Gbọṣi Wiweji Gbọn Hihọ́-Bibasina Ahun Towe Dali
“Hú whiwhla lẹpo, yí otù [kavi ahun] towe whlá, na e mẹ wẹ asisa ogbẹ̀ tọn sọn.”—HOWHINWHẸN LẸ 4:23.
1-3. (a) Nawẹ gbẹtọ lẹ nọ saba dohia dọ yé ma yọ́n nuhọakuẹ-yinyin wiwejininọ yetọn tọn gbọn? Basi dohia. (b) Naegbọn e do yin nujọnu nado gbadopọnna nuhọakuẹ-yinyin wiwejininọ tọn?
YẸDIDE lọ sọgan ko taidi nuhe dohó. Vlavo e ma jẹaṣọ́ to ohọ̀ lọ mẹ ba. Depope he whẹho lọ sọgan yin, e masọ yọn-na-yizan na nunọ lọ ba. Enẹwutu yẹdide lọ yin zize yì onú zánpo lẹ satẹn, bọ dọla 29 yin titlẹ́ do e go taidi akuẹ he e na yin sisà yin. Ṣigba, to owhe vude poun godo, mẹhe họ̀ ẹ lọ wá mọdọ akuẹ etọn dibla yiaga sọ dọla livi dopo! Mọwẹ, e wá lẹzun yẹdide họakuẹ tlala de. Yí nukun homẹ tọn do pọ́n numọtolanmẹ nunọ dai tọn lọ tọn, he ko yí nukunpẹvi do pọ́n nuhọakuẹ ehe!
2 Onú mọnkọtọn de nọ saba jọ do wiwejininọ, yèdọ walọ dagbe, kavi walọ wiwe-ṣeke mẹdelẹ tọn go. Suhugan gbẹtọ lẹ tọn wẹ nọ yí nukunpẹvi do pọ́n wiwejininọ yetọn to egbehe. Mẹdelẹ nọ pọ́n ẹn taidi nuhe ko dohó, bo masọ jẹ na gbẹzan egbezangbe tọn ba. Enẹwutu, yé nọ sà ẹ pọṣọnu. Mẹdelẹ nọ yí awuvivi ojlẹ gli zanhẹmẹ tọn do diọ wiwejininọ yetọn. Mẹdevo lẹ nọ yí ì do sanvọ́ po todido lọ po nado yin alọkẹyi to hagbẹ yetọn lẹ ṣẹnṣẹn kavi to hagbẹ vijinu awetọnọ de dè.—Howhinwhẹn lẹ 13:20.
3 Whenu ko nọ fẹ́ whẹpo mẹsusu nọ wá yọ́n lehe wiwejininọ yetọn yin nutindo họakuẹ de do. E nọ saba dekọtọn do nugbajẹmẹji mẹ na yé. Dile Biblu dọ ẹ do, pòdo kavi kọdetọn fẹnnuwiwa tọn sọgan vẹadi, bosọ “vẹ́ di vivẹ.” (Howhinwhẹn lẹ 5:3, 4) To pọndohlan mẹ na walọ gblezọn he gbayipe to egbehe, nawẹ hiẹ sọgan wlebòna wiwejininọ bo hẹn e go gbọn? Mí na dọhodo afọdide atọ̀n he mí sọgan ze lẹ ji.
Basi Hihọ́na Ahun Towe
4. Etẹwẹ ahun yẹhiadonu tọn lọ yin, podọ naegbọn mí dona basi hihọ́na ẹn?
4 Họ̀nhungàn lọ nado gbọṣi wiweji wẹ nado basi hihọ́na ahun. Biblu dọmọ: “Hú whiwhla lẹpo, yí otù [kavi ahun] towe whlá, na e mẹ wẹ asisa ogbẹ̀ tọn sọn.” (Howhinwhẹn lẹ 4:23) Etẹwẹ yin ‘ahun towe’ heyin alọdlẹndo tofi? E mayin awutugonu lọ lọsu gba. Ahun yẹhiadonu tọn hodọ wẹ mí te. E zẹẹmẹdo mẹhe nkọ hiẹ yin to homẹ, gọna linlẹn, numọtolanmẹ, po mẹwhinwhàn towe lẹ po. Biblu dọmọ: ‘Hiẹ bo na yí ayiha, kavi ahun towe lẹpo, po alindọn towe lẹpo po, po hlọnhlọn towe lẹpo po, do yiwanna OKLUNỌ lọ Jiwheyẹwhe towe.’ (Deutelonomi 6:5) Jesu dlẹnalọdo gbedide ehe di gbedide he klohugan lọ. (Malku 12:29, 30) E họnwun dọ, ahun mítọn họakuẹ taun. E jẹ dọ mí ni basi hihọ́na ẹn.
