Nuṣikọna Mí, Ṣigba E Mayin to Gbigbọ-Liho
“OKLUNỌ, Nudatọ aigba pòdo lẹpo tọn . . . to huhlọn na mẹhe nuṣikọna lẹ; bosọ do huhlọn e ji na ewọ he ma do huhlọn lẹ.”—ISAIA 40:28, 29.
1, 2. (a) Oylọ basinamẹ ojlofọndotenamẹ tọn tẹwẹ yin zizedonukọnna mẹhe jlo na doalọ to sinsẹ̀n-bibasi wiwe-ṣeke mẹ lẹpo? (b) Etẹwẹ sọgan ze gbigbọnọ-yinyin mítọn do owù nujọnu tọn mẹ?
TAIDI devi Jesu tọn lẹ, mí jẹakọhẹ oylọ basinamẹ ojlofọndotenamẹ tọn etọn ganji dọmọ: “Mì wá dè e, mì he to tuklajẹ, bọ yè doagban pinpẹn na lẹ, yẹn nasọ na gbọjẹ [kavi homẹmimiọn] mì. . . . Na zẹgẹ ṣie bọawu, agbàn ṣie sọ fua.” (Matiu 11:28-30) Klistiani lẹ sọ nọ yin nina “ojlẹ awumimiọn tọn . . . sọn nukun Oklunọ tọn mẹ wá.” (Owalọ lẹ 3:19) Matin ayihaawe hiẹ lọsu ko mọdọ nugbo Biblu tọn lẹ pinplọn, todido ayajẹnọ de tintindo, po nunọwhinnusẹ́n Jehovah tọn lẹ yiyizan to gbẹzan towe mẹ po nọ tindo nuyiwadomẹji homẹmiọnnamẹ tọn lẹ.
2 Ṣogan, sinsẹ̀n-basitọ Jehovah tọn delẹ nọ jugbọn ojlẹ nuṣikọ tọn mẹ to numọtolanmẹ-liho. To ninọmẹ delẹ mẹ, ojlẹ flumẹjijẹ tọn ehelẹ ma nọ dẹn-to-aimẹ. Ṣigba to whedelẹnu numọtolanmẹ agbọ́pemẹ tọn lọ sọgan nọ̀ aimẹ dẹn. Dile whenu to yìyì, mẹdelẹ sọgan lẹndọ azọngban Klistiani tọn yetọn lẹ ko lẹzun agbàn pinpẹn kakati nido yin agbàn homẹmiọnnamẹ tọn dile Jesu dopagbe etọn do. Numọtolanmẹ agọ̀ mọnkọtọn lẹ sọgan ze haṣinṣan he Klistiani de tindo hẹ Jehovah do owù nujọnu tọn mẹ.
3. Naegbọn Jesu do na ayinamẹ he tin to Johanu 14:1 mẹ?
3 Ojlẹ vude whẹpo Jesu do yin wiwle bo yin hùhù, e dọna devi etọn lẹ dọmọ: “Mì dike ayiha mìtọn yin tuklanọ blo: mì yise to Jiwheyẹwhe mẹ, mì yise to yẹn mẹ ga.” (Johanu 14:1) Jesu dọ ohó ehelẹ na apọsteli lẹ na pehẹ nujijọ ylankan lẹ to madẹnmẹ. Homẹkẹn vẹadi na bọdo ehe go. Jesu yọnẹn dọ flumẹjijẹ sinsinyẹn sọgan hẹn apọsteli etọn lẹ dahli. (Johanu 16:1) Eyin apọsteli lẹ ma nọ̀ aṣeji sọta numọtolanmẹ awubla tọn lẹ, e sọgan zọ́n bọ yé na gbọjọ to gbigbọ-liho bo hẹn jidide he yé tindo do Jehovah go bu. Nudopolọ sọgan jọ do Klistiani lẹ go to egbehe. Flumẹjijẹ na ojlẹ dindẹn sọgan hẹn awufiẹsa susu wá, podọ e sọgan doagbànna ahun mítọn lẹ. (Jẹlemia 8:18) Onú sọgan ṣikọna mí. To kọgbidinamẹ ehe glọ, awú sọgan kú mí to numọtolanmẹ-liho podọ to gbigbọ-liho; mí tlẹ sọgan hẹn ojlo mítọn nado sẹ̀n Jehovah bu.
