlintinu lẹ 5:20; Efesunu lẹ 2:19; Owalọ lẹ 1:8) Humọ, omẹ ehelẹ dona yin ‘kinkọndopọ po gbesisọ po to ayiha dopolọ mẹ podọ to linlẹn dopolọ mẹ’ nado sọgan duvivi nukundagbe Ahọlu yetọn heyin Jesu Klisti tọn. (1 Kọlintinu lẹ 1:10) Taidi pipli de, yé wleawuna “afanumẹ nugbonọ, nuyọnẹntọ” kavi hagbẹ họ̀nkọnsi nugbonọ de.—Matiu 24:45; Luku 12:42.
Yin Didona na Tonusisena “Họ̀nkọnsi” Jiwheyẹwhe Tọn
5. Sọn hohowhenu gbọ́n, nawẹ Jehovah ko nọ plọn omẹ etọn lẹ gbọn?
5 Jehovah nọ wleawu mẹplọntọ lẹ tọn na omẹ etọn lẹ to whepoponu. Di apajlẹ, to kọlilẹ Ju lẹ tọn sọn Babilọni godo, Ẹzla po sunnu he pegan devo lẹ po ma hia Osẹ́n Jiwheyẹwhe tọn hlan gbẹtọ lẹ poun gba, yé ‘detana’ osẹ́n enẹ, ‘bo to zẹẹmẹ etọn basi bosọ hẹn yé tunwun’ Ohó Jiwheyẹwhe tọn go.—Nẹhemia 8:8.
6, 7. Nawẹ hagbẹ afanumẹ lọ tọn ko wleawuna núdùdù gbigbọmẹ tọn he wá do ganmẹ gbọn Hagbẹ Anademẹtọ etọn gblamẹ gbọn, podọ etẹwutu mí dona yin mẹmẹglọnọ hlan hagbẹ afanumẹ lọ tọn?
6 To owhe kanweko tintan whenu, to whenuena whẹho owhẹgbo tọn fọndote to owhe 49 W.M., hagbẹ anademẹtọ pipli afanumẹ fliflimẹ tọn enẹ hodẹ̀ na anademẹ dile yé to dogbapọnna whẹho lọ bo wá tadona he sọgbe hẹ Owe-wiwe kọ̀n. To whenuena yé lá nudide yetọn gbọn wekanhlanmẹ dali, agun lẹ setonuna anademẹ heyin nina bo duvivi dona susugege Jiwheyẹwhe tọn. (Owalọ lẹ 15:6-15, 22-29; 16:4, 5) Mọdopolọ to egbehe, afanumẹ nugbonọ lọ gbọn Hagbẹ Anademẹtọ etọn gblamẹ ko hẹn whẹho titengbe delẹ họnwun taidi kadaninọ Klistiani tọn, wiwe-yinyin ohùn tọn, po amasin adínọ kavi taba yiyizan po. (Isaia 2:4; Owalọ lẹ 21:25; 2 Kọlintinu lẹ 7:1) Jehovah ko dona omẹ etọn lẹ na tonusise yetọn hlan Ohó etọn po afanumẹ nugbonọ lọ po.
7 Gbọn taliliaina hagbẹ afanumẹ lọ tọn dali, omẹ Jiwheyẹwhe tọn lẹ sọ nọ do mẹglọnọ-yinyin yetọn hlan Ogán lọ, heyin Jesu Klisti hia. Mẹglọnọ-yinyin mọnkọtọn tlẹ sọ yin nujọnu hugan to egbehe na aṣẹpipa Jesu tọn ko gblodeji, dile e yin didọdai gbọn Jakobu dali to adọ́zan okú tọn etọn ji do.
