Pọndohlan Jlẹkaji Tọn Tintindo Gando Agbasazọ́n Go — WESẸDOTẸN INTẸNẸT JI TỌN Watchtower Tọn

Pọndohlan Jlẹkaji Tọn Tintindo Gando Agbasazọ́n Go

TO AIHỌN egbehe tọn he to mizọnmizọn ji to ahi akọjọpli tọn, agbàwhinwhlẹn, po onú lankan lẹ bibasi po mẹ, mẹsusu ma nọ tindo ayajẹ nado nọ yì azọ́nmẹ egbesọegbesọ ba. Etomọṣo, mí dona duvivi azọ́n mítọn tọn. Etẹwutu? Na apajlẹ Jiwheyẹwhe tọn mẹ wẹ mí yin didá te—podọ Jiwheyẹwhe nọ hùnhomẹ to azọ́n etọn mẹ. Di apajlẹ, dile e to nuhe e ko wà lẹ pọ́n to vivọnu “azán,” kavi ojlẹ gaa nudida tọn ṣidopo lẹ tọn, Gẹnẹsisi 1:31 dọna mí dọmọ: “Jiwheyẹwhe . . . mọ nuhe e dá lẹpo, bo doayi e go e yọ́n tlala.”

Matin ayihaawe owanyi he Jehovah tindo na azọ́n yin dopo to nuhewutu e yin yiylọdọ ‘Jiwheyẹwhe ayajẹ tọn’ mẹ. (1 Timoti 1:11) To whelọnu lo, be e ma sọgbe hẹ lẹnpọn dagbe dọ dile mí hodo apajlẹ etọn sọ wẹ mí na yin ayajẹnọ sọ ya? Gando ehe go, Ahọlu Sọlọmọni Islaeli hohowhenu tọn, heyin họgbátọ po anadenanutọ vonọtaun de po wlan dọmọ: “Na mẹdopodopo ni to dùdù bosọ to nùnù, na e ni to vivi [azọ́n] etọn lẹpo tọn dù, nunina Jiwheyẹwhe tọn wẹ.”—Yẹwhehodọtọ 3:13.

Nado tindo pọndohlan jlẹkaji tọn, he sọgbe gando azọ́n go to azọ́nwatẹn he to didiọ to niyaniya mẹ egbehe tọn mẹ sọgan yin avùnnukundiọsọmẹnu de. Ṣigba Jehovah Jiwheyẹwhe nọ dona mẹhe setonuna anademẹ owanyinọ etọn lẹ. (Psalm 119:99, 100) Omẹ enẹlẹ nọ lẹzun mẹyidoazọnmẹ họakuẹ he nọ yin jide-dego, enẹwutu azọ́n ma nọ yawu gble do yé. Yé sọ nọ plọn ma nado yí nukun agbasanu tintindo tọn kẹdẹ do pọ́n gbẹzan po azọ́n yetọn po gba ṣigba nukun gbigbọmẹ tọn de ga. Ehe nọ gọalọna yé nado basi nudide dagbe lẹ to gbẹzan mẹ bo nọ hẹn ẹn diun dọ ayajẹ po hihọ́ yetọn po ma sinai do azọ́n yetọn kavi whẹho agbasazọ́n dindin tọn he mẹ diọdo to yinyin bibasi te gbọzangbọzan lọ ji gba. (Matiu 6:31-33; 1 Kọlintinu lẹ 2:14, 15) E nọ gọalọna yé nado tindo pọndohlan he sọgbe nugbonugbo gando azọ́n go.

Tindo Pọndohlan He Na Hẹn Homẹ Jiwheyẹwhe Tọn Hùn Gando Azọ́n Go

Mẹdelẹ nọ wazọ́n zẹjlẹgo, bo nọ ze azọ́n yetọn do otẹn tintan mẹ na onú devo lẹpo. Mẹdevo lẹ nọ to jejeji na vivọnu azọ́nzán lọ tọn nado tọ́n bo yì whégbè. Pọndohlan tẹwẹ sọgbe? Biblu gblọn dọmọ: “Núdùdù alọgogo dopo po adọjai po, pọnte hú alọgogo awe he gọ́ na magbọjẹ po homẹgble gbigbọ tọn po.” (Yẹwhehodọtọ 4:6) Na taun tọn, azọ́nwiwa zẹjlẹgo, kavi na ojlẹ dindẹn ma nọ de sinsẹ́n tọn gba—“homẹgble gbigbọ tọn” wẹ poun. Naegbọn e yinmọ? Na e nọ gbleawuna onú taun he wutu mí nọ yin ayajẹnọ hugan lẹ poun wẹ: yèdọ haṣinṣan mítọn hẹ whẹndo po họntọn lẹ po, gbigbọnọ-yinyin mítọn, agbasalilo mítọn, podọ gbẹ̀gaa mítọn ga. (1 Timoti 6:9, 10) Pọndohlan he sọgbe lọ wẹ nado tindo pekọ to agbasanu vude mẹ bo tindo jijọho, jẹ obá de mẹ kakati nado nọ wazọ́n zẹjlẹgo, he nọ dekọtọn do magbọjẹ po awubla po mẹ.

