‘Vọ́nu Wẹ Mì Mọyi, Mì Namẹ Vọ́nu’

‘VỌ́NU wẹ mì mọyi, mì namẹ vọ́nu.’ (Matiu 10:8) Jesu na anademẹ enẹ apọsteli etọn lẹ to whenuena e do yé hlan nado dọyẹwheho wẹndagbe lọ tọn. Be apọsteli lẹ setonuna gbedide ehe ya? Mọwẹ, podọ yé sọ to mọwà zọnmii to whenuena Jesu tlẹ ko tọ́nsọn aigba ji godo.

Di apajlẹ, to whenuena Simọni, heyin afinyọnnọ dai lọ mọ huhlọn azọ́njiawu tọn he apọsteli Pita po Johanu po tindo, e ze akuẹ donukọnna yé nado sọgan mọ huhlọn enẹ yí. Ṣigba Pita wọhẹ ẹ, dọmọ: “Akuẹ towe ni và po hiẹ po, na hiẹ lẹndọ yè nọ yí akuẹ do họ̀ nunina [vọ́nu] Jiwheyẹwhe tọn wutu.”—Owalọ lẹ 8:18-20.

Apọsteli Paulu do gbigbọ he taidi Pita tọn hia. Paulu sọgan ko yí ede do basi agbàn to okọ̀ ji na mẹmẹsunnu Klistiani Kọlinti tọn lẹ. Ṣigba, e yí alọ ede tọn lẹ do wazọ́n nado penukundo ede go. (Owalọ lẹ 18:1-3) Enẹwutu, e sọgan dọ po jidide po dọ emi ko dọyẹwheho wẹndagbe lọ tọn hlan Kọlintinu lẹ ‘vọ́nu.’—1 Kọlintinu lẹ 4:12; 9:18.

Ṣigba e blawu dọ, susu mẹhe ylọ yede dọ hodotọ Klisti tọn lẹ ma ko do ojlo tintindo dopolọ nado ‘namẹ vọ́nu’ hia. Na taun tọn, susu sinsẹ̀ngán Mẹylọhodotọklisti tọn lẹ tọn “to mẹplọn na azọ́nkuẹ.” (Mika 3:11) Sinsẹ̀ngán delẹ tlẹ ko lẹzun adọkunnọ sọn akuẹ heyin yíyí sọn agunvi yetọn lẹ si mẹ. To 1989, yẹwhehodọtọ Amelika tọn de yin whẹdana nado sẹ̀ngàn na owhe 45. Etẹwẹ e wà? E ko to “dọla livi susu lẹ hòdu sọn agunvi lẹ si bo yí apadewhe akuẹ lọ tọn do họ̀ owhé lẹ, gbẹduhun lẹ, basi gbejizọnlin sadidi tọn lẹ bo tlẹ gbá ohọ̀ he mẹ zomọ he nọ fá họmẹ de tin te na avún etọn.”—People’s Daily Graphic, 7 octobre 1989.

To Ghana, sọgbe hẹ Ghanaian Times 31 mars 1990 tọn, yẹwhenọ Katoliki Lomu tọn de ze akuẹ heyin ṣinṣinyan to sinsẹ̀n-bibasi dopo whenu bo dlan ẹn lẹkọ do agun lọ. Linlinwe lọ dọmọ: “Nuhewutu e wàmọ wẹ yindọ, taidi mẹhomẹ lẹ, yé yin nukundo nado jọ akuẹ he sù hugan mọ.” Abajọ, ṣọṣi susu tlẹ nọ tẹnpọn nado fọ́n nukunkẹn dote to hagbẹ etọn lẹ mẹ, gbọn zohunhun yíyí do nọgodona nuwiwa akọhiho tọn lẹ po onú devo lẹ po dali nado sọgan mọ akuẹ.