5. Nawẹ ahun sọgan yin nuhọakuẹ de ṣogan bosọ yin owùnu de to ojlẹ dopolọ mẹ gbọn?
5 Ṣigba, Biblu sọ dọ ga dọ “ayiha [kavi ahun] yin oklenọ hugan onú lẹpo, podọ e sọ yin awutunọ tupinpẹnnọ.” (Jẹlemia 17:9) Nawẹ ahun sọgan yin oklenọ—yèdọ owùnu de na mí gbọn? Di apajlẹ, mọto yin núzinzan he yọn-na-yizan taun de, bo tlẹ sọgan whlẹn ogbẹ̀ gán to nujijọ ajiji de whenu. Ṣigba eyin hunkuntọ lọ ma deanana mọto lọ, bo nọ to gigọ̀ ẹ do aliho ji, mọto enẹ dopolọ sọ sọgan hù mẹhe tin to e mẹ lẹ po mẹdevo lẹ po. Mọdopolọ, eyin a ma basi hihọ́na ahun towe, hiẹ na nọ wà nuhe wá linlẹn mẹ na we kavi jlo we lẹpo, bo nasọ jiya kọdetọn ylankan etọn lẹ tọn. Ohó Jiwheyẹwhe tọn dọmọ: “Ewọ he dotudo ayiha ede tọn go nulunọ wẹ; ṣigba mẹdepope he yí nuyọnẹn do to zọnlinzin wẹ yè na whlẹngán.” (Howhinwhẹn lẹ 28:26) Mọwẹ, eyin hiẹ nọ yí Ohó Jiwheyẹwhe tọn do deanana dewe kẹdẹdile hiẹ na pọ́n yẹdide alidohiamẹ tọn de whẹpo do bẹ gbejizọnlin de jẹeji do, hiẹ sọgan zinzọnlin to nuyọnẹn mẹ bo dapana nugbajẹmẹji.—Psalm 119:105.
6, 7. (a) Etẹwẹ wiwe-yinyin zẹẹmẹdo, podọ naegbọn e do yin nujọnu na devizọnwatọ Jehovah tọn lẹ? (b) Nawẹ mí yọnẹn dọ gbẹtọvi mapenọ lẹ sọgan hodo apajlẹ wiwe-yinyin Jehovah tọn gbọn?
6 Ahun mítọn ma na jlo na ede to jọwamọ-liho nado yì aliho wiwe ji gba. Mílọsu wẹ dona deanana ẹn yì aliho enẹ ji. Aliho dopo nado wàmọ wẹ nado lẹnnupọndo lehe wiwejininọ họakuẹ do ji. Jẹhẹnu ehe tindo kanṣiṣa pẹkipẹki hẹ wiwe-yinyin, ehe zẹẹmẹdo madodiho, wiwe-ṣeke, podọ hinhọ̀nna ylando wiwà. Wiwe-yinyin yin jẹhẹnu họakuẹ de he Jehovah Jiwheyẹwhe lọsu tindo. Wefọ Biblu tọn susu wẹ yí jẹhẹnu enẹ zan na Jehovah. Na taun tọn, Biblu yí hogbe lọ zan dọ “Wiwe hlan OKLUNỌ.” (Eksọdusi 28:36) Nalete, kanṣiṣa tẹwẹ jẹhẹnu he yiaga enẹ tindo hẹ mí gbẹtọvi mapenọ lẹ?
