“Nọ Hoavùn Dagbe Yise Tọn”

BE HIẸ sọgan lẹnnupọndo awhànfuntọ de ji to awhàn whenu he homẹ etọn ma na hùn eyin ewọ yin gbedena dọmọ: “Hiẹ dona lẹkọyi whégbè bo yí whenu vude zan hẹ asi towe po whẹndo towe po” ya?

To ojlẹ Ahọlu Davidi Islaeli tọn mẹ, awhànfuntọ de mọ anademẹ mọnkọtọn yí. Ulia Hitinu lọ yin oylọ-basina gbọn ahọlu lọsu dali bo yin tudohomẹna nado lẹkọyi whégbè. Ṣogan, Ulia gbẹ́ nado lẹkọyi owhé etọn gbè. To whenuena e yin hokanse gando nuyiwa he paṣamẹ etọn go, Ulia gblọn dọ aki alẹnu tọn, he nọtena tintin to finẹ Jiwheyẹwhe tọn, po awhànpa Islaeli tọn po tin to awhàngbenu. E kanse dọmọ: “Na yẹn ni yì owhé ṣie gbè nado dù bo nù podọ nado zanhẹ asi ṣie?” Na Ulia, ehe ma sọgbe hẹ lẹnpọn dagbe to ojlẹ awusinyẹn tọn mọnkọtọn mẹ.—2 Samuẹli 11:8-11.

Walọyizan Ulia tọn fọ́n kanbiọ titengbe lẹ dote, na mílọsu to gbẹ̀nọ to awhàn whenu. Awhàn de to núgbà to alọnu din bo gbọnvona awhàn depope he akọta aihọn tọn lẹ ko fùn pọ́n. Wẹkẹ whàn awe lẹ taidi nutata eyin yé yin yiyijlẹdo awhàn ehe go, podọ awhàn ehe gando hiẹ lọsu go. Owù he tin to e mẹ sù tlala, podọ kẹntọ lọ sẹhundaga. To awhàn ehe mẹ, osò depope ma nọ yin dide, bọmbu de ma nọ yin didà, ṣigba e bẹ ayiha wintinwintin awhàn tọn susu hẹn.

Whẹpo hiẹ nado ze dewe jo taidi awhànfuntọ, hiẹ dona yọnẹn eyin e sọgbe hẹ lẹnpọn dagbe bosọ yọ́n lẹndai he wutu hiẹ to avùnho. Be ale de tin to avùnhiho lọ mẹ ya? Lẹndai avùnhiho vonọtaun ehe tọn yin zẹẹmẹ basina gbọn apọsteli Paulu dali to wekanhlanmẹ etọn dohlan Timoti mẹ dọmọ: “Nọ hoavùn dagbe yise tọn.” Mọwẹ, to awhàn ehe mẹ hiẹ dona yiavunlọ, e mayin na figángán de gba, ṣigba na “yise”—yèdọ nugbo Klistiani tọn blebu dile e yin didohia do to Biblu mẹ. E họnwun dọ hiẹ dona kẹalọyi nugbo-yinyin “yise” tọn mlẹnmlẹn nado sọgan hoavùn na ẹn bo gbawhàn.—1 Timoti 6:12.

Awhànfuntọ nuyọnẹntọ de nọ vánkan nado yọ́n kẹntọ etọn. To avùnhiho ehe mẹ, kẹntọ lọ tindo numimọ owhe susu tọn to ayiha wintinwintin awhàn tọn mẹ, gọna nugopipe po awhànfunnu mẹhẹnjọsi tọn lẹ po. E sọ tindo huhlọn he hugan gbẹtọvi tọn. E yin kanylantọ, danuwatọ, bo ma tindo lẹnpọn dagbe depope; ewọ wẹ Satani. (1 Pita 5:8) Awhànfunnu agbasa tọn lẹ gọna ayiha wintinwintin po oklọ gbẹtọvi tọn lẹ po yin ovọ́ sọta mẹglatọ kavi kẹntọ ehe. (2 Kọlintinu lẹ 10:4) Etẹwẹ hiẹ sọgan yizan nado fùn awhàn ehe?