4. Etẹwẹ sọgan gọalọna mí nado họ́ ahun yẹhiadonu tọn mítọn lẹ sọn nuṣikọ si?
4 Na nugbo tọn, ayinamẹ Biblu tọn sọgbe dọ: “Hú whiwhla lẹpo, yí otù [kavi ahun] towe whla, na e mẹ wẹ asisa ogbẹ̀ tọn sọn.” (Howhinwhẹn lẹ 4:23) Biblu bẹ ayinamẹ yọn-na-yizan lẹ hẹn he nọ gọalọna mí nado basi hihọ́na ahun yẹhiadonu tọn mítọn sọn flumẹjijẹ po nuṣikọ gbigbọmẹ tọn po si. Ṣigba, tintan whẹ́, mí dona yọ́n nuhe nọ hẹn agbọ́pé mí.
Sinsẹ̀n Klistiani Tọn Ma Yin Kọgbidinamẹnu
5. Etẹwẹ taidi nuhe jẹagọdo yedelẹ to nuhe devi-yinyin Klistiani tọn bẹhẹn lẹ mẹ?
5 Nado dọ hójọhó, Klistiani yinyin nọ biọ vivẹnudido po linsinsinyẹn po. (Luku 13:24) Jesu tlẹ dọmọ: “Mẹdepope he masọ ze [yatin] etọn, bo hodo mi, e ma sọgan yin nuplọntọ ṣie gba.” (Luku 14:27) To tintan whenu, e sọgan taidi dọ hogbe ehelẹ jẹagọdo nuhe Jesu dọ dogbọn agbàn etọn he fua bo nọ miọnhomẹnamẹ dali, ṣigba na nugbo tọn, yé ma jẹagọdo yedelẹ gba.
6, 7. Naegbọn mí sọgan dọ dọ sinsẹ̀n-bibasi mítọn ma nọ hẹn agbọ́pemẹ wá?
6 Dile etlẹ yindọ vivẹnudido po linsinsinyẹn po, gọna azọ́n sinsinyẹn sọgan hẹn nuṣikọ agbasamẹ tọn wá, e sọgan hẹn pekọ po homẹmiọnnamẹ po wá to whenuena e yin wiwà na whẹwhinwhẹ́n dagbe de wutu. (Yẹwhehodọtọ 3:13, 22) Podọ be whẹwhinwhẹ́n dagbe de sọ tin hugan dehe yin nado má nugbo jiawu Biblu tọn lẹ hẹ kọmẹnu mítọn lẹ ya? Humọ, kanvinván mítọn nado nọgbẹ̀ sọgbe hẹ nujinọtedo walọyizan dagbe he yiaga Jiwheyẹwhe tọn lẹ ma nọ sọtẹ́n eyin yé yin yiyijlẹdo ale he mí nọ mọyi sọn yé mẹ lẹ go. (Howhinwhẹn lẹ 2:10-20) Eyin mí tlẹ tin to homẹkẹn glọ, mí nọ pọ́n ẹn taidi gbégbò de nado jiya na Ahọluduta Jiwheyẹwhe tọn wutu.—1 Pita 4:14.
7 Na nugbo tọn, agbàn Jesu tọn nọ miọnhomẹnamẹ, titengbe to whenue e yin yiyijlẹdo zinvlu gbigbọmẹ tọn he mẹ mẹhe gbọṣi zẹgẹ sinsẹ̀n lalo tọn glọ lẹ tin te go. Jiwheyẹwhe tindo owanyi sisosiso na mí podọ e ma nọ biọ nuhe mí ma sọgan wà lẹ to mí si. “Osẹ́n [Jehovah tọn lẹ] masọ yin nupẹnagbanmẹ gba.” (1 Johanu 5:3) Sinsẹ̀n nugbo Klistiani tọn, dile e yin didohia to Owe-wiwe mẹ do, ma yin kọgbidinamẹnu de. E họnwun dọ, sinsẹ̀n-bibasi mítọn ma nọ hẹn agbọ́pemẹ po flumẹjijẹ po wá.