7 Jehovah dọna mí to Ohó etọn mẹ dọmọ: “Mì na yin wiwe, na wiwe wẹ yẹn.” (1 Pita 1:16) Mọwẹ, mí sọgan hodo apajlẹ wiwe-yinyin Jehovah tọn; mí sọgan tin matin dihó to ewọ nukọn, bo gbọṣi wiweji. Enẹwutu eyin mí dapana walọ mawé, mẹhẹnflu tọn lẹ, mí to vivẹnudo nado jẹ lẹblanulọkẹyi jiawu he yiaga de kọ̀n—yèdọ nado hodo apajlẹ jẹhẹnu whanpẹnọ Jiwheyẹwhe Ganhunupotọ lọ tọn! (Efesunu lẹ 5:1) Mí ma dona lẹndọ ehe wiwà glo mí gba, na Jehovah yin nuyọnẹntọ podọ Ogán lẹnpọn dagbenọ de he ma nọ biọ nuhe go mí ma pé lẹ pọ́n gbede. (Psalm 103:13, 14; Jakobu 3:17) Nugbo wẹ dọ, gbigbọṣi wiweji to gbigbọ-liho podọ to walọyizan-liho biọ vivẹnudido susu. Ṣigba, apọsteli Paulu dohia dọ “nugbodidọ po . . . wiwejininọ po jẹna Klisti.” (2 Kọlintinu lẹ 11:3, NW) Be jẹhẹnu Klisti po Otọ́ etọn po tọn ma dona whàn mí nado wà nuhe go mí pé lẹpo nado gbọṣi wiweji to walọyizan-liho ya? To popolẹpo mẹ, owanyi he yé ko dohia mí sù tlala hú dehe míwlẹ sọgan dohia yé. (Johanu 3:16; 15:13) Lẹblanulọkẹyi de wẹ e yin na mí nado do pinpẹn-nutọn-yinyọnẹn hia gbọn gbẹzan walọ wiwe tọn de zinzan dali. Eyin mí nọ lẹnnupọndo wiwejininọ mítọn ji to aliho ehe mẹ, mí na mọ nuhọakuẹ-yinyin etọn, bo basi hihọ́na ahun mítọn.
8. (a) Nawẹ mí sọgan na núdùdù ahun yẹhiadonu tọn gbọn? (b) Etẹwẹ hodọdopọ mítọn sọgan dohia gando mí go?
8 Mí sọ nọ basi hihọ́na ahun mítọn gbọn aliho he mẹ mí nọ dù núdùdù gbigbọmẹ tọn te dali. Mí dona nọ na núdùdù gbigbọmẹ tọn dagbe ayiha po ahun mítọn po to gbesisọmẹ, bo ze ayidonugo mítọn do wẹndagbe Ahọluduta Jiwheyẹwhe tọn ji. (Kọlọsinu lẹ 3:2) Hodọdopọ mítọn lẹ tlẹ dona nọ do ehe hia. Eyin mẹdevo lẹ yọ́n mí taidi mẹhe nọ saba dọho do agbasanu lẹ, kavi onú mawé lẹ ji, mí to nude dohia dogbọn ninọmẹ ahun mẹ tọn mítọn dali. (Luku 6:45) Kakatimọ, mì gbọ mí ni yin yinyọnẹn taidi mẹhe nọ saba dọho do gbigbọnu he nọ jlọmẹdote lẹ ji. (Efesunu lẹ 5:3) Nado basi hihọ́na ahun mítọn, owù sinsinyẹn lẹ tin he mí dona dapana. Mì gbọ mí ni dọhodo awe to yé mẹ ji.
Mì Họ̀n Na Galilọ
9-11. (a) Naegbọn mẹhe gbẹkọ ayinamẹ he tin to 1 Kọlintinu lẹ 6:18 mẹ lẹ go sọgan yawu jai biọ walọ mawé sinsinyẹn lẹ mẹ? Na apajlẹ. (b) Eyin mí to hinhọ̀n na galilọ, etẹwẹ mí dona dapana? (c) Apajlẹ dagbe tẹwẹ dawe nugbonọ lọ Job zedai na mí?
9 Jehovah gbọdo apọsteli Paulu nado wlan ayinamẹ delẹ dai he ko gọalọna mẹsusu nado basi hihọ́na ahun yetọn bo gbọṣi wiweji. Paulu dọmọ: “Mì họ̀n na galilọ.” (1 Kọlintinu lẹ 6:18) Doayi e go dọ, e ma dọ poun dọ “Mì dapana galilọ” gba. Klistiani lẹ dona wà humọ. Yé dona họ̀n na walọ mawé mọnkọtọn lẹ mlẹnmlẹn, kẹdẹdile yé na họ̀n na owùnu he sọgan hùmẹ de do. Eyin mí gbẹkọ ayinamẹ enẹ go, e na bọawu na mí taun nado jai jẹ walọ mawé sinsinyẹn mẹ bo hẹn nukundagbe Jiwheyẹwhe tọn bu.
