Yọnhonọ lẹ—Hagbẹ Họakuẹ Mẹmẹsunnu-Yinyin Klistiani Tọn Mítọn Lẹ
“Yé mẹhe yin didó to ohọ̀ OKLUNỌ tọn mẹ lẹ na tọ́nkun . . . Yé na to sinsẹ́n hẹn jẹgbonu wá to yọnho mẹ.”—PSALM 92:13, 14.
1. Nukun tẹwẹ mẹsusu nọ yí do pọ́n yọnhonọ lẹ?
JEHOVAH yiwanna devizọnwatọ nugbonọ etọn lẹpo, gọna mẹhe ko biọ yọnhowhe mẹ lẹ. Ṣigba, sọgbe hẹ sọhayinanú de, diblayi yọnhonọ livi daa wẹ nọ yin nuyiwahẹ to aliho agọ̀ mẹ kavi yin vọdona to owhe dopodopo mẹ to États-Unis. Linlin mọnkọtọn lẹ sọn otò devo lẹ mẹ dohia dọ nuyiwa hẹ yọnhonọ lẹ to aliho agọ̀ mẹ yin nuhahun lẹdo aihọn pé tọn de. Titobasinanu de ylọ adọ̀ nuhahun ehe tọn dọ “walọyizan de he gbayipe to gbẹtọ susu ṣẹnṣẹn . . . dọ yọnhonọ lẹ masọ yọn-na-yizan kavi họakuẹ ba podọ nọ biọ alọgọ zẹjlẹgo.”
2. (a) Nukun tẹwẹ Jehovah nọ yí do pọ́n devizọnwatọ etọn yọnhonọ heyin nugbonọ lẹ? (b) Zẹẹmẹ ojlofọndotenamẹ tọn tẹwẹ mí mọ to Psalm 92:12-15 mẹ?
2 Jehovah Jiwheyẹwhe nọ yí nukun nujọnu tọn do pọ́n devizọnwatọ etọn yọnhonọ he yin nugbonọ lẹ. Ewọ nọ ze ayidonugo do “gbẹtọ mítọn homẹ tọn”—yèdọ ninọmẹ gbigbọmẹ tọn mítọn ji—kakati nido yin madogán agbasa mítọn tọn lẹ ji. (2 Kọlintinu lẹ 4:16) To Ohó etọn, Biblu mẹ, mí mọ jidenamẹ ojlofọndotenamẹ tọn lọ dọmọ: “Dodonọ na tọ́nkun taidi odétin: bosọ whẹ́n taidi kedali Lẹbanọni tọn. Yé mẹhe yin didó to ohọ̀ OKLUNỌ tọn mẹ lẹ na tọ́nkun to opá Jiwheyẹwhe mítọn tọn mẹ. Yé na to sinsẹ́n hẹn jẹgbonu wá to yọnho mẹ; yé na dosìn bosọ kọ́. Nado dohia dọ tenọglinọ wẹ OKLUNỌ.” (Psalm 92:12-15) Dogbapọnna wefọ ehelẹ na do adà họakuẹ he hiẹ taidi yọnhonọ de sọgan yidogọna mẹmẹsunnu-yinyin Klistiani tọn mítọn hia.
‘Sinsẹ́n Hinhẹn Jẹgbonu to Yọnhowhe Mẹ’
3. (a) Naegbọn dodonọ lẹ yin yiyijlẹdo odétin lẹ go? (b) Nawẹ yọnhonọ lẹ sọgan ‘hẹn sinsẹ́n jẹgbonu to yọnho mẹ’ gbọn?
