‘Pọ́n! Jiwheyẹwhe Mìtọn Die’
Nudọnamẹ he yin hodọdeji to hosọ nupinplọn tọn awe ehelẹ mẹ yin zize sinai do owe Dọnsẹpọ Jehovah ji, ehe yin didetọ́n to plidopọ agbegbe heyin bibasi lẹdo aihọn pé to owhe 2002/03 tọn whenu.—Pọ́n hosọ lọ “E Sú Odò de to Ahun Ṣie Mẹ,” to weda 20 ji.
‘Pọ́n! Jiwheyẹwhe mítọn die. Míwlẹ ko nọte pọ́n ẹn, e nasọ whlẹn mí: Jehovah wẹ ehe.’—ISAIA 25:9.
1, 2. (a) Nawẹ Jehovah ylọ tọgbo Ablaham dọ, podọ etẹwẹ ehe sọgan hẹn mí nado kanse? (b) Nawẹ Biblu hẹn mí deji dọ mí sọgan tindo haṣinṣan pẹkipẹki hẹ Jiwheyẹwhe gbọn?
“HỌNTỌN ṣie.” Mọwẹ Jehovah, Didatọ olọn po aigba po tọn, ylọ tọgbo Ablaham dọ. (Isaia 41:8) Saa lẹnnupọndeji—gbẹtọvi tata jihọntọn hẹ Oklunọ Nupojipetọ wẹkẹ lọ tọn! Hiẹ sọgan kanse dọ, ‘Be yẹn sọgan dọnsẹpọ Jiwheyẹwhe domọ ya?’
2 Biblu hẹn mí deji dọ mí sọgan tindo haṣinṣan pẹkipẹki hẹ Jiwheyẹwhe. Ablaham duvivi haṣinṣan mọnkọtọn tọn na e “yí Jiwheyẹwhe se” wutu. (Jakobu 2:23) To egbehe lọsu ga, ‘haṣinṣan pẹkipẹki tintindo hẹ Jehovah hùndonuvo na dodonọ lẹ.’ (Howhinwhẹn lẹ 3:32) To Jakobu 4:8, Biblu na tuli mí dọmọ: “Mì sẹpọ Jiwheyẹwhe, ewọ nasọ sẹpọ mì.” E họnwun dọ, eyin mí dovivẹnu nado dọnsẹpọ Jehovah, e na yinuwa. Na nugbo tọn, e na dọnsẹpọ mí. Ṣigba be hogbe gbọdo ehelẹ zẹẹmẹdo dọ míwlẹ—gbẹtọvi ylandonọ, mapenọ lẹ—wẹ ze afọdide tintan lọ ya? Paali. Haṣinṣan pẹkipẹki tintindo hẹ Jehovah yọnbasi na Jiwheyẹwhe owanyinọ mítọn ko ze afọdide titengbe awe delẹ wutu.—Psalm 25:14.
3. Afọdide awe tẹlẹ wẹ Jehovah ko ze nado hẹn ẹn yọnbasi na mí nado jihọntọn hẹ ẹ?
3 Tintan, Jehovah basi tito na Jesu “nado yí ogbẹ̀ etọn do basi ofligọ na mẹsusu.” (Matiu 20:28) Avọ́sinsan ofligọ tọn enẹ hẹn ẹn yọnbasi na mí nado dọnsẹpọ Jiwheyẹwhe. Biblu dọmọ: “Mí yiwanna ẹn, na ewọ whẹwhẹ wẹ yiwanna mí wutu.” (1 Johanu 4:19) Mọwẹ, to whenuena e yindọ Jiwheyẹwhe ‘whẹ́ wẹ yiwanna mí,’ e ze dodonu lọ dai na mí nado jihọntọn hẹ ẹ. Awetọ, Jehovah ko do ede hia mí. To họntọnjiji depope mẹ, kanṣiṣa lọ nọ sinai do mẹlọ yinyọnẹn ganji ji, yinyọ́n pinpẹn jẹhẹnu etọn lẹ tọn po jijọ tangan etọn lẹ po. Lẹnnupọndo nuhe ehe zẹẹmẹdo ji. Eyin Jiwheyẹwhe he nọ whla ede, bo ma sọgan yin yinyọnẹn de wẹ Jehovah yin, mí ma sọgan dọnsẹpọ ẹ pọ́n gbede. Ṣigba kakati nado whla ede, Jehovah jlo dọ mí ni yọ́n emi. (Isaia 45:19) To Ohó etọn Biblu mẹ, e do ede hia to hogbe he họnwun lẹ mẹ. Ehe dohia dọ e mayin dọ e yiwanna mí kẹdẹ wẹ gba ṣigba e sọ jlo dọ mí ni yọ́n ẹn bo yiwanna ẹn taidi Otọ́ olọn mẹ tọn mítọn.