10 Di dohia: Onọ̀ de ko lawu na visunnu etọn bo sọnú na ẹn na yé jlo na tọ́n yì nuwiwa titengbe de tẹnmẹ wutu. Visunnu lọ biọgbè nado yì daihun to gbonu jẹ whenue whẹndo lọ na wleawufo nado yì, bọ onọ̀ etọn yigbe. Ṣigba onọ̀ etọn gbẹnuna ẹn dọmọ: “Ma sẹpọ ogbọ̀n he tin to gbonu lọ blo. Eyin a blu ogbọ̀n, na hò we.” Ṣigba to nukunwhiwhe vude godo, e mọ visunnu lọ to zọnlinzin gbọn ogbọ̀n lọ tó. Nugbo wẹ dọ e ma ko blu ogbọ̀n gba. Ṣogan, e to tolivẹ na nugbẹnamẹ onọ̀ etọn tọn ma nado sẹpọ ogbọ̀n lọ, podọ e họnwun dọ e na biọ nuhahun lọ mẹ to madẹnmẹ. (Howhinwhẹn lẹ 22:15) Susu jọja po mẹhomẹ lẹ po tọn he dona yọnnuin hú visunnu enẹ wẹ nọ basi nuṣiwa mọnkọtọn. Gbọnna?
11 To ojlẹ ehelẹ mẹ he mẹsusu sọmọ ko joawuna ‘ojlo gbémagbo zanhẹmẹ tọn lẹ,’ nudọnamẹ lẹ sisà gando kọndopọ zanhẹmẹ agọ̀ lẹ tọn go ko wá lẹzun ajọwiwa daho de. (Lomunu lẹ 1:26, 27) Yẹdide fẹnnuwiwa tọn lẹ ko lẹzun nuhe gbayipe tlala to linlinwe, owe, po video lẹ po mẹ, podọ to Internet ji. Mẹhe to yẹdide mọnkọtọn lẹ yí do ayiha yetọn mẹ lẹ ma to hinhọ̀n na galilọ gba. Yé to yíyí ì do daihun, bo to zọnlinzin gbọn otó etọn, bosọ to kọgbẹ́ avase Biblu tọn go. Kakati nado basi hihọ́na ahun yetọn, yé to hinhẹn ẹn flu gbọn yẹdide he sọgan gbọṣi oflin mẹ na yé na owhe susu lẹ pinpọ́n dali. (Howhinwhẹn lẹ 6:27) Mì gbọ mí ni plọnnu sọn Job nugbonọ lọ dè, mẹhe basi alẹnu de hẹ nukun etọn lẹ, ma nado pọ́n nuhe na whlé e pọ́n nado waylan lẹ. (Job 31:1) Apajlẹ enẹ wẹ e jẹ dọ mí ni hodo todin!
12. Nawẹ Klistiani sunnu po yọnnu po lẹ sọgan “họ̀n na galilọ” to họntọnmẹninọ whenu gbọn?
12 Onú titengbe de wẹ e yin nado “họ̀n na galilọ” to họntọnmẹninọ whenu. Ojlẹ enẹ dona yin ojlẹ ayajẹ tọn he gọ́ na todido po jejejininọ po, ṣigba jọja sunnu po yọnnu po delẹ ko hẹn ẹn zun awubla tọn gbọn fẹnnuwiwa yíyí do daihun dali. Gbọnmọ dali, alọwle yetọn ma tindo dodonu dagbe de—yèdọ haṣinṣan he sinai do owanyi matin ṣejannabi, mawazẹjlẹgo, po tonusisena Jehovah Jiwheyẹwhe po ji. Klistiani sunnu po yọnnu po de tindo mahẹ to walọ mawé mẹ to họntọnmẹninọ yetọn whenu. To alọwle yetọn godo, asi lọ yigbe dọ ayihadawhẹnamẹnu etọn to avùnho hẹ ẹ, bo tlẹ zọ́n bọ e hẹn ayajẹ bu to azán alọwle etọn tọn gbè. E yigbe dọmọ: “Yẹn ko biọ jona Jehovah tọn whlasusu, ṣigba dile etlẹ yindọ owhe ṣinawe ko juwayi, ayihadawhẹnamẹnu ṣie gbẹ́ pò to whẹgbledo mi.” Dandannu wẹ e yin dọ mẹhe ko waylando mọnkọtọn lẹ ni dín alọgọ sọn mẹho agun tọn lẹ dè. (Jakobu 5:14, 15) Ṣigba, Klistiani sunnu po yọnnu po susu nọ yinuwa po nuyọnẹn po bo nọ dapana owù ehelẹ to họntọnmẹninọ whenu. (Howhinwhẹn lẹ 22:3) Yé nọ ze dogbó do owanyi he yé nọ dohia yedelẹ ji. Yé nọ tindo omẹ atọ̀ntọ de he nọ tọ́n hẹ yé podọ yé omẹ awe lẹ kẹdẹ ma nọ tin to fihe jẹ nuglọ lẹ gba.
