Kanbiọ lẹ sọn Wehiatọ lẹ Dè

Etẹwẹ baptẹm na oṣiọ lẹ zẹẹmẹdo?

To wekinkan etọn dogbọn fọnsọnku olọn tọn dali mẹ, apọsteli Paulu wlan kandai he fọnjlodotenamẹ taun de. To Biblu Wiwe—Gun Alada mẹ, mí hia dọmọ: “Eyin e ma yinmọ etẹwẹ yé he yè baptizi na oṣiọ lẹ wutu na wà, eyin oṣiọ lẹ ma tite lala? Etẹwutu wẹ yè baptizi yé na oṣiọ lẹ wutu?”—1 Kọlintinu lẹ 15:29.

Be didọ wẹ Paulu te tofi dọ mẹhe to ogbẹ̀ lẹ ni yin bibaptizi do ota mẹhe ma ko yin bibaptizi whẹpo do kú lẹ tọn mẹ ya? Lẹdogbedevomẹ Biblu tọn ehe po devo lẹ po sọgan taidi nuhe hẹnmẹ wá tadona enẹ kọ̀n. Ṣigba, sọwhiwhe yiyi do gbadopọnna Owe-wiwe lọ po hogbe Glẹki dowhenu tọn he Paulu yizan po na hẹn mí wá tadona devo kọ̀n. Nuhe dọ Paulu te wẹ yindọ, Klistiani yiamisisadode lẹ yin bibaptizi, kavi yinylọndo sinmẹ, na aliho gbẹzan tọn de he na planmẹ jẹ okú tenọgligo-hinhẹn tọn kọ̀n taidi Klisti tọn. To enẹgodo, yé na yin finfọnsọnku do ogbẹ̀ gbigbọmẹ tọn mẹ taidi Klisti.

Owe-wiwe nọgodona zẹẹmẹ ehe. To wekanhlanmẹ etọn hlan Lomunu lẹ mẹ, Paulu wlan dọmọ: “Be mì [ma yọnẹn] dọ, mí mẹhe yè baptizi do Jesu Klisti mẹ lẹ, yè baptizi mí do okú etọn mẹ?” (Lomunu lẹ 6:3) To wekanhlanmẹ etọn hlan Filippinu lẹ mẹ, Paulu dọho ede tọn dọmọ: ‘To mahẹ tindo to yajiji Klisti tọn lẹ mẹ, bo to dee ze jo na okú he taidi ewọ tọn, vlavo eyin gbọn alọ depope mẹ yẹn sọgan tindo fọnsọnku bẹjẹeji tọn.’ (Filippinu lẹ 3:10, 11) Nuhe Paulu to alọdlẹndo wẹ yindọ, gbẹzan hodotọ yiamisisadode Klisti tọn bẹ tenọgligo-hinhẹn to whlepọn glọ, pinpannukọn okú egbesọegbesọ, podọ to godo mẹ okú na tenọgli etọn wutu hẹn, bọ todido fọnsọnku olọn mẹ tọn bọdego.

E jẹna ayidego dọ wefọ ehe po devo lẹ po he donù okú go tlọlọ to kọndopọmẹ hẹ mẹhe yin bibaptizi lẹ dlẹnalọdo mẹhe to ogbẹ̀ he ko yin bibaptizi lẹ, e mayin mẹhe ko kú lẹ gba. Paulu sọ dọna Klistiani yiamisisadode hatọ etọn lẹ dọmọ: “Yè sọ dì mì dopọ hẹ ẹ to baptẹm mẹ, ehe mẹ yè fọ́n mì do ogbẹ̀ po e po te ga gbọn yise mẹ to azọ́nwiwa Jiwheyẹwhe tọn mẹ mẹhe fọ́n ẹn tite do ogbẹ̀ sọn oṣiọ lẹ mẹ.”—Kọlọsinu lẹ 2:12.

Hogbe Glẹki tọn lọ hy·perʹ, heyin lilẹdogbedevomẹ taidi “na” to Gungbe mẹ to 1 Kọlintinu lẹ 15:29 mẹ, sọgan sọ zẹẹmẹdo “na lẹndai etọn wutu.” Enẹwutu, to gbesisọmẹ hẹ wefọ Biblu tọn devo lẹ, Les Saintes Écritures—Traduction du monde nouveau lẹ́ wefọ ehe do ogbè devo mẹ to aliho he sọgbe mẹ dọmọ: “Etẹwẹ yé na wà mẹhe to yinyin bibaptizi na lẹndai lọ nado yin oṣiọ lẹ wutu? Eyin oṣiọ lẹ ma na yin finfọnsọnku paali, naegbọn yelọsu lẹ to yinyin bibaptizi na lẹndai lọ nado yin oṣiọ wutu?”