“Mì Sẹpọ Jiwheyẹwhe, Ewọ Nasọ Sẹpọ Mì”

Jẹnukọnna Biblu Pinplọn Podọ to Enẹgodo—Biblu to Nuyiwa Do Gbẹtọ lẹ Ji

EYIN a ko dukosọ hẹ Tony to bẹjẹeji owhe aflanmẹ tọn etọn lẹ mẹ wẹ, a na ko mọ dẹpẹ gbévun, danuwatọ saditọ enẹ to lẹdo ylankan Sydney tọn delẹ mẹ to Australie. Jaguda lẹ tin to họntọn etọn lẹ mẹ. Yé nọ saba tindo mahẹ to owhé lẹ gbigbà, avùnhiho hẹ gbévun devo lẹ, po osò yiyizan to tòhomẹ-liho ji po mẹ.

Tony jẹ azọ̀ nù ji to owhe ṣinẹnẹ-mẹvi yinyin mẹ. To owhe 14 tintindo mẹ, e ko lẹzun marijuana zántọ akonka de bo to gbẹzan fẹnnuwiwa tọn zan. To whenuena e tindo owhe 16, e ko peve to amasin adínọ heroïne mẹ, bọ ehe dekọtọn do cocaïne yiyizan mẹ—“na nugbo tọn, yẹn dona zan nudepope he sọgan fọ́n numọtolanmẹ ṣie dote,” wẹ zẹẹmẹ he Tony basi. Enẹgodo e wleawuna kanṣiṣa amasin adínọ sisà tọn hẹ ogbẹ́ jaguda tọn awe. To madẹnmẹ Tony yin yinyọnẹn taidi dopo to amasin adínọ sàtọ he diyin lẹ mẹ to whèzẹtẹn-waji Australie tọn.

Tony nọ zan nudi 112 000 F CFA jẹ 224 000 F CFA na amasin adínọ to gbèdopo. Ṣigba whẹndo etọn nọ jiya to aliho susu devo lẹ mẹ ga. E dọmọ: “Whlasusu wẹ jaguda lẹ nọ dlẹn osò po ohí po do yẹn po asi ṣie po na yé to dindin amasin adínọ po akuẹ he mí tindo to owhé mítọn gbè po wutu.” To whenuena Tony ko yin wiwle do gànpamẹ whla atọ̀n godo, e mọ nuhudo lọ nado lẹnnupọndo nuhe na wá yin kọdetọn gbẹzan etọn tọn ji.

Dile etlẹ yindọ e nọ yì ṣọṣi, Tony mọdọ emi dẹ̀n tlala do Jiwheyẹwhe he yé dọ dọ e nọ sayana ylandonọ lẹ to zòmẹ kakadoi. Ṣigba to whenuena Kunnudetọ Jehovah tọn awe dla Tony pọ́n, e paṣa ẹ nado se dọ Jiwheyẹwhe mayin omẹ mọnkọtọn de gba. Podọ homẹ etọn hùn dọ e sọgan vọ́ gbẹzan etọn jlado bo mọ dona lẹ yí sọn Jiwheyẹwhe dè. Hogbe Jesu Klisti tọn lẹ whàn Tony dọ: “Onú lẹpo wẹ wiwà na Jiwheyẹwhe.” (Malku 10:27) Na taun tọn, hogbe tulinamẹ tọn lọ lẹ yinuwado Tony ji tlala dọmọ: “Mì sẹpọ Jiwheyẹwhe, ewọ nasọ sẹpọ mì.”—Jakobu 4:8.

Todin, Tony pannukọn avùnnukundiọsọmẹnu lọ nado hẹn gbẹzan etọn wá kọndopọmẹ hẹ nujinọtedo Biblu tọn lẹ. E dọmọ: “Onú tintan he yẹn jodo wẹ azọ̀-nùnù, yèdọ nuhe ko vẹawu na mi nado wà dai, dile etlẹ yindọ n’ko tẹnpọn whlasusu. Po huhlọn Jehovah tọn po, yẹn penugo nado jo amasin adínọ he ko dogàn mi na owhe 15 he wayi lẹ do. Yẹn ma lẹn gbede dọ e na yọnbasi nado dù to aṣa ehelẹ ji.”

Kakati nado dibuna Jiwheyẹwhe he nọ sayana gbẹtọ lẹ to zòmẹ kakadoi—yèdọ nuplọnmẹ he mayin mimọ to fidepope to Biblu mẹ—Tony po asi etọn po kẹalọyi todido gbẹninọ kakadoi to paladisi aigba ji tọn to godo mẹ. (Psalm 37:10, 11; Howhinwhẹn lẹ 2:21) “E yí whenu susu po vivẹnudido vẹkuvẹku po to yẹn si nado hẹn gbẹzan ṣie wá kọndopọmẹ hẹ nujinọtedo Jiwheyẹwhe tọn lẹ,” wẹ Tony yigbe dọ, “ṣigba po alọgọ Jehovah tọn po, yẹn ko tindo kọdetọn dagbe.”