Awhànfunnu tangan lọ wẹ “ohí gbigbọ tọn . . . , he yin ohó Jiwheyẹwhe tọn.” (Efesunu lẹ 6:17) Apọsteli Paulu do lehe e yin kọdetọn dagbenọ do hia to whenuena e dọmọ: “Ohó Jiwheyẹwhe tọn tin to ogbẹ̀, e dohuhlọn, bo da hú ohí nùawenọ, e nọ sọ́ omẹ, yèdọ nado klan ayiha po gbigbọ po do voovo, agómẹ hupetẹn tọn po ojó ohú mẹ tọn po, ewọ sọ wẹ linlẹn ayiha tọn po ojlo ayiha tọn po yọnẹntọ.” (Heblu lẹ 4:11, 12) Matin ayihaawe, awhànfunnu he da, bo sọgbe, sọmọ bọ e sọgan biọ linlẹn sisosiso po mẹwhinwhàn gbẹtọvi tọn lẹ po mẹ dona yin yiyizan to aliho azọ́nyinyọnẹn po sọwhiwhe po tọn mẹ.

Vlavo hiẹ sọgan yọnẹn dọ eyin awhànpa de tlẹ tindo awhànfunnu he tin to zoji hugan lẹ, awhànfunnu ehelẹ yin ovọ́ eyin awhànfuntọ lọ lẹ gbọagba azọ́nyinyọnẹn tọn nado yí yé zan. Mọdopolọ hiẹ tindo nuhudo anademẹ tọn nado yí ohí towe zan po kọdetọn dagbe po. Homẹhunnu wẹ e yin dọ azọ́nplọnmẹ gbọn avùnhotọ he tindo numimọ hugan lẹ dali tin to aimẹ na we. Jesu ylọ avùn-plọnmẹtọ ehelẹ dọ “afanumẹ nugbonọ nuyọnẹntọ,” he azọngban lọ yin didena nado nọ wleawuna núdùdù gbigbọmẹ tọn, kavi anademẹ, na hodotọ etọn lẹ do ganmẹ. (Matiu 24:45) Hiẹ sọgan yọ́n pipli pọmẹ tọn heyin afanumẹ ehe gbọn dogbigbapọnna azọ́n sinsinyẹn mẹpinplọn tọn etọn po avase he e nọ na do ganmẹ gando ayiha wintinwintin kẹntọ tọn lẹ go po dali. Kunnudenu dohia dọ hagbẹ yí gbigbọ do de he tin to agun Klistiani Kunnudetọ Jehovah tọn lẹ tọn mẹ lẹ wẹ.—Osọhia 14:1.

Pipli he nọpọ́ bo yin afanumẹ lọ ko wà nususu hugan nado plọnmẹ poun. E ko do gbigbọ apọsteli Paulu tọn hia, mẹhe kanwehlan agun Tẹsalonika tọn dọmọ: “Míwlẹ to dẹẹdẹwà to mì ṣẹnṣẹn, dile ovipọntọ nọ to ayipa ovi etọn lẹ go do: mọwẹ míwlẹ to homẹdagbe basi do mì go, mí sọ jlo nado yí na mì, e mayin wẹndagbe Jiwheyẹwhe tọn kẹdẹ gba, ṣigba gbigbọ mílọsu tọn ga, na mìwlẹ lẹzun mẹyiwanna hlan mí wutu.” (1 Tẹsalonikanu lẹ 2:7, 8) Azọngban Klistiani awhànfuntọ dopodopo tọn wẹ nado yí azọ́nplọnmẹ owanyinọ heyin awuwlena lọ zan.

Gbaja Gigọ́ Lọ

Gbaja gigọ́ yẹhiadonu tọn de yin awuwlena na hihọ́ towe. Hiẹ sọgan mọ todohukanji gbaja ehe tọn to Efesunu lẹ 6:13-18 mẹ. Awhànfuntọ zinzintọ de ma na ze ede do owù mẹ to gbonu eyin adà gbaja gbigbọ tọn etọn delẹ whè kavi dona yin vivọjlado.

Klistiani de tindo nuhudo gbaja hihọ́ basinamẹ etọn blebu tọn, ṣigba sagba, kavi awọ̀yinu daho yise tọn yin nuhọakuẹ taun. Enẹwutu wẹ Paulu wlan dọmọ: “To popo lẹpo ji, mì yí sagba yise tọn hẹn, ehe mì na yí do ṣimiyọ́n ogá mẹylankan tọn lẹpo.”—Efesunu lẹ 6:16.

