Jọja lẹ Emi, Mì Zinzọnlin Dile E Jẹna Jehovah Do

E KO lẹzun dandan na jọja Klistiani delẹ nado sẹtẹn sọn whẹndo po agun yetọn po mẹ na ojlẹ gli de. Mẹdelẹ ko wàmọ nado sọgan hẹn lizọnyizọn yetọn gblodeji. Mẹdevo lẹ dona wàmọ na kadaninọ yetọn na whẹho aihọn ehe tọn lẹ wutu. (Isaia 2:4; Johanu 17:16) To otò delẹ mẹ, “Sesali” ko dawhẹna jọja tenọgligo hẹntọ lẹ nado sẹ̀ngàn kavi nado wà tòzọ́n delẹ.a—Malku 12:17; Titu 3:1, 2.

Dile yé to ogàn sẹ̀n na kadaninọ yetọn wutu, jọja ehelẹ sọgan yin họ̀nsudo dopọ po sẹ́nhẹngbatọ lẹ po na ojlẹ dindẹn. Mọdopolọ, whégbè tintlọ́n na whẹwhinwhẹ́n devo lẹ wutu ko sọ hẹn jọja lẹ po huhlọn po nado wazọ́n to lẹdo ylankan lẹ mẹ. Nawẹ jọja Klistiani ehelẹ kavi mẹdevo he ma sọgan dapana ninọmẹ mọnkọtọn lẹ sọgan pehẹ kọgbidinamẹnu po obiọ he yé nọ pannukọn lẹ po dile yé to kanván nado ‘zinzọnlin dile e jẹna Jiwheyẹwhe do’ gbọn? (1 Tẹsalonikanu lẹ 2:12) Nawẹ mẹjitọ yetọn lẹ sọgan gọalọna yé nado wleawudai na ninọmẹ ylankan depope gbọn?—Howhinwhẹn lẹ 22:3.

Avùnnukundiọsọmẹnu Tangan Lẹ

Tákis, owhe 21 mẹvi de, he dona tọ́nsọn whégbè bo yí osun 37 zan to fidevo dọmọ: “Yinyin mẹhe ma tin to hihọ́ mẹjitọ ṣie lẹ tọn gọna nukunpemẹgo owanyinọ mẹho he yọ́n mi ganji lẹ tọn glọ ba vẹawu bosọ nọ dobuna mi.”b E yidogọ dọ: “To whedelẹnu, e nọ taidi dọ yẹn ma tindo alọgọtọ depope.” Pétros owhe 20 mẹvi dona sẹtẹn sọn whégbè na nuhe hugan owhe awe. E yigbe dọmọ: “Na ojlẹ tintan to gbẹzan ṣie mẹ, yẹn dona basi nudide lẹ gando ayidedai po gbẹdido po go na dee, podọ yẹn ma nọ basi nudide nuyọnẹn tọn to whepoponu gba.” Enẹgodo e dọmọ: “To whedelẹnu, azọngban daho he mẹdekannujẹ dogọ bẹhẹn nọ gbàhundona mi.” Tássos, mẹho agun tọn de he nọ saba mọ jọja Klistiani he tin to ninọmẹ mọnkọtọn mẹ lẹ, doayi e go dọmọ: “Hogbe mawé, atẹṣiṣi, po walọ danuwiwa hagbẹ mayisenọ lẹ tọn po sọgan yinuwado jọja madogánnọ he ma tin to aṣeji lẹ ji.”

Dile jọja Klistiani mọnkọtọn lẹ to gbẹnọ bo to azọ́nwa to mẹhe ma tindo sisi na nunọwhinnusẹ́n Biblu tọn lẹ ṣẹnṣẹn, yé dona họ́ yedelẹ sọta whlepọn lọ nado hodo apajlẹ walọ fẹnnuwiwa tọn po aliho he ma sọgbe hẹ Owe-wiwe po lẹ he hagbẹ yetọn lẹ to zinzán. (Psalm 1:1; 26:4; 119:9) Tito dagbe oplọn mẹdetiti tọn tintindo, opli yìyì, po sinsẹ̀nzọn kunnudegbe tọn po sọgan taidi nuhe sinyẹnawu. (Filippinu lẹ 3:16) Yanwle gbigbọmẹ tọn lẹ zizedai po vivẹnudido nado jẹ yé kọ̀n po sọgan sinyẹnawu ga.