Mọwẹ, mẹhe ko peve do amasin adínọ mẹ dai ehe lẹzun Klistiani de. To whenu po nutindo yetọn lẹ po yíyí do sanvọ́ mẹ, ewọ po asi etọn po ko yí ganmẹ fọtọ́n susu zan to azọ́n Biblu pinplọnmẹ tọn mẹ. Yé sọ hẹn alọnu ján to ovi budisi Jiwheyẹwhe tọ́ awe pinpọ́n whẹ́n mẹ. Diọdo sinsinyẹn ehe yin bibasi gbọn huhlọn daho Ohó Jiwheyẹwhe tọn gblamẹ, yèdọ Biblu. Na nugbo tọn, dile apọsteli Paulu dọ do, “ohó Jiwheyẹwhe tọn tin to ogbẹ̀, e do huhlọn.”—Heblu lẹ 4:12.

Mahopọnna apajlẹ tulinamẹ tọn mọnkọtọn lẹ, mẹdelẹ dọnnu dọ azọ́n wepinplọn sinai do Biblu ji Kunnudetọ Jehovah tọn lẹ tọn nọ gbà whẹndo lẹ kija bosọ nọ hẹn walọdagbe jọja lẹ tọn gble. Na jide tọn, whẹho Tony tọn do alọsọakọ́n mọnkọtọn hia nado yin lalo.

Taidi Tony, mẹsusu ko plọn dọ aṣa mẹhusudo tọn he mẹ yè ko peve do lẹ sọgan yin dududeji. Gbọnna? Gbọn yise tintindo to Jiwheyẹwhe mẹ podọ ginganjẹ ewọ po Ohó etọn po go dali, podọ gbọn alọgọ gbẹdohẹmẹtọ Klistiani mẹtọnhopọntọ po owanyinọ tọn lẹ po gblamẹ. Tony dotana po ayajẹ po dọmọ: “Yẹn ko mọ lehe nunọwhinnusẹ́n Biblu tọn lẹ ko basi hihọ́na ovi ṣie lẹ do. Nuplọnmẹ Biblu tọn lẹ ko whlẹn alọwle ṣie. Podọ kọmẹnu ṣie lẹ nọ damlọn yì tóji na yẹn ma yin owù na yé ba wutu.”

[Nudọnamẹ tangan lẹ to weda 9]

‘Po huhlọn Jehovah tọn po, yẹn penugo bo jo amasin adínọ he ko dogàn mi na owhe 15 he wayi lẹ do’

[Apotin to weda 9]

Nunọwhinnusẹ́n Biblu Tọn lẹ Yọn-na-Yizan

Nunọwhinnusẹ́n Biblu tọn voovo lẹ ko gọalọna susu mẹhe ko peve to amasin adínọ mẹ lẹ tọn nado dù to aṣa ylankan ehe ji. Delẹ to nunọwhinnusẹ́n lọ lẹ mẹ die:

“Mì gbọ mí ni klọ míde sọn dihó agbasalan po gbigbọ tọn lẹpo po mẹ, bosọ hẹn wiwe sọgbe to osi Jiwheyẹwhe tọn mẹ.” (2 Kọlintinu lẹ 7:1) Amasin adínọ zinzan jẹagọdo osẹ́n Jiwheyẹwhe tọn.

“Osi OKLUNỌ tọn wẹ dodo nuyọnẹn tọn: nuyọnẹn Wiwenọ Dopo lọ tọn wẹ zinzin.” (Howhinwhẹn lẹ 9:10) Osi he siso na Jehovah sinai do oyọnẹn he pegan tintindo gando ewọ po aliho etọn lẹ po go ji ko gọalọna mẹsusu nado tlúkanna yede sọn nuyiwadomẹji amasin adínọ lẹ tọn mẹ.

“Yí ayiha towe do dotudo OKLUNỌ go; a dẹ́ hlan dewe tọn dali blo. Yọnẹn to aliho towe lẹpo ji, ewọ nasọ jlọ omọ́ towe.” (Howhinwhẹn lẹ 3:5, 6) Aṣa mẹhusudo tọn lẹ sọgan yin dududeji gbọn jidide do Jiwheyẹwhe go pete bosọ ganjẹ ewọ go mlẹnmlẹn dali.