3 Psalm-kantọ yí dodonọ lẹ jlẹdo odétin lẹ go ‘he yin didó do opá Jiwheyẹwhe mítọn tọn mẹ.’ Yé “to sinsẹ́n hẹn jẹgbonu wá to yọnho mẹ.” Be hiẹ ma yigbe dọ ehe yin linlẹn tulinamẹ tọn de ya? Odétin whanpẹnọ, he to ote lẹ nọ saba yin mimọ to opá Whèzẹtẹn-waji tọn lẹ mẹ to ojlẹ Biblu tọn mẹ. Gbọnvona whanpẹ yetọn, odétin lẹ sọ yin nuhọakuẹ na sinsẹ́n susu yetọn wutu, bọ delẹ to yé mẹ nọ to sinsẹ́n detọ́n na nuhe hú owhe kanweko.a Gbọn gbigbọṣi sinsẹ̀n-bibasi nugbo lọ mẹ gligli dali, hiẹ lọsu sọgan zindonukọn nado “yin sinsẹ́nnọ to azọ́n dagbe lẹpo mẹ.”—Kọlọsinu lẹ 1:10.
4, 5. (a) Sinsẹ́n titengbe tẹwẹ Klistiani lẹ dona detọ́n? (b) Na apajlẹ yọnhonọ he de “sinsẹ́n nùflo” tọn tọ́n to Owe-wiwe mẹ lẹ tọn.
4 Jehovah nọ donukun dọ Klistiani lẹ ni sẹ́n “sinsẹ́n nùflo” tọn lẹ—yèdọ hodidọ he nọ hẹn pipà wá na ewọ po lẹndai etọn lẹ po. (Heblu lẹ 13:15) Taidi yọnhonọ de, be ehe gando hiẹ go ya? Na nugbo tọn mọwẹ.
5 Biblu bẹ apajlẹ yọnhonọ susu tọn hẹn he yí adọgbigbo do dekunnuna oyín po lẹndai Jehovah tọn lẹ po. Mose ko zẹ̀ “owhe kandegbàn” etọn lẹ go to whenuena Jehovah deazọ́nna ẹn taidi yẹwhegán po afọzedaitọ etọn po. (Psalm 90:10; Eksọdusi 4:10-17) Yọnhowhe ma glọnalina yẹwhegán Daniẹli nado yí adọgbigbo do dekunnuna nupojipetọ-yinyin Jehovah tọn. Daniẹli sọgan ko zẹ̀ owhe 90 go to whenuena Bẹlṣazali ylọ ẹ nado detana nukinkan dabla adò go tọn. (Daniẹli, weta 5) Podọ etẹwẹ dogbọn apọsteli Johanu yọnhonọ lọ dali? Sẹpọ vivọnu gbẹzan nugbonọ-yinyin etọn tọn, e mọ ede to ganpamẹ to lopo Patmos tọn ji “na ohó Jiwheyẹwhe tọn, po kunnuhó Jesu Klisti tọn po” wutu. (Osọhia 1:9) Vlavo hiẹ sọgan flin mẹsusu to Biblu mẹ he de “sinsẹ́n nùflo” tọn tọ́n to yọnhowhe yetọn mẹ.—1 Samuẹli 8:1, 10; 12:2; 1 Ahọlu lẹ 14:4, 5; Luku 1:7, 67-79; 2:22-32.
6. Nawẹ Jehovah ko yí “yọnhonọ” lẹ zan nado dọ dọdai to azán godo tọn ehelẹ mẹ gbọn?
6 Apọsteli Pita yihodọ sọn yẹwhegán Heblunu lọ, Joẹli dè, bo lá dọmọ: “Jiwheyẹwhe dọmọ, E na wá jọ to azán godo tọn lẹ mẹ, yẹn na túntún sọn [gbigbọ] ṣie mẹ do gbẹtọ lẹpo ji [gọna “yọnhonọ” lẹ]; . . . yé nasọ dọ dọdai.” (Owalọ lẹ 2:17, 18; Joẹli 2:28) Enẹwutu, to azán godo tọn ehelẹ mẹ, Jehovah ko yí hagbẹ yọnhonọ mẹyiamisisadode lẹ tọn po “lẹngbọ devo” lẹ tọn po zan nado lá lẹndai etọn lẹ. (Johanu 10:16) Delẹ to yé mẹ ko to sinsẹ́n Ahọluduta tọn detọ́n na owhe susu lẹ.
