Kanbiọ lẹ sọn Wehiatọ lẹ Dè
To whenuena e yindọ Levinu lẹ ma nọ tindo ogú de to Islaeli hohowhenu tọn mẹ, nawẹ Levinu Hanamẹli sọgan sà ogle de na tavẹ-vi Levinu etọn Jẹlemia, sọgbe hẹ kandai Jẹlemia 32:7 tọn gbọn?
Gando Levinu lẹ go, Jehovah dọna Aalọn dọmọ: “Hiẹ ma na tindo ogú de to aigba yetọn mẹ gba, mọ hiẹ ma na tindo mimá depope to yé [Islaeli] ṣẹnṣẹn gba.” (Osọha lẹ 18:20) Etomọṣo, tòdaho 48 gọna agbegbeji kavi agbóhomẹ yetọn lẹ, lẹdo aigba opagbe tọn pé wẹ yin nina Levinu lẹ. Otò Jẹlemia tọn wẹ Anatoti, dopo to tòdaho heyin nina “ovi Aalọn yẹwhenọ tọn lẹ” mẹ.—Jọṣua 21:13-19; Osọha lẹ 35:1-8; 1 Otannugbo lẹ 6:54, 60.
Mí mọ dọ Jehovah na anademẹ tangan lẹ to Levitiku 25:32-34 mẹ do lehe aigba heyin Levinu lẹ tọn sọgan yin ‘fiflí’ do ji. E họnwun dọ whẹndo Levinu lẹ tọn dopodopo na ko tindo jlọjẹ gududu tọn lẹ gando aigba heyin dide na yé go, lehe e na yin yiyizan do podọ lehe yé na yin mimá do. To jọwamọ-liho, ehe bẹ aigba sisà po aigba fiflí po hẹn.a To whẹho susu mẹ, Levinu lẹ nọ dugu aigba lẹ tọn bo nọ yí yé zan dile Islaelivi akọ̀ devo lẹ nọ basi do.
Vlavo, nunọ-yinyin aigba Levinu lẹ tọn enẹ nọ yin ogú whẹndo tọn. Ṣigba na nuhe dù ‘jlọjẹ aigba fiflí’ tọn, nuwiwa nusisà tọn lẹ nọ yin dotẹnmẹ etọn na to Levinu lẹ kẹdẹ ṣẹnṣẹn. E sọ taidi dọ aigba he tin to tòdaho lọ lẹ mẹ lẹ kẹdẹ go wẹ aigba sisà po aigba fiflí lọ po gando, whenuena e yindọ “ogle whépakẹ tòdaho yetọn lẹ tọn” ma dona yin sisà na “nutindo yetọn madopodo” wẹ e yin wutu.—Levitiku 25:32, 34.
Enẹwutu, e họnwun dọ ogle he sọgan yin fiflí de wẹ dehe Jẹlemia họ̀ sọn Hanamẹli dè yin. E na ko tin to tòdaho lọ mẹ. Jehovah lọsu dọ dọ “ogle” lọ yin Hanamẹli tọn podọ dọ Jẹlemia tindo “jlọjẹ fiflí tọn.” (Jẹlemia 32:6, 7) Jehovah yí nuwiwa ajọwiwa tọn enẹ zan to yẹhiadonu-liho nado zinnudo opagbe lọ ji dọ Islaelivi lẹ na lẹkọwa nado gọ̀ ogú aigba yetọn tọn yí to ojlẹ kanlinmọgbenu tọn de to Babilọni godo.—Jẹlemia 32:13-15.
Nudepope ma dohia dọ aliho agọ̀ mẹ wẹ Hanamẹli ko mọ aigba lọ yí te to Anatoti. Nudepope ma dohia dọ e gbà osẹ́n Jehovah tọn to whenuena e basi oylọ na Jẹlemia nado wá họ̀ ogle ehe to Anatoti, kavi dọ Jẹlemia ko yí jlọjẹ fiflí tọn etọn zan to aliho he ma sọgbe mẹ to whenuena e họ̀ ogle lọ gba.—Jẹlemia 32:8-15.
[Nudọnamẹ Odò Tọn]
a To owhe kanweko tintan W.M. tọn mẹ, Levinu Balnaba sà aigba etọn bo yí akuẹ etọn jo nado gọalọna hodotọ Klisti tọn he tin to nuhudo mẹ to Jelusalẹm lẹ. Aigba lọ na ko tin to Palestine kavi Kiplu. Kavi e sọgan ko yin ṣiọditẹn de he Balnaba ko họ̀ to lẹdo Jelusalẹm tọn mẹ de wẹ.—Owalọ lẹ 4:34-37.