“De Onú Pinpẹn Lẹpo do Apadopo”
8. Etẹwẹ nọ saba hẹn nuṣikọ gbigbọmẹ tọn wá?
8 Nuṣikọ gbigbọmẹ tọn he nọ dotukla mí lẹ nọ saba wá sọn agbàn pinpẹn susu dogọ he titonu ylankan ehe nọ zedo mí ji lẹ mẹ. Na “aihọn lẹpo . . . mlọnai to mẹylankan lọ mẹ” wutu, nuyiwadomẹji ylankan lẹ sù lẹdo mí. Yé sọgan hẹn agbọ́ pé mí bo de jlẹkajininọ Klistiani tọn mítọn pò. (1 Johanu 5:19) Afọdidona numadinu lẹ sọgan hẹn bẹwlu wá nuwiwa Klistiani tọn mítọn lẹ mẹ. Agbàn pinpẹn dogọ ehelẹ sọgan pẹnagbàn mí bo gbidikọna mí. Abajọ Biblu dotuhomẹna mí nado “de onú pinpẹn lẹpo do apadopo.”—Heblu lẹ 12:1-3.
9. Nawẹ yanwle agbasanu lẹ tọn sọgan hẹn agbàn pẹn mí gbọn?
9 Di dohia, ojlo zogbe aihọn tọn na yindidi, akuẹ, ayidedai, sadidi, po yanwle agbasanu devo lẹ tọn po sọgan yinuwado nulẹnpọn mítọn ji. (1 Johanu 2:15-17) Klistiani owhe kanweko tintan whenu tọn delẹ he doafọna adọkunnu lẹ hẹn gbẹzan yede tọn gẹdẹ to aliho sinsinyẹn mẹ. Apọsteli Paulu basi zẹẹmẹ dọmọ: “Mẹhe jlo nado yin adọkunnọ lẹ jai biọ whlepọn de mẹ, po omọ̀ de po, po onulu wantuntun susu he nọ gbleawunamẹ po, ehe hunkọ nọ siọ omẹ do viva po dindọ̀n po mẹ. Na owanyi akuẹ tọn wẹ adọ̀ owalọ oylan lẹpo tọn de: ehe whenuena gbẹtọ yí nukunkẹn do to dindin pé, yé buali sọn yise mẹ, bosọ yí homẹgble susu do sọwhán yede.”—1 Timoti 6:9, 10.
10. Etẹwẹ mí sọgan plọn dogbọn adọkunnu lẹ dali to oló Jesu tọn gando nudotọ de go mẹ?
10 Eyin nuṣikọna mí bọ mí jẹflumẹ to sinsẹ̀nzọn Jiwheyẹwhe tọn mẹ, be e sọgan yindọ yanwle agbasanu lẹ tọn wẹ to gbigbọnọ-yinyin mítọn finyọ́n hù ya? Ehe yọnbasi taun, dile e yin didohia do to oló Jesu tọn mẹ gando nudotọ de go. Jesu yí “tuklajẹ osaa lọ [kavi aihọn ehe] tọn po oklọ adọkun tọn po, po wantuntun onú devo lẹ tọn po” jlẹdo owùn lẹ go he nọ ‘biọ homẹ bo nọ finyọ́n’ okún ohó Jiwheyẹwhe tọn hù to ahun mítọn lẹ mẹ. (Malku 4:18, 19) Enẹwutu, Biblu na mí ayinamẹ dọmọ: “Mì gbọ owalọ mìtọn ni tin matin nukunkẹn; nuhe mì tindo ni pé mì: na e ko dọmọ, Yẹn ma to na jo we dai gbede, kavi gbẹ́ we gba.”—Heblu lẹ 13:5.
11. Nawẹ mí sọgan bẹ nuhe na pẹnagbàn mí lẹ do apadopo gbọn?
11 To whedelẹnu, e ma yin afọdidona onú susu dogọ lẹ wẹ nọ hẹn gbẹzan mítọn gẹdẹ gba, ṣigba nuhe mí nọ yí onú he mí ko tindo lẹ do wà. Mẹdelẹ sọgan tindo numimọ nuṣikọ tọn to numọtolanmẹ-liho na nuhahun sinsinyẹn agbasalilo tọn, okú mẹyiwanna lẹ tọn, kavi nuhahun ayimajai tọn devo lẹ wutu. Yé ko mọ nuhudo lọ nado nọ basi vọjlado lẹ sọn ojlẹ de mẹ jẹ devo mẹ. Asu po asi po de basi nudide nado zẹhudo ayidedai he yé yiwanna taun delẹ po tito he ma yin dandan tọn lẹ po ji. Na nugbo tọn, yé keje nutindo yetọn lẹ pọ́n bo bẹ nuhe gando tito mọnkọtọn go lẹpo do apadopo. Mímẹpo wẹ sọgan mọaleyi eyin mí nọ gbadopọnna nuyiwa po nutindo mítọn lẹ po sọn ojlẹ de mẹ jẹ devo mẹ, bo de onú pinpẹn he ma yin dandan tọn lẹpo do apadopo na onú nikaa ṣikọna mí bọ agbọ́ na pé alindọn mítọn lẹ.
