Jọja lẹ Emi—Be Mì to Nukọnyi to Gbigbọmẹ Ya?

“DILE etlẹ yindọ yẹn nọ yì opli Klistiani tọn lẹ, yẹn ma tindo ojlo nado sẹ̀n Jehovah gba,” wẹ Hideo dọ dile e flin owhe atọ̀n tintan he e yizan to wehọmẹ daho lẹ. “Yẹn nọ saba pọ́n dee hlan taidi mẹhe klasigbẹ́ ṣie lẹ yiwanna bo nọ to gigó gbọn tòhomẹ-liho ji po họntọn-yọnnu de po. Yẹn ma tindo yanwle tangan lẹ gba bo masọ tindo ojlo depope nado yinukọn to gbigbọmẹ.” Taidi Hideo, e taidi dọ jọja susu tin to nugbo lọ mẹ poun, bo ma tindo ojlo depope nado jẹ yanwle họakuẹ lẹ kọ̀n kavi yinukọn to gbigbọmẹ.

Eyin jọja de wẹ hiẹ yin, vlavo homẹ towe nọ hùn nado tindo mahẹ to aihundida lanmẹyiya tọn kavi ayidedai he hiẹ yiwanna de mẹ. Ṣigba, hiẹ sọgan nọma tindo numọtolanmẹ mọnkọtọn gando gbigbọmẹnu lẹ go. Be e yọnbasi nado yin zohunhunnọ gando yanwle gbigbọmẹ tọn lẹ go ya? Lẹnnupọndo hogbe psalm-kàntọ tọn ehelẹ ji dọmọ: ‘Nuflinmẹ OKLUNỌ tọn wẹ nugbo: bo nọ diọ mayọndenọ zun nuyọnẹntọ. Wiwe wẹ gbedide OKLUNỌ tọn, bosọ nọ hẹn nukun lẹ sẹ́.’ (Psalm 19:7, 8) Ohó Jiwheyẹwhe tọn sọgan deanana “mayọndenọ” nado yinuwa po nuyọnẹn po, ‘bo hẹn nukun etọn lẹ sẹ́.’ Mọwẹ, hiẹ sọgan jẹaglin bo hùnhomẹ to gbigbọmẹnu lẹ mẹ. Ṣigba etẹwẹ na hẹn we tindo numọtolanmẹ mọnkọtọn? Fie wẹ hiẹ dona bẹsọn?

Yin Whinwhàn Nado Sẹ̀n Jiwheyẹwhe

Jẹnukọn whẹ́, hiẹ dona yin whinwhàn. Lẹnnupọndo whẹho Ahọlu Josia Juda tọn heyin jọja de ji. To whenuena owe Osẹ́n Jehovah tọn yin mimọ to tẹmpli mẹ, Josia biọ dọ yè ni hia ẹ podọ nuhe e se lẹ yinuwa do e ji sisosiso. Taidi kọdetọn de, “Josia . . . bẹ́ osùnú lẹpo tọ́n sọn otò he yin ovi Islaeli tọn lẹpo mẹ.” (2 Otannugbo lẹ 34:14-21, 33) Ohó Jiwheyẹwhe tọn hihia whàn Josia nado wà nususu dogọ to godoninọna sinsẹ̀n-bibasi wiwe ṣeke mẹ.

Hiẹ lọsu sọgan wleawuna ojlo nado sẹ̀n Jehovah eyin a nọ hia Biblu bo nọ lẹnayihamẹpọn do nuhe a hia ji. Nuhe whàn Hideo niyẹn. E jẹ gbẹdo hẹ gbehosọnalitọ mẹhomẹ heyin lizọnyizọnwatọ whenu-gigọ́ Kunnudetọ Jehovah tọn lẹ tọn de ji. Gbehosọnalitọ lọ yin Biblu plọntọ vivẹnunọ de bo nọ dovivẹnu nado yí nuhe e plọn lẹ do yizan mẹ. Na apajlẹ gbehosọnalitọ lọ tọn yinuwado Hideo ji tlala wutu, ewọ lọsu jẹ nudopolọ wà ji bosọ wleawuna ojlo sinsinyẹn de nado sẹ̀n Jiwheyẹwhe bo gọalọna mẹdevo lẹ. Nukọnyiyi gbigbọmẹ tọn etọn dekọtọn do gbẹzan he tindo lẹndai de mẹ.