Dile Biblu tlẹ na tuli pọndohlan enẹ tọn do sọ, e ma kẹalọyi adidọ gba. (Howhinwhẹn lẹ 20:4) Adidọ nọ hẹnmẹ ma nado mọ sisi yí gọna sisi he mẹdevo lẹ sọgan tindo na mí. Dehe ylan hugan wẹ yindọ e sọ nọ hẹn haṣinṣan mítọn hẹ Jiwheyẹwhe gble ga. Biblu dọ madoadudẹ́ji dọ mẹhe gbẹ́ nado wazọ́n ma jẹ nado dù núdùdù mẹdevo lẹ tọn. (2 Tẹsalonikanu lẹ 3:10) Kakatimọ, e dona diọ aliho etọn lẹ bo nọ wazọ́n sinsinyẹn, nado yí yẹyi do penukundo ede po mẹhe ganjẹ ewọ go lẹ po go. Gbọn azọ́n sinsinyẹn wiwà dali, e tlẹ sọgan sọ penugo nado gọalọna mẹhe tin to nuhudo nujọnu tọn mẹ lẹ, podọ enẹ yin nuyiwa de he Jiwheyẹwhe biọ.—Howhinwhẹn lẹ 21:25, 26; Efesunu lẹ 4:28.

Yin Pinplọn sọn Ovu Nado Ylọ Azọ́n dọ Nujọnu

Jijọ azọ́nwiwa ganji tọn ma nọ wá to ajiji mẹ gba; e nọ yin pinplọn sọn ovu whenu wẹ. Enẹwutu, Biblu na tuli mẹjitọ lẹ dọmọ: “Plọn ovi do aliho he e na gbọ̀n ji, whenuena e whẹ́n e ma na tọ́nsọn e ji.” (Howhinwhẹn lẹ 22:6) Gbọnvona apajlẹ dagbe zizedai taidi azọ́nwatọ dagbe, mẹjitọ nuyọnẹntọ lẹ nọ jẹ azọ́nplọn ovi flinflin yetọn lẹ ji gbọn azọ́n he sọgbe hẹ owhe yetọn lẹ didena yé to owhé lọ gbè dali. Dile etlẹ yindọ ovi lẹ sọgan gbẹwanna azọ́n delẹ, yé na wá mọdọ yé yin hagbẹ họakuẹ whẹndo lọ tọn lẹ—titengbe to whenuena Onọ̀ po Otọ́ yetọn lẹ po pà yé na azọ́n dagbe de he yé wà. Ṣigba, e blawu dọ diblayin onú lẹpo wẹ mẹjitọ delẹ nọ wà na ovi yetọn lẹ, vlavo na homẹdagbe to aliho agọ̀ mẹ wutu. Mẹjitọ mọnkọtọn lẹ dona flindọ ovi lẹ na lẹzun pinpẹn-nutọn-mayọnẹntọ eyin yé yin alọjodokọjina sọn ovu.

Mẹjitọ he yọ́n azọngban yetọn lẹ sọ nọ tindo ojlo nujọnu tọn to wehọmẹ yìyì ovi yetọn lẹ tọn mẹ, bo nọ na yé tuli nado plọnnu bo wazọ́n ganji to wehọmẹ. Ehe sọgan hẹn ale wá na jọja lẹ to nukọnmẹ to whenuena yé dona wà agbasazọ́n.