Lẹnpọn Dagbenọ-Yinyin po Jlẹkajininọ po Yin Dandannu
12. Etẹwẹ nuṣiwa mítọn titi lẹ sọgan wà na mí?
12 Nuṣiwa mítọn titi lẹ, etlẹ yin to whẹho flinflin lẹ mẹ, sọgan hẹn gbẹzan mítọn gẹdẹ vudevude. Lehe ohó Davidi tọn lẹ yin nugbo sọ dọ: “Ylanwiwa ṣie ṣinyọ́n ota na mi; di agbàn pinpẹn, e pẹn hugan mi.” (Psalm 38:4) Diọdo nujọnu tọn lẹ bibasi nọ saba de agbàn pinpẹn mítọn lẹ pò.
13. Nawẹ lẹnpọn dagbenọ-yinyin sọgan gọalọna mí nado tindo pọndohlan jlẹkaji tọn gando lizọnyizọn mítọn go gbọn?
13 Biblu na mí tuli nado wleawuna “nuyọnẹn he pé po zinzin [kavi nugopipe nulẹnpọn tọn] po.” (Howhinwhẹn lẹ 3:21, 22) “Nuyọnẹn he sọn aga . . . nọ wà dẹẹdẹ,” kavi yin lẹnpọn dagbenọ, wẹ Biblu dọ. (Jakobu 3:17) Mẹdelẹ ko do magbọjẹ na yede nado sọzẹn hẹ mẹdevo lẹ to nuhe yé nọ wà to lizọnyizọn Klistiani tọn mẹ. Ṣigba Biblu na ayinamẹ dọmọ: “Gbọ omẹ dopodopo mìtọn ni mọdona azọ́n ede tọn whẹ́, whenẹnu wẹ e na tindo ayajẹ to ede homẹ kẹdẹ, e ma na yin mẹdevo tọn gba. Na omẹ dopodopo wẹ na hẹn agbàn ede tọn.” (Galatianu lẹ 6:4, 5) Nugbo wẹ dọ, apajlẹ dagbe Klistiani hatọ lẹ tọn sọgan na mí tuli nado sẹ̀n Jehovah po ahun lẹpo po, ṣigba nuyọnẹn he pé po lẹnpọn dagbenọ-yinyin po na gọalọna mí nado ze yanwle he sọgbe lẹ donukọnna míde to kọndopọmẹ hẹ ninọmẹ mítọn titi lẹ.
14, 15. Nawẹ mí sọgan do nuyọnẹn he pé hia to nukunpipedo nuhudo mítọn lẹ go to agbasa-liho podọ to numọtolanmẹ-liho gbọn?
14 Lẹnpọn dagbenọ-yinyin to whẹho he tlẹ sọgan taidi nuhe ma yin nujọnu sọmọ lẹ mẹ na gọalọna mí ma nado mọ nuṣikọ. Di dohia, be mí nọ wleawuna nuyiwa jlẹkaji tọn he nọ yidogọna agbasalilo dagbe lẹ ya? Lẹnnupọndo apajlẹ asu po asi po de tọn ji he nọ wadevizọn to alahọ Kunnudetọ Jehovah tọn lẹ tọn dopo mẹ. Yé ko mọ lehe nuyọnẹn he pé yiyizan nado glọnalina agbọ́pemẹ họakuẹ do. Asi lọ dọmọ: “Mahopọnna lehe azọ́n sọgan sù to mí si do, mí nọ tẹnpọn nado yìhọ diblayin to ogàn dopolọ mẹ to ozán lẹpo mẹ. Mí sọ nọ daihun lanmẹyiya tọn to gbesisọmẹ. Ehe ko gọalọna mí taun. Mí ko plọn nado yọ́n dogbó mítọn lẹ bo nọ yí yé do lẹnpọn mẹ to nuyiwa mítọn lẹ mẹ. Mí nọ tẹnpọn ma nado yí míde jlẹdo mẹhe huhlọn yetọn taidi dehe ma tindo dogbó lẹ go.” Be mí nọ dù núdùdù hùnsìn dagbenọ lẹ to gbesisọmẹ bo nọ gbọjẹ ganji ya? To paa mẹ, ayidonugo dagbe nina hlan agbasalilo mítọn sọgan de nuṣikọ pò to numọtolanmẹ-liho podọ to gbigbọ-liho.
