Pinplọn Nado Nọ Yinuwa po Zinzin Po

PEGGY mọ bọ visunnu etọn daho to hodọ po fifiẹ po na nọvisunnu etọn. “Be a lẹndọ aliho dagbe hugan lọ niyẹn nado dọho na nọvisunnu towe ya?” wẹ e kanse. “Pọ́n le e gblehomẹ sọ!” Naegbọn e dọmọ? E to tintẹnpọn nado plọn visunnu etọn nado nọ yinuwa po zinzin po podọ nado nọ hò numọtolanmẹ mẹdevo lẹ tọn pọ́n.

Apọsteli Paulu na tuli gbẹdohẹmẹtọ jọja etọn Timoti nado nọ ‘yí zinzin do yinuwa hẹ mẹlẹpo.’ To mọwiwa mẹ, Timoti ma na gbleawuna numọtolanmẹ mẹdevo lẹ tọn. (2 Timoti 2:24) Etẹwẹ zinzin yin? Nawẹ hiẹ sọgan wadagbe dogọ to adà ehe mẹ gbọn? Podọ nawẹ hiẹ sọgan gọalọna mẹdevo lẹ nado wleawuna jẹhẹnu ehe gbọn?

Etẹwẹ Zinzin Yin?

Zinzin yin nugopipe lọ nado yọ́n lehe ninọmẹ de doglẹ do podọ nado wà kavi dọ nuhe jọmẹ kavi he sọgbe hugan. Zinzintọ de sọgan doayi numọtolanmẹ mẹdevo lẹ tọn go bo yọ́n lehe hodidọ po nuyiwa etọn lẹ po nọ yinuwado yé ji do. Ṣigba ehe ma nọ yin wiwà poun gba; e bẹ ojlo nujọnu tọn tintindo ma nado gbleawuna mẹdevo lẹ hẹn.

Kandai Biblu tọn gando afanumẹ Eliṣa tọn Gehazi go do apajlẹ mẹhe ma yí zinzin zan tọn hia mí. Yọnnu Ṣunaminu de he visunnu etọn ko ṣẹṣẹ kú do alọmẹ na ẹn wá nado mọ Eliṣa, bo to homẹmiọnnamẹ dín. To whenue e yin kinkanse eyin jijọho wẹ, e gblọn dọ: “Jijọho e yin.” Ṣigba dile e sẹpọ yẹwhegán lọ, “Gehazi sọ wá sẹpọ nado sisẹ ẹ sẹ.” To vogbingbọn mẹ, Eliṣa dọmọ: ‘Gbọ sọn e go: na yè hẹn alindọn etọn gblehomẹ to e homẹ.’—2 Ahọlu lẹ 4:17-20, 25-27.

Nawẹ Gehazi sọgan yinuwa po fifiẹ po matin zinzin domọ do? Nugbo wẹ dọ yọnnu lọ ma dọ numọtolanmẹ etọn to whenue e yin kinkanse. Ṣigba, mẹsusu wẹ ma nọ dọ numọtolanmẹ yetọn lẹ na mẹdepope poun. Etomọṣo, numọtolanmẹ etọn dona ko sọawuhia to aliho delẹ mẹ. E họnwun dọ Eliṣa yọ́n numọtolanmẹ etọn, ṣigba Gehazi ma wàmọ, kavi de nado gbẹkọ e go. Ehe basi dohia nuwiwa de he nọ saba do zinzin matindo hia ganji. Eyin nujọnu-yinyin agbasazọ́n mẹtọn tọn to ahunmẹdunamẹ hugan, e nọ bọawu dọ yè ni gboawupo nado yọ́n kavi hò nuhudo mẹhe yè to nuyiwa hẹ lẹ tọn pọ́n. E nọ taidi ahihun-kùntọ he ma nọte bo ze ahisinọ lẹ na fie e jei lọ jijẹ do ganmẹ to ahunmẹduna ẹn zẹjlẹgo wutu.

