Be Hiẹ Nọ Kanse Dọ, ‘Fie Wẹ Jehovah te’ Ya?
‘Yé yì dẹn sọn dè e. Mọ yé ma ko dọmọ, Fie wẹ OKLUNỌ te? ’—JẸLEMIA 2:5, 6.
1. Etẹwẹ gbẹtọ lẹ sọgan tindo to ayiha mẹ to whenuena yé kanse dọ, “Fie wẹ Jiwheyẹwhe te?”
“FIE wẹ Jiwheyẹwhe te?” Mẹsusu wẹ ko kàn kanbiọ enẹ se. Delẹ to yé mẹ to tintẹnpọn nado yọ́n nugbo tangan de gando Mẹdatọ lọ go poun wẹ, yèdọ nado yọ́n fie e nọ nọ̀. Mẹdevo lẹ ko kàn kanbiọ lọ se to nugbajẹmẹji titengbe de godo kavi to whenuena yé tin to ninọmẹ sinsinyẹn de glọ bo ma yọ́n nuhewutu Jiwheyẹwhe ma dademẹ. Ṣogan, mẹdevo lẹ ma tlẹ nọ kàn kanbiọ lọ se paali na yé ma yise dọ Jiwheyẹwhe tin wutu.—Psalm 10:4.
2. Mẹnu lẹ wẹ nọ tindo kọdetọn dagbe to Jiwheyẹwhe dindin mẹ?
2 Na nugbo tọn, mẹsusu wẹ yọ́n kunnudenu susugege lẹ dọ Jiwheyẹwhe de tin. (Psalm 19:1; 104:24) Delẹ to yé mẹ tindo pekọ to sinsẹ̀n wunmẹ de tintindo mẹ poun. Ṣigba owanyi sisosiso tintindo na nugbo lọ ko whàn omẹ livi susu devo lẹ, to aigba lẹpo ji, nado dín Jiwheyẹwhe nugbo lọ. Vivẹnudido yetọn ma yin to ovọ́ mẹ gba, na e “ma . . . dẹn sọn dopodopo mítọn dè” wutu.—Owalọ lẹ 17:26-28.
3. (a) Fie wẹ Jiwheyẹwhe nọ nọ̀? (b) Etẹwẹ kanbiọ Owe-wiwe tọn lọ, ‘Fie wẹ Jehovah te’ zẹẹmẹdo?
3 To whenuena mẹde dín Jehovah mọ nugbonugbo, e nọ yọnẹn dọ “gbigbọ wẹ Jiwheyẹwhe,” bọ nukun ma sọgan mọ ẹn. (Johanu 4:24) Jesu ylọ Jiwheyẹwhe nugbo lọ dọ ‘Otọ́ ṣie he tin to olọn mẹ.’ Etẹwẹ enẹ zẹẹmẹdo? To linlẹn gbigbọmẹ tọn mẹ, e zẹẹmẹdo dọ Otọ́ olọn mẹ tọn mítọn tin to agblò he yiaga tlala de mẹ, kẹdẹdile olọn yiaga tlala hú aigba do. (Matiu 12:50; Isaia 63:15) Ṣigba, dile etlẹ yindọ mí ma sọgan mọ Jiwheyẹwhe po nukun po, e hẹn ẹn yọnbasi na mí nado yọ́n ewọ bo plọn nususu gando lẹndai etọn lẹ go. (Eksọdusi 33:20; 34:6, 7) E nọ na gblọndo kanbiọ he omẹ ahundoponọ he jlo na yọ́n lẹndai ogbẹ̀ tọn lẹ kanse lẹ. Na nuhe dù whẹho he gando gbẹzan mítọn go lẹ, e wleawuna dodonu dolido de na mí nido yọ́n otẹn etọn, yèdọ lehe e nọ pọ́n whẹho mọnkọtọn lẹ hlan do podọ vlavo eyin ojlo mítọn lẹ sọgbe hẹ lẹndai etọn lẹ. E jlo dọ mí ni dindona whẹho he gando gbẹzan mítọn go lẹ bo dovivẹnu vẹkuvẹku nado dín gblọndo lọ lẹ mọ. Gbọn yẹwhegán Jẹlemia gblamẹ, Jehovah gblewhẹdo omẹ Islaeli hohowhenu tọn lẹ na yé ma wàmọ wutu. Yé yọ́n yinkọ Jiwheyẹwhe tọn, ṣigba yé ma kanse dọ, ‘Fie wẹ Jehovah te?’ (Jẹlemia 2:6) Lẹndai Jehovah tọn ma duahunmẹna yé. Yé ma dín anademẹ etọn. Eyin hiẹ pannukọn nudide lẹ, daho kavi pẹvi, be a nọ kanse dọ, ‘Fie wẹ Jehovah te’ ya?