Awọ̀yinu daho lọ, he sọgan ṣinyọ́n agbasa blebu, nọtena jẹhẹnu yise tọn. Hiẹ dona tindo yise he lodo to anademẹ Jehovah tọn mẹ, bo kẹalọyi matin ayihaawe dọ opagbe etọn lẹpo na wá mọ hẹndi. Hiẹ dona nọ pọ́n opagbe ehelẹ taidi dọ yé ko mọ hẹndi wẹ nkọtọn. Ma tindo ayihaawe gbede blo dọ titonu aihọn Satani tọn blebu na yin vivasudo to madẹnmẹ, dọ aigba na yin didiọzun paladisi de, podọ dọ mẹhe yin nugbonọ na Jiwheyẹwhe lẹ na yin hinhẹngọwa pipé kọ̀n.—Isaia 33:24; 35:1, 2; Osọhia 19:17-21.

Ṣigba to avùnhiho jiawu he to yìyì to alọnu din lọ mẹ, hiẹ tindo nuhudo nudevo tọn dogọ—enẹwẹ họntọn de. To awhàn whenu, kanṣiṣa pẹkipẹki họntọnjiji tọn nọ wá aimẹ dile avùnhotọ hatọ lẹ nọ na tuli bo nọ basi hihọ́na yenọzo, bo tlẹ sọ nọ whlẹn ode awetọ yetọn lẹ gán sọn okú si to whedelẹnu. Nugbo wẹ dọ gbẹdohẹmẹtọ lẹ yin nujọnu, ṣigba nado lùn avùnhiho ehe tọ́n hiẹ tindo nuhudo họntọnjihẹmẹ Jehovah lọsu titi tọn. Enẹwutu wẹ Paulu dotana todohukanji nuhe nọ wleawuna gbaja lọ tọn po hogbe ehelẹ po dọmọ: “Mì nọ yí whepoponu do hodẹ̀, to odẹ̀ po ovẹ̀ lẹpo po mẹ, to gbigbọ mẹ.”—Efesunu lẹ 6:18.

Mí nọ yiwanna nado nọpọ́ hẹ họntọn vivẹ de. Mí nọ dín gbẹdohẹmẹ etọn vẹkuvẹku. Gbọn hodidọ hẹ Jehovah whẹwhẹ to odẹ̀ mẹ dali, ewọ nọ lẹzun omẹ nujọnu tọn de na mí, yèdọ họntọn dejidego de. Devi Jakobu dotuhomẹna mí dọmọ: “Mì sẹpọ Jiwheyẹwhe, ewọ nasọ sẹpọ mì.”—Jakobu 4:8.

Ayiha Wintinwintin Kẹntọ Tọn Lẹ

To whedelẹnu, ahidídí hẹ aihọn ehe sọgan taidi zọnlinzinzin to aigba he bọmbu flinflin yin didi do oglọ na de ji. Nugbajẹmẹji sọgan wá sọn fidepope, podọ kẹntọ lọ nọ tẹnpọn nado wle we to ajijimẹ. Ṣigba, hiẹ ni deji dọ Jehovah ko wleawuna hihọ́ he hiẹ tindo nuhudo etọn lẹpo to gigọ́mẹ.—1 Kọlintinu lẹ 10:13.

Kẹntọ lọ sọgan tẹnpọn nado hẹn nugbajẹmẹji wá gbọn nukundidiọsọ nugbo Biblu tọn heyin dodonu yise towe tọn lẹ dali. Atẹṣitọ lẹ sọgan yí hogbe vivi lẹ, mẹkiklọ, po hoyijlẹdohogo heyin kọslona lẹ po zan do tẹnpọn nado duto jiwe. Ṣigba dagbemẹ-ninọ towe ma nọ duahunmẹna atẹṣitọ. Howhinwhẹn lẹ 11:9 doayi e go dọmọ: “Onù wẹ ylanwatọ [atẹṣitọ, NW] do nọ hù kọmẹnu etọn sudo: ṣigba nuyọnẹn wẹ yè na do whlẹn nugbonọ lẹ dai.”

Nuṣiwa de wẹ e na yin nado lẹndọ hiẹ dona dotoaina atẹṣitọ lẹ kavi hia owe yetọn lẹ nado sọgan gbẹ́ hoyijlẹdohogo yetọn lẹ dai. Linlẹn yetọn heyin kọslona bo yin adínọ lẹ sọgan gbleawunamẹ to gbigbọ-liho podọ e sọgan bẹpla yise towe taidi apà vivo he nọ dùgbà po awuyiya po. (2 Timoti 2:16, 17) Kakatimọ, hodo apajlẹ nuyiwa Jehovah tọn hlan atẹṣitọ lẹ. Job dọ gando Jehovah go dọmọ: “Omẹ matin budisi Jiwheyẹwhe [atẹṣitọ, NW] ma na wá ewọ nukọn gba.”—Job 13:16.