13. Naegbọn Klistiani lẹ ma dona biọ họntọnmẹninọ mẹ hẹ mẹhe ma to Jehovah sẹ̀n de?
13 Klistiani he biọ họntọnmẹninọ mẹ hẹ mẹhe ma nọ sẹ̀n Jehovah lẹ sọgan pannukọn nuhahun sinsinyẹn lẹ. Di apajlẹ, nawẹ hiẹ sọgan sìn dewe dopọ hẹ mẹhe ma yiwanna Jehovah Jiwheyẹwhe gbọn? Mẹhe yiwanna Jehovah bo nọ na sisi nujinọtedo wiwejininọ tọn etọn lẹ kẹdẹ wẹ e jẹ dọ Klistiani lẹ ni sìn yede dopọ hẹ. Ohó Jiwheyẹwhe tọn dọna mí dọmọ: “Mì yin omẹ yè yí gbemasọ do dopokle dopọ po mayisenọ lẹ po blo: na pọninọ tẹwẹ dodo tindo po mawadodo po? Kọndopọ tẹwẹ hinhọ́n tindo po zinvlu po?”—2 Kọlintinu lẹ 6:14.
14, 15. (a) Pọndohlan agọ̀ tẹwẹ mẹdelẹ tindo gando zẹẹmẹ “galilọ” tọn go? (b) Walọ tẹlẹ wẹ “galilọ” bẹhẹn, podọ nawẹ Klistiani lẹ sọgan “họ̀n na galilọ” gbọn?
14 Oyọnẹn sọ yin dandannu ga. Eyin mí ma yọ́n nuhe galilọ yin na taun tọn, mí ma sọgan họ̀n na ẹn gba. Mẹdelẹ to aihọn egbehe tọn mẹ ko kẹalọyi linlẹn he ma sọgbe gando zẹẹmẹ “galilọ” tọn go. Yé nọ lẹndọ yé sọgan hẹn pekọwana ojlo zanhẹmẹ tọn yetọn matin alọwle, eyin yé ko gbẹ́ dapana walọ zanhẹmẹ tọn. Dotowhé he tlẹ diyin delẹ he to díndín nado de sọha hòmimọ madonukun jọja aflanmẹ lẹ tọn pò ko na tuli jọja lẹ nado nọ tindo mahẹ to wunmẹ zanhẹmẹ he ma yin jọwamọ tọn lẹ mẹ ehe ma nọ dekọtọn do hòmimọ mẹ. E blawu dọ ayinamẹ mọnkọtọn lẹ nọ hẹnmẹ buali. Didapana hòmimọ matin alọwle gbọnvo mlẹnmlẹn na gbigbọṣi wiweji, podọ zẹẹmẹ he sọgbe “galilọ” tọn gbloada taun.