15 Mẹdelẹ to mí mẹ tindo nuhudo vonọtaun lẹ. Di dohia, mẹmẹyọnnu Klistiani de ko wadevizọn to lizọnyizọn whenu-gigọ́ tọn mẹ to azọ́ndenamẹ avùnnukundiọsọmẹ tọn susu mẹ. E ko jẹazọ̀n sinsinyẹn susu, gọna azọ̀n agbasa wiwọ̀ tọn. Etẹwẹ nọ gọalọna ẹn nado duto ninọmẹ awusinyẹn tọn lẹ ji? E dọmọ: “Nujọnu wẹ e yin dọ yẹn ni mọ ojlẹ de, whenue yẹn sọgan nọ̀ ṣokẹdẹ bo vò. Lehe apọṣimẹ po agbọ́pemẹ lọ po to susudeji do, mọwẹ yẹn nọ tindo nuhudo ojlẹ ṣokẹdẹ-ninọ tọn do niyẹn nado hiawe bo gbọjẹ.” Nuyọnẹn he pé po nugopipe nulẹnpọn tọn po nọ gọalọna mí nado yọ́n nuhudo mídetiti tọn lẹ bo hẹn pekọwa na yé bosọ gbọnmọ dali dapana nuṣikọ gbigbọmẹ tọn.
Jehovah Jiwheyẹwhe Nọ Na Mí Huhlọn
16, 17. (a) Naegbọn nukunpipedo nuhudo gbigbọmẹ tọn mítọn lẹ go do yin onú titengbe? (b) Etẹwẹ aṣa nuyiwa mítọn egbesọegbesọ tọn lẹ dona bẹhẹn?
16 Na nugbo tọn, onú titengbe wẹ nado penukundo agbasalilo gbigbọmẹ tọn mítọn go. Eyin mí tindo haṣinṣan pẹkipẹki de hẹ Jehovah Jiwheyẹwhe, mí sọgan nọ mọ nuṣikọ to agbasa-liho, ṣigba onú ma na ṣikọna mí to sinsẹ̀n-bibasi etọn mẹ pọ́n gbede. Jehovah wẹ omẹ lọ he “to huhlọn na mẹhe nuṣikọna lẹ; bosọ do huhlọn e ji na ewọ he ma do huhlọn lẹ.” (Isaia 40:28, 29) Apọsteli Paulu, he ko mọ nugbo-yinyin hogbe ehelẹ tọn na ede, wlan dọmọ: “Mí ma yọ́n nudikọ; ṣigba eyin gbẹtọ mítọn gbonu tọn to dindọ̀n, ṣigba yè to gbẹtọ mítọn homẹ tọn hẹn jẹ yọyọ egbesọegbesọ.”—2 Kọlintinu lẹ 4:16.
17 Doayi hogbe lọ “egbesọegbesọ” go. Ehe zẹẹmẹdo dọ mí dona nọ yí awuwledainanu Jehovah tọn lẹ zan to azán dopodopo ji. Mẹdehlan de he ko wadevizọn po nugbonọ-yinyin po na owhe 43, tindo numimọ ojlẹ nuṣikọ agbasamẹ tọn po flumẹjijẹ po tọn lẹ. Ṣigba onú ma ṣikọna ẹn to gbigbọ-liho gba. E dọmọ: “Yẹn ko yí ì do basi aṣa nado nọ yawu fọ́n na yẹn nido sọgan yí whenu zan nado hodẹ̀ hlan Jehovah bo hia Ohó etọn whẹpo do bẹ azọ́n depope jẹeji. Aṣa nuyiwa egbesọegbesọ tọn ehe ko gọalọna mí nado doakọnnanu kakajẹ din.” Na nugbo tọn, mí sọgan ganjẹ huhlọn mẹhẹnlodo Jehovah tọn go eyin mí nọ hodẹ̀ hlan ẹn bo nọ lẹnayihamẹpọn do jẹhẹnu dagbe po opagbe etọn lẹ po ji to gbesisọmẹ, yèdọ “egbesọegbesọ.”