4. Etẹwẹ na yin numọtolanmẹ mítọn gando Jehovah go eyin mí wá yọ́n jẹhẹnu etọn lẹ ganji?
4 Be a ko mọ ovi pẹvi de pọ́n bọ e to otọ́ etọn dohia họntọn etọn lẹ bo yí ayajẹ po awagundido po do dọna yé dọ, “Baba ṣie niyẹn” ya? Sinsẹ̀ntọ Jiwheyẹwhe tọn lẹ tindo whẹwhinwhẹ́n lẹpo nado tindo numọtolanmẹ dopolọ gando Jehovah go. Biblu dọ dọdai ojlẹ de tọn whenuena gbẹtọ nugbonọ lẹ na lá dọmọ: ‘Pọ́n! Jiwheyẹwhe mítọn die.’ (Isaia 25:8, 9) Lehe nukunnumọjẹnumẹ mítọn gando jẹhẹnu Jehovah tọn lẹ go siso sọ, mọwẹ numọtolanmẹ mítọn na siso do niyẹn dọ mí tindo Otọ́ dagbe hugan de podọ Họntọn alọmayiemẹ he mẹde sọgan tindo. Mọwẹ, nukunnumimọjẹ jẹhẹnu Jehovah tọn lẹ mẹ nọ na mí whẹwhinwhẹ́n susu nado dọnsẹpọ ẹ pẹkipẹki. Enẹwutu mì gbọ mí ni gbadopọnna lehe Biblu do jẹhẹnu tangan Jehovah tọn lẹ hia do—yèdọ huhlọn, whẹdida dodo, nuyọnẹn, po owanyi po. To hosọ ehe mẹ, mí na dọhodo jẹhẹnu atọ̀n tintan lẹ ji.
‘E Yiaga to Huhlọn Mẹ’
5. Naegbọn e do sọgbe dọ Jehovah kẹdẹ wẹ yin yiylọdọ ‘Ganhunupotọ,’ podọ aliho tẹlẹ mẹ wẹ e nọ yí huhlọn jiawu etọn zan te?
5 Jehovah ‘yiaga to huhlọn mẹ.’ (Job 37:23) Jẹlemia 10:6 dọmọ: “Mẹde ma tin jijlẹ hlan we gba, OKLUNỌ E; kiklo wẹ hiẹ, podọ oyín towe sọ yin kiklo to hlọnhlọn mẹ.” To vogbingbọnmẹ na nudida depope, huhlọn Jehovah tọn ma tindo dogbó gba. Enẹwẹ zọ́n bọ ewọ dopo kẹdẹ do yin yiylọdọ ‘Ganhunupotọ.’ (Osọhia 15:3) Jehovah nọ yí huhlọn jiawu etọn zan nado dá, nado vasudo, nado basi hihọ́, podọ nado basi vọjlado. Gbadopọnna apajlẹ awe poun—huhlọn nudida tọn etọn po huhlọn hihọ́-basinamẹ tọn etọn po.
6, 7. Nawẹ owhè dohuhlọn sọ, podọ nugbo titengbe tẹwẹ e dekunnuna?