Ṣilo Lẹzun Ahọlu Jlọjẹnọ Aigba Tọn
8. Whetẹnu podọ nawẹ aṣẹpipa Klisti tọn gblodeji gbọn?
8 Dọdai Jakobu tọn dọ dọ Ṣilo na biọ “tonusise gbẹtọ lẹ tọn.” E họnwun dọ, gandudu Klisti tọn na dlẹnkan zẹ̀ Islaeli gbigbọmẹ tọn go. Etẹwẹ e na bẹhẹn? Osọhia 11:15 na gblọndo dọmọ: ‘Ahọludu aihọn tọn lẹzun ahọludu Oklunọ mítọn tọn, po Klisti etọn po tọn; ewọ nasọ to ahọludu kakadoidoi.’ Biblu dohia dọ Jesu mọ aṣẹpipa enẹ yí to vivọnu dọdai “ojlẹ ṣinawe” lọ tọn—yèdọ ‘ojlẹ sisọ kosi lẹ tọn’—to 1914.a (Daniẹli 4:16, 17; Luku 21:24) To owhe enẹ mẹ, ‘tintin tofi’ mayinukundomọ Klisti tọn taidi Ahọlu Mẹssia bẹjẹeji, dile ojlẹ etọn nado “to ahọludu to ṣẹnṣẹn kẹntọ [etọn] lẹ tọn” lọsu bẹjẹeji do ga.—Matiu 24:3; Psalm 110:2.
9. Etẹwẹ Jesu wà to whenuena e mọ Ahọluduta etọn yí, podọ nugandomẹgo tẹwẹ ehe tindo do gbẹtọvi lẹ ji, titengbe do devi etọn lẹ ji?
9 Nuhe Jesu wà jẹnukọn to whenuena e mọ huhlọn gandudu tọn yí wẹ nado yàn mẹhe diyin hugan na tolivivẹ etọn—Satani—po aovi etọn lẹ po “dlan aigba ji.” Sọn whenẹnu gbọ́n, gbigbọ ylankan ehelẹ ko hẹn nugbajẹmẹji matin awetọ wá gbẹtọvi lẹ ji, bosọ nọ ze ninọmẹ he nọ hẹn tonusisena Jehovah yin avùnnukundiọsọmẹnu de daga. (Osọhia 12:7-12; 2 Timoti 3:1-5) Na nugbo tọn, mẹyiamisisadode Jehovah tọn lẹ, “ehe to osẹ́n Jiwheyẹwhe tọn yìn, bosọ hẹn okunnu Klisti tọn go gligli lẹ” po gbẹdohẹmẹtọ yetọn “lẹngbọ devo” lẹ po wẹ yin yanwle tangan Satani tọn to awhànfunfun gbigbọmẹ tọn etọn mẹ.—Osọhia 12:17; Johanu 10:16.
10. Hẹndi dọdai Biblu tọn tẹlẹ wẹ na mí jidide dọ awhànfunfun Satani tọn sọta Klistiani nugbo lẹ na gboawupo dandan?
10 Ṣigba, Satani na gboawupo dandan, na “azán Oklunọ tọn” mẹ wẹ mí tin te, podọ nudepope ma sọgan glọnalina Jesu sọn ‘awhàngbigba etọn mẹ’ wutu. (Osọhia 1:10; 6:2) Di apajlẹ, e na hẹn ẹn diun dọ ohia yin didogona godotọ Islaelivi gbigbọmẹ 144 000 lẹ tọn. E nasọ basi hihọ́na “gbẹtọ susugege, he mẹdepope ma sọgan hia, sọn akọta lẹpo mẹ, sọn ohẹnnu lẹpo mẹ, sọn gbẹtọ lẹpo mẹ, podọ sọn ogbè lẹpo mẹ.” (Osọhia 7:1-4, 9, 14-16) Ṣigba to ma taidi gbẹdohẹmẹtọ mẹyiamisisadode yetọn lẹ, omẹ ehelẹ na lẹzun mẹjidugando aigba ji Jesu tọn lẹ. (Daniẹli 7:13, 14) Mimọ yé to aigba ji to egbehe yin kunnudenu huhlọnnọ de dọ Ṣilo yin Ahọlu do “ahọludu aihọn tọn” ji nugbonugbo.—Osọhia 11:15.
Ojlẹ lọ Die Nado “Setonuna Wẹndagbe” Lọ
11, 12. (a) Mẹnu lẹ kẹdẹ wẹ na lùn vivọnu titonu ehe tọn tọ́n? (b) Jijọ tẹlẹ wẹ nọ wleawu to mẹhe joawuna “gbigbọ aihọn tọn” lẹ mẹ?
11 Mẹhe jlo na mọ ogbẹ̀ madopodo yí lẹpo dona plọn tonusise, na Biblu dọ hezeheze dọ “mẹhe ma yọ́n Jiwheyẹwhe lẹ . . . podọ yé he ma setonuna wẹndagbe Jesu Klisti Oklunọ mítọn tọn lẹ” ma na lùn azán ahọsuyi Jiwheyẹwhe tọn tọ́n gba. (2 Tẹsalonikanu lẹ 1:8) Nalete, aihọn ylankan egbehe tọn po gbigbọ atẹṣiṣi tọn etọn po sọta osẹ́n po nunọwhinnusẹ́n Biblu tọn lẹ po nọ hẹn ẹn sinyẹnawuna mí nado setonuna wẹndagbe lọ.