Nado dapana zinzin matindo Gehazi tọn, mí dona dovivẹnu nado jọmẹ, na mí ma nọ yọ́n nuhe yin numọtolanmẹ gbẹtọ lẹ tọn na taun tọn. Mí dona tin to aṣeji to whepoponu hlan ohia lẹ he nọ do numọtolanmẹ gbẹtọ lẹ tọn hia bo dọho kavi yinuwa to aliho he jọmẹ mẹ. Nawẹ hiẹ sọgan wadagbe dogọ to adà ehe mẹ gbọn?

Nukunnumimọjẹ Numọtolanmẹ Mẹdevo lẹ Tọn Mẹ

Jesu yin apajlẹ vonọtaun de to numọtolanmẹ mẹdevo lẹ tọn yinyọnẹn po yinyọ́n aliho dagbe hugan lọ nado yinuwa hẹ yé po homẹdagbe po mẹ. To ojlẹ de mẹ he e to núdù to owhé Simọni, Falesi de tọn gbè, nawe ‘heyin yinyọnẹn to tòdaho lọ mẹ di ylandonọ de’ wá e dè. To ojlẹ ehe lọsu mẹ, yọnnu lọ ma dọ nudepope, ṣigba nuyiwa etọn do nususu hia gando numọtolanmẹ etọn go. “E hẹn núsisagbán alabasta nuwhẹ́nkun tọn wá, bosọ ṣite to afọ [Jesu tọn] go, to godo etọn, bo to avivi, bosọ ṣẹ dasin yí do to afọ etọn klọ́, bo yí oda he to ota etọn do to súnsúnsúnsún in, bosọ to onù yí do afọ etọn go, bosọ yí amisisa sá do yé.” Jesu yọ́n nuhe ehe lẹpo zẹẹmẹdo. Podọ dile etlẹ yindọ Simọni ma dọ nudepope, Jesu yọnẹn dọ nuhe dọ e te to ahun mẹ wẹ yindọ: “Dawe he, eyin ewọ yin yẹwhegán lọ, e do yọ́n mẹhe nkọ nawe he to alọ do e go yin: dọ ylandonọ de wẹ ewọ.”—Luku 7:37-39.

Yí nukun homẹ tọn do pọ́n awugble he na ko yin hinhẹnwa eyin Jesu ko sisẹ nawe lọ dlan, kavi eyin e ko dọ hlan Simọni dọ: “Hiẹ wunvinọ! Be a ma mọdọ nawe lọ ko lẹnvọjọ wẹ?” Kakatimọ, Jesu yí zinzin do ze oló de donukọnna Simọni gando dawe de go he jo ahọ́ daho de do na mẹde bosọ jo ahọ́ he whè tlala de do na mẹdevo. “To yé omẹ awe lẹ mẹ, mẹnu wẹ na yiwanna ẹn hugan?” wẹ Jesu kanse. Gbọnmọ dali, kakati e ni taidi dọ Jesu to whẹgbledo Simọni, e penugo nado pà ẹ na gblọndo he sọgbe he e na. Enẹgodo, e gbọn homẹdagbe dali gọalọna Simọni nado yọ́n ohia susu numọtolanmẹ taun yọnnu lọ tọn lẹ gọna lẹnvọjọ didohia etọn. Jesu lẹhlan yọnnu lọ bo yí homẹdagbe do dohia ẹ dọ emi mọnukunnujẹ numọtolanmẹ etọn lẹ mẹ. E dọna ẹn dọ ylando etọn lẹ yin jijona ẹn bosọ dọ bọdego dọ: “Yise towe ko whlẹn we gán; to yìyì to jijọho mẹ.” Lehe hogbe zinzin tọn enẹlẹ na ko hẹn gbemima etọn nado nọ wà nuhe sọgbe lodo do sọ! (Luku 7:40-50) Jesu tindo kọdetọn dagbe to zinzin didohia mẹ na e nọ doayi numọtolanmẹ gbẹtọ lẹ tọn go bo nọ yinuwa po awuvẹmẹ po wutu.

