Kanbiọ lẹ sọn Wehiatọ lẹ Dè

Jehovah kẹalọyi yọnnu-bibẹpli to devizọnwatọ etọn hohowhenu tọn lẹ ṣẹnṣẹn, ṣigba e ma kẹalọyi i todin. Be nujinọtedo etọn nọ diọ wẹ ya?

Jehovah ma ko diọ pọndohlan etọn gando yọnnu-bibẹpli go gba. (Psalm 19:7; Malaki 3:6) E mayin apadewhe tito etọn tọn na gbẹtọ lẹ sọn bẹjẹeji, mọjanwẹ e masọ yinmọ do todin. To whenuena Jehovah dá Evi taidi asi na Adam, e dọ dọ nujinọtedo emitọn wẹ asi dopo na asu dopo. “Enẹwutu wẹ sunnu na jo otọ́ po onọ̀ po do, bo na sẹbọdo asi etọn go: yé nasọ lẹzun olàn dopo.”—Gẹnẹsisi 2:24.

To whenuena Jesu Klisti tin to aigba ji, e vọ́ nujinọtedo ehe dọ to gblọndo mẹ hlan mẹhe kàn kanbiọ se gando gbẹdai po alọvivọwle po go lẹ. E dọmọ: “Be mìwlẹ ma ko hia, dọ mẹhe dá yé to whẹwhẹwhenu, dá yé asu po asi po? E sọ dọmọ, Na ehe tọn wẹ sunnu na jo otọ́ po onọ̀ etọn po dai, bo na sẹbọdo asi etọn dè: yé omẹ awe lẹ nasọ lẹzun agbasalan dopo. Sọmọ yé masọ yin omẹ awe ba gba, adavo agbasalan dopo.” Jesu yidogọ dọmọ: “Mẹdepope he na jo asi etọn dai, adavo na whẹho ogalilọ tọn, bosọ wlealọhẹ devo, e deayọ.” (Matiu 19:4-6, 9) Sọn ehe mẹ, e họnwun dọ ayọdide wẹ asi dopo kavi susu didà dogọ lọsu yin.

To whelọnu lo, etẹwutu yọnnu-bibẹpli yin alọkẹyi to hohowhenu? Hẹn do ayiha mẹ dọ aṣa lọ ma wá sọn Jehovah dè gba. Omẹ tintan he go Biblu donù he tindo hugan asi dopo wẹ Lẹmẹki, heyin ovivi Kaini tọn. (Gẹnẹsisi 4:19-24) To whenuena Jehovah hẹn Singigọ azán Noa gbè tọn wá, asi dopodopo wẹ Noa po visunnu etọn atọ̀n lẹ po tindo. Mẹhe bẹ yọnnu pli lẹpo wẹ yin vivasudo to Singigọ lọ mẹ.

Owhe kanweko susu to nukọnmẹ to whenue Jehovah de Islaelivi lẹ taidi omẹ etọn lẹ, dile etlẹ yindọ asi dopo tintindo wẹ gbayipe hugan, delẹ to yé mẹ ko bẹ yọnnu pli. Jiwheyẹwhe ma biọ dọ whẹndo lẹ ni klan to fie asi hugan dopo tin te gba. Kakatimọ, e deanana nuyiwa lọ gligli.—Eksọdusi 21:10, 11; Deutelonomi 21:15-17.

Dọ ojlẹ gli de wẹ alọkikẹyi yọnnu-bibẹpli ehe tin na sọgan yin mimọ e mayin sọn nuhe Jesu dọ gando nujinọtedo dowhenu Jehovah tọn na alọwle go kẹdẹ mẹ wẹ gba ṣigba sọn nuhe apọsteli Paulu lọsu wlan to gbọdo gbigbọ wiwe Jiwheyẹwhe tọn glọ mẹ ga. E dọmọ: “Mì gbọ sunnu dopodopo ni tindo asi etọn titi, bosọ gbọ yọnnu dopodopo ni tindo asu etọn titi.” (1 Kọlintinu lẹ 7:2) Paulu sọ yin gbigbọdo ga nado wlan dọ sunnu depope heyin dide taidi nugopọntọ kavi devizọnwatọ lizọnyizọnwiwa tọn to agun Klistiani tọn mẹ dona yin “asisunọ yọnnu dopo tọn.”—1 Timoti 3:2, 12; Titu 1:6.

Enẹwutu, gbeyiyi Jehovah tọn nado bẹ yọnnu pli wá vivọnu to whenuena agun Klistiani tọn yin didoai to owhe 2 000 delẹ die wayi. To ojlẹ enẹ mẹ, nujinọtedo alọwle tọn lẹkọ do nuhe e yin to bẹjẹeji didá sunnu po yọnnu po tọn gbọn Jiwheyẹwhe dali: enẹ wẹ asu dopo, asi dopo. Nujinọtedo lọ niyẹn to egbehe to omẹ Jiwheyẹwhe tọn lẹ ṣẹnṣẹn lẹdo aihọn pé.—Malku 10:11, 12; 1 Kọlintinu lẹ 6:9, 10.