6 Eyin hiẹ ṣite to gbonu to owhè ṣádada mẹ, etẹwẹ hiẹ nọ mọ to lanmẹ? Yozò owhè tọn. Na nugbo tọn, hiẹ to kọdetọn huhlọn nudida Jehovah tọn tọn mọ to lanmẹ. Nawẹ owhè dohuhlọn sọ? Owhè lọsu na ede nọ hùnmiyọ́n sọ 15 000 000°C. Eyin hiẹ sọgan kán pẹvi tiuntiun he ma hugan yẹ́nví-ta dopo sọn owhè go bo hẹn ẹn wá aigba ji, owhè pẹvi tiuntiun enẹ na hẹnawugblena mẹhe tlẹ dẹn do e sọ kilomẹtlu 140 lẹ! To nuhe ma pé nukunwhiwhe dopo gblamẹ, owhè nọ de huhlọn miyọ́n tọn he sọzẹn hẹ wuwujẹgbonu bọmbu nuzanusẹvaun livi donu kanweko susu lẹ tọn tọ́n. Ṣogan, aigba nọ lẹdo zòhọ daho jiawu enẹ to obá he to jlẹkaji pẹpẹ de mẹ. Eyin e sẹpọ ẹ gbau, osin he to aigba ji lẹpo na hú; podọ eyin e sọ dẹn do e zẹjlẹgo, osin lẹpo wẹ nasọ lẹzun osin-ago. Nudepope ma sọgan nọgbẹ̀ to planẹti mítọn ji eyin e sẹpọ ẹ kavi dẹn do e zẹjlẹgo.
7 Dile etlẹ yindọ gbẹtọ ma sọgan nọgbẹ̀ matin owhè, mẹsusu nọ yí nukunpẹvi do pọ́n ẹn. Gbọnmọ dali, yé ma nọ mọ nudepope plọn sọn owhè dè gba. Psalm 74:16 dọ gando Jehovah go dọmọ: “Hiẹ wleawu hinhọ́n po owhè po tọn.” Mọwẹ, owhè nọ pagigona Jehovah, “Mẹhe dá olọn po aigba po.” (Psalm 146:6) Ṣigba, owhè yin dopo poun to nudida susugege lẹ mẹ he plọnnu mí gando huhlọn daho he Jehovah tindo go. Dile mí plọnnu gando huhlọn nudida Jehovah tọn go sù sọ, mọwẹ gbégbò mítọn na ẹn nọ siso dogọ do niyẹn.
8, 9. (a) Hogbe yẹdenanu awuvẹmẹ tọn tẹwẹ dohia mí dọ Jehovah tindo ojlo nado basi hihọ́na sinsẹ̀ntọ etọn lẹ bo penukundo yé go? (b) Nawẹ lẹngbọhọtọ he nọgbẹ̀ to ojlẹ Biblu tọn mẹ de nọ penukundo lẹngbọ etọn lẹ go gbọn, podọ etẹwẹ ehe plọn mí gando Lẹngbọhọtọ Daho mítọn go?
8 Jehovah sọ nọ yí huhlọn daho etọn zan nado basi hihọ́na devizọnwatọ etọn lẹ bo penukundo yé go. Biblu yí hogbe yẹdenanu tọn he họnwun bosọ whànmẹ lẹ zan nado do opagbe Jehovah tọn lẹ nado basi hihọ́na mí hia. Di apajlẹ, doayi Isaia 40:11 go. To finẹ Jehovah yí ede jlẹdo lẹngbọhọtọ de go bo yí omẹ etọn lẹ jlẹdo lẹngbọ lẹ go. Mí hia dọmọ: “Ewọ na yìn kanlinpa etọn di lẹngbọhọtọ de: e nasọ yí awà etọn do bẹ lẹngbọvu lẹ pli, bo ze yé do akọ́n etọn nù, bosọ wà dẹẹdẹ do plan ehe mọhò lẹ jẹgbonu.” Be hiẹ sọgan yí nukun homẹ tọn do pọ́n nuhe yin didọ to wefọ ehe mẹ ya?
