Hùnwhẹ de He Gando Gowe

TO WHENUENA Jesu Klisti tin to aigba ji, e ze hùnwhẹ de he nọ gbògbéna Jiwheyẹwhe dai. Hùnwhẹ sinsẹ̀n tọn dopo akàn he e degbè na hodotọ etọn lẹ tlọlọ nado nọ basi wẹ ehe yin. E nọ yin yiylọdọ Tenu Núdùdù Oklunọ tọn, kavi Tenu Núdùdù Godo tọn.

Mí ni dọ dọ hiẹ yí nukun towe do mọ nuhe jọ jẹnukọnna nujijọ lọ lẹ. Jesu po apọsteli etọn lẹ po ko pli do abò aga tọn de mẹ to Jelusalẹm nado basi hùnwhẹ Juwayi Ju lẹ tọn. Dile e yin aṣa yetọn do, yé ko dù núdùdù Juwayi tọn lọ, he bẹ lẹngbọ-lan hìhì, omá, akla madotọ́n, po ovẹn vẹẹ po hẹn. Apọsteli Juda Iskaliọti he mayin nugbonọ lọ ko yin yinyan bọ e nasọ de Oklunọ etọn hia to madẹnmẹ. (Matiu 26:17-25; Johanu 13:21, 26-30) Jesu po apọsteli nugbonọ 11 etọn lẹ po kẹdẹ wẹ tin to finẹ. Matiu yin dopo to yé mẹ.

Sọgbe hẹ kandai Matiu he tin to nujijọ lọ tẹnmẹ tọn, lehe Jesu ze Tenu Núdùdù Oklunọ tọn lọ dai do die: “Jesu yí akla [madotọ́n] bo dona, bosọ kán ẹn, bo yí na nuplọntọ etọn lẹ, bo dọmọ, Yí, dù; ehe wẹ agbasa ṣie. E sọ yí kọfo [ovẹn tọn] de, bo dopẹ́, bosọ yí na yé, bo dọmọ, Mì omẹ pó ni nù to e mẹ. Na ehe wẹ ohùn ṣie alẹnu yọyọ lọ tọn, he yè kọ̀n dai na omẹ susu hlan desẹ ylando tọn.”—Matiu 26:26-28.

Naegbọn Jesu ze Tenu Núdùdù Oklunọ tọn lọ dai? To whenuena e to mọwà, naegbọn e yí akla madotọ́n po ovẹn vẹẹ po zan? Be hodotọ Klisti tọn lẹpo wẹ dona tindo mahẹ to yẹhiadonu ehelẹ mẹ ya? Nawẹ hùnwhẹ ehe dona nọ yin bibasi gbọzangbọzan sọ? Podọ be e tindo zẹẹmẹ depope na we ya?