Na jide tọn, jọja Klistiani nugbonọ lẹ nọ jlo dọ walọ po hodidọ yetọn po ni hẹn homẹ Jehovah tọn hùn. Yé nọ dovivẹnu po nugbonọ-yinyin po nado setonuna oylọ-basinamẹ owanyinọ Otọ́ olọn mẹ tọn yetọn tọn dọmọ: “Ovi ṣie, yin nuyọnẹntọ, bosọ hẹn homẹ ṣie hùn; na yẹn nido gblọnhona ewọ he to vivlẹ mi.” (Howhinwhẹn lẹ 27:11) Yé yọnẹn dọ walọyizan po nusisọ́ yetọn po nọ yinuwado nukun he mẹdevo lẹ nọ yí do pọ́n Jehovah po omẹ etọn lẹ po ji.—1 Pita 2:12.

E jẹna pipà dọ, suhugan jọja enẹlẹ tọn nọ wà nuhe go yé pé lẹpo nado taidi mẹmẹsunnu yetọn owhe kanweko tintan tọn lẹ he apọsteli Paulu hodẹ̀na dọmọ: ‘Mì zinzọnlin dile e jẹna Oklunọ do to nukundagbe lẹpo mẹ, na mì ni yin sinsẹ́nnọ to azọ́n dagbe lẹpo mẹ nado sọgan doakọnnanu bo yí ayajẹ do sinyẹnlin.’ (Kọlọsinu lẹ 1:9-11) Biblu na mí apajlẹ jọja budisi Jiwheyẹwhe tọ́ susu tọn he zinzọnlin dile e jẹna Jiwheyẹwhe do po kọdetọn dagbe po to lẹdo ylankan, budonamẹ, po boṣiọ-sinsẹ̀n tọn po mẹ.—Filippinu lẹ 2:15.

‘Jehovah Tin hẹ Josẹfu’

To owhe aflanmẹ tọn etọn lẹ mẹ, Josẹfu, visunnu yiwanna Jakobu po Laheli po tọn, mọ ede to otò he dẹ̀n tlala do otọ́ budisi Jiwheyẹwhe tọ́ etọn tọn mẹ. E yin sisà do kanlinmọgbenu to Egipti. Josẹfu ze apajlẹ dagbe dai taidi dẹpẹ azọ́n sinsinyẹn watọ, he go yè sọgan dejido, podọ walọ dagbenọ. Mahopọnna dọ Pọtifali he ma nọ sẹ̀n Jehovah wẹ e to devizọnwa na, Josẹfu yin nugbonọ po vivẹnudotọ po sọmọ bọ ogán etọn wá ze nuhe to whédo lọ mẹ lẹpo do alọmẹ na ẹn to godo mẹ. (Gẹnẹsisi 39:2-6) Josẹfu hẹn tenọgligo hlan Jehovah, podọ to whenuena ehe hẹn ẹn yì ganpamẹ, e ma wá tadona kọ̀n dọ: “Etẹwutu yẹn tlẹ do wà ehe?” E tlẹ do jẹhẹnu dagbe lẹ hia to ganpamẹ bosọ yin dide to madẹnmẹ nado penukundo onú susu go to ganpa lọ mẹ. (Gẹnẹsisi 39:17-22) Jiwheyẹwhe dona ẹn, podọ dile e yin didọ to Gẹnẹsisi 39:23 mẹ do, ‘OKLUNỌ tin hẹ Josẹfu.’

Lehe e na ko bọawu na Josẹfu, he dẹ̀n tlala do whẹndo budisi Jiwheyẹwhe tọ́ etọn, nado hodo apajlẹ walọ kosi he lẹdo e lẹ tọn, bo zan gbẹzan fẹnnuwiwa tọn he Egiptinu lẹ nọ zan do sọ! Kakatimọ, e tẹdo nunọwhinnusẹ́n Jiwheyẹwhe tọn lẹ go bo hẹn teninọ wiwe etọn go mahopọnna whlepọn he sẹhundaga hugan. To whenuena asi Pọtifali tọn vẹ̀ ẹ pludopludo nado zanhẹ ẹ, gblọndo nujikudo tọn etọn wẹ yindọ: “[Nawẹ] yẹn sọgan wà oylan daho he do, bo waylan do Jiwheyẹwhe?”—Gẹnẹsisi 39:7-9.

To egbehe, jọja Kunnudetọ lẹ dona setonuna avase sinai do Biblu ji lẹ sọta gbẹdido ylankan, ayidedai he ma sọgbe, yẹdide fẹnnuwiwa tọn, po húnhiho gblezọn po. Yé yọnẹn dọ “nukun OKLUNỌ tọn tin to ofi popo, e to mẹylankan po mẹdagbe lẹ po pọ́n.”—Howhinwhẹn lẹ 15:3.