12 Biblu basi zẹẹmẹ gbigbọ atẹṣiṣi sọta Jiwheyẹwhe tọn ehe taidi “gbigbọ aihọn tọn.” (1 Kọlintinu lẹ 2:12) To zẹẹmẹ bibasina nugandomẹgo etọn do gbẹtọ lẹ ji mẹ, apọsteli Paulu wlanwe hlan Klistiani fliflimẹ tọn lẹ to Efesu dọmọ: “Mìwlẹ ko to zọnlinzin . . . to hohowhenu kẹdẹdi walọ aihọn he tọn, kẹdẹdi ahọvi huhlọn agahomẹ tọn tọn, gbigbọ he to azọ́nwa to dinvie to ovi tolivivẹ tọn lẹ mẹ: to mẹhe mẹ mí omẹ pó ga ko do walọ mítọn to hohowhenu to wantuntun agbasalan mítọn tọn mẹ, bọ mí sọ to ojlo agbasalan tọn po homẹ tọn po hẹndi; gbọn jijọ dali ovi homẹgble tọn wẹ mí, yèdọ, kẹdẹdi mẹdevo lẹ.”—Efesunu lẹ 2:2, 3.
13. Nawẹ Klistiani lẹ sọgan nọavunte gligli sọta gbigbọ aihọn tọn gbọn, podọ po kọdetọn dagbe tẹlẹ po?
13 Ayajẹnu wẹ e yin dọ Klistiani Efesu tọn lẹ ma gbọṣi afanumẹ yinyin mẹ na gbigbọ tolivivẹ tọn enẹ. Kakatimọ, yé lẹzun ovi tonusetọ Jiwheyẹwhe tọn lẹ gbọn yedelẹ zizejo na gbigbọ etọn dali bosọ to sinsẹ́n dagbe etọn susugege gbẹ̀n. (Galatianu lẹ 5:22, 23) Mọdopolọ to egbehe, gbigbọ Jiwheyẹwhe tọn—yèdọ huhlọn he yiaga hugan to wẹkẹ mẹ—to alọgọna livi susu nado lẹzun tonusetọ na Jehovah. Taidi kọdetọn de, yé sọgan tindo ‘jidide gigọ́ to todido mẹ kakajẹ opodo.’—Heblu lẹ 6:11; Zekalia 4:6.
14. Nawẹ Jesu hẹn Klistiani he to gbẹnọ to azán godo tọn mẹ lẹpo tin to nukle hlan onú tangan he na whlé tonusise yetọn pọ́n lẹ gbọn?
14 Hẹn do ayiha mẹ ga, dọ mí tindo godonọnamẹ huhlọnnọ Ṣilo tọn, mẹhe ewọ po Otọ́ etọn po ma na dike kẹntọ de—vlavo aovi kavi gbẹtọ—ni whlé tonusise mítọn pọ́n zẹ̀ nuhe mí sọgan doakọnna go. (1 Kọlintinu lẹ 10:13) Na nugbo tọn, nado gọalọna mí to awhànfunfun gbigbọmẹ tọn mítọn mẹ, Jesu donù nuhahun tangan delẹ he mí na pehẹ to azán godo tọn ehelẹ mẹ go. E wàmọ to wekanhlanmẹ ṣinawe mẹ, ehe e na to numimọ he e dohia apọsteli Johanu mẹ. (Osọhia 1:10, 11) Na jide tọn, yé bẹ ayinamẹ tangan hẹn na Klistiani fliflimẹ tọn lẹ, ṣigba yọn-na-yizan taun yetọn yin to “azán Oklunọ tọn gbè,” sọn 1914 gbọ́n. Enẹwutu, lehe e sọgbe dọ mí ni na ayidonugo hlan owẹ̀n ehelẹ do sọ!b
Dapana Ojlo Matindo, Fẹnnuwiwa, Ojlo Agbasanu lẹ Tọn
15. Naegbọn mí dona họ́ míde sọta nuhahun he yinuwado agun he tin to Efesu ji, podọ nawẹ mí sọgan wà ehe gbọn? (2 Pita 1:5-8)