7. Basi zẹẹmẹ lehe yọnhonọ lẹ zindonukọn nado to sinsẹ́n Ahọluduta tọn detọ́n mahopọnna madogán agbasa tọn lẹ do.
7 Lẹnnupọndo Sonia, he lẹzun wẹnlatọ whenu-gigọ́ tọn to 1941 ji. Mahopọnna ahididi whenu dindẹn tọn sọta azọ̀n sinsinyẹn, e nọ deanana plọnmẹ Biblu gbesisọ tọn lẹ to owhé etọn gbè. “Wẹndagbe lọ lilá ko lẹzun apadewhe gbẹzan ṣie tọn,” wẹ Sonia dọ. “Na taun tọn, enẹ wẹ hẹn ogbẹ̀ ṣie dote. Yẹn ma sọgan doalọte.” To agọe, Sonia po nọviyọnnu etọn, Olive po, má owẹ̀n todido Biblu tọn hẹ Janet, he to kúdonu to azọ̀n-zan ji bọ yé dukosọ hẹ to abò tenọpọnmẹ tọn mẹ to dotowhé. Onọ̀ Janet tọn, heyin Katoliki akonka de, yin nuyiwadeji gbọn ojlo owanyinọ he yin didohia viyọnnu etọn dali bọ e kẹalọyi plọnmẹ Biblu de bosọ to nukọnyiyi dagbe basi to alọnu. Be hiẹ sọgan nọ yí dotẹnmẹ hundote mọnkọtọn lẹ zan nado de sinsẹ́n Ahọluduta tọn tọ́n ya?
8. Nawẹ Kalẹbu he ko poyọnho do jide etọn hia to Jehovah mẹ gbọn, podọ nawẹ Klistiani yọnhonọ lẹ sọgan hodo apajlẹ etọn gbọn?
8 Gbọn nukọnzinzindo po adọgbigbo po to azọ́n yẹwhehodidọ Ahọluduta lọ tọn mẹ mahopọnna madogán yọnhowhe tọn lẹ dali, Klistiani yọnhonọ lẹ to hihodo apajlẹ Kalẹbu tọn, yèdọ Islaelivi nugbonọ he nọgodona Mose to zungbo mẹ na owhe kande. Owhe 79 wẹ Kalẹbu tindo to whenuena e dasá Otọ̀ Jọdani biọ Aigba Pagbe tọn ji. To awhànfunfun to awhànpa huhlọnnọ Islaeli tọn mẹ na owhe ṣidopo godo, e sọgan ko tindo pekọ po enẹ po bo gbọjẹ to whégbè. Ṣigba e ma wàmọ, e yí adọgbigbo do biọ azọngban sinsinyẹn lọ nado gbawhàn “tòdaho kiklo dòkọ́nọ lẹ” tọn to lẹdo osó Juda tọn lẹ mẹ, yèdọ lẹdo he mẹ Anakimi lẹ, he yin sunnu asuka he tọ́nalùn lẹ nọ nọ̀. Po alọgọ Jehovah tọn po, Kalẹbu “yàn yé jẹgbonu, dile OKLUNỌ dọ do.” (Jọṣua 14:9-14; 15:13, 14) Dile hiẹ to sinsẹ́n Ahọluduta tọn detọ́n zọnmii to yọnhowhe towe mẹ, deji dọ Jehovah tin hẹ we, dile e tin hẹ Kalẹbu do. Podọ eyin hiẹ gbọṣi nugbonọ-yinyin mẹ, e na kán otẹn de na we to aihọn yọyọ dopagbe etọn mẹ.—Isaia 40:29-31; 2 Pita 3:13.
“Yé Na Dosìn Bosọ Kọ́”
9, 10. Nawẹ Klistiani yọnhonọ lẹ nọ hẹn nugopipe yetọn go to yise mẹ bosọ nọ gbọṣi huhlọnnọ-yinyin mẹ to gbigbọmẹ gbọn? (Pọ́n apotin weda 13 tọn.)
9 Nado dọ̀n ayidonugo wá sinsẹ́n he devizọnwatọ Jehovah tọn yọnhonọ lẹ nọ detọ́n ji, psalm-kantọ lọ jihàn dọmọ: “Dodonọ na tọ́nkun taidi odétin: bosọ whẹ́n taidi kedali Lẹbanọni tọn. Yé na to sinsẹ́n hẹn jẹgbonu wá to yọnho mẹ; yé na dosìn bosọ kọ́.”—Psalm 92:12, 14.