Biblu hihia egbesọegbesọ sọgan whàn jọja lẹ. Takahiro dọmọ: “Whedepopenu he yẹn yìhọ bo flin dọ yẹn ma ko hia Biblu, yẹn nọ fọ́n bo nọ hia ẹ. Taidi kọdetọn de, yẹn mọ anademẹ Jehovah tọn. Biblu hihia egbesọ tọn gọalọna mi tlala nado yinukọn to gbigbọmẹ. Po gbemima lọ po nado tindo mahẹ dogọ to sinsẹ̀nzọn Jehovah tọn mẹ, yẹn bẹ azọ́n gbehosọnalitọ whepoponu tọn jẹeji tlolo to gbedewema yíyí sọn wehọmẹ daho godo. Na nugbo tọn, yẹn to vivi etọn dù tlala.”

Gbọnvona Biblu hihia, onú devo tẹwẹ sọgan gọalọna we nado hẹn mẹwhinwhàn towe nado pagigona Jehovah lodo? Onọ̀ Tomohiro tọn plọn ẹn nugbo Biblu tọn. E dọmọ: “To whenuena yẹn plọn owe La vie a bien un but fó godo to owhe 19 mẹvi mẹ wẹ yẹn wá yin nuyiwadeji sisosiso gbọn owanyi Jehovah tọn po avọ́sinsan ofligọ Jesu tọn po dali. Pẹdido na owanyi Jiwheyẹwhe tọn enẹ whàn mi nado wà onú susu dogọ to sinsẹ̀nzọn Jehovah tọn mẹ.” (2 Kọlintinu lẹ 5:14, 15) Taidi Tomohiro, jọja susu nọ yin tulina nado yinukọn to gbigbọmẹ gbọn afọdidona oplọn Biblu vẹkuvẹku mẹdetiti tọn dali.

Ṣigba etẹwẹ eyin hiẹ ma gbẹsọ tindo ojlo ahundopo tọn nado sẹ̀n Jehovah janwẹ? Be mẹde tin he hiẹ sọgan lẹhlan na alọgọ ya? Apọsteli Paulu wlan dọmọ: ‘Na Jiwheyẹwhe to azọ́nwa to mì homẹ nado jlo podọ nado yinuwa.’ (Filippinu lẹ 2:13) Eyin hiẹ hodẹ̀ hlan Jehovah na alọgọ, ewọ na na we gbigbọ wiwe etọn vọ́nu, podọ ehe na na we huhlọn ‘nado yinuwa’ bosọ “jlo.” Ehe zẹẹmẹdo dọ gbigbọ wiwe Jiwheyẹwhe tọn na dozolanmẹna we nado wà nuhe go hiẹ pé lẹpo to sinsẹ̀nzọn Jehovah tọn mẹ bo na gọalọna we nado whẹ́n to gbigbọmẹ. To aliho lẹpo mẹ, dotudo huhlọn Jehovah tọn go bo hẹn ahun towe lodo!

Ze Yanwle Mẹdetiti Tọn lẹ Dai

Eyin hiẹ ko magbe nado sẹ̀n Jehovah to gigọ́mẹ dogọ, hiẹ dona ze yanwle mẹdetiti tọn lẹ dai nado sọgan yinukọn to gbigbọmẹ. Mana, viyọnnu jọja Klistiani de, dọmọ: “Yanwle lẹ zizedai gọalọna mi taun. Kakati nado joagọyigodo, yẹn sọgan yí adọgbigbo do zindonukọn. Po yanwle ṣie lẹ po to ayiha mẹ, yẹn biọ anademẹ Jehovah tọn to odẹ̀ mẹ bosọ penugo nado yinukọn bo ma yin ayihafẹsẹna.”