Mẹhe Dín Anademẹ Jiwheyẹwhe Tọn Lẹ
4. Nawẹ mí sọgan mọaleyi sọn apajlẹ Davidi tọn to anademẹ Jehovah tọn dindin mẹ gbọn?
4 To whenue Davidi, visunnu Jẹsse tọn gbẹ́ yin jọja, e wleawuna yise he lodo to Jehovah mẹ. E yọ́n Jehovah taidi “Jiwheyẹwhe ogbẹ̀nọ” lọ. Davidi ko tindo numimọ hihọ́ Jehovah tọn. Na yise po owanyi po na ‘yinkọ Jehovah tọn’ whàn Davidi wutu, e hù Goliati Filistininu gángánsu he blá gbaja lọ. (1 Samuẹli 17:26, 34-51) Ṣigba, kọdetọn dagbe tintindo Davidi tọn ma hẹn ẹn nado dejido ede go gba. E ma dọ dọ todin, Jehovah na dona nudepope he yẹn wà gba. Gbọzangbọzan to owhe he bọdego lẹ mẹ, Davidi dín anademẹ Jehovah tọn to whenuena e pannukọn nudide lẹ. (1 Samuẹli 23:2; 30:8; 2 Samuẹli 2:1; 5:19) E zindonukọn nado to dẹ̀ho dọmọ: “Hẹn mi yọ́n ali towe, OKLUNỌ E: plọn mọ́ji towe mi. Do mi gbọn ali nugbo towe ji, bosọ plọn mi: na hiẹ wẹ Jiwheyẹwhe whlẹngán ṣie tọn; hiẹ wẹ yẹn nọtepọn to azán popo gbè.” (Psalm 25:4, 5) Apajlẹ dagbe nankọ die na míwlẹ nado hodo!
5, 6. Nawẹ Jehọṣafati dín Jehovah to ojlẹ voovo gbẹzan etọn tọn mẹ gbọn?
5 To azán Ahọlu Jehọṣafati, heyin ahọlu atọ́ntọ to hukan gandudu Davidi tọn mẹ tọn lẹ gbè, awhànpa akọta atọ̀n tọn kọnawudopọ bo tọ́nawhàn Juda. To whenue Jehọṣafati pannukọn ninọmẹ sinsinyẹn ehe, e “ze ede [jo] nado dín hlan OKLUNỌ dè.” (2 Otannugbo lẹ 20:1-3) E mayin ojlẹ tintan die he Jehọṣafati dín Jehovah gba. Ahọlu lọ ko họ̀n na sinsẹ̀n-bibasi Baali tọn he mẹ ahọluduta agewaji atẹṣitọ Islaeli tọn ko tlọ́ ede do bo ko de nado zinzọnlin to aliho Jehovah tọn lẹ ji. (2 Otannugbo lẹ 17:3, 4) Enẹwutu todin he e pannukọn nuhahun de, nawẹ Jehọṣafati ‘dín Jehovah’ gbọn?