9 Lẹngbọ yin kanlin madogánnọ de. Lẹngbọhọtọ he nọgbẹ̀ to ojlẹ Biblu tọn mẹ lẹ dona yin adọgbotọ nado sọgan basi hihọ́na lẹngbọ yetọn lẹ sọn ohla, beali, po kinnikinni lẹ po si. (1 Samuẹli 17:34-36; Johanu 10:10-13) Ṣigba to whedelẹnu, e nọ biọ awuvẹmẹ nado basi hihọ́na lẹngbọ lẹ bo penukundo yé go. Di apajlẹ, to whenuena lẹngbọ de jivi to fie dẹn do apó etọn, nawẹ lẹngbọhọtọ lọ na penukundo lẹngbọvu madogánnọ he ṣẹṣẹ yin jiji lọ go gbọn? E na ze e, vlavo na azán susu, “do akọ́n etọn nù”—yèdọ apò awugbó etọn tọn mẹ. Nalete, nawẹ lẹngbọvu de na wá tin to akọ́n lẹngbọhọtọ lọ tọn nù gbọn? Lẹngbọvu lọ sọgan dọnsẹpọ lẹngbọhọtọ lọ bo tlẹ ganjẹ afọ etọn go. Ṣigba, lẹngbọhọtọ lọ wẹ dona fẹ̀ yido, dlẹn awà bo ze lẹngbọvu lọ, bo ze e do akọ́n etọn nù fie e na mọ hihọ́ te. Apajlẹ awuvẹmẹ tọn nankọ die nado dohia dọ Lẹngbọhọtọ Daho mítọn tindo ojlo nado basi hihọ́na devizọnwatọ etọn lẹ bo penukundo yé go!
10. Hihọ́ tẹwẹ Jehovah nọ wleawuna to egbehe, podọ naegbọn hihọ́ mọnkọtọn yin nujọnu taun?
10 Jehovah ko wà nususu hugan opagbe hihọ́-basinamẹ tọn dido poun. To hohowhenu, e dohia to aliho jiawu lẹ mẹ dọ emi penugo “nado whlẹn ayihawiwenọ lẹ . . . sọn whlepọn mẹ.” (2 Pita 2:9) Egbehe lo? Mí yọnẹn dọ e ma nọ yí huhlọn etọn do basi hihọ́na mí sọn nugbajẹmẹji lẹpo mẹ todin gba. Ṣigba, e nọ wleawuna nude he tlẹ yin nujọnu hugan—yèdọ hihọ́ gbigbọmẹ tọn. Jiwheyẹwhe owanyinọ mítọn nọ basi hihọ́na mí sọn awugble gbigbọmẹ tọn si gbọn nuhe mí tindo nuhudo etọn nado doakọnna whlepọn lẹ bo whlá haṣinṣan mítọn hẹ ewọ nina mí dali. Di apajlẹ, Luku 11:13 dọmọ: “Eyin mìwlẹ heyin mẹylankan yọ́n le yè nọ na nunina dagbe hlan ovi mìtọn lẹ do, nẹmunẹmu wẹ Otọ́ mìtọn olọn tọn na na gbigbọ wiwe hlan yé he biọ to e dè lẹ.” Huhlọn yido wazọ́n enẹ sọgan hẹn mí pegan nado dù to whlepọn kavi nuhahun depope he mí pehẹ ji. (2 Kọlintinu lẹ 4:7) Gbọnmọ dali, Jehovah nọ yinuwa nado whlẹn ogbẹ̀ mítọn, e mayin na owhe vude poun gba, ṣigba kakadoi. Po nukundido enẹ po to ayiha mẹ, mí sọgan pọ́n yajiji depope to titonu ehe mẹ hlan taidi “nukunwhiwhe dopo” tọn. (2 Kọlintinu lẹ 4:17) Be mí ma yin dindọn hlan Jiwheyẹwhe he nọ gbọn owanyi dali yí huhlọn etọn zan do ota mítọn mẹ de dè ya?
