Lilatọ Ahọluduta Tọn lẹ Na Linlin

Homẹfa po Linsinsinyẹn po Hẹn Kọdetọn Ayajẹnọ lẹ Wá

JESU KLISTI dọ dọdai dọ to azán godo tọn lẹ mẹ “owanyi mẹsusu tọn na lẹzun mimiọn.” Taidi kọdetọn de, to adà susu aihọn lọ tọn mẹ to egbehe, gbẹtọ lẹ to paa mẹ ma nọ do ojlo hia to wẹndagbe Ahọluduta lọ tọn mẹ. Mẹdelẹ tlẹ gbẹwanna sinsẹ̀n.—Matiu 24:12, 14.

Dile etlẹ yinmọ, lilatọ Ahọluduta tọn lẹ nọ yí yise po homẹfa po do duto avùnnukundiọsọmẹnu lọ ji dile numimọ he bọdego sọn République tchèque dohia do.

Kunnudetọ awe dọho na yọnnu de he ma hùn ohọ̀n. To madẹnmẹ, yọnnu lọ hùn ohọ̀n lọ yẹẹ, bo dlẹn alọ etọn jẹgbonu bo yí Atọ̀họ̀-Nuhihọ́ Lọ Tọn po Réveillez-vous! po he Kunnudetọ lọ lẹ zedonukọnna ẹn. Yọnnu lọ dọnudo yé sọn họmẹ bo sú ohọ̀n. “Be mí ni lẹkọyi to whedevonu wẹ ya?” wẹ Kunnudetọ lọ lẹ kanse yede. Dopo to yé mẹ, gbehosọnalitọ de, kavi lizọnyizọnwatọ whenu-gigọ́ tọn, de nado lẹkọyi, ṣigba nudopolọ jọ whladopo dogọ, podọ ehe zindonukọn na owhe dopo.

Gbehosọnalitọ lọ magbe todin nado diọ mẹdọnsẹpọ etọn bo hodẹ̀ hlan Jehovah na alọgọ. To ojlẹ devo mẹ he e ze linlinnamẹwe lọ lẹ donukọnna ẹn, e kàn kanbiọ họntọnjihẹmẹ tọn lẹ se yọnnu lọ dọ: “Nawẹ a te do? Nawẹ a duvivi linlinnamẹwe lọ lẹ tọn do?” To tintan whenu, yọnnu lọ ma yigbe, ṣigba to dlapọn vude dogọ godo, ninọmẹ etọn jẹ didiọ ji. To gbèdopo e hùn ohọ̀n lọ ganji, ṣigba hodọdopọ lọ nọ glido.

Na yọnnu lọ nọ whleawu nado dọho to ohọ̀n ji wutu, gbehosọnalitọ lọ de nado wlanwe hlan ẹn bo basi zẹẹmẹ lẹndai dlapọn lọ tọn bosọ ze plọnmẹ Biblu whégbè tọn donukọnna ẹn. To godo mẹ, to vivẹnudido sọwhiwhe tọn na owhe dopo daa godo, gbehosọnalitọ lọ penugo nado bẹ plọnmẹ Biblu jẹeji hẹ yọnnu lọ. E paṣa ẹ ṣigba na ẹn tuli to whenuena yọnnu lọ wá dọna ẹn to godo mẹ dọ: “Yẹn ko yise to Jiwheyẹwhe mẹ sọn whenue gbọ́n a jẹ linlinnamẹwe lẹ hẹnwa na mi ji.”

Na nugbo tọn, homẹfa po linsinsinyẹn po sọgan hẹn kọdetọn ayajẹnọ lẹ wá to azọ́n yẹwhehodidọ Ahọluduta lọ tọn po gbẹtọ lẹ hinhẹnzun devi tọn po mẹ.—Matiu 28:19, 20.