6 To odẹ̀ gbangba tọn he e hò to Jelusalẹm to ojlẹ awusinyẹn tọn ehe mẹ, Jehọṣafati dohia dọ emi flin huhlọn yiaga hugan Jehovah tọn. E ko lẹnnupọn sisosiso do lẹndai Jehovah tọn ji dile e yin didohia gbọn akọta devo lẹ yinyan jẹgbonu Etọn po aigba delẹ nina Islaeli taidi ogú de po dali. Ahọlu lọ yigbe dọ emi tindo nuhudo alọgọ Jehovah tọn. (2 Otannugbo lẹ 20:6-12) Be ahọlu lọ mọ Jehovah to ojlẹ lọ mẹ ya? Gbau. Gbọn Jahaziẹli, heyin Levinu de gblamẹ, Jehovah na anademẹ tangan lẹ, bosọ na awhàngbigba omẹ Etọn lẹ to wunkẹngbe. (2 Otannugbo lẹ 20:14-28) Nawẹ hiẹ sọgan deji dọ emi na mọ Jehovah eyin a lẹhlan ẹn na anademẹ gbọn?
7. Odẹ̀ mẹnu lẹ tọn wẹ Jiwheyẹwhe nọ se?
7 Jehovah ma nọ homẹnukuntapọn. Mẹlẹpo wẹ e ylọ nado dín ewọ to odẹ̀ mẹ. (Psalm 65:2; Owalọ lẹ 10:34, 35) E nọ yọ́n nuhe tin to ahun mẹhe ylọ ẹ lẹ tọn mẹ. E na mí jidide dọ emi nọ se odẹ̀ dodonọ lẹ tọn. (Howhinwhẹn lẹ 15:29) E dike mẹhe ma tindo ojlo to ewọ mẹ dai ṣigba he to anademẹ etọn dín po whiwhẹ po todin lẹ ni mọ ẹn. (Isaia 65:1) E tlẹ sọ nọ se odẹ̀ mẹhe ma ko nọ yìn osẹ́n etọn dai ṣigba he gbọn whiwhẹ dali lẹnvọjọ todin lẹ tọn. (Psalm 32:5, 6; Owalọ lẹ 3:19) Etomọṣo, eyin mẹde ma setonuna Jiwheyẹwhe, odẹ̀ etọn lẹ na yin onú tata. (Malku 7:6, 7) Pọ́n apajlẹ delẹ.
Yé Biọ Ṣigba Yé Ma Mọyi
8. Etẹwutu Jehovah ma kẹalọyi odẹ̀ Ahọlu Sauli tọn lẹ?
8 To whenuena yẹwhegán Samuẹli dọna Ahọlu Sauli dọ Jiwheyẹwhe ko gbẹ́ ẹ dai na tolivivẹ etọn wutu godo, Sauli litaina Jehovah. (1 Samuẹli 15:30, 31) Ṣigba yẹdoklọmẹ wẹ e te poun. E mayin dọ Sauli jlo na setonuna Jiwheyẹwhe wẹ gba, ṣigba jlo dọ gbẹtọ lẹ ni gbògbéna emi. To nukọnmẹ, dile Filistininu lẹ to awhànfun hẹ Islaeli, Sauli wà nuhe Jehovah biọ lẹ mọmọ. Nalete, to whenuena e ma mọ gblọndo yí, e yì dọṣẹdọtọ de dè, dile etlẹ yindọ e yọnẹn dọ Jehovah gbẹ́ ehe. (Deutelonomi 18:10-12; 1 Samuẹli 28:6, 7) To whẹho lọ bibladopọ mẹ, 1 Otannugbo lẹ 10:14 dọ gando Sauli go dọ: “[E] ma kanbiọ sọn OKLUNỌ dè gba.” Etẹwutu? Na odẹ̀ Sauli tọn lẹ mayin hihò po yise po wutu. Enẹwutu, e taidi dọ e ma tlẹ ko hodẹ̀ paali wẹ nkọtọn.
9. Etẹwẹ jẹdò to anademẹ Jehovah tọn dindin Zedekia tọn mẹ?
9 Mọdopolọ, dile opodo ahọluduta Juda tọn dọnsẹpọ, odẹ̀ susu yin hihò bọ yẹwhegán Jehovah tọn lẹ yin hokanse. Ṣigba, omẹ lọ lẹ to boṣiọ sẹ̀n bọ to ojlẹ dopolọ mẹ sọ to didọ dọ yé to budisi Jehovah. (Zẹfania 1:4-6) Dile etlẹ yindọ yé dín anademẹ Jiwheyẹwhe tọn mọmọ tọn de, yé ma wleawu nado setonuna ojlo etọn gba. Ahọlu Zedekia vẹvẹna Jẹlemia nado dín anademẹ Jehovah tọn na ẹn. Jehovah ko dọna ahọlu lọ nuhe e dona wà. Ṣigba na yise matindo po awujijona obu gbẹtọ tọn po wutu, ahọlu lọ ma setonuna Jehovah, podọ Jehovah masọ gblọn nuhe ahọlu lọ jlo nado se lẹ na ẹn ba.—Jẹlemia 21:1-12; 38:14-19.