Kẹntọ lọ sọgan tẹ́n ayiha wintinwintin devo pọ́n, yèdọ dopo he ko tindo kọdetọn dagbe jẹ obá de mẹ. Eyin awhànpa he to awhànfọ de sọgan yin kiklọ nado tọ́nsọn titoji bo doafọna walọ gblezọn fẹnnuwiwa tọn lẹ, ehe sọgan hẹn bẹwlu wá.

Ayidedai aihọn tọn lẹ, taidi sinimoto gblewa tọn lẹ po nudohia televiziọn tọn lẹ po gọna húnhiho zingidi tọn lẹ yin omọ̀ nujọnu tọn de. Mẹdelẹ nọ sọalọakọ́n dọ yé sọgan pọ́n yẹdide fẹnnuwiwa tọn lẹ kavi hia owe fẹnnuwiwa tọn lẹ bọ e ma na yinuwado yé ji. Ṣigba mẹhe nọ pọ́n sinimoto zanhẹmẹ tlọlọ tọn whẹwhẹ de yigbe madoadudẹ́ji dọmọ: “Yẹdide ehelẹ ma nọ yin winwọn pọ́n gbede, lehe hiẹ to nulẹnpọndo yé ji susọ, mọwẹ hiẹ na nọ mọdọ hiẹ to jijlo nado wà nuhe a ko pọ́n lẹ do niyẹn . . . Sinimoto lọ lẹ nọ hẹnmẹ lẹndọ nude to mí go gbọ̀ nugbonugbo.” Be e jẹ dọ mẹde ni ze ede do owù mẹ nado yin awugblena gbọn mẹgbeyinyan oklọ tọn ehe dali ya?

Adanwànu devo he tin to agbànhọ kẹntọ lọ tọn mẹ wẹ yin oklọ ojlo agbasanu lẹ tọn. E sọgan sinyẹnawu nado tunwun owù lọ go na mímẹpo wẹ tindo nuhudo agbasanu lẹ tọn. Mí tindo nuhudo owhé, núdùdù po avọ̀ po tọn, podọ e ma ylan nado tindo onú dagbe lẹ. Pọndohlan mẹdopodopo tọn mẹ wẹ owù lọ tin te. Akuẹ sọgan lẹzun nujọnu hugan gbigbọnu lẹ. Mí sọgan lẹzun owanyina akuẹ tọ. E jẹ dọ mí ni nọ flinnu míde gando dogbó adọkun tọn lẹ go. Ojlẹ gli de wẹ e tin na, to whenuena adọkunnu gbigbọmẹ tọn lẹ nọ nọte kakadoi.—Matiu 6:19, 20.

Eyin awhànpa de jẹflumẹ, nugopipe etọn nado gbawhàn nọ depò. “Eyin nuṣikọna we to azán nukunbibia tọn gbè, huhlọn towe ma sọtẹ́n gba.” (Howhinwhẹn lẹ 24:10) Flumẹjijẹ yin awhànfunnu de he Satani ko yizan po kọdetọn dagbe po. “Ogàngbakun, todido whlẹngán tọn” didó na gọalọna we nado hoavùn sọta flumẹjijẹ. (1 Tẹsalonikanu lẹ 5:8) Tẹnpọn bo hẹn todido towe lodo taidi Ablaham. To whenuena e yin bibiọ to e si nado yí visunnu etọn dopo akàn lọ, Isaki, do sanvọ́, Ablaham ma whleawu. E yise dọ Jiwheyẹwhe na hẹn opagbe Etọn nado dona akọta lẹpo gbọn kúnkan etọn dali di podọ dọ Jiwheyẹwhe sọgan fọ́n Isaki sọnku eyin nuhudo etọn tin nado sọgan hẹn opagbe ehe di.—Heblu lẹ 11:17-19.

Ma Gbẹkọ Avùn lọ Go Blo

Mẹdelẹ he ko hoavùn na ojlẹ dindẹn sọgan jẹ gbigbọjọ ji bo masọ to avùnho po aṣejininọ dopolọ po ba. Apajlẹ Ulia tọn, heyin nùdego to bẹjẹeji hosọ ehe tọn, sọgan gọalọna mẹhe to mahẹ tindo to avùnhiho lọ mẹ lẹpo nado hẹn pọndohlan he sọgbe lọ go. Susu Klistiani awhànfuntọ hatọ mítọn lẹ tọn dona doakọnna ohẹ́n, bo tin to owù mẹ, kavi to oyà avivọ po huvẹ po tọn ji. Taidi Ulia, mí ma jlo na to nulẹnpọndo awuvivi he mí sọgan duvivi etọn todin lẹ ji kavi nado joawuna ojlo gbẹzan awubibọ tọn de gba. Mí jlo na gbọṣi awhànpa blebu Jehovah tọn he bẹ awhànfuntọ nugbonọ lẹ hẹn mẹ bo zindonukọn to avùnhiho lọ mẹ kakajẹ whenuena mí sọgan duvivi dona jiawu he tin to sẹdotẹnmẹ na mí lẹ tọn.—Heblu lẹ 10:32-34.