To vogbingbọn mẹ, Kunnudetọ Jehovah tọn lẹ nọ tẹnpọn nado hodo apajlẹ Jesu po devi fliflimẹ etọn lẹ po tọn. Yé ma tindo sinsẹ̀ngán he nọ yí sunmẹ-kuẹ lẹ. Kunnudetọ dopodopo yin lizọnyizọnwatọ he tindo azọngban lọ nado dọyẹwheho “wẹndagbe ahọludu tọn” na mẹdevo lẹ. (Matiu 24:14) Enẹwutu hugan livi ṣidopo yetọn lẹdo aihọn pé wẹ to mahẹ tindo to “osin ogbẹ̀ tọn” hinhẹn yì na gbẹtọ lẹ vọ́nu mẹ. (Osọhia 22:17) To aliho ehe mẹ, mẹhe ma tlẹ “tindo akuẹ” lẹ lọsu sọgan mọaleyi sọn owẹ̀n Biblu tọn mẹ. (Isaia 55:1) Dile etlẹ yindọ gbọn nunina sọn ojlo mẹ wá lẹ dali wẹ azọ́n lẹdo aihọn pé yetọn nọ yin godonọna te to akuẹ-liho, yé ma nọ biọ akuẹ gbede gba. Taidi lizọnyizọnwatọ nugbo Jiwheyẹwhe tọn lẹ, yé ma nọ ‘sà ohó Jiwheyẹwhe tọn’ gba, ṣigba yé nọ dọho “sọn nugbo homẹ tọn mẹ . . . di sọn Jiwheyẹwhe dè.”—2 Kọlintinu lẹ 2:17.

Ṣigba, naegbọn Kunnudetọ Jehovah tọn lẹ nọ jlo nado gọalọna mẹdevo lẹ, bo nọ wàmọ vọ́nu? Etẹwẹ nọ whàn yé? Be nado namẹ vọ́nu zẹẹmẹdo dọ yé ni wàmọ mlẹnmlẹn matin ahọsumẹ de na vivẹnudido yetọn lẹ wẹ ya?

Gblọndo de Na Avùntọ́nmẹ Satani Tọn

Na taun tọn, ojlo nado hẹn homẹ Jehovah tọn hùn wẹ nọ whàn Klistiani nugbo lẹ to egbehe—e mayin nado hẹn yede zun adọkunnọ gba. Gbọnmọ dali yé nọ penugo nado wleawu gblọndo tọn na whẹho he Satani Lẹgba fọndote to owhe kanweko lẹ die wayi. Gando dawe nugbonọ lọ Job go, Satani tọ́navùn Jehovah po kanbiọ lọ po dọmọ: “Be Job dibusi Jiwheyẹwhe na ovọ́ wẹ?” Satani sọalọakọ́n dọ Job to Jiwheyẹwhe sẹ̀n kiki na E ko basi osópa de lẹdo e pé wutu. Satani dọnnu dọ, eyin agbasanu he Job tindo lẹ yin hihoyi, Job na mọ́n Jiwheyẹwhe mlẹnmlẹn!—Job 1:7-11.

Nado na gblọndo na avùntọ́nmẹ ehe, Jiwheyẹwhe dike Satani ni whlé Job pọ́n, dọmọ: “Popo he e tindo tin to alọ towe mẹ.” (Job 1:12) Etẹwẹ yin kọdetọn lọ? Job do Satani hia di lalonọ. Mahopọnna yajiji he wá Job ji lẹ, e gbọṣi nugbonọ-yinyin mẹ. E dọmọ: ‘Kaka yẹn na kú yẹn ma na de tenọgli ṣie sọn dè e gba.’—Job 27:5, 6.

Sinsẹ̀n-basitọ nugbonọ egbehe tọn lẹ nọ do gbigbọ he taidi Job tọn hia. E mayin ojlo agbasanu lẹ tọn wẹ nọ sisẹ yé nado sẹ̀n Jiwheyẹwhe gba.

Nunina Vọ́nu Ojọmiọn Jiwheyẹwhe Tọn Tọn

Whẹwhinwhẹ́n devo he wutu Klistiani nugbo lẹ nọ jlo nado ‘namẹ vọ́nu’ wẹ yindọ yelọsu ko ‘mọyi vọ́nu’ sọn Jiwheyẹwhe dè. Gbẹtọvi tin to kanlinmọgbenu ylando po okú po tọn mẹ na ylando tọgbo mítọn Adam tọn wutu. (Lomunu lẹ 5:12) Jehovah gbọn owanyi dali basi titona Ovi etọn nado kú okú avọ́sinsan tọn—yèdọ nude he vẹawuna Jiwheyẹwhe taun. Gbẹtọvi ma jẹna ehe to aliho depope mẹ. Lala, nunina de wẹ e yin sọn Jiwheyẹwhe dè.—Lomunu lẹ 4:4; 5:8; 6:23.

