‘Mì Gboadọ bo Yin Huhlọnnọ!’
“Mì [gboadọ, NW]; yẹn ko gbawhàn aihọn tọn.”—JOHANU 16:33.
1. To pọndohlanmẹ na nuhe Islaelivi lẹ na pehẹ to Kenani, tulinamẹ tẹwẹ yé mọyi?
TLOLO whẹpo Islaelivi lẹ dasá Otọ̀ Jọdani tọn biọ Aigba Pagbe tọn ji, Mose dọna yé dọmọ: ‘Mì gboadọ bo yin huhlọnnọ, mì dibu blo, mì sọ yin avosatọ na yé blo: na Jehovah Jiwheyẹwhe mìtọn wẹ to zọnlinzin hẹ mì wutu.’ Enẹgodo Mose ylọ Jọṣua, he na plan Islaelivi lẹ biọ Kenani, bo vọ́ ayinamẹ ehe lọ na ẹn tlọlọ nado gboadọ. (Deutelonomi 31:6, 7) To nukọn mẹ, Jehovah lọsu na tuli Jọṣua, dọmọ: ‘Gboadọ bo yin huhlọnnọ. Gboadọ bo yin huhlọnnọ taun.’ (Jọṣua 1:6, 7, 9) Ohó enẹlẹ wá do ganmẹ pẹpẹ. Islaelivi lẹ na tindo nuhudo adọgbigbo tọn nado pehẹ kẹntọ huhlọnnọ he nọ nọ̀ adà awetọ Jọdani tọn ji lẹ.
2. Ninọmẹ tẹmẹ wẹ mí mọ mídelẹ te to egbehe, podọ nuhudo etẹ tọn wẹ mí tindo?
2 To egbehe, Klistiani nugbo lẹ na dasá aihọn ylankan ehe biọ aihọn yọyọ dopagbe lọ mẹ to madẹnmẹ podọ, taidi Jọṣua, yé dona gboadọ. (2 Pita 3:13; Osọhia 7:14) Ṣigba, ninọmẹ mítọn gbọnvona Jọṣua tọn. Jọṣua yí ohí po owhán lẹ po do hoavùn. Míwlẹ to avùn gbigbọmẹ tọn hò bo ma nọ yí avùnhonu paa lẹ zan gbede. (Isaia 2:2-4; Efesunu lẹ 6:11-17) Humọ, Jọṣua dona hoavùn sinsinyẹn susu to whenuena e tlẹ ko biọ Aigba Pagbe tọn mẹ godo. Ṣigba míwlẹ to avùn sinsinyẹn mítọn lẹ hò todin—whẹpo do biọ aihọn yọyọ lọ mẹ. Mì gbọ mí ni gbadopọnna ninọmẹ delẹ he biọ adọgbigbo.
Naegbọn Mí Dona Vánkan?
3. Etẹwẹ Biblu dohia gando agọjẹdomẹtọ-gán mítọn go?
3 Apọsteli Johanu wlan dọmọ: “Míwlẹ sọ yọnẹn dọ Jiwheyẹwhe dè mí jọ sọn, aihọn lẹpo sọ mlọnai to omẹ ylankan lọ mẹ.” (1 Johanu 5:19) Ohó enẹlẹ do whẹwhinwhẹ́n tangan he wutu Klistiani lẹ dona vánkan nado hẹn yise yetọn go hia. To whenuena Klistiani de hẹn tenọgli etọn go, e ko gbawhàn Satani Lẹgba tọn jẹ obá de mẹ. Nuhe zọ́n niyẹn bọ Satani to adusi po amiyọn po yì taidi “kinnikinni he to lìlì,” bo to tintẹnpọn nado dobuna Klistiani nugbo lẹ bo tlẹ́n yé dù. (1 Pita 5:8) Na nugbo tọn, e to awhànfun hẹ Klistiani yiamisisadode lẹ po gbẹdohẹmẹtọ yetọn lẹ po. (Osọhia 12:17) To awhàn ehe mẹ, e nọ yí gbẹtọvi he nọ hẹn lẹndai etọn lẹ di sọn ojlo mẹ kavi to mayọnẹn mẹ lẹ zan. E nọ biọ adọgbigbo nado nọavunte sọta Satani po godonọnamẹtọ etọn lẹpo po.