Kẹdẹdile Jesu gọalọna Simọni do, mílọsu sọgan plọn bo nọ gọalọna mẹdevo lẹ nado mọnukunnujẹ numọtolanmẹ heyin didohia poun lẹ mẹ. Lizọnyizọnwatọ numimọnọ lẹ sọgan plọn zinzin mẹyọyọ lẹ to lizọnyizọn Klistiani tọn mẹ to whedelẹnu. To kunnudide na mẹde godo, yé sọgan gbadopọnna ohia lẹ he do numọtolanmẹ mẹhe yé dukosọna lọ tọn lẹ hia. Be mẹlọ kuwinyan, tindo ayihaawe, gblehomẹ, kavi alọnu etọn ján wẹ ya? Etẹwẹ na yin aliho he jọmẹ hugan lọ nado gọalọna ẹn? Mẹho lẹ sọgan sọ gọalọna mẹmẹsunnu po mẹmẹyọnnu lẹ po he sọgan ko hẹn ode awetọ yetọn gblehomẹ na zinzin matindo wutu. Mì gọalọna mẹdopodopo nado nọ mọnukunnujẹ numọtolanmẹ mẹdevo lẹ tọn mẹ. Be omẹ lọ lẹndọ emi yin winyando, yin kọgbẹ́ e go, kavi emi yin nukunnumọjẹemẹ do agọ̀ wẹ ya? Nawẹ homẹdagbe sọgan hẹn ẹn voawu dogọ gbọn?

Mẹjitọ lẹ dona gọalọna ovi yetọn lẹ nado wleawuna awuvẹmẹ, na ehe na nọ sisẹ yé nado yinuwa po zinzin po wutu. Visunnu Peggy tọn, heyin nùdego to bẹjẹeji, doayi flumẹjijẹ, awubla, po dasin nọvisunnu etọn tọn po go, bosọ yọ́n awufiẹsa he mẹ nọvisunnu etọn te. Dile onọ̀ etọn ko donukun do, nuhe e wà vẹ́ na ẹn bọ e sọ magbe nado diọ. Visunnu awe Peggy tọn lẹ yí nuhe yé plọn to ovu-whenu lẹ zan ganji podọ to owhe lẹ godo yé lẹzun yẹwhehodọtọ po lẹngbọhọtọ sinsẹ́nnọ lẹ po to agun Klistiani tọn mẹ.

Dohia Dọ Hiẹ Mọnukunnujẹemẹ

Zinzin yin nujọnu taun to whenuena hiẹ tindo wiwọ́ hẹ mẹdevo. Hiẹ sọgan dè yẹyi sọn omẹ lọ go po awubibọ po. Mẹpipa nọ saba sọgbe to bẹjẹeji. Kakati nado mọhodọdo omẹ lọ go, yanwle towe ni yin nado didẹ nuhahun lọ. Dọ lehe nuwiwa etọn yinuwado hiẹ ji do gọna nuhe a na jlo dọ e ni yin didiọ taun lọ. Enẹgodo wleawu nado dotoai. Vlavo a ma mọnukunnujẹ nuhe omẹ lọ dọ mẹ wẹ.

Gbẹtọ lẹ nọ jlo dọ mí ni mọnukunnujẹ pọndohlan yetọn mẹ eyin mí ma tlẹ kẹalọyi pọndohlan lọ. Jesu dọho po zinzin po, bo dohia dọ emi mọnukunnujẹ ayimajai Malta tọn mẹ. E dọmọ: “Malta, Malta, hiẹ yin magbọjẹnọ podọ tuklanọ na onú susu.” (Luku 10:41) Mọdopolọ, eyin mẹde dọho do nuhahun delẹ ji, kakati nado dín pọngbọ na nuhahun lọ whẹpo do se zẹẹmẹ gigọ́ lẹ, aliho zinzin tọn he na dohia dọ a mọnukunnujẹemẹ wẹ nado vọ́ nuhahun kavi lewuwu lọ dọ to hogbe towe titi lẹ mẹ. Aliho he jọmẹ he dohia dọ a mọnukunnujẹ nuhe e dọ mẹ de wẹ ehe yin.