10 Nawẹ hiẹ sọgan gbọṣi huhlọnnọ-yinyin mẹ to gbigbọmẹ mahopọnna yọnhowhe lẹ gbọn? Whanpẹ odétin tọn nọ dẹn-to-aimẹ eyin e mọ osin susu. Mọdopolọ, hiẹ sọgan mọ alọgọ yí sọn osin nugbo Biblu tọn lẹ mẹ gbọn Ohó Jiwheyẹwhe tọn pinplọn po awukọndopọ hẹ titobasinanu etọn po dali. (Psalm 1:1-3; Jẹlemia 17:7, 8) Nugopipe gbigbọmẹ tọn towe nọ hẹn we yin nuhọakuẹ taun de na yisenọ hatọ lẹ. Gbadopọnna lehe ehe yin nugbo to whẹho Yẹwhenọ Daho Jehọiada heyin yọnhonọ de tọn mẹ do.
11, 12. (a) Adà tangan tẹwẹ Jehọiada yiwà to whenuho ahọluduta Juda tọn mẹ? (b) Nawẹ Jehọiada yí huhlọn etọn zan nado ze sinsẹ̀n-bibasi nugbo daga gbọn?
11 Owhe Jehọiada tọn na ko hú kanweko to whenuena Ahọsi Atalia yí huhlọn do dugán do Juda ji gbọn ovivi etọn titi lẹ hùhù dali. Etẹwẹ Jehọiada yọnhonọ lọ sọgan wà? Ewọ po asi etọn po ze Joaṣi heyin whédutọ dopo akàn he pò lọ whlá do tẹmpli mẹ na owhe ṣidopo. Enẹgodo, Jehọiada ze afọdide nujikudo tọn de bo lá Joaṣi owhe ṣinawe-mẹvi lọ di ahọlu bọ Atalia yin hùhù.—2 Otannugbo lẹ 22:10-12; 23:1-3, 15, 21.
12 Taidi mẹgopọntọ ahọlu lọ tọn, Jehọiada yí huhlọn etọn zan nado ze sinsẹ̀n-bibasi nugbo daga. E “basi alẹnu de to ede po gbẹtọ lẹpo po ṣẹnṣẹn, po ahọlu lọ po, dọ yé ni yin omẹ OKLUNỌ tọn.” To tonusisena gbedide Jehọiada tọn lẹ mẹ, gbẹtọ lẹ gbà ohọ̀ yẹwhe lalo Baali tọn hányán bo gídí agbà etọn lẹ, boṣiọ etọn lẹ, po yẹwhenọ etọn lẹ po. To anademẹ Jehọiada tọn glọ wẹ Joaṣi sọ hẹn sinsẹ̀nzọn tẹmpli mẹ tọn lẹ gọ̀ do otẹn yetọn mẹ bosọ basi azọ́n nuvọjlado tọn he jẹ lẹ to tẹmpli lọ mẹ. “[Joaṣi] sọ wà enẹ he yin jlọjlọ to nukun OKLUNỌ tọn lẹ mẹ to azán etọn lẹpo ehe mẹ Jehọiada yẹwhenọ to oplọn na ẹn.” (2 Otannugbo lẹ 23:11, 16-19; 24:11-14; 2 Ahọlu lẹ 12:2) To okú etọn to owhe 130 tintindo whenu, Jehọiada yin nina yẹyi vonọtaun de bo yin didi do ahọlu lẹ ṣẹnṣẹn na “e ko wà dagbe to Islaeli mẹ wutu, podọ hlan Jiwheyẹwhe po ohọ̀ etọn po.”—2 Otannugbo lẹ 24:15, 16.