4. Avase tẹwẹ Jesu na, ṣigba jẹhẹnu tẹwẹ Klistiani nugbo lẹ ko dohia?
4 Jesu yọnẹn dọ Satani po godonọnamẹtọ etọn lẹ po na jẹagọdo wẹndagbe lọ mlẹnmlẹn. Enẹwutu e na avase hodotọ etọn lẹ dọmọ: “Yé na jo mì hlan nukunbibia, yé nasọ hù mì: yè nasọ gbẹwanna mì to akọta lẹpo mẹ na oyín ṣie tọn wutu.” (Matiu 24:9) Ohó enẹlẹ mọ hẹndi yí to owhe kanweko tintan whenu bosọ to hẹndi mọyi to egbehe. Na nugbo tọn, homẹkẹn he Kunnudetọ Jehovah tọn egbezangbe tọn delẹ ko doakọnna ko sinyẹn tlala hú devo depope to whenuho mẹ. Etomọṣo, Klistiani nugbo lẹ nọ gboadọ to kọgbidinamẹ mọnkọtọn glọ. Yé yọnẹn dọ “obu gbẹtọ tọn wẹ nọ hẹn omọ̀ wá,” podọ yé ma jlo na yin wiwle do omọ̀ mẹ.—Howhinwhẹn lẹ 29:25.
5, 6. (a) Ninọmẹ tẹlẹ wẹ biọ adọgbigbo to mí si? (b) Nawẹ Klistiani nugbonọ lẹ nọ yinuwa gbọn to whenuena adọgbigbo yetọn yin whiwhlepọn?
5 Gbọnvona homẹkẹn, avùnnukundiọsọmẹnu devo lẹ tin he biọ adọgbigbo to mí si. Na mẹdelẹ, avùnnukundiọsọmẹnu wẹ e yin nado lá wẹndagbe lọ na mẹhe yé ma yọnẹn lẹ. Adọgbigbo ovi delẹ tọn nọ yin whiwhlepọn to wehọmẹ eyin yè biọ to yé si nado jì tohàn kavi nado dọnudo asia. Na ohàn mọnkọtọn nọ sinai do hogbe sinsẹ̀n tọn lẹ ji wutu, ovi Klistiani tọn lẹ ko yí adọgbigbo do magbe nado yinuwa to aliho he nọ hẹn homẹ Jiwheyẹwhe tọn hùn mẹ, podọ nuyiwa dagbe yetọn ko hẹn awuvivi wá.
6 Mí sọ tindo nuhudo adọgbigbo tọn to whenuena agọjẹdomẹtọ lẹ yí linlinnamẹnu lẹ zan nado hẹn linlin ylankan lẹ gbayipe gando devizọnwatọ Jiwheyẹwhe tọn lẹ go kavi to whenuena yé tẹnpọn nado doalọtena sinsẹ̀n-bibasi nugbo gbọn ‘osẹ́ndoai yíyí do ṣika’ dali. (Psalm 94:20) Di apajlẹ, etẹwẹ dona yin numọtolanmẹ mítọn to whenuena linlinwe, ladio, kavi televiziọn na linlin he slokọna nugbo lọ kavi he dolalo dokọna Kunnudetọ Jehovah tọn lẹ? Be e dona paṣa mí wẹ ya? Lala. Mí yọnẹn dọ onú mọnkọtọn lẹ na jọ. (Psalm 109:2) Podọ e ma nọ paṣa mí eyin mẹdelẹ yí lalo mọnkọtọn lẹ se, na “wunvinọ [wẹ nọ] yí ohó popo se.” (Howhinwhẹn lẹ 14:15) Ṣogan, Klistiani nugbonọ lẹ ma nọ yí nuhe yin didọ gando mẹmẹsunnu yetọn lẹ go lẹpo se gba, podọ yé ma nọ dike linlin lalo tọn lẹ ni hẹn yé nado gọ̀n opli Klistiani tọn lẹ, kavi nado dekanpona lizọnyizọn kunnudegbe tọn, kavi nado gbọjọ to yise yetọn mẹ gba. Kakatimọ, yé nọ ‘suwhẹna yede di devizọnwatọ Jiwheyẹwhe tọn gbọn gigo po ovlẹ po dali, gbọn linlin ylankan po linlin dagbe po dali: di mẹklọtọ to nukun agọjẹdomẹtọ lẹ tọn mẹ, ṣigba na taun tọn nugbonọ.’—2 Kọlintinu lẹ 6:4, 8.