18. Homẹmiọnnamẹ tẹwẹ Biblu na nugbonọ he ko poyọnho kavi he to azọ̀njẹ lẹ?
18 Ehe yin alọgọnamẹnu titengbe na mẹhe tindo numọtolanmẹ flumẹjijẹ tọn na mẹhowhe kavi agbasamalo wutu lẹ. Omẹ mọnkọtọn lẹ sọgan mọ apọ̀, e ma yin na yé nọ yí yede jlẹdo mẹdevo lẹ go wutu wẹ gba, ṣigba na yé nọ yí nuhe wà yé te todin lẹ jlẹdo nuhe yé ko wà wayi lẹ go wutu. Lehe e yin homẹmiọnnamẹnu do sọ nado yọnẹn dọ Jehovah nọ doyẹyigona yọnhonọ lẹ! Biblu dọmọ: “Jẹgbakun gigo tọn wẹ ota owhànọ, eyin yè mọ ẹn to aliho dodo tọn ji.” (Howhinwhẹn lẹ 16:31) Jehovah yọ́n dogbó mítọn lẹ bo nọ yí nukun nujọnu tọn do pọ́n sinsẹ̀n-bibasi ahundopo tọn mítọn mahopọnna awugbopo mítọn lẹ. Podọ azọ́n dagbe he mí ko wà wayi lẹ ko yin kinkàndai do oflin Jiwheyẹwhe tọn mẹ bo ma sọgan yin súnsúnsún sẹ̀. Owe-wiwe na mí jide dọ: “Jiwheyẹwhe ma yin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyín etọn dali, na le mì to devizọnwa hlan mẹwiwe lẹ do, bosọ to bibasi i.” (Heblu lẹ 6:10) Lehe mímẹpo hùnhomẹ nado tindo mẹhe ko yin nugbonọ hlan Jehovah na owhe susu lẹ to ṣẹnṣẹn mítọn do sọ!
A Dike Nuṣikọna We Blo
19. Nawẹ alọnu hinhẹn ján to dagbewiwa mẹ nọ hẹn ale wá na mí gbọn?
19 Mẹsusu yise dọ mahẹ gbesisọ tọn tintindo to nuwiwa he biọ huhlọn agbasa tọn mẹ sọgan de nuṣikọ pò. Mọdopolọ, mahẹ tintindo to nuwiwa gbigbọmẹ tọn lẹ mẹ to gbesisọmẹ sọgan de agbọ́pemẹ numọtolanmẹ kavi gbigbọmẹ tọn depope pò. Biblu dọmọ: “Mì dike nuṣikọna mí to dagbewiwa mẹ blo: na míwlẹ na gbẹ̀n to whenuena ojlẹ sọ, eyin mí ma wàdidọ. Be enẹwutu le míwlẹ mọtẹn do, mì gbọ mí ni nọ wà dagbe hlan omẹ popo, humọ hlan yé he yin yise whédo tọn lẹ.” (Galatianu lẹ 6:9, 10) Doayi hogbe lọ lẹ “dagbewiwa” po “wà dagbe” po go. Ehe zẹẹmẹdo dọ mí dona yí nude wà. Na nugbo tọn, dagbewiwa na mẹdevo lẹ sọgan zọ́n bọ onú ma na ṣikọna mí to sinsẹ̀nzọn mítọn hlan Jehovah mẹ.
20. Gbẹdido nankọtọn lẹ wẹ mí dona dapana nado glọnalina numọtolanmẹ flumẹjijẹ tọn lẹ?
20 To alọ devo mẹ, gbẹdido podọ nuwiwa dopọ hẹ mẹhe nọ gbẹkọ osẹ́n Jiwheyẹwhe tọn go lẹ sọgan lẹzun agbàn pinpẹn he nọ hẹn nuṣikọnamẹ de. Biblu na mí avase dọmọ: “Zánnu pẹnzin, tọkẹ́n sọ pẹnzin; ṣigba homẹgble nulunọ tọn pẹnzin hú yé mẹawe lẹ.” (Howhinwhẹn lẹ 27:3) Nado glọnalina numọtolanmẹ flumẹjijẹ po nuṣikọ po tọn lẹ, mí dona dapana gbẹdido hẹ mẹhe nọ tẹdo pọndohlan agọ̀ lẹ go bo nọ dín aklọ̀n bosọ nọ mọhodọdo mẹdevo go lẹ.