13. Nawẹ Klistiani yọnhonọ lẹ sọgan ‘wà dagbe hlan Jiwheyẹwhe nugbo lọ po ohọ̀ etọn po’ gbọn?
13 Agbasamalo kavi ninọmẹ devo lẹ sọgan hẹn nuhe hiẹ sọgan wà nado ze sinsẹ̀n-bibasi nugbo daga tindo dogbó. Eyin etlẹ yinmọ, hiẹ gbẹ́ sọgan ‘wà dagbe hlan Jiwheyẹwhe nugbo lọ po ohọ̀ etọn po.’ Hiẹ sọgan do zohunhun hia na ohọ̀ gbigbọmẹ tọn Jehovah tọn gbọn opli agun tọn lẹ yìyì po mahẹ tintindo to yé mẹ po dali podọ gbọn mahẹ tintindo to lizọnyizọn kunnudegbe tọn mẹ to whedepopenu he e yọnbasi dali. Alọkikẹyi ayinamẹ Biblu tọn lẹ sọn ojlo mẹ wá podọ godoninọ na “afanumẹ nugbonọ, nuyọnẹntọ” lọ po agun lọ po na hẹn mẹmẹsunnu-yinyin Klistiani tọn lodo. (Matiu 24:45-47) Hiẹ sọgan sọ whàn sinsẹ̀n-basitọ hatọ lẹ hlan “owanyi po azọ́n dagbe lẹ po” kọ̀n. (Heblu lẹ 10:24, 25; Filemọni 8, 9) Podọ hiẹ na yin dona de na mẹdevo lẹ eyin hiẹ nọ yinuwa to kọndopọmẹ hẹ ayinamẹ apọsteli Paulu tọn dọmọ: “Na sunnu mẹho [kavi, yọnhonọ] lẹ ni yin huwhẹnọ, omẹ abọẹabọẹ, wùnzanọ, bo zìn to yise mẹ, to owanyi mẹ, to homẹfa mẹ. Mọkẹdẹ wẹ yọnnu mẹho [kavi, yọnhonọ] lẹ ga, dọ yé ni tin to jijọ he jẹ hẹ wiwe mẹ, ma yin whẹ̀jẹtọ lalonọ, ma yin sinnùmúnọ, mẹplọntọ onú dagbe lẹ tọn.”—Titu 2:2-4.
14. Etẹwẹ Klistiani nugopọntọ whenu dindẹn tọn lẹ sọgan wà nado ze sinsẹ̀n-bibasi nugbo daga?
14 Be hiẹ ko sẹ̀n taidi mẹho agun tọn na owhe susu wẹ ya? “Nọ yí nuyọnẹn he hiẹ ko bẹpli lẹ zan matin ṣejannabi,” wẹ ayinamẹ he mẹho agun tọn whenu dindẹn tọn de na. “Nọ má azọngban lẹ, bo nọ má numimọ towe hẹ mẹdevo lẹ he jlo na plọnnu . . . Nọ mọ nugopipe mẹdevo lẹ tọn. Nọ hẹn nugopipe yetọn pọnte bo nọ yí yé zan. Wleawuna sọgodo.” (Deutelonomi 3:27, 28) Ojlo nujọnu tọn towe to azọ́n Ahọluduta lọ tọn he to gbigblodeji tẹgbẹ lọ mẹ na dekọtọn do dona susu lẹ mẹ na mẹdevo lẹ to mẹmẹsunnu-yinyin Klistiani tọn mítọn mẹ.
“Dohia Dọ Tenọglinọ Wẹ OKLUNỌ”
15. Nawẹ Klistiani yọnhonọ lẹ nọ “dohia dọ tenọglinọ wẹ OKLUNỌ” gbọn?
15 Devizọnwatọ Jiwheyẹwhe tọn yọnhonọ lẹ nọ yí ayajẹ do hẹn azọngban yetọn di “nado dohia dọ tenọglinọ wẹ OKLUNỌ.” Eyin Klistiani yọnhonọ de wẹ hiẹ yin, hodidọ po nuyiwa towe lẹ po sọgan dohia mẹdevo lẹ dọ ‘Jehovah wẹ Awinyan towe, mẹhe mẹ mawadodo depope ma tin te.’ (Psalm 92:15) Odétin lẹ nọ dekunnuna jẹhẹnu ayidego Mẹdatọ lọ tọn lẹ. Ṣigba Jehovah ko na we lẹblanulọkẹyi lọ nado dekunnuna ẹn to mẹhe to alọkẹyi sinsẹ̀n-bibasi nugbo todin lẹ ṣẹnṣẹn. (Deutelonomi 32:7; Psalm 71:17, 18; Joẹli 1:2, 3) Naegbọn ehe do yin onú titengbe de?