7. Kanbiọ mẹdetiti gbigbejepọn tọn tẹlẹ wẹ mí sọgan kanse mídelẹ?
7 To whenuena Paulu to wekanhlan Timoti, e dọmọ: “Jiwheyẹwhe ma na gbigbọ obu tọn mí gba, adavo huhlọn tọn . . . Enẹwutu hiẹ kuwinyan okunnu Oklunọ mítọn tọn blo.” (2 Timoti 1:7, 8; Malku 8:38) Todin mí sọgan kanse míde dọ: ‘Be nuyise ṣie lẹ nọ huwinyan na mi wẹ, kavi be yẹn nọ gboadọ ya? To azọ́nwatẹn ṣie (kavi wehọmẹ ṣie), be yẹn nọ dike gbẹtọ lẹ ni yọnẹn dọ yẹn yin Kunnudetọ Jehovah tọn ya, kavi be yẹn nọ tẹnpọn nado whlá nugbo lọ do yé wẹ ya? Be winyan nọ hù mi nado gbọnvona mẹdevo lẹ wẹ ya, kavi be homẹ ṣie nọ hùn dọ haṣinṣan ṣie hẹ Jehovah hẹn mi gbọnvo?’ Eyin yẹwheho wẹndagbe lọ tọn didọ nọ dobuna mẹde kavi eyin mẹde tindo numọtolanmẹ agọ̀ dogbọn nuyise he ma diyin lẹ tintindo dali, omẹ lọ ni flin ayinamẹ he Jehovah na Jọṣua dọmọ: ‘Gboadọ bo yin huhlọnnọ.’ Ma wọn gbede blo dọ pọndohlan Jehovah po Jesu Klisti tọn po wẹ yin nujọnu, e mayin linlẹn azọ́nwatọgbẹ́ kavi wehọmẹvigbẹ́ mítọn lẹ tọn gba.—Galatianu lẹ 1:10.
Lehe Mí Sọgan Wleawuna Adọgbigbo Do
8, 9. (a) To nujijọ de whenu, nawẹ adọgbigbo Klistiani fliflimẹ tọn lẹ tọn yin whiwhlepọn gbọn? (b) Nawẹ Pita po Johanu po yinuwa gbọn to whenuena yé yin budona, podọ etẹwẹ yewlẹ po mẹmẹsunnu yetọn lẹ po tindo numimọ etọn?
8 Nawẹ mí sọgan wleawuna adọgbigbo he na hẹn mí penugo nado hẹn tenọgli mítọn go to ojlẹ awusinyẹn tọn ehelẹ whenu gbọn? Eyọn, nawẹ Klistiani fliflimẹ tọn lẹ wleawuna adọgbigbo gbọn? Lẹnnupọndo nuhe jọ to whenuena ogán yẹwhenọ po mẹhomẹ Jelusalẹm tọn lẹ po dọna Pita po Johanu po nado doalọtena yẹwhehodidọ to oyín Jesu tọn mẹ ji. Devi lọ lẹ gbẹ́ podọ yé yin budona ṣigba bo yin tuntundote to godo mẹ. To madẹnmẹ, yé kọnawudopọ hẹ mẹmẹsunnu lẹ, podọ to pọmẹ yé hodẹ̀ dọmọ: “Oklunọ, pọ́n budonamẹ yetọn: bo yí na hlan afanumẹ towe lẹ, nado nọ yí tugbigbo lẹpo do dọ ohó towe.” (Owalọ lẹ 4:13-29) Jehovah yigbe gbọn hinhẹn yé lodo po gbigbọ wiwe po dali, podọ dile nukọntọ Ju tọn lẹ dekunnu etọn do to nukọn mẹ, yé yí nuplọnmẹ yetọn do “gọ́ Jelusalẹm.”—Owalọ lẹ 5:28.