Yanwle towe lẹ dona yin lẹnpọn dagbe tọn he alọ sọgan plá. Weta dopo hihia to Biblu mẹ to gbèdopo sọgan yin yanwle lẹnpọn dagbe tọn de. Hiẹ sọ sọgan bẹ tito dodinnanu tọn de jẹeji. Nado basi dohia ehe tọn po nuhe mí tindo to Gungbe mẹ po, hiẹ sọgan plọn gbẹzan po jẹhẹnu Klistiani tọn lẹ po heyin titodohukanji to Alọdlẹndonu Hosọ Atọ̀họ̀-Nuhihọ́ Lọ Tọn 15 décembre 2001 weda 31 tọn mẹ. Nudi hosọ 27 wẹ tin he hiẹ sọgan gbadopọnna, podọ ayihaawe matin dọ dodinnanu lọ na dọ̀n we sẹpọ Jehovah bo nasọ dozolanmẹna we nado wà humọ. Yanwle he alọ sọgan plá devo lẹ bẹ gblọndo nina e whè gbau whladopo to opli Klistiani tọn dopodopo he biọ mahẹ tintindo mẹplidopọ lẹ tọn ji, tintẹnpọn nado jẹakọhẹ hagbẹ agun lọ tọn dopo to opli lẹpo ji, podọ dẹ̀hiho hlan Jehovah bo dọho etọn na mẹdevo lẹ egbesọegbesọ hẹn.

Eyin hiẹ ma ko ze yinkọ dai to Wehọmẹ Lizọnyizọn Yẹwhehọluduta tọn mẹ, yanwle dagbe de wẹ enẹ na yin na we. Be hiẹ ko jẹ mahẹ tindo to lizọnyizọn gbangba tọn mẹ ji ya? Eyin lala wẹ, hiẹ sọgan jlo nado dovivẹnu bo lẹzun wẹnlatọ he ma ko yí baptẹm de. Afọdide he bọdego na yin nado lẹnnupọn sisosiso do haṣinṣan he a tindo hẹ Jehovah ji bo klan dewe do wiwe na ẹn. Jọja susu nọ tẹnpọn nado nọgbẹ̀ sọgbe hẹ klandowiwe yetọn gbọn afọdidona lizọnyizọn whenu-gigọ́ tọn dali.

Dile e tlẹ yin onú dagbe nado tindo yanwle lẹ to gbẹzan mẹ, tin to aṣeji ma nado wleawuna gbigbọ agbàwhinwhlẹn tọn. Hiẹ na mọ ayajẹ susu dogọ to nuhe hiẹ wà lẹ mẹ eyin a ma nọ yí dewe jlẹdo mẹdevo lẹ go.—Galatianu lẹ 5:26; 6:4.

Vlavo hiẹ lẹndọ hiẹ ma tindo numimọ sọmọ bọ e nọ vẹawuna we nado ze yanwle lẹnpọn dagbe tọn lẹ dai. Eyin mọwẹ, hodo ayinamẹ Biblu tọn he dọmọ: “Tùn otó towe ai, bo se ohó nuyọnẹntọ lẹ tọn.” (Howhinwhẹn lẹ 22:17) Biọ alọgọ mẹjitọ towe lẹ tọn kavi Klistiani he whèwhín devo lẹ tọn. Na nugbo tọn, mẹjitọ lẹ po mẹdevo lẹ po, dona yin lẹnpọn dagbenọ po tulinamẹtọ po to whẹho ehe mẹ. Jọja lẹ sọgan hẹn ayajẹ yetọn bu eyin yé yin hinhẹn gánnugánnu nado jẹ yanwle he mẹdevo lẹ zedai na yé kọ̀n. Podọ ehe tlẹ sọgan hẹn lẹndai yanwle lẹ zizedai tọn bú. Enẹ jọ do viyọnnu de go, he dọmọ: “Mẹjitọ ṣie lẹ ze yanwle susu dai na mi, taidi yinkọ zizedai to Wehọmẹ Lizọnyizọn Yẹwhehọluduta tọn mẹ, mahẹ tintindo to sinsẹ̀nzọn kunnudegbe tọn mẹ, baptẹm yíyí, podọ lilẹzun gbehosọnalitọ de. Yẹn vánkan nado jẹ dopodopo yetọn kọ̀n. Eyin yẹn jẹ yanwle dopo kọ̀n, mẹjitọ ṣie lẹ ma nọ pà mi gba ṣigba, kakatimọ, nọ ze yanwle devo dai na mi nado vánkan na. Taidi kọdetọn de, yẹn nọ saba tindo numọtolanmẹ dọ yè to hinhẹn mi gánnugánnu nado jẹ yanwle lẹ kọ̀n. Apọ̀ ṣì mi bọ yẹn masọ tindo linlẹn nuwadotana dagbe tọn depope.” Etẹwutu? Yanwle lọ lẹpo wẹ yin nujọnu, ṣigba mẹdevo lẹ wẹ ze yé dai na ẹn. Nado tindo kọdetọn dagbe, hiẹ dona yin whinwhàn nado ze afọdide tintan lọ to yanwle zizedai na dewe mẹ!