10. Etẹwẹ jẹdò to lehe Johanani dín anademẹ Jehovah tọn do mẹ, podọ etẹwẹ mí plọn sọn nuṣiwa etọn mẹ?
10 To vasudo Jelusalẹm tọn godo he awhànpa Babilọni tọn ko bẹ Juvi lẹ yì kanlinmọgbenu, Johanani wleawu nado plan Ju vude he pò to Juda lẹ yì Egipti. Yé basi tito yetọn lẹ, ṣigba whẹpo do yì, yé biọ dọ Jẹlemia ni hodẹ̀ do ota yetọn mẹ bo dín anademẹ sọn Jehovah dè. Nalete, dile etlẹ yindọ yé ma mọ gblọndo he yé jlo lọ, yé sinyẹnta bo wà nuhe yé ko basi titona lọ. (Jẹlemia 41:16–43:7) Be hiẹ mọ nuplọnmẹ de sọn nujijọ ehelẹ mẹ he sọgan gọalọna we nado mọ Jehovah to whenuena hiẹ dín in ya?
‘Mì to Dodinna Zọnmii’
11. Naegbọn mí dona yí Efesunu lẹ 5:10 do yizan mẹ?
11 Sinsẹ̀n-bibasi nugbo bẹ nususu hẹn hugan klandowiwe mítọn didohia gbọn baptẹm dali, opli agun tọn lẹ yìyì, po mahẹ tintindo to lizọnyizọn kunnudegbe tọn mẹ po. E bẹ gbẹzan mítọn blebu hẹn. Mí nọ pehẹ kọgbidinamẹnu lẹ egbesọegbesọ—vlavo dehe whlá, kavi dehe họnwun taun lẹ—he sọgan gọkọna mí sọn aliho mẹdezejo hlan Jiwheyẹwhe tọn ji. Nawẹ mí na pehẹ yé gbọn? To wekanhlan Klistiani nugbonọ he to Efesu lẹ mẹ, apọsteli Paulu na tuli yé dọmọ: ‘Mì to dodinna nuhe Oklunọ kẹalọyi lẹ zọnmii.’ (Efesunu lẹ 5:10) Nuyọnẹn he tin to mọwiwa mẹ yin didohia gbọn nujijọ susu he Owe-wiwe na linlin etọn lẹ dali.
12. Naegbọn Jehovah gblehomẹ to whenuena Davidi sẹtẹn na aki alẹnu tọn yì Jelusalẹm?
12 To whenuena aki alẹnu tọn ko yin hinhẹn lẹkọwa Islaeli bo ko yin hinhẹn do Kiliati-jealimi na owhe susu godo, Ahọlu Davidi jlo na sẹtẹn na ẹn wá Jelusalẹm. E dọho hẹ awhàngán lẹ bosọ dọ dọ Aki lọ na yin tẹnsẹna ‘eyin e sọgbe to nukun yetọn mẹ bọ Jehovah sọ kẹalọyi.’ Ṣigba e ma dín anademẹ Jehovah tọn ganji nado yọ́n ojlo etọn do whẹho lọ ji. Eyin e ko wàmọ wẹ, Aki lọ ma na ko yin zizedo kẹkẹ de ji. E na ko yin zize gbọn Kohatinu Levinu lẹ dali do abọ́ yetọn lẹ ji, dile Jiwheyẹwhe ko dọ hezeheze do. Dile etlẹ yindọ Davidi nọ dín anademẹ Jehovah tọn gbọzangbọzan, e gboawupo nado wàmọ to aliho he sọgbe mẹ to ojlẹ ehe mẹ. E dekọtọn do nugbajẹmẹji mẹ. Davidi yigbe to godo mẹ dọmọ: “OKLUNỌ Jiwheyẹwhe mítọn ko basi gbágbigbo de to mí ji, na enẹ mí ma dín in kẹdẹdi ogbedai lọ gba.”—1 Otannugbo lẹ 13:1-3; 15:11-13; Osọha lẹ 4:4-6, 15; 7:1-9.