9 Mì gbọ mí ni gbadopọnna nuhe jọ to ojlẹ enẹ mẹ. To whenuena nukọntọ Ju tọn lẹ vannukundo devi lẹ ji, yé ma tindo linlẹn gbejijo tọn to kọgbidinamẹ lọ glọ gba. Kakatimọ, devi lẹ biọ adọgbigbo to odẹ̀ mẹ nado to yẹwhehodọ zọnmii. Enẹgodo yé yinuwa sọgbe hẹ odẹ̀ yetọn, Jehovah sọ hẹn yé lodo po gbigbọ etọn po. Numimọ yetọn dohia dọ nuhe Paulu wlan to owhe delẹ godo to lẹdo hodidọ tọn devo mẹ yọn-na-yizan na Klistiani lẹ to whenuena yé yin homẹkẹndo. Paulu dọmọ: “Yẹn sọgan wà onú popo gbọn Klisti he to huhlọnna mi mẹ.”—Filippinu lẹ 4:13.
10. Nawẹ numimọ Jẹlemia tọn gọalọna mẹhe nọ kuwinyan to jọwamọ-liho lẹ gbọn?
10 Ṣigba mí ni dọ dọ mẹde nọ kuwinyan to jọwamọ-liho. Be e sọgan yí adọgbigbo do sẹ̀n Jehovah to nukundiọsọmẹ nukọn ya? Gbau! Flin nuyiwa Jẹlemia tọn to whenuena Jehovah dè e nado yin yẹwhegán. Dẹpẹ lọ dọmọ: “Yẹn yin yọpọvu.” Matin ayihaawe, e lẹndọ emi ma pegan. Ṣogan, Jehovah na ẹn tuli dọmọ: “A dọ, yẹn yin yọpọvu blo: na hiẹ na yì mẹpopo he dè yẹn na do we hlan, podọ nudepope yẹn na degbena we hiẹ na dọ. A dibu na nukunmẹ yetọn lẹ blo; na yẹn tin de we nado whlẹn we.” (Jẹlemia 1:6-10) Jẹlemia dotudo Jehovah go, podọ na enẹ wutu, po huhlọn Jehovah tọn po e dùto awuwhiwhle etọn ji bo lẹzun kunnudetọ adọgbotọ de to Islaeli.
11. Etẹwẹ nọ gọalọna Klistiani lẹ to egbehe nado gboadọ di Jẹlemia?
11 Klistiani yiamisisadode lẹ tindo azọ́ndenamẹ he taidi Jẹlemia tọn to egbehe, podọ po godonọnamẹ “gbẹtọ susugege” “lẹngbọ devo” lẹ tọn po, yé to lẹndai Jehovah tọn lẹ lá zọnmii, mahopọnna ojlo matindo, mẹṣanko, po homẹkẹn po. (Osọhia 7:9; Johanu 10:16) Yé nọ mọ tulinamẹ yí sọn nuhe Jehovah dọna Jẹlemia mẹ dọmọ: ‘A dibu blo.’ Yé ma nọ wọn gbede dọ Jiwheyẹwhe wẹ deazọ́nna yé podọ owẹ̀n etọn lá wẹ yé te.—2 Kọlintinu lẹ 2:17.
Apajlẹ Adọgbigbo Tọn He Mí Dona Hodo Lẹ
12. Apajlẹ dagbe adọgbo tọn tẹwẹ Jesu zedai, podọ tuli tẹwẹ e na hodotọ etọn lẹ?
12 Eyin mí lẹnayihamẹpọn do apajlẹ mẹdevo lẹ tọn he ko yí adọgbigbo do yinuwa taidi Jẹlemia ji, e sọgan gọalọna mí to vivẹnudido mítọn mẹ nado wleawuna adọgbigbo. (Psalm 77:12) Di apajlẹ, dile mí gbadopọnna lizọnyizọn Jesu tọn, adọgbigbo etọn to whenuena Satani whlé e pọ́n podọ to whenuena e pehẹ nukundiọsọmẹ sinsinyẹn nukọntọ Ju lẹ tọn nọ whàn mí tlala. (Luku 4:1-13; 20:19-47) To huhlọn Jehovah tọn mẹ, Jesu ma jogbe gba, podọ ojlẹ vude jẹnukọnna okú etọn, e dọna devi etọn lẹ dọmọ: “To aihọn mẹ mì na tindo tukla: ṣigba mì [gboadọ]; yẹn ko gbawhàn aihọn tọn.” (Johanu 16:33; 17:16) Eyin devi Jesu tọn lẹ hodo apajlẹ etọn, yé lọsu na gbawhàn. (1 Johanu 2:6; Osọhia 2:7, 11, 17, 26) Ṣigba yé dona ‘gboadọ.’