Yí Nuyọnẹn do De Azọ́n He A Na Wà

Dile etlẹ yindọ Biblu ma dọ wunmẹ azọ́n he mí dona wà tọn, e na mí anademẹ dagbe lẹ na nukọnyiyi gbigbọmẹ tọn mítọn, sinsẹ̀nzọn mítọn hlan Jiwheyẹwhe, po azọngban nujọnu tọn devo lẹ po ma nado yin kọgbẹ́ e go. Di apajlẹ, apọsteli Paulu wlan dọ: ‘Gli wẹ ojlẹ lọ pò. Enẹwutu mì gbọ mẹhe to aihọn lọ zan lẹ ni taidi yé ma to zinzan ẹn to gigọ́mẹ; na ninọmẹ aihọn tọn to didiọ.’ (1 Kọlintinu lẹ 7:29-31) Nude matin he na nọ aimẹ kakadoi kavi he na lodo mlẹnmlẹn to aihọn ehe mẹ. Ojlẹ po huhlọn mítọn lẹpo po kinklan dovo na ẹn na taidi adọkun he mí tindo lẹpo bibẹpli do ohọ̀ he tin to lẹdo he osin nọ gbà de mẹ. Nuyiwa nululu tọn nankọ die!

Lẹdogbedevomẹ Biblu tọn devo lẹ lẹ́ hodidọ lọ “ma to zinzan ẹn to gigọ́mẹ” do “ma nado hẹn alọnu ján to e mẹ.” (La Bible de Jérusalem; Today’s English Version) Nuyọnẹntọ lẹ ma nọ wọnji gbede dọ ojlẹ he pò na titonu ehe ‘whègli,’ podọ nado “hẹn alọnu ján” to e mẹ na dekọtọn do flumẹjijẹ po awubla po mẹ dandan.—1 Johanu 2:15-17.

‘Jiwheyẹwhe Ma Na Gbẹ́ We Dai Gba’

Jehovah yọ́n nuhudo mítọn lẹ yèdọ hugan mílọsu. E yọ́n fie mí tin te to hẹndi lẹndai etọn lẹ tọn mẹ. Enẹwutu, e flinnu mí dọmọ: ‘Mì gbọ walọ mìtọn ni tin matin owanyi akuẹ tọn, na mì ni tindo pekọ to nuhe mì tindo todin lẹ mẹ. Na Jiwheyẹwhe ko dọ: Yẹn ma to na jo we dai gbede, kavi gbẹ́ we gba.’ (Heblu lẹ 13:5) Lehe hodidọ enẹ miọnhomẹnamẹ do sọ! To apajlẹ mẹtọnhopọn owanyinọ he Jiwheyẹwhe tindo na gbẹtọ lẹ hihodo mẹ, Jesu yí suhugan Yẹwhehodidọ diyin Osó ji tọn etọn do plọn devi etọn lẹ nado tindo pọndohlan he sọgbe lọ gando azọ́n po agbasanu lẹ po go.—Matiu 6:19-33.

Kunnudetọ Jehovah tọn lẹ nọ tẹnpọn nado setonuna nuplọnmẹ enẹlẹ. Di apajlẹ, to whenuena azọ́nmẹyimẹdotọ de biọ to Kunnudetọ he nọ wà lẹtliki-zọ́n de si nado nọ wazọ́n ogàn-godo tọn to whepoponu, Kunnudetọ lọ gbẹ́. Etẹwutu? Na e ma jlo dọ agbasazọ́n etọn ni yí ojlẹ he e nọ saba de dovo na whẹndo etọn po whẹho gbigbọmẹ tọn lẹ po wutu. Na e yin azọ́nyọnẹntọ dagbe podọ mẹhe go yè nọ dejido de wutu, ogán etọn kẹalọyi nudide etọn. Nugbo wẹ dọ, ninọmẹ lẹ ma nọ yì domọ to whepoponu gba, bọ omẹ lọ dona dín azọ́n devo nado sọgan hẹn gbẹzan jlẹkaji tọn de go. Etomọṣo, mẹhe dejido Jehovah go mlẹnmlẹn lẹ nọ saba mọdọ walọ dagbe po azọ́n sinsinyẹn wiwà yetọn po nọ hẹn yé tindo nukundagbe ogán yetọn tọn.—Howhinwhẹn lẹ 3:5, 6.

Whenuena Azọ́n Lẹpo Na Tindo Ale

To aihọn mape ehe mẹ, azọ́n po nukundido azọ́n tọn lẹ po ma na vò sọn nuhahun po bẹwlu lẹ po mẹ pọ́n gbede. Na taun tọn, onú lẹ sọgan sọ vọ́ ylan deji dile aihọn to bẹwlunọ yin dogọ bọ whẹho akuẹzinzan tọn lẹ ma lodo kavi tlẹ to gbigbakija deji. Ṣigba ojlẹ gli de wẹ ehe na tin na. To madẹnmẹ, mẹdepope ma na ba azọ́n pò ba. Humọ, azọ́n lẹpo wẹ na nọ hẹn pekọ po ayajẹ po wá taun. Nawẹ enẹ na yọnbasi gbọn? Etẹwẹ na hẹn diọdo enẹ wá?