13. Nuflinmẹ tẹwẹ ohàn heyin jiji to whenuena Aki lọ yin tẹnsẹna po kọdetọn dagbe po bẹhẹn?
13 To whenuena Aki lọ yin zize gbọn Levinu lẹ dali sọn owhé Obẹdi-edọmi tọn gbè wá Jelusalẹm to godo mẹ, ohàn he Davidi pà de yin jiji. E bẹ nuflinmẹ ahundoponọ lọ hẹn dọmọ: “Mì nọ to OKLUNỌ po huhlọn etọn po dín; mì nọ to nukunmẹ etọn dín tẹgbẹ. Mì nọ flin azọ́njiawu etọn he e wà lẹ; nujiawu etọn lẹ po whẹdida onù etọn tọn lẹ po.”—1 Otannugbo lẹ 16:11, 12.
14. Nawẹ mí sọgan mọaleyi sọn apajlẹ dagbe Sọlọmọni tọn mẹ podọ sọn nuṣiwa yọnhowhe tọn etọn lẹ mẹ gbọn?
14 Whẹpo Davidi do kú, e na ayinamẹ visunnu etọn Sọlọmọni dọmọ: “Eyin hiẹ dín [Jehovah], yè na mọ ẹn sọn dè we.” (1 Otannugbo lẹ 28:9) To ofìn ji hihẹ godo, Sọlọmọni yì Gibeọni, fie gohọ̀ opli tọn tin te, bosọ sanvọ́ hlan Jehovah. Jehovah dọna Sọlọmọni to finẹ dọmọ: “Biọ nuhe yẹn na na we.” To gblọndo mẹ na obiọ Sọlọmọni tọn, Jehovah na ẹn oyọnẹn po nuyọnẹn po susugege nado dawhẹna Islaeli, podọ gbọnvona enẹ, E sọ na ẹn adọkun po gbégbò po. (2 Otannugbo lẹ 1:3-12) To tito họgbigbá tọn he Jehovah ko na Davidi yiyizan mẹ, Sọlọmọni gbá tẹmpli blibata de. Ṣigba Sọlọmọni gboawupo nado dín Jehovah to whẹho alọwle tọn etọn lẹ mẹ. Sọlọmọni dà yọnnu he ma nọ sẹ̀n Jehovah lẹ. To yọnhowhe etọn lẹ mẹ, yé lilẹ́ ahun etọn sọn Jehovah dè. (1 Ahọlu lẹ 11:1-10) Mahopọnna lehe mí sọgan lẹndọ mí diyin, yọnnuin, kavi bikan sọ, nujọnu wẹ e yin nado ‘to dodinna nuhe Oklunọ kẹalọyi lẹ zọnmii’!
15. To whenuena Zela Etiopianu lọ tọ́nawhàn Juda, naegbọn Asa sọgan hodẹ̀ po jidide po dọ Jehovah na whlẹn Juda?
15 Nuhudo ehe tọn yin nùzindeji dogọ gbọn kandai gandudu Asa, heyin ovivi Sọlọmọni tọn de dali. To owhe 11 godo he Asa duahọlu, Zela Etiopianu lọ plan awhànpa livi dopo wá nado tọ́nawhàn Juda. Be Jehovah na whlẹn Juda ya? Hugan owhe 500 jẹnukọn, Jehovah ko dọ nuhe omẹ etọn lẹ na donukun eyin yé dotoaina ẹn bo setonuna osẹ́n etọn lẹ podọ nuhe yé dona donukun eyin yé ma wàmọ. (Deutelonomi 28:1, 7, 15, 25) To bẹjẹeji gandudu Asa tọn, e de agbà po dòtin he nọ yin yiyizan na sinsẹ̀n-bibasi lalo lẹ po sẹ sọn Juda. E ko na tuli omẹ lọ lẹ nado ‘dín Jehovah.’ Asa ma nọte bo pannukọn nugbajẹmẹji lẹ whẹpo do wàmọ gba. Enẹwutu po yise to Jehovah mẹ po, Asa sọgan hodẹ̀ hlan ẹn nado yinuwa do ota yetọn mẹ. Etẹwẹ yin kọdetọn lọ? Juda gbawhàn mlẹnmlẹn.—2 Otannugbo lẹ 14:2-12.