13. Tulinamẹ tẹwẹ Paulu na Filippinu lẹ?
13 Owhe delẹ to okú Jesu tọn godo, Paulu po Sila po yin zizedo ganpamẹ to Filippi. To nukọn mẹ, Paulu na tuli agun Filippi tọn nado “nọte gligli to gbigbọ dopo mẹ, bosọ nọpọ́ do to awhànfun na yise wẹndagbe tọn wutu; [bo ma dibuna kẹntọ yetọn lẹ] to nudepope mẹ blo.” Nado hẹn yé lodo to ehe mẹ, Paulu dọmọ: “[Homẹkẹn he to yinyin dido Klistiani lẹ ehe] yin ohia dopo na viva [homẹkẹndomẹtọ lẹ tọn] he yè mọdona, ṣigba whlẹngán mìtọn tọn, podọ enẹ sọn Jiwheyẹwhe dè wẹ. Na hlan mì wẹ yè na Klisti wutu, e ma yin nado yí ì se kẹdẹ gba, ṣigba nado jiya na ewọ tọn wutu ga.”—Filippinu lẹ 1:27-29.
14. Nawẹ adọgbigbo Paulu tọn yinuwado mẹmẹsunnu lẹ ji to Lomu gbọn?
14 Ganpamẹ wẹ Paulu sọ tin te, to ojlẹ ehe mẹ to Lomu, to whenuena e kanwe hlan agun Filippi tọn. Ṣogan, e zindonukọn nado yí adọgbigbo do to yẹwhehodọ na mẹdevo lẹ. Etẹwẹ yin kọdetọn lọ? E wlan dọmọ: “Ogàn ṣie lẹzun awusọhia to Klisti mẹ to awhànvipẹ Sesali tọn lẹpo ṣẹnṣẹn, podọ to fidevo lẹpo; podọ mẹmẹsunnu susu to Oklunọ mẹ wẹ do tugbigbo gbọn ogàn ṣie mẹ, yé sọ yí tugbigbo do to ohó lọ dọ tlala madibu.”—Filippinu lẹ 1:13, 14.
15. Apajlẹ dagbe yise mẹnu lẹ tọn wẹ na hẹn gbemima mítọn lodo nado gboadọ?
15 Apajlẹ Paulu tọn nọ na tuli mí. Mọjanwẹ apajlẹ dagbe Klistiani egbezangbe tọn he ko doakọnna homẹkẹn to otò he tin to gandudu aṣẹglanglan-panamẹ tọn kavi sinsẹ̀ngán lẹ tọn glọ lẹ tọn nọ wà do niyẹn. Otàn susu yetọn tọn ko yin didọ to linlinnamẹwe Atọ̀họ̀-Nuhihọ́ Lọ Tọn po Réveillez-vous! lẹ po mẹ podọ to Annuaire des Témoins de Jéhovah lẹ mẹ. Dile hiẹ to kandai ehelẹ hia, flindọ omẹ ehelẹ yin gbẹtọ tata di míwlẹ; ṣigba to whenuena yé tin to ninọmẹ sinsinyẹn lẹ mẹ, Jehovah na yé huhlọn he hugan jọwamọ tọn podọ yé sọ doakọnna. Mí sọgan deji dọ e na wà nudopolọ na mí eyin mí wá tin to ninọmẹ sinsinyẹn lẹ mẹ.
Adọgbigbo Mítọn Nọ Hẹn Homẹ Jehovah Tọn Hùn bo Nọ Gbògbéna Ẹn
16, 17. Nawẹ mí sọgan wleawuna adọgbigbo to egbehe gbọn?