Gbọn yẹwhegán Isaia gblamẹ, Jehovah dlẹnalọdo ojlẹ mọnkọtọn de. “Yẹn na dá olọn yọyọ lẹ po aigba yọyọ de po,” wẹ Jehovah dọ, “yè ma na flin hoho tọn, mọ yé ma na wá linlẹn mẹ.” (Isaia 65:17) E to hodọ gando gandudu yọyọ etọn go, he glọ ogbẹ́ gbẹtọvi tọn yọyọ mlẹnmlẹn de na nọ̀.—Daniẹli 2:44.

Gando lehe gbẹtọ lẹ na nọgbẹ̀ bo wazọ́n to whenẹnu do go, dọdai lọ zindonukọn dọmọ: “Yé na gbá ohọ̀, bosọ nọ nọ̀ yé mẹ, yé na dó vẹngle, bosọ dù sinsẹ́n yetọn. Yé ma na gbá ohọ̀ bọ mẹdevo na nọ̀ e mẹ; yé ma na dó bọ mẹdevo na dù: na dile azán atin tọn te wẹ azán omẹ ṣie lẹ tọn na te, omẹ ṣie lẹ na dugbẹ azọ́n alọ yetọn mẹ tọn dẹn. Yé ma na wazọ́n yaya, yé ma na jivi na tukla; na yé wẹ okún donanọ OKLUNỌ tọn, podọ ovi yetọn po yé po.”—Isaia 65:21-23.

Vogbingbọn ayidego tọn nankọ die aihọn yọyọ he Jiwheyẹwhe wleawuna enẹ na hẹnwa! Be hiẹ ma na jlo nado nọ̀ aihọn mọnkọtọn de mẹ, to fie hiẹ “ma na wazọ́n yaya” te ṣigba na duvivi “sinsẹ́n” tuklajẹ towe tọn jẹ gigọ́mẹ te ya? Ṣigba doayi mẹhe na duvivi dona enẹlẹ tọn lẹ go: “Yé wẹ okún donanọ OKLUNỌ tọn.” Hiẹ sọgan yin dopo to “donanọ” enẹlẹ mẹ gbọn nupinplọn gando Jehovah go po nubiọtomẹsi etọn lẹ po kọ̀n jijẹ dali. Jesu dọmọ: ‘Ehe wẹ ogbẹ̀ madopodo, dọ yé ni plọnnu dogbọn hiẹ, Jiwheyẹwhe nugbo dopo lọ dali, podọ mẹhe hiẹ dohlan, yèdọ Jesu Klisti.’ (Johanu 17:3) Homẹ Kunnudetọ Jehovah tọn lẹ tọn na hùn nado gọalọna we nado plọnnu gando oyọnẹn ogbẹ̀-namẹ tọn enẹ go gbọn Biblu, heyin Ohó Jiwheyẹwhe tọn pinplọn hẹ we to kannukannu dali.

[Apotin to weda 6]

“YÉ NỌ YIN DINDIN TO FISUSU”

“Nudepope he mì to wiwà, mì nọ yí ayiha dodo do wà ẹ, kẹdẹdi hlan Oklunọ, e mayin hlan gbẹtọ gba,” wẹ Biblu dọ. (Kọlọsinu lẹ 3:23) E họnwun dọ, mẹhe nunọwhinnusẹ́n azọ́nwiwa tọn ehe nọ deanana wẹ azọ́nwatọ dagbe he mẹsusu nọ jlo. Na enẹ tọn wutu, J. J. Luna na ayinamẹ azọ́ngán he jlo na yí mẹ do azọ́nmẹ lẹ to owe etọn How to Be Invisible mẹ nado nọ dín hagbẹ zohunhunnọ sinsẹ̀n delẹ tọn lẹ, ṣigba e yidogọ dọ: “Nugbo lọ wẹ yindọ Kunnudetọ [Jehovah tọn] lẹ wẹ mí nọ saba yí.” Dopo to whẹwhinwhẹ́n he e na lẹ mẹ wẹ yindọ yé nọ yin yinyọnẹn na nugbodidọ yetọn, bọ enẹ nọ zọ́n bọ “yé nọ yin dindin to fisusu” na azọ́n voovo lẹ.

[Yẹdide lẹ to weda 5]

Azọ́n, nuwiwa gbigbọmẹ tọn lẹ po ayidedai po hinhẹn do jlẹkaji nọ hẹn pekọ wá