15 Wekanhlanmẹ tintan Jesu tọn yin didohlan agun he tin to Efesu. To pipà nina agun lọ na akọ́ndonanu etọn godo, Jesu dọmọ: “Ṣigba yẹn tindo onú de do ogo we, na hiẹ ko jo owanyi towe tintan dai.” (Osọhia 2:1-4) Mọdopolọ to egbehe, Klistiani he ko tindo zohunhun dai delẹ ko jo owanyi zogbe he yé tindo na Jiwheyẹwhe dai do. Enẹ sọgan dekanpona haṣinṣan mẹtọn hẹ Jiwheyẹwhe bo dona yin vivọjlado to niyaniya mẹ. Nawẹ owanyi mọnkọtọn sọgan yin gigọdotẹnmẹ gbọn? Gbọn Biblu pinplọn gbesisọ tọn, opli lẹ yìyì, odẹ̀, po ayihamẹlẹnpọn po dali wẹ. (1 Johanu 5:3) Nugbo wẹ dọ ehe nọ biọ ‘vivẹnudido vẹkuvẹku,’ ṣigba mọwiwà nọ hẹn ale wá. (2 Pita 1:5-8) Eyin a yí ahundopo do gbeje dewe pọ́n bo mọ dọ owanyi towe ko depò, to whelọnu lo, yawu jla ninọmẹ lọ do, to tonusisena tudohomẹnamẹ Jesu tọn mẹ dọmọ: “Flin fie aijijẹ towe fọ́n sọn, na hiẹ ni lẹnvọjọ, bosọ wazọ́n tintan.”—Osọhia 2:5.
16. Nuyiwadomẹji heyin owùnu to gbigbọ-liho tẹlẹ wẹ tin to agun he tin to Pagamu po Tiatila po mẹ, podọ etẹwutu nuhe Jesu dọna yé lẹ sọgbe to egbehe?
16 Klistiani he tin to Pagamu po Tiatila po lẹ yin pipà na tenọgli, akọ́ndonanu, po zohunhun yetọn po. (Osọhia 2:12, 13, 18, 19) Ṣogan, yé yin nuyiwadeji gbọn mẹhe to gbigbọ ylankan Balaami po Jẹzebẹli po tọn dohia delẹ dali. Gbọn fẹnnuwiwa zanhẹmẹ tọn po sinsẹ̀n-bibasi Baali tọn yetọn po gblamẹ, omẹ mọnkọtọn lẹ tindo nuyiwadomẹji ylankan do gbẹtọ lẹ ji to Islaeli hohowhenu tọn mẹ. (Osọha lẹ 31:16; 1 Ahọlu lẹ 16:30, 31; Osọhia 2:14, 16, 20-23) Ṣigba etẹwẹ dogbọn ojlẹ mítọn heyin “azán Oklunọ tọn” dali? Be nuyiwadomẹji ylankan dopolọ lẹ to awusọhia ya? Mọwẹ, na kakajẹ din, fẹnnuwiwa wẹ yin onú tintan he to omẹ desẹ sọn agun mẹ hugan to omẹ Jiwheyẹwhe tọn lẹ ṣẹnṣẹn. Enẹwutu, lehe e yin nujọnu do sọ dọ mí ni dapana gbẹdido hẹ mẹhe sọgan bẹpla walọ dagbe mítọn lẹ—vlavo to agun lọ mẹ kavi gbonu etọn! (1 Kọlintinu lẹ 5:9-11; 15:33) Mẹhe jlo na yin mẹjidugando tonusetọ Ṣilo tọn lẹ nasọ dapana ayidedai he ma sọgbe po yẹdide fẹnnuwiwa tọn lẹ po to owe kavi Internet ji.—Amọsi 5:15; Matiu 5:28, 29.
17. Nawẹ pọndohlan po walọyizan mẹhe tin to Sadi po Laodikea po lẹ tọn gbọnvo na nukun he Jesu do pọ́n ninọmẹ gbigbọmẹ tọn yetọn gbọn?