16. Apajlẹ Biblu tọn tẹwẹ dohia dọ e yin nujọnu nado ‘dohia dọ tenọglinọ wẹ Jehovah’?
16 To whenuena nukọntọ Islaeli tọn Jọṣua lẹzun “mẹwhinwhẹ́n [kavi, yọnhonọ] bo peve to owhe susu mẹ,” e ‘ylọ Islaeli lẹpo, mẹhomẹ yetọn lẹ podọ ogán yetọn lẹ, podọ whẹdatọ yetọn lẹ podọ azọ́ngán yetọn lẹ,’ bo flinnu yé gando nuyiwa tenọglinọ Jiwheyẹwhe tọn lẹ go. E dọmọ: “Onú dopo ma gbòpò sọn onú dagbe he OKLUNỌ Jiwheyẹwhe mìtọn dọ gbọn mì dali lẹ de mẹ; popolẹpo wẹ ṣẹ hlan mì.” (Jọṣua 23:1, 2, 14) Hodidọ ehe hẹn gbemima gbẹtọ lọ lẹ tọn nado gbọṣi nugbonọ-yinyin mẹ lodo na ojlẹ de. Ṣigba, to okú Jọṣua tọn godo “whẹndo devo sọ fọ́n . . . he ma yọ́n OKLUNỌ, kavi azọ́n he e ko wà na Islaeli. Ovi Islaeli tọn lẹ sọ wà enẹ he yin oylan to nukun OKLUNỌ tọn mẹ, bo sẹ̀n [Baali].”—Whẹdatọ 2:8-11.
17. Nawẹ Jehovah ko yinuwa hẹ omẹ etọn lẹ to ojlẹ egbezangbe tọn lẹ mẹ gbọn?
17 Tenọgligo-hinhẹn agun Klistiani egbezangbe tọn ma sinai do kunnudide devizọnwatọ Jiwheyẹwhe tọn yọnhonọ lẹ tọn ji gba. Ṣogan, yise mítọn to Jehovah mẹ podọ to opagbe etọn lẹ mẹ nọ yin hinhẹn lodo dogọ to whenuena mí sè otàn “azọ́n daho” he e ko wà na omẹ etọn lẹ to azán godo tọn ehelẹ mẹ tọn tlọlọ sọn mẹde dè. (Whẹdatọ 2:7; 2 Pita 1:16-19) Eyin hiẹ ko to awukọndopọ hẹ titobasinanu Jehovah tọn na owhe susu, hiẹ sọgan flin ojlẹ de whenuena lilatọ Ahọluduta tọn vude poun wẹ tin to lẹdo kavi otò mìtọn mẹ kavi whenue azọ́n yẹwhehodidọ tọn pehẹ nukundiọsọmẹ sinsinyẹn. To ojlẹ he wayi lẹ gblamẹ, hiẹ ko mọ lehe Jehovah de aliglọnnamẹnu delẹ sẹ̀ bosọ “do mizọnmizọn” na jideji Ahọluduta tọn do. (Isaia 54:17; 60:22, NW) Hiẹ ko doayi lehe nugbo Biblu tọn lẹ yin hinhẹn họnwun dogọ go bosọ mọ vọjlado dagbe debọdo-dego lẹ to titobasinanu yinukundomọ Jiwheyẹwhe tọn mẹ. (Howhinwhẹn lẹ 4:18; Isaia 60:17) Be hiẹ nọ tẹnpọn nado na tuli mẹdevo lẹ gbọn numimọ towe gando nuyiwa tenọglinọ Jehovah tọn lẹ go didọna yé dali ya? Lehe ehe na tindo nuyiwadomẹji tulinamẹ tọn po mẹhẹnlodo tọn po do mẹmẹsunnu-yinyin Klistiani tọn ji do sọ!