16 Klistiani de he nọte gligli na nugbo po dodowiwa po yin adọgbotọ. Eyin e wàmọ mahopọnna numọtolanmẹ obu tọn, adọgbigbo etọn sọ jẹna pipà hugan. Na nugbo tọn, Klistiani depope wẹ sọgan yin adọgbotọ eyin e jlo na wà ojlo Jehovah tọn nugbo, eyin e magbe nado yin nugbonọ, eyin e nọ ganjẹ Jiwheyẹwhe go to whepoponu, podọ eyin e nọ flin to whepoponu dọ Jehovah ko hẹn mẹsusu taidi ewọ lodo wayi. Humọ, eyin mí doayi e go dọ adọgbigbo mítọn nọ hẹn homẹ Jehovah tọn hùn bo nọ gbògbéna ẹn, mí nọ yin nujikudonọ dogọ ma nado gbọjọ. Mí nọ magbe nado doakọnna mẹṣanko kavi nuyiwahẹmẹ he ylan humọ lẹ na mí yiwanna ẹn sisosiso wutu.—1 Johanu 2:5; 4:18.
17 Mì wọn gbede blo dọ eyin mí to yaji na yise mítọn wutu, enẹ ma zẹẹmẹdo dọ mí ko wà nude jẹdò gba. (1 Pita 3:17) Mí to yaji na mí tẹdo nupojipetọ-yinyin Jehovah tọn go, na mí to dagbe wà, podọ na mí mayin apadewhe aihọn tọn wutu. Apọsteli Pita dọ gando ehe go dọmọ: “Eyin, whenuena mì to dagbe wà, eyin mì to yaji na enẹ wutu, bọ mì sọ [doakọnna ẹn], ehe wẹ yin alọkẹyi to Jiwheyẹwhe dè.” Pita sọ dọmọ: “Mì gbọ yé he to yaji kẹdẹdi ojlo Jiwheyẹwhe tọn lẹ, ni yí ayiha yetọn do dagbe wiwà mẹ, hlan Mẹdatọ nugbonọ de.” (1 Pita 2:20; 4:19) Mọwẹ, yise mítọn nọ hẹn homẹ Jiwheyẹwhe owanyinọ mítọn, Jehovah tọn hùn, bo nọ gbògbéna ẹn. Whẹwhinwhẹ́n dagbe nankọ die nado yin adọgbotọ!
Hodidọ hẹ Aṣẹpatọ Lẹ
18, 19. To whenuena mí ze teninọ adọgbigbo tọn to whẹdatọ de nukọn, owẹ̀n tẹwẹ mí to didó to yẹhiadonu-liho?
18 To whenuena Jesu dọna hodotọ etọn lẹ dọ yé na yin homẹkẹndo, e sọ dọna yé dọmọ: “[Gbẹtọ lẹ] na hẹn mì yì tòhódọtọ lẹ dè, yé nasọ hò mì to sinagọgu yetọn lẹ mẹ; yè na hẹn mì yì togán lẹ po ahọlu lẹ po nukọn na yẹn wutu, na okunnu de do yé po [akọta] lẹ po go.” (Matiu 10:17, 18) E nọ biọ adọgbigbo nado nọte to whẹdatọ kavi togán de nukọn na whẹsadokọnamẹ agọ̀ wutu. Ṣogan, to whenuena mí yí ojlẹ mọnkọtọn lẹ zan po adọgbigbo po nado dekunnuna omẹ enẹlẹ, mí to dotẹnmẹ he hundote to ninọmẹ sinsinyẹn lọ glọ yizan nado jẹ yanwle titengbe de kọ̀n. To yẹhiadonu-liho, mí to ohó Jehovah tọn heyin kinkàndai to Psalm 2tọ mẹ dọna mẹhe to whẹdana mí lẹ dọmọ: “Enẹwutu nuyọnẹn ni pé mì dinvie, mì ahọlu emi; na yè nisọ plọn mì, mì whẹdatọ aigba tọn emi, mì yí osi do sẹ̀n OKLUNỌ.” (Psalm 2:10, 11) To paa mẹ, whẹdatọ lẹ ko nọgodona mẹdekannujẹ sinsẹ̀n-bibasi tọn to whenuena Kunnudetọ Jehovah tọn lẹ yin owhẹ̀ agọ̀ sadokọna to whẹdọhọsa, podọ mí yọ́n pinpẹn enẹ tọn. Ṣigba, whẹdatọ delẹ ko joawuna nuyiwadomẹji agọjẹdomẹtọ lẹ tọn. Gando whẹdatọ mọnkọtọn lẹ go, Owe-wiwe dọmọ: “Na yè nisọ plọn mì.”