Yọ́n Nuhe Ma Dona Yin Didọ Lẹ

To whenuena Ahọsi Ẹsteli jlo na biọ to asu etọn si nado hẹn sebibla Hamani tọn nado và Ju lẹ sudo gble, e basi titona whẹho lẹ po zinzin po na asu etọn nido tin to ninọmẹ awuvivo tọn mẹ. Ojlẹ enẹ mẹ wẹ e penugo nado donù whẹho sinsinyẹn ehe go. Ṣigba mí sọ plọn nude sọn ayidido nuhe e ma dọ lẹ go mẹ. Po zinzin po e ma donù adà he asu etọn tindo to sebibla ylankan lọ mẹ go.—Esteli 5:1-8; 7:1, 2; 8:5.

Mọdopolọ, to whenuena hiẹ to asu mayisenọ mẹmẹyọnnu Klistiani de tọn dla pọ́n, kakati nado do Biblu hia ẹ to afọdopolọji, naegbọn a ma na bẹjẹeji gbọn zinzin yíyí do kàn nuhe e yiwanna lẹ se dali? Eyin jonọ de wá Plitẹnhọ Ahọluduta tọn mẹ bo doaṣọ mọmọ kavi eyin mẹde wá opli to whenuena e ko gọ̀n opli na ojlẹ gaa de godo, dokuavọna ẹn po zohunhun po kakati nado dọhodo nusisọ́ kavi opli gingọ̀n etọn ji. Podọ eyin hiẹ doayi e go dọ jlodotọ de tindo pọndohlan he ma sọgbe de, e na yọnhugan ma nado diọ pọndohlan etọn to afọdopolọji. (Johanu 16:12) Zinzin bẹ yinyọ́n nuhe ma dona yin didọ lẹ hẹn.

Hodidọ He Nọ Jlọmẹdote

Pinplọn nado nọ dọho po zinzin po na gọalọna we nado duvivi haṣinṣan ayajẹnọ lẹ tọn hẹ mẹdevo lẹ, yèdọ eyin mẹde ma tlẹ mọnukunnujẹ mẹwhinwhàn towe lẹ mẹ ganji bo jẹagọdo we kavi gblehomẹ. Di apajlẹ, to whenuena omẹ Eflaimi tọn lẹ ‘tẹnpọn nado tlọnu hẹ Gideoni sinsinyẹn,’ gblọndo zinzin tọn etọn bẹ zẹẹmẹ he họnwun nuhe ko jọ na taun tọn hẹn gọna pipà ahundopo tọn nina Eflaiminu lẹ na nuhe yé ko wadotana. Ehe yin nuwiwa zinzin tọn na e yọ́n nuhewutu yé gblehomẹ, bọ whiwhẹ etọn sọ miọnhomẹna yé.—Whẹdatọ 8:1-3; Howhinwhẹn lẹ 16:24.

Nọ tẹnpọn to whepoponu nado nọ lẹnnupọndo lehe hogbe towe lẹ na yinuwado mẹdevo lẹ ji do. Vivẹnudido nado yin zinzintọ na gọalọna we nado tindo numimọ ayajẹ he yin zẹẹmẹ basina to Howhinwhẹn lẹ 15:23 mẹ tọn dọmọ: “Gbẹtọ tindo ayajẹ gbọn gbeyiyi onù etọn mẹ tọn dali: podọ ohó dopo to ojlẹ etọn mẹ, nawẹ e jẹ do.”

[Yẹdide to weda 31]

Mẹjitọ lẹ sọgan plọn ovi yetọn lẹ nado nọ vẹawu mẹdevo lẹ

[Yẹdide to weda 31]

Klistiani numimọnọ lẹ sọgan plọn mẹyọyọ lẹ nado yin zinzintọ