18. (a) Na apajlẹ nuyiwadomẹji dẹn-to-aimẹ he ‘didohia mẹdevo lẹ dọ tenọglinọ wẹ Jehovah’ nọ tindo tọn. (b) Nawẹ hiẹ lọsu titi ko tindo numimọ tenọglinọ-yinyin Jehovah tọn gbọn?
18 Etẹwẹ dogbọn nujijọ he mẹ hiẹ mọ nukunpedomẹgo po anademẹ owanyinọ Jehovah tọn po to gbẹzan towe titi mẹ lẹ dali? (Psalm 37:25; Matiu 6:33; 1 Pita 5:7) Mẹmẹyọnnu yọnhonọ de he nọ yin Martha nọ saba na tuli mẹdevo lẹ dọmọ: “Eyin nudepope tlẹ jọ, ma gbẹ́ Jehovah dai gbede blo. E na gọalọna we.” Ayinamẹ ehe yinuwado Tolmina ji sisosiso, mẹhe yin dopo to Biblu plọntọ Martha tọn lẹ mẹ he yin bibaptizi to bẹjẹeji owhe 1960 lẹ tọn gblamẹ. Tolmina flin dọmọ: “Yẹn gbọjọ taun to whenuena asu ṣie kú, ṣigba hogbe enẹlẹ hẹn mi nado magbe ma nado gọ̀n opli dopo tata. Podọ Jehovah hẹn mi lodo na taun tọn nado zindonukọn.” Tolmina lọsu ko na ayinamẹ dopolọ Biblu plọntọ etọn susu to owhe susu lẹ gblamẹ. Na nugbo tọn, gbọn tulinamẹ po nuyiwa tenọglinọ Jehovah tọn lẹ po didọna mẹdevo lẹ dali, hiẹ sọgan hẹn yise Klistiani hatọ lẹ tọn lodo taun.
Jehovah Yọ́n Pinpẹn Yọnhonọ Heyin Nugbonọ lẹ Tọn
19, 20. (a) Nukun tẹwẹ Jehovah nọ yí do pọ́n azọ́n devizọnwatọ etọn yọnhonọ lẹ tọn? (b) Etẹwẹ na yin dogbapọnna to hosọ he bọdego mẹ?
19 Aihọn egbehe tọn, he gọ́ na pinpẹn-nutọn-mayọnẹn, ma tindo whenu sọmọ na yọnhonọ lẹ gba. (2 Timoti 3:1, 2) To whenuena yé yin finflin, e nọ saba yin na wadotana yetọn he ko wayi lẹ—yèdọ nuhe yé yin dai, kakati nido yin nuhe yé yin todin. To vogbingbọnmẹ, Biblu dọmọ: “Jiwheyẹwhe ma yin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyín etọn dali, na le mì to devizọnwa hlan mẹwiwe lẹ do, bosọ to bibasi i.” (Heblu lẹ 6:10) Na nugbo tọn, Jehovah Jiwheyẹwhe nọ flin azọ́n nugbonọ-yinyin tọn towe he ko wayi lẹ. Ṣigba e sọ yọ́n pinpẹn nuhe hiẹ zindonukọn nado to wiwà to sinsẹ̀nzọn etọn mẹ todin lẹ tọn. Mọwẹ, e nọ pọ́n yọnhonọ heyin nugbonọ lẹ hlan di Klistiani sinsẹ́nnọ, he zìn to gbigbọ-liho, bosọ yin hlọnhlọnnọ lẹ—he yin kunnudenu yinukundomọ huhlọn etọn tọn.—Filippinu lẹ 4:13.
20 Be nukun he Jehovah nọ yí do pọ́n hagbẹ yọnhonọ mẹmẹsunnu-yinyin Klistiani mítọn tọn lẹ wẹ hiẹ lọsu nọ yí do pọ́n yé ya? Eyin mọwẹ, hiẹ na yin whinwhàn nado do owanyi towe hia yé. (1 Johanu 3:18) Hosọ he bọdego na gbadopọnna aliho yọn-na-yizan delẹ nado do owanyi mọnkọtọn hia to nukunpipedo nuhudo yetọn lẹ go mẹ.