15 Hogbe Glẹki tọn por·neiʹa, he yin lilẹdogbedevomẹ nado yin “galilọ,” tindo zẹẹmẹ he gbloada taun. E gando walọ zanhẹmẹ tọn to mẹhe ma ko wlealọ hẹ yedelẹ ṣẹnṣẹn podọ e sọ zẹẹmẹdo vijinu lẹ yiyizan to aliho agọ̀ mẹ. Por·neiʹa bẹ walọ mọnkọtọn lẹ taidi zanhẹmẹ nùmẹ tọn, zanhẹmẹ yonu tọn, po vijinu mẹdevo tọn yiyido daihun po hẹn—yèdọ walọ he nọ saba yin mimọ to owhé sákábó lẹ tọn gbè lẹ. Mẹhe lẹndọ walọ mọnkọtọn lẹ ma yin “galilọ” to yede klọ bo ko sọ jai jẹ dopo to omọ̀ Satani tọn lẹ mẹ. (2 Timoti 2:26) Humọ, gbigbọṣi wiweji bẹ nususu hẹn hugan nado dapana walọ depope he zẹẹmẹdo galilọ poun. Nado “họ̀n na galilọ,” mí dona dapana walọ mawé zanhẹmẹ tọn lẹpo gọna wantuntun he sọgan planmẹ biọ ylando sinsinyẹn por·neiʹa tọn mẹ. (Efesunu lẹ 4:19) Gbọnmọ dali, mí na gbọṣi wiweji.
Dapana Owù Aihun Gblewa Tọn
16. Ninọmẹ tẹ mẹ wẹ aihundida owanyi didohia tọn sọgbe te, podọ apajlẹ Owe-wiwe tọn tẹwẹ do ehe hia?
16 Eyin mí na gbọṣi wiweji, owù devo he mí dona nọavunte sọta wẹ aihun gblewa tọn. Mẹdelẹ sọgan dọ dọ nudepope ma ylan to aihun gblewa tọn mẹ gba, dọ aihundida de poun wẹ e yin to sunnu po yọnnu po ṣẹnṣẹn. Nugbo wẹ dọ, whenu po otẹn aihundida owanyi didohia tọn po tin. Isaki po Lebeka po yin mimọ hlan bọ yé to “aihunda” dopọ, podọ e họnwun na mẹhe to yé mọ lẹ dọ yé ma yin nọvisunnu po nọviyọnnu po poun gba. (Gẹnẹsisi 26:7-9) Ṣigba, asu po asi po wẹ yé. Aihun owanyi didohia tọn to ṣẹnṣẹn yetọn sọgbe. Ṣigba aihun gblewa tọn gbọnvo.
17. Etẹwẹ aihun gblewa tọn yin, podọ nawẹ nuhahun lọ sọgan yin anadena gbọn?
17 Aihun gblewa tọn sọgan yin zẹẹmẹ-basina dole: ojlo owanyi tọn didohia mẹdevo to whenuena e ma tin to linlẹn towe mẹ nado wlealọ. Gbẹtọvi lẹ yin didá to aliho he gẹdẹ de mẹ, enẹwutu e họnwun dọ aliho susu wẹ tin nado daihun gblewa tọn, delẹ sọgan nọma yawu yin ayidego. (Howhinwhẹn lẹ 30:18, 19) Enẹwutu, osẹ́n hẹngogo tọn lẹ nina ma yin pọngbọ lọ gba. Kakatimọ, e biọ onú titengbe hugan de—yèdọ mẹdetiti gbigbejepọn nujọnu tọn de po nunọwhinnusẹ́n Biblu tọn lẹ yiyido-yizan mẹ po.
18. Etẹwẹ nọ sisẹ́ mẹdelẹ nado daihun gblewa tọn, podọ naegbọn e do yin owùnu de?
18 Eyin mí gbadopọnna mídelẹ ganji, suhugan mítọn na yigbe dọ to whenuena omẹ vijinu awetọnọ de do ojlo owanyi tọn hia mí, homẹ mítọn nọ hùn. Jọwamọnu de wẹ enẹ yin. Ṣigba be mí nọ daihun gblewa tọn nado sọgan do ojlo mọnkọtọn hia—nado do míde hia di mẹjọmẹ kavi nado fọ́n nuyiwa dopolọ dote to mẹdevo mẹ wẹ ya? Eyin mọwẹ, be mí ko lẹnnupọn dogbọn awufiẹsa he mí sọgan to hinhẹnwa mẹlọ ji dali ya? Di apajlẹ, Howhinwhẹn lẹ 13:12 dọmọ: “Todido susu hẹn ayiha jẹazọ̀n.” Eyin mí nọ daihun gblewa tọn hẹ mẹde sọn ojlo mẹ wá, mí sọgan gọ̀n ma yọ́n lehe e to awugblena mẹlọ do. Ewọ sọgan jẹ awuwlena todido họntọnmẹninọ tọn po alọwle tọn po ji. Flumẹjijẹ etọn na sinyẹn taun to whenuena nukundido etọn ma mọ hẹndi. (Howhinwhẹn lẹ 18:14) Kanyinylan wẹ e yin nado yí numọtolanmẹ mẹdevo lẹ tọn do daihun sọn ojlo mẹ.