‘Jehovah Yiwanna Whẹdida Dodo’
11, 12. (a) Naegbọn whẹdida dodo Jehovah tọn nọ dọ̀n mí sẹpọ ẹ? (b) Tadona tẹ kọ̀n wẹ Davidi wá gando whẹdida dodo Jehovah tọn go, podọ nawẹ hogbe gbọdo ehelẹ sọgan miọnhomẹna mí gbọn?
11 Jehovah nọ wà nuhe sọgbe bo jlọ, podọ e nọ wàmọ gbọzangbọzan matin mẹnukuntahihopọn. Whẹdida dodo Jiwheyẹwhe tọn mayin jẹhẹnu fifiẹ tọn he nọ yàn mí dolá na ẹn de gba, ṣigba yin jẹhẹnu dagbe de he nọ dọ̀n mí sẹpọ Jehovah. Biblu basi zẹẹmẹ lehe jẹhẹnu ehe yin awuvivinamẹnu do tọn hezeheze. Enẹwutu, mì gbọ mí ni gbadopọnna aliho atọ̀n he mẹ Jehovah nọ do whẹdida dodo etọn hia te.
12 Tintan, whẹdida dodo Jehovah tọn nọ whàn ẹn nado do nugbonọ-yinyin hia devizọnwatọ etọn lẹ. Psalm-kàntọ Davidi tindo numimọ adà whẹdida dodo Jehovah tọn ehe tọn tlọlọ. Sọn numimọ edetiti tọn po aliho Jiwheyẹwhe tọn pinplọn etọn po mẹ, tadona tẹ kọ̀n wẹ Davidi wá? E dọmọ: ‘Jehovah yiwanna whẹdida dodo, bo masọ nọ gbẹ́ nugbonọ etọn lẹ dai; e na nọ yí yé whlá kakadoi.’ (Psalm 37:28) Mẹhẹndeji homẹmiọnnamẹ tọn nankọ die! Jiwheyẹwhe mítọn ma na gbẹ́ mẹhe yin nugbonọ hlan ẹn lẹ dai pọ́n gbede. Enẹwutu mí sọgan dejido họntọnjiji po nukunpedomẹgo owanyinọ etọn po go. Whẹdida dodo etọn na jide ehe tọn!—Howhinwhẹn lẹ 2:7, 8.
13. Nawẹ mẹtọnhopọn Jehovah tọn na wamọnọ lẹ sọawuhia to Osẹ́n he e na Islaeli mẹ gbọn?
13 Awetọ, whẹdida dodo Jiwheyẹwhe tọn nọ na ayidonugo hlan nuhudo mẹhe to yaji lẹ tọn. Mẹtọnhopọn Jehovah tọn na wamọnọ lẹ sọawuhia to Osẹ́n he e na Islaeli mẹ. Di apajlẹ, Osẹ́n lọ wleawuna tito delẹ nado hẹn ẹn diun dọ tọṣiọvi po asuṣiọsi lẹ po yin nukunpedego. (Deutelonomi 24:17-21) Na Jehovah yọ́n lehe gbẹninọ sọgan vẹawuna whẹndo mọnkọtọn lẹ sọ wutu, ewọ lọsu lẹzun otọ́ Whẹdatọ po Hihọ́tọ yetọn po. (Deutelonomi 10:17, 18) E na avase Islaelivi lẹ dọ eyin yé sayana yọnnu po ovi agbátọnọ mọnkọtọn lẹ po, emi na se awhá yetọn. ‘Homẹgble ṣie na jizò,’ wẹ e dọ, dile e yin kinkàndai to Eksọdusi 22:22-24 mẹ do. Dile etlẹ yindọ homẹgble mayin dopo to jẹhẹnu tangan Jehovah tọn lẹ mẹ, nuyiwa whẹdida mawadodo sọn ojlo mẹ wá tọn nọ gblehomẹ na ẹn to dodo-liho, titengbe eyin agbátọnọ lẹ wẹ e bẹhẹn.—Psalm 103:6.
