To Tafo Tọjihun-Kùntọ-Gán lọ Tọn Ji

GBẸTỌ ayajẹnọ lẹ, núdùdù dagbe, podọ hodọdopọ awuvivi tọn nọ hẹn núdùdù heyin dùdù to tafo tọjihun-kúntọ-gán tọn ji to bato de mẹ yin awuvivinu de. Ṣigba hodọdopọ de he wá aimẹ to tafo Tọjihun-kùntọ-gán Robert G. Smith, heyin ogán bato White Star Line tọn lẹ ji, tá hinhọ́n do hùnwhẹ gbigbọmẹ tọn de ji.—Isaia 25:6.

To 1894, Robert jẹ anadena bato Kinclune of Dundee tọn ji to owhe 24-mẹvi mẹ, nado basi gbejizọnlin lẹdo aihọn pé tọji tọn tintan etọn. To nukọnmẹ, e lẹzun ogán na bato White Star tọn lẹ, he bẹ Cedric, Cevic, po Runic po hẹn.a Dile e to ohù Atlantique tọn dasá sọn New York jei Liverpool, to Angleterre to bato ehelẹ dopo mẹ, Robert yí jonọ Charles Taze Russell tọn to tafo etọn ji. Hodọdopọ hẹ Russell fọ́n ojlo Robert tọn dote to owẹ̀n Biblu tọn mẹ, bọ e sọ yí vọkan Études des Écritures tọn lẹ to Russell si nado sọgan plọnnu dogọ.

Russell nọ wlanwe hlan ẹn, enẹwutu ojlo he Robert tindo to owẹ̀n Biblu tọn mẹ jideji. Robert má oyọnẹn yọyọ etọn hẹ asi etọn. To madẹnmẹ, yé omẹ awe lẹ lẹzun Biblu Plọntọ, dile Kunnudetọ Jehovah tọn lẹ yin yinyọnẹn do to whenẹnu. To nukọnmẹ, Robert tindo lẹblanulọkẹyi nado dọ hodidọ Biblu tọn lẹ. Di apajlẹ, to Brisbane, Australie, e dọhodo “Alánhùnú Giliadi Tọn” ji bo dohia dọ Ohó Jiwheyẹwhe tọn bẹ owẹ̀n ‘pọngbọ tọn de hẹn na dindọn aihọn tọn lẹpo.’ To Angleterre, asi po ovi etọn lẹ po gọalọ to “Photo-Drame de la Création” didohia mẹ, bo nọ hò hoyidokanji Russell tọn lẹ dile yẹdide lẹ to yinyin didohia.

Robert jo ogú nugbo Ahọluduta lọ tọn he e ko mọyi dai na ovi etọn lẹ. To egbehe, to owhe susu godo, hagbẹ whẹndo lọ tọn 18 wẹ to wẹndagbe lọ má hẹ mẹdevo lẹ po zohunhun po, na nuhe yin didọ to tafo tọjihun-kùntọ-gán lọ tọn ji wutu.

Gbọn owe yetọn lẹ po azọ́n Biblu pinplọnmẹ tọn yetọn po gblamẹ, Kunnudetọ Jehovah tọn lẹ to alọgọna gbẹtọ lẹ lẹdo aihọn pé nado plọn owẹ̀n Biblu tọn he fọ́n ojlo Smith tọn dote lọ. Hiẹ lọsu sọgan dindona nuhe fọnjlodotenamẹ sọmọ to tafo tọjihun-kùntọ-gán lọ tọn ji.

[Nudọnamẹ odò tọn]

[Yẹdide to weda 8]

Robert G. Smith

[Yẹdide to weda 8]

Charles T. Russell