19. Nawẹ aihun gblewa tọn sọgan ze alọwle Klistiani tọn lẹ do owù mẹ gbọn?
19 Onú titengbe hugan de wẹ e yin nado dapana aihun gblewa tọn didá hẹ mẹhe ko wlealọ lẹ. Nado do numọtolanmẹ owanyi tọn hia mẹhe ko wlealọ de—kavi dọ mẹhe ko wlealọ de ni do ojlo mọnkọtọn hia to mẹhe ma yin alọwlemẹ etọn mẹ—yin onú ylankan de. E blawu dọ, Klistiani delẹ tindo pọndohlan he jẹagọ lọ dọ e ma ylan nado wleawuna numọtolanmẹ owanyi tọn na omẹ vijinu awetọnọ de he ma yin alọwlemẹ yetọn. Mẹdelẹ nọ do numọtolanmẹ sisosiso yetọn hia “họntọn” mọnkọtọn de bo tlẹ nọ dọ aṣli vivẹ́ he yé ma tlẹ dọna alọwlemẹ yetọn lẹ na ẹn. Taidi kọdetọn de, numọtolanmẹ owanyi tọn ko dekọtọn do numọtolanmẹ lẹpo didọna ode awetọ mẹ, ehe sọgan fọ́n nuhahun lẹ dote bo tlẹ gbà alọwle kija. Klistiani he ko wlealọ lẹ na wà dagbe nado flin avase Jesu tọn dogbọn ayọdide dali—dọ ahun mẹ wẹ e nọ bẹsọn. (Matiu 5:28) Enẹwutu, mì gbọ mí ni basi hihọ́na ahun mítọn bo dapana ninọmẹ he sọgan planmẹ biọ kọdetọn mẹvasudo tọn lẹ mẹ.
20. Nukun tẹwẹ mí dona magbe nado yí do pọ́n wiwejininọ mítọn?
20 Nugbo wẹ dọ, e ma nọ bọawu nado gbọṣi wiweji to aihọn mawé egbehe tọn mẹ. Ṣigba, flindọ e bọawu tlala nado gbọṣi wiweji hugan nado hẹn ẹn gọwa to whenuena e ko yin hinhẹnbu godo. Na nugbo tọn, Jehovah sọgan “jona susugege” bosọ penugo nado klọ́ mẹhe lẹnvọjọ nugbonugbo sọn ylando yetọn mẹ lẹ wé. (Isaia 55:7) Etomọṣo, Jehovah ma nọ basi hihọ́na mẹhe jai jẹ fẹnnuwiwa mẹ lẹ sọn kọdetọn ylando yetọn tọn lẹ mẹ gba. Kọdetọn lọ lẹ sọgan gbọṣi aimẹ na owhe susu, kavi etlẹ yin to gbẹzan mẹtọn lẹpo mẹ. (2 Samuẹli 12:9-12) Enẹwutu, dovivẹnu lẹpo nado gbọṣi wiweji gbọn hihọ́-bibasina ahun towe dali. Pọ́n teninọ wiwe towe to Jehovah Jiwheyẹwhe nukọn hlan di nuhọakuẹ tlala de—bo ma hẹn ẹn bu gbede blo!
Nawẹ Hiẹ Na Na Gblọndo Gbọn?
• Etẹwẹ wiwejininọ yin, podọ naegbọn e do yin nujọnu sọmọ?
• Nawẹ mí sọgan basi hihọ́na ahun mítọn gbọn?
• Etẹwẹ hinhọ̀n na galilọ bẹhẹn?
• Naegbọn mí dona dapana aihun gblewa tọn?
[Yẹdide to weda 11]
Mọto de sọgan lẹzun owùnu eyin e ma yin anadena ganji
[Yẹdide to weda 12]
Etẹwẹ sọgan jọ eyin mí gbẹkọ avase lẹ go?
[Yẹdide to weda 13]
Họntọnmẹninọ he wé nọ yin ayajẹnu de bo nọ gbògbéna Jiwheyẹwhe