17 Gbọnvona omẹ ṣinṣinyan delẹ, agun Sadi tọn ma mọ pipà depope yí gba. E tindo “oyín,” kavi awusọhia mẹhe tin to ogbẹ̀ tọn, ṣigba ojlo matindo gbigbọmẹ tọn ko doadọ̀do sọmọ bọ to nukun Jesu tọn mẹ, e yin “oṣiọ.” Tonusisena wẹndagbe lọ ko lẹzun onú mọmọ tọn de poun. Whẹgbledomẹ nankọtọn die! (Osọhia 3:1-3) Agun Laodikea tọn lọsu tin to ninọmẹ mọnkọtọn mẹ. E doawagun to adọkunnu lẹ mẹ dọ, “Adọkunnọ wẹ yẹn,” ṣogan na Klisti, e yin ‘tapònọ, lèlènọ, agbátọnọ, nukuntọ́nnọ, omẹ́nọ.’—Osọhia 3:14-17.
18. Etẹwẹ mẹde dona wà ma nado lẹzun mẹhe gblọ to gbigbọ-liho to nukun Jiwheyẹwhe tọn mẹ?
18 To egbehe, Klistiani he ko yin nugbonọ dai delẹ ko jai biọ nuyiwa tolivivẹ tọn dopolọ mẹ. Vlavo yé ko na dotẹnmẹ gbigbọ aihọn tọn nado de linlẹn jejejininọ tọn yetọn pò, bo gbọnmọ dali lẹzun mẹhe gblọ to gbigbọ-liho na nuhe dù oplọn Biblu tọn, odẹ̀, opli Klistiani tọn lẹ, po lizọnyizọn lọ po. (2 Pita 3:3, 4, 11, 12) Lehe e yin onú titengbe do sọ dọ omẹ mọnkọtọn lẹ ni setonuna Klisti gbọn awuwlena adọkunnu gbigbọmẹ tọn lẹ dali, bo “họ̀ sọn [Klisti dè] sika he yè whlepọn to miyọ́n mẹ”! (Osọhia 3:18) Adọkun nujọnu tọn enẹlẹ bẹ ‘adọkunnọ-yinyin to azọ́n dagbe lẹ mẹ, alọtútlú, awuwle nado má namẹ’ hẹn. Gbọn awuwlena adọkunnu gbigbọmẹ tọn ehelẹ dali, mí ‘na bẹpli do agbànhọ mẹ na míde odòdó dagbe de pọ́n ojlẹ he ja, na mí nido hẹn ogbẹ̀ nujọnu tọn lọ go gligli.’—1 Timoti 6:17-19.
Yé Yin Pipà na Tonusise Yetọn
19. Pipà po tudohomẹnamẹ tẹlẹ po wẹ Jesu na Klistiani he tin to Smana po Filadẹlfia po lẹ?
19 Agun he tin to Smana po Filadẹlfia po lẹ yin ayidego taidi apajlẹ dagbenọ to tonusise mẹ, na wekanhlanmẹ Jesu tọn dohlan yé ma bẹ nugbẹnamẹ depope hẹn. E dọna mẹhe tin to Smana lẹ dọ: “Yẹn yọ́n azọ́n towe, nukunbibia po ohẹn towe po ṣigba adọkunnọ wẹ hiẹ.” (Osọhia 2:9) Vogbingbọn nankọtọn die po mẹhe tin to Laodikea lẹ po, he to awagundo to adọkun aihọn tọn lẹ mẹ ṣigba he tin to ohẹ́n klókló mẹ na taun tọn! Na nugbo tọn, homẹ Lẹgba tọn ma nọ hùn nado mọ dọ mẹde yin nugbonọ bo yin tonusetọ na Klisti. Enẹwutu, Jesu na avase dọmọ: “Hiẹ si onú nẹlẹ depope he hiẹ pọ́ yaji na blo: Doayi e go, Lẹgba ko pọ́ bibẹ adade to mì mẹ kọ̀n do ogàn mẹ, na yé nido whlé mì pọ́n; mì na mọ nukunbibia họ̀ azán ao; yin nugbonọ jẹ okú, yẹn nasọ na jẹgbakun ogbẹ̀ tọn lọ we.” (Osọhia 2:10) Mọdopolọ, Jesu pà mẹhe tin to Filadẹlfia lẹ dọmọ: “[Hiẹ] yí ohó ṣie whla [kavi, setonuna mi] bo ma sọ mọ́n oyin ṣie. Doayi e go, yẹn ja zandevie. Ehe hiẹ tindo nẹ, hẹn e go gligli na mẹdepope ma nado yí jẹgbakun towe.”—Osọhia 3:8, 11.