19 Whẹdatọ lẹ dona yọnẹn dọ Jehovah Jiwheyẹwhe wẹ tindo osẹ́n he yiaga hugan. Yé dona flin dọ gbẹtọvi lẹpo, he bẹ whẹdatọ lẹ hẹn, na dogbè na Jehovah Jiwheyẹwhe po Jesu Klisti po. (Lomunu lẹ 14:10) Na míwlẹ tọn, vlavo whẹdatọ heyin gbẹtọvi de dawhẹ dodo do ota mítọn mẹ kavi lala, mí tindo whẹwhinwhẹ́n lẹpo nado gboadọ, na Jehovah tin to godo na mí wutu. Biblu dọmọ: ‘Ayajẹnọ wẹ yé he dín fibẹtado to e mẹ lẹpo.’—Psalm 2:12.
20. Naegbọn mí sọgan gọ́ na ayajẹ eyin mí tlẹ dona doakọnna homẹkẹn po mẹhẹngble po?
20 To Yẹwhehodidọ Osó ji tọn mẹ, Jesu dọmọ: ‘Ayajẹnọ wẹ mìwlẹ, whenuena gbẹtọ lẹ na to vivlẹ mì kò, bo to homẹkẹndo mì, bosọ to oylan hunkọhunkọ dọ do mì go to lalo mẹ, na ṣie wutu. Mì ni jaya, na mì nisọ to ayajẹ susu; na ale mìtọn wẹ daho to olọn mẹ: na mọkẹdẹ wẹ yé dohomẹkẹn yẹwhegán he ko tin jẹnukọnna mì lẹ do.’ (Matiu 5:11, 12) Nugbo wẹ dọ, homẹkẹn mayin awuvivinu to ede mẹ gba, ṣigba teninọ gligli mítọn mahopọnna homẹkẹn po linlin mẹhẹngble tọn lẹ to linlinnamẹnu lẹ mẹ po, yin whẹwhinwhẹ́n de na ayajẹ. E zẹẹmẹdo dọ mí to homẹ Jehovah tọn hẹn hùn bo nasọ mọ ale yí. Adọgbigbo mítọn nọ dohia dọ mí tindo yise nujọnu tọn bosọ nọ hẹn mí deji dọ mí tindo nukundagbe Jiwheyẹwhe tọn. Na nugbo tọn, e nọ dohia dọ mí dotudo Jehovah go mlẹnmlẹn. Tudido mọnkọtọn yin nujọnu na Klistiani lẹ, dile hosọ he bọdego na dohia do.
Etẹwẹ Hiẹ Plọn?
• Ninọmẹ tẹlẹ wẹ nọ biọ adọgbigbo to egbehe?
• Nawẹ mí sọgan wleawuna adọgbigbo gbọn?
• Mẹnu lẹ wẹ ze apajlẹ dagbe adọgbigbo tọn dai?
• Naegbọn mí nado jlo nado yinuwa po adọgbigbo po?
[Yẹdide to weda 9]
Simone Arnold (Liebster todin) to Allemagne, Widdas Madona to Malawi, gọna Lydia po Oleksii Kurdas po to Ukraine do adọgbigbo hia bosọ nọavunte sọta mẹylankan lọ
[Yẹdide to lẹ weda 10]
Winyan wẹndagbe lọ tọn ma hù mí gba
[Yẹdide to weda 11]
Adọgbigbo Paulu tọn to ganpamẹ gọalọ to godoninọna wẹndagbe lọ mẹ
[Yẹdide to weda 12]
Eyin mí yí adọgbigbo do basi zẹẹmẹ teninọ sinai do Owe-wiwe ji mítọn tọn na whẹdatọ de, owẹ̀n titengbe de dó wẹ mí te