Enẹwutu, dile e yin kinkàndai to Lomunu lẹ 3:23, 24 mẹ do, Paulu dọna Klistiani yiamisisadode lẹ dọmọ: ‘Omẹ pó wẹ waylan, bosọ whète do gigo Jiwheyẹwhe tọn go; podọ nunina vọ́nu wẹ e yin dọ yè suwhẹna yé di dodonọ gbọn ojọmiọn etọn dali, gbọn túndote ofligọ tọn he Jesu Klisti sú gblamẹ.’ Mẹhe tindo todido gbẹninọ kakadoi to aigba ji lẹ tọn lọsu mọ “nunina vọ́nu” de yí. Nunina lọ bẹ lẹblanulọkẹyi yinyin whẹsuna di dodonọ taidi họntọn Jehovah tọn lẹ hẹn.—Jakobu 2:23; Osọhia 7:14.

Avọ́sinsan ofligọ Klisti tọn sọ hùn dotẹnmẹ dote na Klistiani lẹpo nado sẹ̀n taidi lizọnyizọnwatọ Jiwheyẹwhe tọn lẹ. Apọsteli Paulu wlan dọmọ: ‘Yé yí mi do basi devizọnwatọ aṣli wiwe ehe tọn, kẹdẹdi nunina vọ́nu ojọmiọn Jiwheyẹwhe tọn tọn.’ (Efesunu lẹ 3:4-7) Na yé ko yin didọna nado hẹn lizọnyizọn ehe di gbọn nunina de he yé ma jẹna kavi sọgan mọyi gblamẹ wutu, lizọnyizọnwatọ nugbo Jiwheyẹwhe tọn lẹ ma sọgan donukun nado yin ahọsuna po agbasanu lẹ po na wẹndagbe nunina ehe tọn mimahẹ mẹdevo lẹ gba.

Ogbẹ̀ Madopodo—Be Mẹwhinwhàn Ṣejannabi Tọn de Wẹ Ya?

To whelọnu lo, be ehe zẹẹmẹdo dọ Jiwheyẹwhe nọ donukun dọ Klistiani lẹ ni sẹ̀n emi matin todido ahọsumẹ depope tọn wẹ ya? Lala, na apọsteli Paulu dọna yisenọ hatọ etọn lẹ dọmọ: “Jiwheyẹwhe mayin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyín etọn dali.” (Heblu lẹ 6:10) Podọ Jehovah ma nọ dawhẹ agọ̀. (Deutelonomi 32:4) Kakatimọ, Jehovah wẹ “ahọsutọ yé he whesọ do dín in lẹ tọn.” (Heblu lẹ 11:6) Ṣigba be e mayin mẹwhinwhàn ṣejannabi tọn de wẹ opagbe ogbẹ̀ madopodo to Paladisi mẹ tọn yin ya?—Luku 23:43.

Lala. Whẹwhinwhẹ́n dopo wẹ yindọ, Jiwheyẹwhe dè wẹ ojlo gbẹninọ kakadoi to Paladisi mẹ to aigba ji tọn wá sọn. Ewọ wẹ ze todido ehe donukọnna asu po asi po tintan lọ. (Gẹnẹsisi 1:28; 2:15-17) E sọ hẹn todido ehe gọwa to whenuena Adam po Evi po ko hẹn ẹn bu na kúnkàn yetọn lẹ godo. Gbọnmọ dali, Jiwheyẹwhe dopagbe to Ohó etọn mẹ dọ “yè na whlẹn nudida lọsu sọn mẹglọnọ hẹngble tọn mẹ do mẹdekannujẹ he do gigo ovi Jiwheyẹwhe tọn lẹ tọn mẹ.” (Lomunu lẹ 8:21) Enẹwutu, taidi Mose hohowhenu tọn, nuhe sọgbe mlẹnmlẹn wẹ e yin na Klistiani egbehe tọn lẹ nado nọ “pọ́n hlan ahọsu ale lọ tọn.” (Heblu lẹ 11:26) Jiwheyẹwhe ma ze ahọsumẹ ehe donukọnnamẹ taidi alọgodokuẹ de gba. E ze e donukọnnnamẹ sọn owanyi nujọnu tọn mẹ na mẹhe sẹ̀n ẹn lẹ. (2 Tẹsalonikanu lẹ 2:16, 17) To gbeyiyi mẹ, “mí yiwanna ẹn, na ewọ whẹwhẹ wẹ yiwanna mí wutu.”—1 Johanu 4:19.