14. Etẹwẹ yin kunnudenu ayidego mẹnukuntamahopọn Jehovah tọn tọn?
14 Atọ̀ntọ, to Deutelonomi 10:17, Biblu na mí jide dọ Jehovah “ma nọ hò gbẹtọ lẹ [nukunta] pọ́n, mọ ma nọ yí núbla gba.” To vogbingbọn mẹ na gbẹtọvi he tindo huhlọn kavi aṣẹpipa lẹ, Jehovah ma nọ yin nuyiwadeji gbọn adọkunnu lẹ kavi awusọhia agbasa tọn dali gba. E ma nọ do nuvẹun kavi mẹnukuntahopọn hia gba. Kunnudenu ayidego mẹnukuntamahopọn etọn tọn wẹ yindọ: Dotẹnmẹ hundote lọ nado lẹzun sinsẹ̀ntọ nugbo etọn lẹ, bo mọ ogbẹ̀ madopodo yí, mayin nina omẹ nukundeji vude poun gba. Kakatimọ, Owalọ lẹ 10:34, 35 dọmọ: “Jiwheyẹwhe ma yin mẹnukuntahopọntọ gba: ṣigba to akọta lẹpo mẹ, mẹhe dibusi i, bo wazọ́n dodo, wẹ yè kẹalọyi to e dè.” Nukundido ehe hùndonuvo na mẹlẹpo mahopọnna ninọmẹ yetọn, sinmẹ agbasa yetọn tọn, kavi otò he mẹ yé nọ nọ̀. Be enẹ ma yin whẹdida dodo he yiaga hugan ya? Na nugbo tọn, nukunnumimọjẹ whẹdida dodo Jehovah tọn mẹ ganji nọ dọ̀n mí sẹpọ ẹ!
‘Ṣo Na Nuyọnẹn Jiwheyẹwhe Tọn Siso Sọ!’
15. Etẹwẹ nuyọnẹn yin, podọ nawẹ Jehovah nọ do e hia gbọn?
15 Apọsteli Paulu yin whinwhàn nado lá, dile e yin kinkàndai to Lomunu lẹ 11:33 mẹ do dọmọ: ‘Ṣo na nuyọnẹn po oyọnẹn Jiwheyẹwhe tọn po siso sọ!’ Mọwẹ, dile mí to nulẹnpọndo adà voovo nuyọnẹn gbloada Jehovah tọn lẹ ji, ahun mítọn lẹpo wẹ na gọ́ na sisi po gbégbò po. Ṣigba, nawẹ mí sọgan basi zẹẹmẹ jẹhẹnu ehe tọn do? Nuyọnẹn wẹ nọ kọ̀n oyọnẹn, wuntuntun, po nukunnumọjẹnumẹ po dopọ bo nọ hẹn yé yọn-na-yizan. Gbọn oyọnẹn he gbloada po nukunnumọjẹnumẹ sisosiso etọn po yiyizan dali, Jehovah nọ basi nudide he yọnhugan lẹ to whepoponu, bo nọ ze afọdide he sọgbe hugan lẹ nado hẹn yé di.
16, 17. Nawẹ nudida Jehovah tọn lẹ dekunnuna nuyọnẹn gbloada etọn gbọn? Na apajlẹ de.
16 Kunnudenu tangan tẹlẹ wẹ do nuyọnẹn gbloada Jehovah tọn hia? Psalm 104:24 dọmọ: “Na azọ́n towe sù dole, OKLUNỌ E! Nuyọnẹn mẹ wẹ hiẹ basi yé omẹ pó te: aigba gọ́ na nutindo towe.” Na nugbo tọn, dile mí plọnnu gando nuhe Jehovah ko basi lẹ go sù sọ, mọwẹ sisi mítọn na nuyọnẹn Jehovah tọn nọ siso deji sọ. Lẹnunnuyọnẹntọ lẹ lọsu tlẹ ko plọn nususu sọn nuhe Jehovah dá lẹ mẹ! Adà lẹnunnuyọnẹn tọn de tlẹ tin he nọ tẹnpọn nado hodo apajlẹ nudida lẹ tọn.
