Lehe Mí Sọgan Doafọna Ayajẹ Gbọn

TO OWHE vude die wayi, e yin kinkanse gbẹtọ lẹ to France, Allemagne, Grande-Bretagne po États-Unis po dọ, “Etẹwẹ e nọ biọ nado yin ayajẹnọ?” To mẹhe yin hokanse lọ lẹ mẹ, 89 to kanweko ji dọ dọ agbasalilo dagbe wẹ yin onú titengbe lọ; 79 to kanweko ji donù alọwle kavi gbẹdido pekọ hẹnwanamẹ tọn go; 62 to kanweko ji dlẹnalọdo ale he nọ wá sọn mẹjitọ-yinyin mẹ; podọ 51 to kanweko ji lẹndọ agbasazọ́n dagbe tintindo yin dandannu nado yin ayajẹnọ. Dile etlẹ yindọ suhugan gbẹtọ lẹ tọn nọ saba yin pinplọn dọ akuẹ ma nọ hẹn ayajẹ wá, 47 to kanweko ji mẹhe yin hokanse lọ lẹ tọn kudeji dọ e nọ wàmọ. Etẹwẹ kunnudenu lẹ dohia?

Tintan whẹ́, lẹnnupọndo kanṣiṣa he mẹsusu lẹndọ e tin to akuẹ po ayajẹ po ṣẹnṣẹn ji. Dodinnanu de heyin bibasi gando omẹ kanweko heyin akuẹnọ hugan lẹ go to États-Unis dohia dọ yé ma yin ayajẹnọ hugan omẹ paa lẹ. Humọ, dile etlẹ yindọ mẹsusu to États-Unis ko dibla hẹn agbasanu yetọn lẹ jideji whlaawe to owhe gbàn he wayi lẹ mẹ, azọ́nyọnẹntọ agbasalilo apọ̀nmẹ tọn lẹ dohia dọ yé ma lẹzun ayajẹnọ hugan dai gba. Na nugbo tọn, linlin de dọmọ: “To ojlẹ dopolọ gblamẹ, sọha mẹhe jẹazọ̀n apọṣimẹ tọn lẹ tọn jideji taun. Mẹdehuhu jọja aflanmẹ lẹ tọn jideji do whlaatọ̀n ji. Sọha gbẹdai lẹ tọn jideji do whlaawe ji.” To nudi otò voovo 50 mẹ, dodinnanutọ he gbadopọnna kanṣiṣa he tin to akuẹ po ayajẹ po ṣẹnṣẹn lẹ wá tadona kọ̀n dọ akuẹ ma sọgan họ̀ ayajẹ.

Enẹgodo, obá tẹ mẹ wẹ agbasalilo dagbe, alọwle ayajẹnọ po agbasazọ́n dagbe po sọgan hẹn ayajẹ wá jẹ? Na nugbo tọn, eyin mẹde dona tindo onú ehelẹ dandan whẹpo do yin ayajẹnọ, etẹwẹ dogbọn livi susu he ma tindo agbasalilo dagbe podọ mẹhe ma tindo alọwle ayajẹnọ lẹpo dali? Etẹwẹ dogbọn asu po asi po he ma tindo ovi lẹ podọ sunnu po yọnnu po he ma tindo agbasazọ́n dagbe lẹ dali? Be gbẹzan awubla tọn wẹ omẹ mọnkọtọn lẹpo pò na ya? Podọ, eyin ninọmẹ mẹhe tindo agbasalilo dagbe po alọwle ayajẹnọ po todin lẹ tọn wá diọ, be ayajẹ he mẹsusu lẹndọ yé tindo lọ na busẹ wẹ ya?

Be Mí to Ayajẹ Dín sọn Asisa He Sọgbe mẹ Ya?

Mẹlẹpo wẹ nọ jlo nado yin ayajẹnọ. Ehe ma yin nupaṣamẹ na Didatọ gbẹtọ tọn yin zẹẹmẹ-basina taidi ‘Jiwheyẹwhe ayajẹnọ,’ podọ gbẹtọ yin didá to apajlẹ Jiwheyẹwhe tọn mẹ. (1 Timoti 1:11; Gẹnẹsisi 1:26, 27) Enẹwutu, jọwamọnu wẹ e yin dọ gbẹtọvi lẹ ni nọ dín ayajẹ. Ṣogan, mẹsusu nọ mọ dọ ayajẹ go hinhẹn taidi yẹnkẹn hinhẹn do alọgogo mẹ—popolẹpo wẹ nọ dùdú kọnyinai po awubibọ po.

Ṣigba, e sọgan ko yindọ mẹdelẹ to vivẹnudo zẹjlẹgo nado tindo ayajẹ. Nuhe tamẹnuplọnmẹtọ Eric Hoffer lẹn niyẹn. E dọmọ: “Ayajẹ dindin yin dopo to asisa tangan ayajẹ matindo tọn lẹ mẹ.” Matin ayihaawe, ehe yin nugbo eyin mí to ayajẹ dín to fie ma sọgbe lẹ. To ninọmẹ enẹ mẹ, flumẹjijẹ po apọṣimẹ po kọ̀n janwẹ e sọgan plan mí jẹ. Vivẹnudido nado lẹzun adọkunnọ; kanvinván na yindidi po pipà po; afọdidona yanwle tonudidọ, ogbẹ́ gbẹtọvi tọn po akuẹzinzan tọn lẹ po; kavi gbẹzan ṣejannabi tọn po gbẹdudu afọdopolọji tọn po, popolẹpo wẹ nọ gboawupo nado hẹn ayajẹ wá. Abajọ, mẹdelẹ ko kẹalọyi pọndohlan doglẹ wekantọ de tọn, he dọmọ: “Eyin mí sọgan doalọtena vivẹnudido nado yin ayajẹnọ mí na penugo nado dugbẹ jẹ obá de mẹ”!

E jẹna ayidego dọ, dodinnanu heyin nùdego to bẹjẹeji hosọ ehe tọn sọ dohia dọ omẹ 4 to 10 ji lẹndọ dagbewiwa po alọgigọna mẹdevo lẹ po wẹ nọ hẹn ayajẹ wá. Podọ omẹ 1 to 4 ji zinnudeji dọ yise po nujikudo sinsẹ̀n tọn po nọ yí adà tangan de wà to ayajẹnọ-yinyin mẹ. E họnwun dọ, mí dona yí sọwhiwhe do gbadopọnna nuhe e nọ biọ taun nado yin ayajẹnọ. Hosọ he bọdego na gọalọna mí nado wàmọ.

[Yẹdide to weda 3]

Mẹsusu lẹndọ akuẹ, gbẹzan whẹndo tọn ayajẹnọ, kavi agbasazọ́n dagbe wẹ yin họnhungan ayajẹ tọn. Be hiẹ kẹalọyi linlẹn ehe ya?