16, 17. (a) Dile etlẹ yindọ Asa gbawhàn, etẹwẹ Jehovah flin in? (b) To whenuena Asa yinuwa po nululu po, alọgọ tẹwẹ e mọyi, ṣigba nawẹ e yinuwa gbọn? (c) Nawẹ mí sọgan mọaleyi sọn nulẹnpọndo nuyiwa Asa tọn ji mẹ gbọn?
16 Ṣogan, to whenuena Asa gbawhàn bo lẹkọ, Jehovah do Azalia hlan nado pé ahọlu lọ bo dọna ẹn dọmọ: “Asa, po Juda lẹpo po po Bẹnjamini po, mì se mi: OKLUNỌ tin to mì dè, whenuena mìwlẹ tin to ewọ dè; podọ eyin mìwlẹ dín in, e na yin mimọ sọn mì mẹ; ṣigba eyin mì gbẹ́ ẹ dai, ewọ nasọ gbẹ́ mì dai.” (2 Otannugbo lẹ 15:2) Po zodolanmẹnamẹ ehe po, Asa ze sinsẹ̀n-bibasi nugbo daga. Ṣigba to owhe 24 godo he e pannukọn awhàn devo, Asa gboawupo nado dín Jehovah. E ma dindona Ohó Jiwheyẹwhe tọn, mọ e masọ flin nuhe Jehovah wà to whenue awhànpa Etiopianu lẹ tọn tọ́nawhàn Juda. Po nululu po, e biọ alẹnu mẹ hẹ Silia.—2 Otannugbo lẹ 16:1-6.
17 Na ehe wutu, Jehovah do Hanani numọtọ lọ hlan nado wọhẹ Asa. Etlẹ yin to ojlẹ enẹ mẹ, he zẹẹmẹ yin basi do pọndohlan Jehovah tọn do whẹho lọ ji, Asa gbẹsọ sọgan mọaleyi. Kakatimọ, e gblehomẹ bo ze Hanani do ganhọ̀ mẹ. (2 Otannugbo lẹ 16:7-10) Lehe e blawu do sọ! Etẹwẹ dogbọn míwlẹ dali? Be mí nọ dín Jiwheyẹwhe ṣigba nọ gbẹ́ nado kẹalọyi ayinamẹ wẹ ya? Eyin mẹho mẹtọnhopọntọ de yí Biblu zan nado na ayinamẹ mí na mí to míde tlọ́ do aihọn lọ mẹ wutu, be mí nọ dopẹna alọgọ owanyinọ heyin nina mí nado yọ́n ‘nuhe Oklunọ kẹalọyi lẹ’ ya?
Ma Wọnji Nado Nọ Kanse Blo
18. Nawẹ mí sọgan mọaleyi sọn nuhe Elihu dọna Job mẹ gbọn?
18 To kọgbidinamẹ glọ, mẹhe tlẹ ko tindo kandai dagbe to sinsẹ̀nzọn Jehovah tọn mẹ lọsu sọgan gboawupo. Job ze ayidonugo etọn lẹpo do ede ji to whenuena e yin hihò po azọ̀nylankan de po, hẹn ovi po nutindo agbasa tọn etọn lẹ po bu, bo yin owhẹ̀ agọ̀ gbledo gbọn họntọn etọn lẹ dali. Elihu flinnu in dọmọ: “Mẹde ma dọmọ, Fie [wẹ] Jiwheyẹwhe Basitọ ṣie te?” (Job 35:10) Job dona vọ́ ayidonugo etọn zedo Jehovah ji bo lẹnnupọndo lehe E pọ́n ninọmẹ lọ hlan do ji. Job kẹalọyi nuflinmẹ enẹ po whiwhẹ po, podọ apajlẹ etọn sọgan gọalọna mí nado wà nudopolọ.