17 Di dohia, lehe adọ́ tọgboyẹyẹ de tọn nọ yọnwhanpẹ do sọ sọgan ko paṣa we. Na nugbo tọn anazọ́n he jiawu de wẹ e yin. Okàn he ma taidi nuhe dẹ̀ sọmọ delẹ nọ sinyẹn hú ogàn, bo nọ dohuhlọn hú sekan he nọ yin yíyí do basi awu he nọ glo sòpẹ́n de. Etẹ dọ wẹ mí te taun? Lẹnnupọndo adọ́ tọgboyẹyẹ tọn de he gblo sọ odọ̀ whèhutọ lẹ tọn ji. Adọ́ mọnkọtọn sọgan sinyẹn sọmọ bo hẹn agahun he bẹ gbẹtọ bo to zinzlọn de dote! Mọwẹ, Jehovah ko basi onú ehe lẹpo ‘to nuyọnẹn mẹ.’
18. Nawẹ nuyọnẹn Jehovah tọn yin mimọ to nudide etọn nado yí gbẹtọvi lẹ zan nado kàn Ohó etọn, Biblu lọ mẹ gbọn?
18 Kunnudenu daho hugan nuyọnẹn Jehovah tọn tọn sọgan yin mimọ to Ohó etọn, Biblu mẹ. Ayinamẹ nuyọnẹn tọn heyin mimọ to e mẹ lẹ nọ do aliho gbẹninọ tọn he yọnhugan lọ hia mí. (Isaia 48:17) Ṣigba nuyọnẹn mayọnjlẹ Jehovah tọn sọ yin mimọ to aliho he mẹ Biblu yin kinkàn te mẹ. Gbọnna? To nuyọnẹn etọn mẹ, Jehovah de nado yí gbẹtọvi lẹ zan nado kàn Ohó etọn. Eyin e ko yí angẹli lẹ zan nado kàn Biblu wẹ, be e na ko tindo nuyiwadomẹji dopolọ ya? Nugbo wẹ dọ angẹli lẹ sọgan ko yí hogbe he yiaga sọgbe hẹ pọndohlan yetọn lẹ do basi zẹẹmẹ Jehovah tọn po mẹdezejo yedetiti tọn po hlan ẹn. Ṣigba be mí na penugo nugbonugbo nado mọnukunnujẹ pọndohlan nudida pipé gbigbọnọ he nuyọnẹn, numimọ, po huhlọn yetọn po yiaga tlala hú míwlẹ tọn mẹ ya?—Heblu lẹ 2:6, 7.
19. Apajlẹ tẹwẹ dohia dọ gbẹtọvi lẹ yiyizan nado kàn Biblu hẹn ẹn nado yin owe he dozolanmẹnamẹ bo dọnmẹdogo de?
19 Gbẹtọvi lẹ yiyizan nado kàn Biblu hẹn ẹn nado yin owe he dozolanmẹnamẹ bo dọnmẹdogo taun de. Mẹhe kàn ẹn lẹ yin gbẹtọ he tindo numọtolanmẹ taidi míwlẹ tọn. Na yé yin mapenọ wutu, yé pannukọn whlepọn po kọgbidinamẹ lẹ po he taidi míwlẹ lọsu tọn. To nujijọ delẹ mẹ, yé wlan hogbe he basi zẹẹmẹ numọtolanmẹ mẹdetiti tọn dogbọn numimọ po tuklajijẹ yetọn titi lẹ po dali. (2 Kọlintinu lẹ 12:7-10) Enẹwutu yé wlan hogbe he angẹli depope ma sọgan ko yizan lẹ. Di apajlẹ, lẹnnupọndo hogbe Davidi tọn heyin kinkàndai to Psalm 51 mẹ lẹ ji. Sọgbe hẹ nukinkan aga tọn lọ, Davidi pà ohàn ehe to ylando sinsinyẹn wiwà godo. E dọ nuhe tin to ahun etọn mẹ lẹpo jẹgbonu, bo blawu sisosiso bosọ vẹvẹ na jona Jiwheyẹwhe tọn. Wefọ 2 po 3 po dọmọ: “Klọ́ mi sọn ylanwiwa ṣie mẹ patapata; bosọ lẹ̀ mi wé sọn ylando ṣie mẹ. Na yẹn yigbe tasinyẹn ṣie tọn: whepoponu wẹ ylando ṣie sọ tin to nukọn ṣie.” Wefọ 5 dọmọ: “Doayi e go, ylanwiwa mẹ wẹ yè ji mi te; podọ ylando mẹ wẹ onọ̀ ṣie mọhò ṣie te.” Wefọ 17 yidogọ dọmọ: “Avọ́ Jiwheyẹwhe tọn wẹ otù gbigbà; ayiha gbigbà finfinyọ́n, Jiwheyẹwhe E, hiẹ ma to na vlẹ gba.” Be hiẹ doayi awufiẹsa wekantọ lọ tọn lẹ go ya? Gbọnvona gbẹtọvi mapenọ de, mẹnu wẹ sọ sọgan basi zẹẹmẹ numọtolanmẹ mọnkọtọn lẹ tọn?
