“Huhlọn Gbloada Nankọtọn Die Ohó Jiwheyẹwhe Tọn Tindo!”

“OHÓ JIWHEYẸWHE TỌN tin to ogbẹ̀, e dohuhlọn.” (Heblu lẹ 4:12) Nado dekunnuna huhlọn sẹhundaga Ohó Jiwheyẹwhe tọn tọn, Calendrier des Témoins de Jéhovah 2003 bẹ otàn nugbo gbẹzan tọn ṣidopo sọn adà aihọn tọn lẹpo mẹ hẹn. To hosọ lọ “Avant et Après” glọ, sunzanhiawe lọ dohia lehe azọ́n mẹpinplọn Kunnudetọ Jehovah tọn lẹ tọn nọ gọalọna gbẹtọ lẹ nado hẹn walọ yetọn lẹ pọnte, jo gbẹzan ylankan lẹ do, hẹn gbẹzan whẹndo tọn yetọn lodo, bo tindo haṣinṣan pẹkipẹki hẹ Jiwheyẹwhe do.

Wekanhlanmẹ pinpẹn-nutọn-yinyọnẹn tọn susu wẹ ko yin mimọyi gando sunzanhiawe 2003 lọ go. Delẹ to yé mẹ die:

“Sunzanhiawe ehe yin kunnudenu de na Klistiani nugbo lẹ dọ mẹdevo lẹ tin he dona hoavùn sinsinyẹn na yise lọ kẹdẹdile yelọsu to bibasi do. Todin yẹdide lọ lẹ pinpọn sọgan flin yé diọdo he mẹdelẹ ko basi.”—Steven, États-Unis.

“Yẹn jlo na kàn wema kleun ehe nado hẹn mì yọ́n obá he mẹ sunzanhiawe 2003 lọ ko yinuwado ahun ṣie ji jẹ. Sunzanhiawe de ma ko yinuwado ji e domọ pọ́n. Otàn gbẹzan tọn ehelẹ na lẹzun apadewhe nuhe yẹn na nọ hẹn to saki kunnudegbe tọn ṣie mẹ lẹ tọn nado sọgan do apajlẹ po kunnudenu lehe Biblu sọgan diọ gbẹzan gbẹtọ lẹ tọn do po tọn hia mẹdevo lẹ.”—Marc, Belgique.

“Sunzanhiawe lọ whàn mi taun. Yẹn ma sọgan deanana numọtolanmẹ ṣie lẹ dile yẹn to hihia bo mọ lehe Jehovah ko diọ omẹ ehelẹ do. Taidi kọdetọn de, e whàn mi nado to diọdo lẹ basi zọnmii to gbẹzan ṣie mẹ. Todin hú gbede pọ́n tọn, yẹn mọdọ yẹn yin apadewhe mẹmẹsunnu-yinyin akọjọpli tọn mítọn.”—Mary, États-Unis.

“Ninọmẹ blawu gbigbọmẹ gbẹtọ lẹ tọn nọ duahunmẹna Jesu tlala. Mì wanu na apajlẹ Klisti tọn hihodo gbọn otàn gbẹzan tọn enẹlẹ zinzinjẹgbonu to sunzanhiawe 2003 tọn mẹ dali. Sunzanhiawe de ma ko yinuwado ji e sọmọ pọ́n to gbẹ̀mẹ bo hẹn mi kùn dasin gba.”—Cassandra, États-Unis.

“Yẹn jẹ azọ̀ nù ji to whenuena yẹn tindo owhe 11; to nukọnmẹ yẹn nọ zan amasin adínọ lẹ. Whlasusu wẹ e ko wá ayiha ṣie mẹ nado hù dee. Ṣigba to whenuena yẹn wá yọ́n Jehovah, yẹn yin alọgọna nado jo aṣa enẹlẹ do. Sunzanhiawe ehe yin nujọnu taun na mi. Apajlẹ mẹmẹsunnu po mẹmẹyọnnu ṣie lẹ tọn po sọn adà aihọn tọn lẹpo mẹ hẹn mi lodo taun. Todin yẹn yọnẹn dọ e mayin yẹn ṣo wẹ to avùn ehe hò gba podọ nuhe yin nujọnu hugan lọ wẹ owanyi na Jehovah po sinsẹ̀nzọn ahundopo tọn bibasi hlan ẹn po.”—Margaret, Pologne.

“Etẹ nkọ, huhlọn gbloada nankọtọn die Ohó Jiwheyẹwhe tọn tindo! To whenuena yẹn mọ sunzanhiawe 2003 lọ yí, dasin dibla wayi do mi. Numimọ ehelẹ, po yẹdide lọ lẹ po, hẹn yise lodo taun.”—Darlene, États-Unis.

“Gbẹzan he delẹ to omẹ ehelẹ mẹ zan dai dibla sọzẹn hẹ dehe yẹnlọsu zan wayi. Jehovah ko na mi huhlọn lọ nado dùto walọ gblezọn he ma bọawu nado gbẹdai lẹ ji. Mì wanu susu na otàn nugbo gbẹzan tọn ehelẹ.”—William, États-Unis.