Lẹnnupọndo Jesu Klisti ji. To whenuena e wá aigba ji, e yọ́n nuhe Otọ́ etọn, Jehovah, donukun sọn ewọ si. Na Jesu, ojlo Jehovah tọn wiwà mayin yanwle de poun gba, ṣigba azọ́ndenamẹ he dona yin hinhẹndi wẹ e yin. Nukun tẹwẹ Jesu yí do pọ́n azọ́ndenamẹ etọn? E dọmọ: “Núdùdù ṣie wẹ nado wà ojlo mẹhe do mi hlan tọn podọ nado dotana azọ́n etọn.” (Johanu 4:34) Jesu hùnhomẹ to ojlo Jehovah tọn wiwà mẹ bosọ hẹn ojlo Otọ́ etọn tọn lẹ di. E taidi núdùdù na Jesu—e mọ homẹhunhun po pekọ po to azọ́n he e yin nukundo nado wà lọ wiwadotana mẹ. (Heblu lẹ 10:5-10) Hiẹ lọsu sọgan mọ homẹhunhun eyin a yin whinwhàn to aliho he sọgbe mẹ nado wà nuhe mẹjitọ towe lẹ na we tuli nado wà.

Nuṣikọna We to Dagbe Wiwà mẹ Blo

Eyin hiẹ ko ze yanwle de dai to ayiha mẹ, dovivẹnu nado jẹ e kọ̀n. Galatianu lẹ 6:9 dọmọ: “Mì dike nuṣikọna mí to dagbe wiwà mẹ blo: na míwlẹ na gbẹ̀n to whenuena ojlẹ sọ, eyin mí ma wàdidọ.” Ma ganjẹ huhlọn kavi nugopipe towe kẹdẹ go blo. Hiẹ sọgan pehẹ aliglọnnamẹnu lẹ podọ to whedelẹnu tlẹ sọgan tindo linlẹn awugbopo tọn na ojlẹ gli de. Ṣigba Biblu hẹn mí deji dọmọ: “Yọ́n [Jiwheyẹwhe] to aliho towe lẹpo ji, ewọ nasọ jlọ omọ́ towe.” (Howhinwhẹn lẹ 3:6) Jehovah na hẹn we dote dile hiẹ to kanván nado jẹ yanwle gbigbọmẹ tọn towe lẹ kọ̀n.

Mọwẹ, eyin hiẹ wleawuna ojlo nado sẹ̀n Jehovah bo dovivẹnu nado jẹ yanwle gbigbọmẹ tọn lẹ kọ̀n, hiẹ na penugo nado ‘hẹn nukọnyiyi towe sọawuhia to omẹ popo nukọn.’ (1 Timoti 4:15) To whenẹnu hiẹ na duvivi gbẹzan he tindo lẹndai de tọn to sinsẹ̀nzọn Jiwheyẹwhe tọn mẹ.

[Yẹdide to weda 9]

Biblu hihia po ayihamẹlinlẹnpọn do nuhe hiẹ ko hia lẹ ji po na whàn we nado sẹ̀n Jehovah

[Yẹdide to weda 10]

Jesu hẹn ojlo Otọ́ etọn tọn lẹ di