Mose Gbẹ́ “Nado Dugbẹ Ylando Tọn”

Mose whẹ́n to lẹdo boṣiọ-sinsẹ̀n po gbẹdudu tọn po mẹ to họ̀nmẹ Falo tọn mẹ. Biblu dọ gando e go dọmọ: “Gbọn yise dali Mose . . . kọ́ nado yin yiylọ ovi viyọnnu Falo tọn lọ tọn; e tlẹ jlo na jiya nukunbibia tọn hẹ omẹ Jiwheyẹwhe tọn lẹ, hú nado dugbẹ ylando tọn to ojlẹ pẹvide mẹ.”—Heblu lẹ 11:24, 25.

Họntọnjiji hẹ aihọn sọgan hẹn ale delẹ wá, ṣigba e nọ yin ojlẹ gli tọn. Eyin e dẹn-to-aimẹ hugan wẹ e na do nọ aimẹ na ojlẹ vude he pò na aihọn ehe. (1 Johanu 2:15-17) Be e ma na pọnte hugan nado hodo apajlẹ Mose tọn ya? Biblu dọ dọ “e doakọnna ẹn taidi e mọ ewọ he yin mamọ lọ.” (Heblu lẹ 11:27) E ze ayidonugo etọn lẹpo do ogú gbigbọmẹ tọgbo budisi Jiwheyẹwhe tọ́ etọn lẹ tọn ji. E ze gbẹzan etọn sinai do lẹndai Jehovah tọn ji, bọ yanwle etọn yin nado wà ojlo Jiwheyẹwhe tọn.—Eksọdusi 2:11; Owalọ lẹ 7:23, 25.

Eyin jọja budisi Jiwheyẹwhe tọ́ lẹ mọ yede to mẹhe ma yiwanna Jiwheyẹwhe bo ma tindo ojlo to yé mẹ lẹ ṣẹnṣẹn, yé sọgan hẹn haṣinṣan yetọn hẹ Jehovah lodo gbọn oplọn mẹdetiti tọn dali, bo dovivẹnu nado yọ́n “ewọ he yin mamọ lọ” ganji. Tito-to-whinnu nuwiwa Klistiani tọn lẹ tọn he sọgbe, he bẹ opli po sinsẹ̀nzọn kunnudegbe tọn po yìyì to gbesisọmẹ hẹn, na gọalọna jọja ehelẹ nado ze ayidonugo yetọn do gbigbọnu lẹ ji. (Psalm 63:6; 77:12) Yé dona dovivẹnu nado wleawuna yise po todido he dolido taidi Mose tọn po. Yé dona vánkan nado ze nulẹnpọn po nuyiwa yetọn lẹ po sinai do Jehovah ji, bo hùnhomẹ nado yin họntọn etọn.

E Yí Odẹ́ Etọn do Pagigona Jiwheyẹwhe

Jọja devo he ze apajlẹ dagbe dai to whenuena e tin dẹ̀n do whégbè wẹ viyọnnu Islaelivi heyin wiwle gbọn Silianu lẹ dali to azán yẹwhegán Jiwheyẹwhe tọn Eliṣa tọn gbè. E lẹzun deviyọnnu na asi Naamani heyin awhangán pòtọnọ Silianu de tọn. Viyọnnu ehe dọna mẹmẹnu etọn dọmọ: ‘Ṣo dọ klunọ ṣie tin to yẹwhegán he tin to Samalia mẹ dè! Whenẹnu ewọ do hẹn ẹn jẹ gángán sọn opò etọn mẹ.’ Na kunnudide etọn wutu, Naamani yì Eliṣa dè to Islaeli bosọ yin kiklọwé sọn opò etọn mẹ. Humọ, Naamani lẹzun Jehovah sẹ̀ntọ de.—2 Ahọlu lẹ 5:1-3, 13-19.