Owùnu wẹ e na yin nado dekanpona aṣejininọ mítọn, vlavo gbọn linlẹn dali dọ mẹgbeyinyan godo tọn lọ gbẹpo to nukọn taun. Apajlẹ Ahọlu Davidi tọn do owù ehe hia hezeheze. Na whẹwhinwhẹ́n de wutu ewọ ma yì awhàngbenu hẹ awhànpa etọn lẹ. Taidi kọdetọn de, Davidi wà ylando sinsinyẹn de he hẹn ẹn nado mọ awufiẹsa bosọ jiya to pipotọ gbẹzan etọn tọn mẹ.—2 Samuẹli 12:10-14.

Be e sọgbe nado tindo mahẹ to avùnhiho ehe mẹ, pannukọn awusinyẹnnamẹnu awhàn tọn lẹ, doakọnna mẹṣanko, bo dapana awuvivinu aihọn tọn he ma sọgbe lẹ ya? Mẹhe to nukọnzindo to avùnhiho lọ mẹ po kọdetọn dagbe po lẹ yigbe dọ awusọhia nuhe aihọn nọ zedonukọnnamẹ tọn sọgan dọnmẹdogo, taidi wema he nọ sẹ́ mlanmlan de, ṣigba eyin yè gbadopọnna kitokito, e ma yin nujọnu gba. (Filippinu lẹ 3:8) Humọ, awuvivinu ehelẹ nọ saba dekọtọn do awufiẹsa po flumẹjijẹ po mẹ.

To avùnhiho gbigbọmẹ tọn ehe mẹ, Klistiani de nọ duvivi haṣinṣan pẹkipẹki tọn hẹ họntọn nugbo lẹ, gọna ayihadawhẹnamẹnu madodiho po todido jiawu de po. Klistiani yí gbigbọ do de lẹ to nukundo gbẹninọ jọmaku to olọn mẹ to pọmẹ hẹ Jesu Klisti. (1 Kọlintinu lẹ 15:54) Suhugan Klistiani avùnhotọ lẹ tọn tindo todido na gbẹzan pipé gbẹtọvi tọn to paladisi aigba ji tọn de mẹ. Matin ayihaawe, alemọyi ehelẹ jẹna avọ́sinsan depope. To vogbingbọnmẹ na awhàn aihọn tọn lẹ, mí tindo jidide nado gbawhàn to avùnhiho ehe mẹ, dile e na dẹnsọ bọ mí na gbẹpo to nugbonọ yin. (Heblu lẹ 11:1) Ṣigba kọdetọn lọ na yin vasudo mlẹnmlẹn na titonu ehe he tin to anademẹ Satani tọn glọ.—2 Pita 3:10.

Dile hiẹ to nukọnzindo to avùnhiho ehe mẹ, nọ flin hogbe Jesu tọn lẹ dọmọ: “Mì deji; yẹn ko gbawhàn aihọn tọn.” (Johanu 16:33) E gbawhàn gbọn aṣejininọ to whepoponu po tenọgligo hinhẹn to whlepọn glọ po dali. Mílọsu sọgan wàmọ.

[Blurb on page 27]

Osò depope ma nọ yin dide, bọmbu de ma nọ yin didà, ṣigba e bẹ ayiha wintinwintin awhàn tọn susu hẹn

[Blurb on page 30]

Mí tindo jidide nado gbawhàn to avùnhiho ehe mẹ, dile e na dẹnsọ bọ mí na gbẹpo to nugbonọ yin

[Yẹdide to weda 26]

Ogàngbakun whlẹngán tọn na gọalọna mí nado hoavùn sọta flumẹjijẹ

[Yẹdide to weda 26]

Yí awọ̀yinu daho lọ zan nado glo “ogá” Satani tọn lẹ

[Yẹdide to weda 28]

“Mì sẹpọ Jiwheyẹwhe, ewọ nasọ sẹpọ mì”

[Yẹdide to weda 29]

Mí dona tindo yise to hẹndi opagbe Jiwheyẹwhe tọn lẹ tọn mẹ