Mẹwhinwhàn He Sọgbe lọ Na Jiwheyẹwhe Sinsẹ̀n

Etomọṣo, Klistiani egbehe tọn lẹ dona nọ gbeje nuhewutu yé to Jiwheyẹwhe sẹ̀n pọ́n gbọzangbọzan. To Johanu 6:10-13, mí hia dọ Jesu na núdùdù gbẹtọgun he hugan fọtọ́n donu atọ́n to azọ́njiawu-liho. Enẹgodo, mẹdelẹ jẹ hihodo Jesu ji na whẹwhinwhẹ́n ṣejannabi tọn mlẹnmlẹn wutu. Jesu dọna yé dọmọ: “Mì to díndín mi . . . na mì dù akla nẹlẹ bo gọ́hò wutu.” (Johanu 6:26) Mọdopolọ to nudi owhe 30 godo, Klistiani he ko klan yede do wiwe delẹ wadevizọn na Jiwheyẹwhe ṣigba ‘e mayin po mẹwhinwhàn he sọgbe de po gba.’ (Filippinu lẹ 1:17) Mẹdelẹ he ma ‘kẹalọyi ohó he pegan Jesu Klisti tọn’ lẹ tlẹ sọ dín aliho lẹ nado mọ ale akuẹ tọn yí sọn gbẹdido yetọn hẹ Klistiani lẹ mẹ.—1 Timoti 6:3-5.

To egbehe, Klistiani de he nọ wadevizọn kiki na e jlo nado nọgbẹ̀ kakadoi to Paladisi mẹ wutu sọgan to devizọnwa po mẹwhinwhàn ṣejannabi tọn po. Yigodo-yinukọn, ehe sọgan dekọtọn do aijijẹ gbigbọmẹ tọn mẹ. Na e taidi dọ titonu Satani tọn ko dẹn-to-aimẹ hugan lehe e donukun do wutu, ‘onú sọgan ṣikọna ẹn,’ bọ e na to linlẹn dọ opodo lọ ko dọ̀ngban gbau. (Galatianu lẹ 6:9) E tlẹ sọgan gblehomẹ na avọ́sinsan agbasanu lẹ tọn he e ko basi. Jesu flinnu mí dọmọ: “Hiẹ na yí ayiha towe lẹpo, podọ alindọn towe lẹpo po nuyọnẹn towe lẹpo po do yiwanna Oklunọ Jiwheyẹwhe towe.” (Matiu 22:37) Mọwẹ, mẹhe to Jiwheyẹwhe sẹ̀n na owanyi wutu ma nọ lẹn nado sẹ̀n ẹn na ojlẹ he tindo dogbó de gba. E nọ magbe nado sẹ̀n Jehovah kakadoi! (Mika 4:5) Avọ́sinsan depope he e ko basi to kọndopọmẹ hẹ sinsẹ̀nzọn etọn hlan Jiwheyẹwhe ma nọ vẹna ẹn gba. (Heblu lẹ 13:15, 16) Owanyi na Jiwheyẹwhe nọ sisẹ ẹ nado ze dagbenu Jiwheyẹwhe tọn lẹ do otẹn tintan mẹ to gbẹzan etọn mẹ.—Matiu 6:33.

To egbehe, hugan sinsẹ̀n-basitọ nugbo livi ṣidopo wẹ ‘ze yede jo sọn ojlo mẹ’ to sinsẹ̀nzọn Jehovah tọn mẹ. (Psalm 110:3) Be hiẹ yin dopo to yé mẹ ya? Eyin lala wẹ, bo lẹnayihamẹpọn do nuhe Jiwheyẹwhe zedonukọnnamẹ lẹ ji: oyọnẹn wiwe-ṣeke nugbo lọ tọn; (Johanu 17:3) mẹdekannujẹ sọn nuplọnmẹ lalo sinsẹ̀n tọn lẹ si; (Johanu 8:32) todido gbẹninọ kakadoi tọn. (Osọhia 21:3, 4) Kunnudetọ Jehovah tọn lẹ sọgan gọalọna we nado plọn lehe a sọgan mọ ehe lẹpo yí sọn Jiwheyẹwhe dè vọ́nu do.

[Nudọnamẹ tangan lẹ to weda 22]

Na taun tọn, ojlo nado hẹn homẹ Jehovah tọn hùn wẹ nọ whàn Klistiani nugbo lẹ to egbehe—e mayin nado hẹn yede zun adọkunnọ gba

[Yẹdide to weda 21]

Nunina vọ́nu Jiwheyẹwhe tọn heyin ofligọ lọ nọ whàn Klistiani lẹ nado má wẹndagbe lọ vọ́nu