Lilatọ Ahọluduta Tọn lẹ Na Linlin

Yé to Owẹ̀n Ahọluduta Tọn “Se” to Brésil

Nado sọgan lá wẹndagbe Ahọluduta tọn to lẹdo Tókunọ lẹ tọn mẹ, susu Kunnudetọ Jehovah tọn he tin to Brésil lẹ tọn ko kẹalọyi avùnnukundiọsọmẹ Ogbè Alọ-yido-dọho Brésil tọn pinplọn tọn. Vivẹnudido yetọn to kọdetọn dagbe tindo, dile numimọ he bọdego lẹ dohia do.

Eva,a heyin yọnnu tókunọ de to São Paulo, jẹ ogbè alọ-yido-dọho tọn plọn ji to whenuena ewọ po ovi etọn atọ̀n lẹ po jẹ ninọ hẹ dawe tókunọ de ji. Eva po họntọn-sunnu etọn po dukosọ hẹ pipli Kunnudetọ tókunọ lẹ tọn to nusatẹn de mẹ, bọ Kunnudetọ lọ lẹ sọ basi oylọ na yé nado wá opli to Plitẹnhọ Ahọluduta tọn mẹ. Yé yigbe, po linlẹn lọ po dọ nuwiwa ayidedai tọn de wẹ e na yin.

Na Eva ma se ogbè alọ-yido-dọho tọn sọmọ wutu, nuhe yin didọ to opli lọ ji vude poun mẹ wẹ e mọnukunnujẹ. Enẹgodo, Kunnudetọ asu po asi po de ylọ ẹ nado wá deayidai hẹ yé to whégbè. To yẹdide he tin to alọnuwe Duvivi Ogbẹ̀ Tọn to Aigba Ji Kakadoi! mẹ lẹ yiyizan mẹ, yé basi zẹẹmẹ opagbe aigba paladisi tọn he Jiwheyẹwhe na hẹnwa to sọgodo tọn na ẹn. Eva yiwanna nuhe e plọn bosọ jẹ opli lẹ yì ji to gbesisọmẹ.

To madẹnmẹ, Eva jo họntọn-sunnu etọn do nado nọgbẹ̀ sọgbe hẹ nujinọtedo Biblu tọn lẹ. Mahopọnna dọ whẹndo etọn diọnukunsọ ẹ sinsinyẹn, e zindonukọn nado to nukọnyi to gbigbọmẹ bosọ yin bibaptizi to 1995. To osun ṣidopo godo, Eva lẹzun gbehosọnalitọ, kavi lilatọ whenu-gigọ́ tọn Ahọluduta lọ tọn de. E ko gọalọna tókunọ ẹnẹ jẹ obá klandowiwe po baptẹm po tọn kọ̀n sọn whenẹnu gbọ́n.

Carlos yin jiji taidi tókunọ. Sọn ovu gbọ́n wẹ e ko peve to amasin adínọ zinzan, fẹnnuwiwa, po ajojijẹ po mẹ. Na obu jaguda-gbẹ́ devo lẹ tọn wutu, e họnyi São Paulo bo nọ̀ hẹ João na ojlẹ de. Taidi Carlos, tókunọ de wẹ João lọsu yin bosọ nọ zan gbẹzan mawé de.

To owhe delẹ godo, Carlos plọn owẹ̀n Ahọluduta lọ tọn, he sisẹ ẹ nado klọ́ gbẹzan etọn wé bosọ hẹn alọwle etọn sọgbe hẹ osẹ́n. To nubiọtomẹsi Owe-wiwe tọn lẹ kọ̀n jijẹ godo, Carlos yin bibaptizi to yẹhiadonu mẹ na klandowiwe etọn hlan Jehovah. Ṣigba, to mayọnẹn mẹ hlan Carlos, João lọsu ko se wẹndagbe lọ, bo ko basi diọdo daho lẹ to gbẹzan etọn mẹ. To yinyọnẹn dọ Jehovah ma kẹalọyi yizan yẹdide sinsẹ̀n tọn lẹ mẹ, João bẹ yẹdide “mẹwiwe lẹ” tọn etọn lẹpo dlan. To aliho gbẹzan tọn etọn dai tọn gbigbẹdai godo, João lọsu yin bibaptizi.

Lehe ayajẹ Carlos po João tọn po sù sọ to whenuena yé pé to Plitẹnhọ Ahọluduta tọn de mẹ bo mọ diọdo he dopodopo yetọn ko basi lẹ! Yé omẹ awe lẹ yin tatọ́ whẹndo tọn he tindo azọngban bosọ yin lilatọ zohunhunnọ Ahọluduta lọ tọn lẹ todin.

Agun alọ-yido-dọho tọn 30 po kándo 154 po wẹ tin to Brésil todin, bosọ tindo hú wẹnlatọ 2 500, to ehe mẹ tókunọ 1 500 tin te. To Plidopọ Agbegbe “Ohó Jiwheyẹwhe Tọn Plọnmẹtọ Lẹ” heyin bibasi to Brésil to 2001 na tókunọ lẹ ji, hugan gbẹtọ 3 000 wẹ wá, bọ omẹ 36 yin bibaptizi. Po dona Jehovah tọn po, mí deji dọ tókunọ susu dogọ na gbẹ́ kẹalọyi owẹ̀n Ahọluduta lọ tọn.

[Nudọnamẹ Odò Tọn]