Kanbiọ lẹ sọn Wehiatọ lẹ Dè

Be e ylan nado hù kanlin-yìnyìn he to awutu jẹ taun kavi he ko poyọnho de wẹ ya?

Suhugan gbẹtọ lẹ tọn yiwanna kanlin voovo lẹ bosọ nọ jaya to yé mẹ. Whékanlin delẹ nọ yin gbẹdohẹmẹtọ dagbe lẹ. Di apajlẹ, avún lẹ yin yinyọnẹn na tonusise mlẹnmlẹn po owanyi yetọn po na klunọ yetọn. Enẹwutu, owanyi he gbẹtọ lẹ sọgan tindo na kanlin mọnkọtọn de họnwun, titengbe na dehe yé ko yìn na owhe susu lẹ.

Nalete, tedidi gbẹzan kanlin-yìnyìn susu tọn whègli taun. Avún po asé po sọgan nọgbẹ̀ na owhe 10 jẹ 15 kavi onú mọnkọtọn, sinai do wunmẹ yetọn ji. Eyin yé poyọnho, yé sọgan jẹ awutu bo tindo madogán susu he sọgan hẹn klunọ yetọn blawu, eyin e flin vuwhenu po owhe nuyiwa zohunhunnọ kanlin ehelẹ tọn po. Be e ylan nado doalọtena yajiji kanlin ehelẹ tọn gbọn hùhù yé dali wẹ ya?

Klistiani de na jlo nado yinuwa sọgbe hẹ ojlo Jiwheyẹwhe tọn to nuyiwa hẹ kanlin lẹ mẹ. E họnwun dọ kanyinylan do kanlin lẹ go ma sọgbe hẹ ojlo Jiwheyẹwhe tọn, na Ohó etọn dọmọ: “Gbẹtọ dodonọ de hò ogbẹ̀ [whékanlin] etọn tọn pọ́n.” (Howhinwhẹn lẹ 12:10) Ṣigba, ehe ma zẹẹmẹdo dọ Jiwheyẹwhe nọ pọ́n kanlin lẹ hlan dile e nọ pọ́n gbẹtọ lẹ hlan do gba. To whenuena Jiwheyẹwhe dá gbẹtọvi lẹ, e dohia dọ vogbingbọn daho de tin to yewlẹ po kanlin lẹ po ṣẹnṣẹn. Di apajlẹ, e na gbẹtọvi lẹ todido ogbẹ̀ madopodo tọn, ṣigba e ma ze todido ehe donukọnna kanlin lẹ pọ́n. (Lomunu lẹ 6:23; 2 Pita 2:12) Na e yin Mẹdatọ wutu, e tindo jlọjẹ nado do haṣinṣan he sọgbe he dona tin to gbẹtọ lẹ po kanlin lẹ po ṣẹnṣẹn hia.

Gẹnẹsisi 1:28 dọ nuhe haṣinṣan enẹ yin na mí. Jiwheyẹwhe dọna gbẹtọvi tintan lẹ dọmọ: “[Mì] duahọlu to whèvi ohù tọn ji, podọ to ohẹ̀ aga tọn ji, po to onú he to ogbẹ̀ lẹpo ji he nọ lìn to aigba ji.” Mọdopolọ, Psalm 8:6-8 dọmọ: “Hiẹ [Jiwheyẹwhe] sọ yí onú popo do afọ etọn [gbẹtọ tọn] glọ. Lẹngbọ lẹpo po oyìn lẹpo po ga, mọwẹ po kanlin he tin to gbémẹ lẹ po. Ohẹ̀ he to oji aga lẹ, whèvi he tin to ohù mẹ.”

Jiwheyẹwhe hẹn ẹn họnwun dọ kanlin lẹ sọgan yin yiyizan ganji bo yin hùhù gbọn gbẹtọ dali. Di apajlẹ, mí sọgan yí ayú yetọn zan taidi avọ̀. Jiwheyẹwhe sọ nagbè gbẹtọ lẹ ga nado dù olàn kanlin lẹ tọn to Singigọ azán Noa gbè tọn godo, bo yidogọna jinukun he ko yin nina yé jẹnukọn lọ.—Gẹnẹsisi 3:21; 4:4; 9:3.

Ehe ma na gbẹtọ jlọjẹ nado nọ hù kanlin lẹ sọn ojlo mẹ na aihundida gba. To Gẹnẹsisi 10:9, Biblu basi zẹẹmẹ Nimlọdi tọn taidi “gbéyantọ asuka.” Ṣigba wefọ dopolọ dọ dọ ehe hẹn ẹn ‘diọnukunsọ Jehovah.’

Enẹwutu, dile etlẹ yindọ gbẹtọ dugán do kanlin lẹ ji, e ma dona ṣì aṣẹpipa enẹ zan gba, ṣigba yí ì zan to kọndopọmẹ hẹ nunọwhinnusẹ́n Ohó Jiwheyẹwhe tọn lẹ. Ehe sọgan biọ dọ mí ni ma dike kanlin-yìnyìn de ni jiya na yọnhowhe, awugble sinsinyẹn, kavi awutu jẹmagbọ de wutu blo. To whẹho mọnkọtọn mẹ, azọngban Klistiani de tọn wẹ e yin nado de nuhe e na wà. Eyin e mọdọ lẹblanu wẹ e na yin ma nado dike kanlin lọ ni to yaji zọnmii matin todido pọngbọ depope tọn, to whenẹnu e sọgan de nado hù i sẹ.