Apajlẹ viyọnnu ehe tọn zinnudo nuhudo lọ ji na jọja lẹ nado nọ yí odẹ́ yetọn zan to aliho he nọ gbògbéna Jiwheyẹwhe mẹ, eyin yé ma tlẹ tin to mẹjitọ yetọn lẹ dè. Eyin viyọnnu enẹ ko tindo aṣa lọ nado nọ yí “hógblo” kavi ‘hogbe he kúdiho’ lẹ zan, be e na ko bọawu na ẹn nado yí odẹ́ etọn zan po kọdetọn dagbe po dile e wà do to whenuena dotẹnmẹ lọ hundote ya? (Efesunu lẹ 5:4; Howhinwhẹn lẹ 15:2) Níkos, dẹpẹ de to owhe 20 etọn lẹ mẹ he yin wiwle do ganpamẹ na kadaninọ etọn wutu flin dọmọ: “To whenuena yẹn tin hẹ mẹmẹsunnu jọja devo lẹ to ganpamẹ, to fie dẹ̀n tlala do aṣẹpipa mẹjitọ lẹ po agun po tọn, yẹn doayi e go dọ hogbe he kudiho lẹ jẹ tintọ́n to hodidọ mítọn mẹ ji. Na nugbo tọn e ma hẹn pipà wá na Jehovah gba.” Homẹhunnu wẹ e yin dọ Níkos po mẹdevo lẹ po ko yin alọgọna nado setonuna ayinamẹ Paulu tọn do whẹho ehe ji dọmọ: “Ṣigba ogalilọ, po mawe lẹpo po, kavi nukunkẹn, yè sọ ylọ oyín etọn to mì ṣẹnṣẹn ba blo, dile e jẹna mẹwiwe lẹ do.”—Efesunu lẹ 5:3.

Jehovah Yin Omẹ Nujọnu Tọn Na Yé

Numimọ họntọn Heblunu atọ̀n Daniẹli tọn lẹ tọn to Babilọni hohowhenu tọn mẹ do nugbo-yinyin nunọwhinnusẹ́n he Jesu dọ tọn hia dọ nugbonọ-yinyin to onú pẹvi lẹ mẹ nọ planmẹ jẹ nugbonọ-yinyin to onú daho lẹ mẹ kọ̀n. (Luku 16:10) To whenuena yé pehẹ nuhahun lọ nado dù núdùdù heyin gbigbẹ́ to Osẹ́n Mose tọn mẹ lẹ, yé sọgan ko dín whẹjijọ dọ afanumẹ wẹ emilẹ yin to aigba jonọ tọn ji, bo tin to dandan glọ nado setonu. Ṣigba lehe yé yin didona do sọ na nuhe tlẹ sọgan ko taidi onú pẹvi yiylọ dọ nujọnu! Yé tindo agbasalilo dagbe bosọ yin nuyọnẹntọ hugan afanumẹ devo he zindonukọn nado to núdùdù dojo ahọlu tọn dù lẹ. Matin ayihaawe, nugbonọ-yinyin to onú pẹvi helẹ mẹ hẹn yé lodo, bọ to whenuena yé pehẹ whlepọn sinsinyẹn lọ nado litaina boṣiọ de, yé penugo nado hẹn tenọgligo.—Daniẹli 1:3-21; 3:1-30.

Jehovah yin omẹ nujọnu tọn na dẹpẹ atọ̀n helẹ. Mahopọnna dọ yé dẹ̀n do whégbè podọ do ahọnkan sinsẹ̀n-bibasi Jiwheyẹwhe tọn, yé magbe nado gbọṣi diho matindo mẹ sọn aihọn lọ dè. (2 Pita 3:14) Haṣinṣan yetọn hẹ Jehovah họakuẹ na yé sọmọ bọ yé jlo nado yí ogbẹ̀ yetọn lẹ do sanvọ́ na ẹn.

Jehovah Ma Na Gbẹ́ Mì Dai

Nugbo wẹ dọ eyin jọja lẹ sẹtẹn yì fihe dẹ̀n do mẹyiwanna yetọn po mẹhe go yé dejido lẹ po, yé sọgan tindo numọtolanmẹ hihọ́ matindo, ayihaawe, po obu po tọn. Ṣigba, yé sọgan pehẹ whlepọn yetọn lẹ po jidide mlẹnmlẹn po dọ ‘Jehovah ma na gbẹ́ yé dai’ gba. (Psalm 94:14) Eyin jọja mọnkọtọn lẹ “jiya na dodo wutu,” Jehovah na gọalọna yé nado to zọnlinzin to “aliho dodo tọn” ji zọnmii.—1 Pita 3:14; Howhinwhẹn lẹ 8:20.

Jehovah hẹn Josẹfu, Mose, viyọnnu Islaelivi afanumẹ lọ, po jọja nugbonọ atọ̀n Heblunu lọ lẹ po lodo bosọ dona yé susugege. To egbehe, e nọ yí gbigbọ wiwe etọn, Ohó etọn, po titobasinanu etọn po zan nado gọalọna mẹhe “hoavùn dagbe yise tọn” lẹ, bosọ ze ale “ogbẹ̀ madopodo” tọn donukọnna yé. (1 Timoti 6:11, 12) Mọwẹ, zọnlinzinzin dile e jẹna Jehovah do yọnbasi, podọ nuyọnẹnnu wẹ e yin nado wàmọ.—Howhinwhẹn lẹ 23:15, 19.