21. Nawẹ mí sọgan yin asisa tulinamẹ tọn na mẹdevo lẹ to opli Klistiani tọn lẹ ji gbọn?
21 Opli Klistiani tọn lẹ yin awuwledainanu de sọn Jehovah dè he sọgan na mí huhlọn to gbigbọ-liho. Yé nọ hùn dotẹnmẹ dagbe dote na mí nado na tuli ode awetọ gbọn nuplọnmẹ po gbẹdido homẹmiọnnamẹ tọn po gblamẹ. (Heblu lẹ 10:25) Mímẹpo dona vánkan to agun mẹ nado nọ jlọmẹdote to whenuena mí to gblọndo na to opli lẹ ji kavi to mahẹ tindo to adà tito-to-whinnu lọ tọn de mẹ sọn oplò ji. Titengbe mẹhe yin nukọntọ taidi mẹplọntọ lẹ wẹ tindo azọngban lọ nado nọ na tuli mẹdevo lẹ. (Isaia 32:1, 2) Eyin etlẹ lẹzun dandan nado dotuhomẹnamẹ kavi gbẹnunamẹ, ayinamẹ lọ dona yin nina to aliho homẹmiọnnamẹ tọn mẹ. (Galatianu lẹ 6:1, 2) Na nugbo tọn, owanyi he mí tindo na mẹdevo lẹ na gọalọna mí nado sẹ̀n Jehovah matin nuṣikọ.—Psalm 133:1; Johanu 13:35.
22. Mahopọnna mapenọ-yinyin mítọn, naegbọn mí sọgan tindo tugbigbo?
22 Sinsẹ̀n-bibasi hlan Jehovah to ojlẹ opodo tọn ehe mẹ nọ biọ vivẹnudido. Podọ Klistiani lẹ ma vò sọn nugandomẹgo agbọ́pemẹ apọ̀nmẹ tọn, awufiẹsa numọtolanmẹ tọn, po ninọmẹ awusinyẹn tọn lẹ po si gba. Agbasa mapenọ mítọn yin madogánnọ, taidi núzinzan okò tọn. Etomọṣo, Biblu dọmọ: “Míwlẹ tindo adọkunnu he to núzinzan okọ́ tọn lẹ mẹ, na whanpẹ huhlọn tọn [kavi huhlọn he hugan jọwamọ tọn] nido yin Jiwheyẹwhe tọn, bo ma yin sọn míwlẹ mẹ gba.” (2 Kọlintinu lẹ 4:7) Mọwẹ, onú sọgan ṣikọna mí, ṣigba onú ni ma ṣikọna mí to gbigbọ-liho bo hẹn mí gbọjọ gbede blo. Kakatimọ, mì gbọ mí ni yí “tugbigbo . . . do dọmọ, [Jehovah] wẹ alọgọtọ ṣie.”—Heblu lẹ 13:6.
Dogbapọn Kleun De
• Agbàn pinpẹn tẹlẹ wẹ mí sọgan de do apadopo?
• Nawẹ mí sọgan nọ “wà dagbe” na Klistiani hatọ mítọn lẹ gbọn?
• Nawẹ Jehovah nọ gọalọna mí to whenuena mí tindo numọtolanmẹ nuṣikọ kavi flumẹjijẹ tọn gbọn?
[Yẹdide to weda 23]
Jesu yọnẹn dọ flumẹjijẹ he dẹn-to-aimẹ sọgan hẹn ayimajai wá na apọsteli lẹ
[Yẹdide to weda 24]
Mẹdelẹ ko zẹhudo ayidedai he yé yiwanna po tito he ma yin dandan tọn delẹ po ji
[Yẹdide to weda 26]
Mahopọnna madogán mítọn lẹ, Jehovah nọ yí nukun nujọnu tọn do pọ́n sinsẹ̀n-bibasi ahundopo tọn mítọn