[Nudọnamẹ Odò Tọn]
a Ohín odé tọn dopodopo sọgan bẹ dékún fọtọ́n lẹ hẹn bo sọgan dà nudi kilo 8 to nujlẹgàn ji kavi humọ. Wekantọ dopo yí sọha na dọ “atin [odé] he ko jẹ sinsẹ́n ji tọn sọgan de nudi dékún tọnu awe kavi atọ̀n tọ́n na mẹhe tindo e whẹpo do kú.”
Etẹwẹ Yin Gblọndo Towe Lẹ?
• Nawẹ yọnhonọ lẹ nọ ‘hẹn sinsẹ́n jẹgbonu’ gbọn?
• Naegbọn nugopipe gbigbọmẹ tọn Klistiani yọnhonọ lẹ tọn do yin nuhọakuẹ de?
• Nawẹ yọnhonọ lẹ sọgan “dohia dọ tenọglinọ wẹ OKLUNỌ” gbọn?
• Naegbọn Jehovah nọ yọ́n pinpẹn devizọnwatọ whenu dindẹn etọn lẹ tọn?
[Apotin to weda 13]
Lehe Yé Ko Hẹn Nugopipe Yetọn Go to Yise mẹ Gbọn
Etẹwẹ ko gọalọna Klistiani whenu dindẹn tọn lẹ nado hẹn nugopipe yetọn go to yise mẹ bosọ gbọṣi huhlọnnọ-yinyin mẹ to gbigbọmẹ? Nuhe mẹdelẹ dọ die:
“Hihia wefọ he zinnudo haṣinṣan mítọn hẹ Jehovah ji lẹ yin nujọnu taun. Yẹn nọ hia Psalm 23 po 91 po sọn tamẹ gbọzangbọzan to zánmẹ.”—Olive, he yin bibaptizi to 1930.
“Yẹn nọ tẹnpọn nado tin to hodidọ baptẹm tọn lẹpo tẹnmẹ bosọ nọ dotoai po sọwhiwhe po, taidi dọ gbenẹgbe wẹ baptẹm ṣie nkọ. Hinhẹn klandowiwe ṣie do ayiha mẹ to whelẹponu ko gọalọna mi taun nado gbọṣi nugbonọ-yinyin mẹ.”—Harry, he yin bibaptizi to 1946.
“Dẹ̀hiho egbesọegbesọ—bo nọ biọ alọgọ, hihọ́, po dona Jehovah tọn lẹ po to whepoponu yin dandannu, ‘nado yọ́n ẹn to aliho mítọn lẹpo ji.’ ” (Howhinwhẹn lẹ 3:5, 6)—Antônio, he yin bibaptizi to 1951.
“Todidoai na numimọ mẹhe ko sẹ̀n Jehovah po nugbonọ-yinyin po na owhe susu lẹ tọn nọ hẹn gbemima ṣie lodo dogọ nado yin nugbonọ hlan ẹn zọnmii.”—Joan, he yin bibaptizi to 1954.
“Nujọnu wẹ e yin ma nado nọ lẹn mẹdetiti tọn glanglan. Nukundagbe majẹhẹ Jiwheyẹwhe tọn wẹ zọ́n bọ mí do tindo nuhe mí tindo lẹpo. Pọndohlan ehe tintindo nọ hẹn mí nado ze ayidonugo mítọn do asisa he sọgbe lọ ji nado mọ núdùdù gbigbọmẹ tọn he mí tindo nuhudo etọn nado doakọnna kakajẹ opodo.”—Arlene, he yin bibaptizi to 1954.
[Yẹdide to weda 11]
Yọnhonọ lẹ nọ de sinsẹ́n Ahọluduta tọn họakuẹ lẹ tọ́n
[Yẹdide to weda 14]
Nugopipe gbigbọmẹ tọn yọnhonọ lẹ tọn yin nuhọakuẹ de