[Nudọnamẹ Odò Tọn]

[Apotin to weda 25]

MẸJITỌ LẸ EMI—MÌ WLEAWUNA OVI MÌTỌN LẸ!

“Di ogá to alọ asuka de tọn mẹ; mọwẹ dẹpẹmẹvi sunnu lẹ te.” (Psalm 127:4) Ogá ma na jẹ nuhe go yè yìn in hlan kọ̀n gbọn kosọ dali gba. E dona yin yìnyìn po azọ̀nyinyọnẹn po. Mọdopolọ, ovi lẹ ma na penugo nado pehẹ nuhahun gbẹninọ to fihe dẹ̀n do whégbè tọn lẹ matin anademẹ he sọgbe mẹjitọ lẹ tọn gba.—Howhinwhẹn lẹ 22:6.

Jọja lẹ nọ tindo mẹwhinwhàn lọ nado yinuwa sọgbe hẹ linlẹn yetọn kavi nado joawuna “wantuntun yọpọ whenu tọn.” (2 Timoti 2:22) Biblu na avase dọmọ: “Obá po wọhẹ po na nuyọnẹn omẹ: ṣigba ovi he yè jodo na ede, na dowinyan onọ̀ etọn.” (Howhinwhẹn lẹ 29:15) Ovi lẹ ma na pegan nado pehẹ obiọ po kọgbidinamẹnu gbẹ̀mẹ tọn lẹ po to fidevo eyin mẹjitọ lẹ gboawupo nado ze dogbó lẹ dai do walọyizan jọja whenu tọn ji.

Mẹjitọ Klistiani lẹ dona dọ awusinyẹnnamẹnu, kọgbidinamẹnu, po nuhahun gbẹ̀mẹ tọn lẹ po na ovi yetọn lẹ to aliho he họnwun bo sọgbe mẹ. Yé sọgan basi zẹẹmẹ ninọmẹ sinsinyẹn he jọja de sọgan pehẹ lẹ tọn eyin e dona sẹtẹn sọn whégbè bo yì nọ̀ fidevo. Zẹẹmẹ ehe ma dona yin bibasi po pọndohlan agọ̀ po kavi to aliho mẹhẹngbọjọ tọn mẹ gba. Azọ́nplọnmẹ ehe, po nuyọnẹn he Jiwheyẹwhe nọ namẹ po, na ‘na zinzin mayọndenọ, oyọnẹn po huhlọn nulẹnpọn tọn po hlan sunnu dẹpẹ.’—Howhinwhẹn lẹ 1:4.

Mẹjitọ he dó nujinọtedo Jiwheyẹwhe tọn lẹ po nunọwhinnusẹ́n walọdagbe tọn lẹ po do ahun mẹ na ovi yetọn lẹ to yé hẹn penugo nado dùto nuhahun gbẹ̀mẹ tọn lẹ ji. Oplọn Biblu whẹndo tọn to gbesisọmẹ, hodọdopọ ahundopo tọn, podọ ojlo nujọnu tọn to dagbemẹ-ninọ ovi lẹ tọn mẹ, sọgan do vogbingbọn lọ hia to kọdetọn dagbe po awugbopo po ṣẹnṣẹn. Mẹjitọ lẹ dona plọn ovi lẹ to anademẹ Jiwheyẹwhe tọn glọ to aliho he to jlẹkaji ṣogan he yin nujikudo po lẹnpọn dagbe tọn po mẹ, bo wleawuna ovi yetọn lẹ nado nọ̀ na yedelẹ to sọgodo. Gbọn apajlẹ mẹdetiti tọn dali, mẹjitọ lẹ sọgan plọn ovi yetọn lẹ dọ e yọnbasi nado tin to aihọn lọ mẹ ṣogan bo mayin apadewhe etọn.—Johanu 17:15, 16.

[Yẹdide to weda 23]

E ko lẹzun dandan na jọja Klistiani delẹ nado sẹtẹn sọn whégbè

[Yẹdide to weda 24]

Gbọn avunteninọ sọta whlepọn dali, jọja lẹ sọgan hodo apajlẹ Josẹfu tọn bo gbọṣi wiwejininọ mẹ to walọyizan-liho

[Yẹdide to weda 26]

Hodo apajlẹ viyọnnu Islaelivi afanumẹ lọ tọn he yí odẹ́ etọn do pagigona Jehovah