Gbẹtọ lẹ Didlapọn to Azọ́nwatẹn Yetọn Lẹ — WESẸDOTẸN INTẸNẸT JI TỌN Watchtower Tọn

Lilatọ Ahọluduta Tọn lẹ Na Linlin

Gbẹtọ lẹ Didlapọn to Azọ́nwatẹn Yetọn Lẹ

KỌNDOPỌ tẹwẹ tin to apọsteli Matiu, Pita, Andlé, Jakobu, po Johanu po ṣẹnṣẹn? Yemẹpo wẹ yin oylọ-basina gbọn Jesu dali to whenuena yé tin to azọ́nwatẹn yetọn. Pita, Andlé, Jakobu, po Johanu po ko hẹn alọnu ján to azọ́n whèhuhu tọn yetọn mẹ to whenuena Jesu basi oylọ na yé dọmọ: “Mì to hihodo mi.” Wekantẹn takuẹ-yíyí tọn wẹ Matiu tin te to whenuena e yin oylọ-basina nado lẹzun devi Jesu tọn.—Matiu 4:18-21; 9:9.

Kunnudidena gbẹtọ lẹ to azọ́nwatẹn yetọn sọgan tindo kọdetọn dagbe. To ehe yinyọnẹn mẹ, Kunnudetọ Jehovah tọn Japon tọn lẹ dovivẹnu pọmẹ tọn de to agọe nado yí yede zan to adà lizọnyizọn lọ tọn ehe mẹ. Etẹwẹ yin kọdetọn etọn? To osun vude gblamẹ, gọyìpọn fọtọ́n susu lẹ yin bibasi, bọ nudi plọnmẹ Biblu 250 bẹjẹeji. Lẹnnupọndo numimọ he bọdego ehelẹ ji.

To Tokyo, lizọnyizọnwatọ whenu-gigọ́ tọn de dukosọ hẹ ogán núdùdù-satẹn de tọn he ko dọhodopọ hẹ Kunnudetọ de to nudi owhe 30 die wayi to whenuena e yin wehọmẹvi. Dile etlẹ yindọ ogán lọ ma mọnukunnujẹ nususu mẹ to whenẹnu, e wá tindo ojlo to Biblu mẹ. Todin, ojlo etọn vọ́ yin finfọndote whladopo dogọ, bọ ewọ kẹalọyi oplọn Biblu tọn de to owe Oyọnẹn He Nọ Planmẹ Sọyi Ogbẹ̀ Madopodo Mẹ lọ mẹ.a To yidogọmẹ, e bẹ tito mẹdetiti tọn de jẹeji nado nọ hia Biblu to whèjai lẹpo whẹpo do yihọ.

Gbehosọnalitọ titengbe de dla wekantẹn de pọ́n. Dile etlẹ yindọ alọnu ogán lọ tọn ján, yọnnu he yigbe do otẹn etọn mẹ to alokan ji lọ kanse dọ: “Be hiẹ jlo nado dọho hẹ mi ya?” To hodọdopọ kleun de to alokan ji godo, yọnnu lọ tọ́n jẹgbonu bo dọ dọ emi tindo ojlo to Biblu hihia mẹ. Gbehosọnalitọ lọ basi tito nado hẹn Biblu wá bọ plọnmẹ Biblu de bẹjẹeji po e po, he nọ yin bibasi to jipa he tin to yakẹ de mẹ to afọnnu fuu jẹnukọnna azọ́n-ganmẹ.

To wekantẹn devo mẹ, dawe de mọ dọ azọ́nwatọgbẹ́ etọn de bẹ Atọ̀họ̀-Nuhihọ́ Lọ Tọn po Réveillez-vous! he e yí lẹ po dlan tlolo to whenuena Kunnudetọ lọ tlọ́n finẹ godo. To whenuena e jẹ whégbè, e dọ nuhe jọ na asi etọn heyin Kunnudetọ de, bo dọ dọ eyin emi tọn wẹ, emi na ko dotoai pẹẹde. Viyọnnu etọn he gblató nuhe e dọ, basi zẹẹmẹ ninọmẹ lọ tọn na Kunnudetọ he nọ wazọ́n to aigba-denamẹ ajọwiwa tọn lọ ji. Kunnudetọ lọ yawu bo dla dawe lọ pọ́n to wekantẹn lọ mẹ bo bẹ plọnmẹ Biblu de jẹeji po e po. To madẹnmẹ, dawe lọ jẹ opli dimanche tọn lẹ yì ji to gbesisọmẹ.

Kunnudide na gbẹtọ lẹ to azọ́nwatẹn yetọn sọ hẹn ale devo lẹ wá. Wẹnlatọ Japon tọn susu lẹzun azọ́nyọnẹntọ dogọ to gọyìpọn lẹ bibasi to nusatẹn lẹ, azọ́nwhé lẹ, po wekantẹn lẹ po mẹ. To yidogọmẹ, gbọn kunnudide ehe gblamẹ, susu mẹhe ko gbọjọ lẹ tọn yin didlapọn, bọ oplọn lẹ yin bibẹjẹeji po yé po. Kọdetọn lẹ yin ayidego tọn. Agun de he tin to ṣẹnṣẹn Tokyo tọn na linlin plọnmẹ Biblu 108 tọn, enẹwẹ whlaawe hugan sọha heyin linlin etọn na to owhe he wayi mẹ.

[Nudọnamẹ Odò Tọn]

a Yin zinzinjẹgbonu gbọn Kunnudetọ Jehovah tọn lẹ dali.