19. Etẹwẹ Islaelivi lẹ nọ saba gboawupo nado wà?
19 Islaelivi lẹ yọ́n kandai nuyiwa Jiwheyẹwhe tọn lẹ tọn hẹ akọta yetọn ganji. Ṣigba yé nọ saba wọnji e go to whenuena yé pannukọn ninọmẹ tangan lẹ to gbẹzan yetọn mẹ. (Jẹlemia 2:5, 6, 8) Eyin yé pannukọn nudide gbẹzan tọn lẹ, yé nọ doafọna gbẹdudu yedetiti tọn bo ma nọ kanse dọ, ‘Fie wẹ Jehovah te?’—Isaia 5:11, 12.
To Kinkanse Zọnmii dọ, ‘Fie wẹ Jehovah Te?’
20, 21. (a) Mẹnu lẹ wẹ ko do gbigbọ Eliṣa tọn hia to anademẹ Jehovah tọn dindin mẹ to egbehe? (b) Nawẹ mí sọgan hodo apajlẹ yise yetọn tọn bo mọaleyi sọn mẹ gbọn?
20 To whenuena Elija ko dotana lizọnyizọn gbangba tọn etọn godo, devi etọn Eliṣa yí tewu he ko flẹ sọn e go lọ, yì Jọdani, bo linú osin lọ bosọ kanse dọ: “Fie OKLUNỌ, Jiwheyẹwhe Elija tọn te?” (2 Ahọlu lẹ 2:14) Jehovah gblọn gbọn didohia dọ gbigbọ emitọn tin to Eliṣa ji todin dali. Etẹwẹ mí sọgan plọn sọn ehe mẹ?
21 Onú mọnkọtọn de jọ to ojlẹ mítọn mẹ. Klistiani yiamisisadode he ko yin nukọntọ to azọ́n yẹwhehodidọ tọn mẹ delẹ kú. Mẹhe yin dide do otẹn nukunpedonugo tọn mẹ bọdego lẹ nọ gbeje Owe-wiwe pọ́n bo nọ hodẹ̀ hlan Jehovah na anademẹ. Yé nọ saba kanse dọ, ‘Fie wẹ Jehovah te?’ Taidi kọdetọn, Jehovah to anadena omẹ etọn lẹ zọnmii bo to didona nuwiwa yetọn. Be mí nọ hodo apajlẹ yise yetọn tọn ya? (Heblu lẹ 13:7) Eyin mọwẹ, mí na gbọṣi titobasinanu Jehovah tọn mẹ, kẹalọyi anademẹ etọn, bo tindo mahẹ gigọ́ to azọ́n he to yinyin wiwà to anademẹ Jesu Klisti tọn glọ lọ mẹ.—Zekalia 8:23.
Nawẹ Hiẹ Na Na Gblọndo Gbọn?
• Po linlẹn tẹ po wẹ mí dona nọ kanse dọ, ‘Fie wẹ Jehovah te?’
• To egbehe, nawẹ mí sọgan mọ gblọndo na kanbiọ lọ ‘Fie wẹ Jehovah te’ gbọn?
• Naegbọn odẹ̀ heyin hihò na anademẹ Jiwheyẹwhe tọn delẹ ma nọ mọ gblọndo yí?
• Apajlẹ Biblu tọn tẹlẹ wẹ dohia dọ mí dona ‘to dodinna nuhe Oklunọ kẹalọyi lẹ zọnmii’?
[Yẹdide to weda 9]
Nawẹ Ahọlu Jehọṣafati dín Jehovah gbọn?
[Yẹdide to weda 10]
Naegbọn Sauli kanhose dọṣẹdọtọ de?
[Yẹdide to weda 12]
Nọ hodẹ̀, nọ plọnnu, bo nọ lẹnayihamẹpọn nado yọ́n ‘fie Jehovah te’