Kanbiọ lẹ sọn Wehiatọ lẹ Dè
Etẹwẹ jọ to nujijọ heyin kinkàndai to Eksọdusi 4:24-26 mẹ lọ whenu, podọ ogbẹ̀ mẹnu tọn wẹ tin to owù mẹ?
Aliho ji wẹ Mose po asi etọn Zipola po te jei Egipti, gọna visunnu etọn Gelṣomi po Eliẹzẹli po, to whenuena nujijọ he bọdego ehe wá aimẹ: “E sọ wá jọ, to aliho ji to ofi ahisi lẹ nọ jẹ, wẹ OKLUNỌ pé e, bo dín nado hù i. Whenẹnu wẹ Zipola ze okẹ́n de, bo sán ayútintan visunnu etọn tọn, bo hẹn ẹn jẹ afọ etọn go; ewọ sọ dọmọ, Nugbonugbo asisunọ ohùn tọn de wẹ hiẹ hlan mi. Mọwẹ ewọ jo e do abọẹ. Whenẹnu wẹ ewọ dọmọ, Asisunọ ohùn tọn de wẹ hiẹ, na owhẹgbo lọ tọn wutu.” (Eksọdusi 4:20, 24-26) Dile etlẹ yindọ wefọ ehelẹ ma họnwun ganji bọ e vẹawu nado tindo nujikudo gando zẹẹmẹ yetọn go, Owe-wiwe tá hinhọ́n do yé ji jẹ obá de mẹ.
Kandai lọ ma dọ ogbẹ̀ mẹhe tọn tin to owù mẹ lọ tlọlọ gba. Ṣigba gbọn gbesisọ dali, mí sọgan wá tadona lọ kọ̀n dọ e mayin ogbẹ̀ Mose tọn wẹ gba, na e ṣẹṣẹ mọ azọ́ndenamẹ de yí sọn Jiwheyẹwhe dè nado plan Islaelivi lẹ tọ́n sọn Egipti wẹ. (Eksọdusi 3:10) E ma taidi nuhe sọgbe gba dọ angẹli Jiwheyẹwhe tọn de nasọ to ogbẹ̀ Mose tọn zedo owù mẹ to whenuena e tin to aliho ji nado yì hẹn azọ́ndenamẹ etọn di. Enẹwutu, ogbẹ̀ dopo to visunnu etọn lẹ tọn mẹ wẹ e na ko yin. Osẹ́n heyin nina Ablaham jẹnukọn gando whẹgbigbo go lọ dọmọ: “Visunnu whẹmagbonọ he yè ma gbowhẹ na to agbasalan ayútintan etọn tọn mẹ, dawe nẹ yè na sán sẹ̀ sọn hẹnnu etọn mẹ; e ko gbà alẹnu ṣie.” (Gẹnẹsisi 17:14) E họnwun dọ Mose na ko gboawupo nado gbowhẹ na visunnu etọn, bọ na enẹwutu, ogbẹ̀ visunnu lọ tọn yin zizedo owù mẹ gbọn angẹli Jehovah tọn dali.
To whenuena Zipola sán ayútintan visunnu etọn tọn sẹ̀ bo basi nuhe yé dona ko wà dai lọ, afọ mẹnu tọn go wẹ e jẹ? Angẹli Jehovah tọn wẹ tindo huhlọn lọ nado hù visunnu he mayin whẹgbona lọ. Enẹwutu, e sọgbe hẹ lẹnpọn dagbe nado lẹndọ afọ angẹli lọ tọn go wẹ Zipola na ko dlan ayútintan lọ do, nado dohia ẹ taidi kunnudenu de dọ emi ko setonu na alẹnu lọ.
Hogbe Zipola tọn lẹ dọ “asisunọ ohùn tọn de wẹ hiẹ hlan mi” yin vonọtaun. Etẹwẹ enẹ dohia gando ewọ go? Gbọn nuyiwa sọgbe hẹ nubiọtomẹsi alẹnu whẹgbigbo tọn lẹ dali, Zipola kẹalọyi haṣinṣan alẹnu tọn de hẹ Jehovah. Alẹnu Osẹ́n tọn heyin didoai to godo mẹ hẹ Islaelivi lẹ dohia dọ Jehovah sọgan yin pinpọnhlan taidi asu de to haṣinṣan alẹnu tọn mẹ bọ adà awetọ alẹnu lọ tọn lẹ nọ taidi asi de. (Jẹlemia 31:32) Enẹwutu, to alọdindlẹndo Jehovah (gbọn afọzedaitọ etọn angẹli lọ dali) taidi “asisunọ ohùn tọn de” mẹ, Zipola na ko to alọkẹyi nuhe alẹnu lọ bẹhẹn lẹ po taliai po. E taidi dọ e ko kẹalọyi otẹn asi de tọn to alẹnu whẹgbigbo tọn lọ mẹ, bọ Jehovah Jiwheyẹwhe taidi asu de. Depope he whẹho lọ yin, na e yawu yinuwa po nujikudo po to tonusise mẹ na nubiọtomẹsi Jiwheyẹwhe tọn wutu, ogbẹ̀ visunnu etọn tọn masọ tin to owù mẹ ba.