20, 21. (a) Naegbọn mí sọgan dọ dọ Biblu bẹ nuyọnẹn Jehovah tọn hẹn dile etlẹ yindọ gbẹtọvi lẹ wẹ kàn ẹn? (b) Etẹwẹ na yin hodọdeji to hosọ he bọdego mẹ?
20 Gbọn gbẹtọvi mapenọ lẹ yiyizan dali, Jehovah wleawuna nuhe mí tindo nuhudo etọn pẹpẹ—yèdọ kandai he ‘Jiwheyẹwhe gbọdo’ ṣogan he gbẹtọvi lẹ sọgan mọnukunnujẹemẹ po awubibọ po. (2 Timoti 3:16) Mọwẹ, gbigbọ wiwe wẹ deanana wekantọ enẹlẹ. Yé gbọnmọ dali kàn nuyọnẹn Jehovah tọn, e mayin yetọn gba. Nuyọnẹn enẹ sọgan yin jide-dego mlẹnmlẹn. E yiaga tlala hú nuyọnẹn mítọn sọmọ bọ Jiwheyẹwhe gbọn owanyi dali dotuhomẹna mí dọmọ: “Yí ayiha towe [lẹpo] do dotudo OKLUNỌ go; a dẹ́ hlan dewe tọn dali blo. Yọ́n ẹn to aliho towe lẹpo ji, ewọ nasọ jlọ omọ́ towe.” (Howhinwhẹn lẹ 3:5, 6) Gbọn tonusisena ayinamẹ he gọ́ na nuyọnẹn enẹ dali, mí na dọnsẹpọ Jiwheyẹwhe mítọn heyin asisa nuyọnẹn lẹpo tọn.
21 Jẹhẹnu Jehovah tọn he dọnmẹdogo bo yọnwhanpẹ hugan dehe pò lẹpo wẹ owanyi. Lehe Jehovah ko do owanyi hia do na yin hodọdeji to hosọ he bọdego mẹ.
Be Hiẹ Sọgan Flin Ya?
• Afọdide tẹlẹ wẹ Jehovah ko ze nado hẹn ẹn yọnbasi na mí nado jihọntọn hẹ ẹ?
• Etẹwẹ yin delẹ to apajlẹ huhlọn nudida Jehovah tọn mẹ podọ huhlọn hihọ́-basinamẹ tọn etọn?
• Aliho tẹlẹ mẹ wẹ Jehovah nọ do whẹdida dodo etọn hia te?
• Nawẹ nuyọnẹn Jehovah tọn yin mimọ to nudida etọn lẹ mẹ podọ to Biblu mẹ gbọn?
[Yẹdide to weda 10]
Taidi lẹngbọhọtọ he ze lẹngbọvu de do akọ́n etọn nù, Jehovah nọ gbọn awuvẹmẹ dali penukundo lẹngbọ Etọn lẹ go
[Yẹdide to weda 13]
Nuyọnẹn Jehovah tọn yin mimọ to aliho he mẹ Biblu yin kinkàn te mẹ