20. Nawẹ livi susu lẹ to egbehe ko setonuna ohó Jesu tọn gbọn, podọ mahopọnna ninọmẹ tẹlẹ?
20 To “azán Oklunọ tọn gbè,” he bẹsọn 1914, pipòtọ nugbonọ de po gbẹdohẹmẹtọ yetọn lẹngbọ devo lẹ po, he sọha yetọn ko yì livi susu todin, ko sọ setonuna ohó Jesu tọn gbọn mahẹ zohunhun tọn tintindo to lizọnyizọn lọ mẹ po tenọgli yetọn go hinhẹn gligli po dali. Taidi mẹmẹsunnu owhe kanweko tintan whenu tọn yetọn lẹ, mẹdelẹ ko jiya na tonusise yetọn na Klisti wutu, bo tlẹ yin zizedlan do ogàn po osla yasanamẹ tọn lẹ po mẹ. Mẹdevo lẹ ko setonuna ohó Jesu tọn gbọn tintindo ‘nukun he bọawu’ de dali, mahopọnna dọ adọkunnọ po nukunkẹnnọ lẹ po tin lẹdo yé pé. (Matiu 6:22, 23) Mọwẹ, to lẹdo po ninọmẹ lẹpo po mẹ, Klistiani nugbo lẹ, gbọn tonusise yetọn dali, zindonukọn nado hẹn homẹ Jehovah tọn hùn.—Howhinwhẹn lẹ 27:11.
21. (a) Azọngban gbigbọmẹ tọn tẹwẹ hagbẹ afanumẹ lọ tọn na zindonukọn nado to hinhẹndi? (b) Nawẹ mí sọgan dohia dọ mí jlo na setonuna Ṣilo nugbonugbo gbọn?
21 Dile mí to dindọnsẹpọ nukunbibia daho lọ, “afanumẹ nugbonọ, nuyọnẹntọ” lọ hẹn gbemima etọn go ma nado vẹtolina Ogán lọ heyin Klisti gbede. Tonusise etọn bẹ awuwiwlena núdùdù gbigbọmẹ tọn he wá do ganmẹ na whédo Jiwheyẹwhe tọn hẹn. Enẹwutu mì dike mí ni nọ dopẹ́ to whepoponu na titobasinanu yẹwhehọluduta jiawu Jehovah tọn po awuwledainanu etọn lẹ po. To aliho ehe mẹ, mí nọ do mẹglọnọ-yinyin mítọn na Ṣilo hia, mẹhe na yí ogbẹ̀ madopodo do suahọ mẹjidugando tonusetọ etọn lẹpo.—Matiu 24:45-47; 25:40; Johanu 5:22-24.
[Nudọnamẹ odò tọn]
a Nado mọ zẹẹmẹ do “ojlẹ ṣinawe” lẹ ji, pọ́n weta 10 owe Oyọnẹn He Nọ Planmẹ Sọyi Ogbẹ̀ Madopodo Mẹ, heyin zinzinjẹgbonu gbọn Kunnudetọ Jehovah tọn lẹ dali tọn.
b Na zẹẹmẹ gigọ́ do wekanhlanmẹ ṣinawe lẹ ji, jaale pọ́n owe Osọhia—Hẹndi Pete Etọn Sẹpọ!, heyin zinzinjẹgbonu gbọn Kunnudetọ Jehovah tọn lẹ dali, bẹsọn weda 33.
Be Hiẹ Flin Ya?
• Azọngban tẹwẹ Jesu na yiwà dile e yin didọdai gbọn Jakobu dali to adọ́zan okú tọn etọn ji?
• Nawẹ mí nọ kẹalọyi dọ Jesu yin Ṣilo gbọn, podọ gbigbọ tẹwẹ mí dona dapana?
• Ayinamẹ he sọgbe na azán mítọn tẹwẹ wekanhlanmẹ heyin didohlan agun ṣinawe owe Osọhia tọn lẹ bẹhẹn?
• Aliho tẹlẹ mẹ wẹ mí sọgan hodo apajlẹ mẹhe tin to agun Smana po Filadẹlfia hohowhenu tọn po mẹ lẹ tọn te?
[Yẹdide to weda 18]
Jehovah nọ dona omẹ etọn lẹ na tonusisena “họ̀nkọnsi” nugbonọ lọ
[Yẹdide to weda 19]
Nuyiwadomẹji Satani tọn nọ hẹn tonusisena Jiwheyẹwhe sinyẹnawu
[Yẹdide to weda 21]
Haṣinṣan pẹkipẹki mítọn hẹ Jehovah nọ gọalọna mí nado setonuna ẹn