Nuhe E Nọ Biọ Taun Nado Yin Ayajẹnọ

JEHOVAH, ‘Jiwheyẹwhe ayajẹnọ lọ’ po Jesu Klisti, ‘Huhlọnnọ ayajẹnọ dopo lọ’ po yọ́n nuhe e nọ biọ nado yin ayajẹnọ, hugan mẹdepope. (1 Timoti 1:11; 6:15) Enẹwutu, e mayin nupaṣamẹ dọ họnhungan ayajẹ tọn tin to Ohó Jiwheyẹwhe tọn, Biblu mẹ.—Osọhia 1:3; 22:7.

To Yẹwhehodidọ Osó ji tọn etọn he diyin taun lọ mẹ, Jesu basi zẹẹmẹ nuhe e nọ biọ nado yin ayajẹnọ tọn. E dọmọ: “Ayajẹnọ wẹ mẹhe” (1) nuhudo gbigbọmẹ tọn yetọn nọ duahunmẹna lẹ, (2) to awubla lẹ, (3) yin homẹmimiọnnọ lẹ, (4) huvẹ to hùhù bọ ovẹ́ to húhú na dodo wutu lẹ, (5) yin lẹblanunọ lẹ, (6) yin wiwenọ to ayiha mẹ lẹ, (7) yin jijọho-dintọ lẹ, (8) yin homẹkẹndo na dodo tọn wutu lẹ, podọ (9) yin vivlẹko bo yin homẹkẹndo na ewọ tọn wutu lẹ.—Matiu 5:3-11, NW.a

Be Hodidọ Jesu Tọn lẹ Sọgbe Ya?

Nugbo-yinyin delẹ to hodidọ Jesu tọn lẹ mẹ tọn dona yin zẹẹmẹ basina to kleun mẹ. Mẹnu wẹ na jẹagọdo dọ mẹhe yin homẹmimiọnnọ, lẹblanunọ, jijọho-dintọ, podọ wiwenọ to ayiha mẹ na yin ayajẹnọ hú mẹhe yin adìnọ, avùndá-daitọ bo masọ tindo lẹblanu depope?

Ṣigba, e sọgan paṣa mí lehe mẹhe huvẹ to hùhù bọ ovẹ́ to húhú na dodo wutu lẹ kavi mẹhe to awubla lẹ sọgan yin yiylọdọ ayajẹnọ do. Omẹ mọnkọtọn lẹ tindo pọndohlan he sọgbe hẹ lẹnpọn dagbe gando ninọmẹ aihọn tọn lẹ go. Yé ‘to hunwẹn bo to awhádo na osùnú lẹpo he to yinyin wiwà’ to ojlẹ mítọn mẹ. (Ezekiẹli 9:4) Ninọmẹ ehe ma nọ hẹn yé jaya gba. Ṣigba, eyin yé plọnnu dogbọn lẹndai Jiwheyẹwhe tọn nado hẹn ninọmẹ dodowiwa tọn lẹ wá aigba ji bo hẹn whẹdida-dodo wá na mẹhe yin kọgbidina lẹ dali, ayajẹ yetọn nọ gọfla.—Isaia 11:4.

Wanyina dodowiwa sọ nọ whàn gbẹtọ lẹ nado blawu, na yé nọ gboawupo gbọzangbọzan nado wà nuhe sọgbe wutu. Enẹwutu, nuhudo gbigbọmẹ tọn yetọn nọ duahunmẹna yé. Omẹ mọnkọtọn lẹ nọ jlo nado dín anademẹ sọn Jiwheyẹwhe dè na yé yọnẹn dọ ewọ kẹdẹ wẹ sọgan gọalọnamẹ nado duto madogán lẹ ji.—Howhinwhẹn lẹ 16:3, 9; 20:24.

Mẹhe to awubla, he huvẹ to hùhù bọ ovẹ́ to húhú na dodo wutu lẹ, po mẹhe nuhudo gbigbọmẹ tọn yetọn nọ duahunmẹna lẹ po yọ́n nujọnu-yinyin haṣinṣan dagbe tintindo hẹ Mẹdatọ lọ tọn. Haṣinṣan dagbe tintindo hẹ gbẹtọvi lẹ nọ yidogọna ayajẹ, ṣigba haṣinṣan dagbe tintindo hẹ Jiwheyẹwhe sọ nọ wà nususu humọ. Mọwẹ, ahundoponọ he yiwanna nuhe sọgbe bo nọ jlo nado kẹalọyi anademẹ Jiwheyẹwhe tọn lẹ, sọgan yin yiylọdọ ayajẹnọ na nugbo tọn.

Ṣigba, e sọgan vẹawuna we nado yise dọ mẹhe yin homẹkẹndo bo yin vivlẹko de ni yin ayajẹnọ. Ṣogan, nugbo wẹ ehe dona yin, na Jesu lọsu wẹ dọ mọ. To whelọnu lo, nawẹ hogbe etọn lẹ dona yin nukunnumọjẹemẹ gbọn?

Yin Homẹkẹndo, Ṣogan Yin Ayajẹnọ—Gbọnna?

Doayi e go dọ Jesu ma dọ dọ vlẹko po homẹkẹn po na yede nọ hẹn ayajẹ wá gba. E dọmọ: “[Ayajẹnọ] wẹ yé he yè to homẹkẹndo na dodo tọn wutu lẹ; . . . whenuena gbẹtọ lẹ na to vivlẹ mì kò, . . . na ṣie wutu.” (Matiu 5:10, 11) Enẹwutu, ayajẹ nọ wá kiki eyin mẹde to oyà homẹkẹn tọn ji na hodotọ Klisti tọn yinyin wutu podọ na e to ogbẹ̀ etọn zan to kọndopọmẹ hẹ nunọwhinnusẹ́n dodo he Jesu plọnmẹ lẹ wutu.

Nuhe jọ do Klistiani fliflimẹ tọn lẹ go do ehe hia hezeheze. Tòhódọtọ Ju lẹ tọn, yèdọ whẹdatẹn daho Ju lẹ tọn, “ylọ apọsteli lẹ, bo linú yé, [bosọ] dosẹ́n na yé dọ, yé sọ dọho to oyín Jesu tọn mẹ ba blo, yé sọ jo yé do na yé ni yì.” Nawẹ apọsteli lẹ yinuwa gbọn? ‘Yé sọ yì sọn agun Tòhódọtọ lẹ tọn nukọn bo to ayajẹ na yè lẹn yé jẹ nado jiya na oyín etọn wutu. Podọ egbesọegbesọ to tẹmpli mẹ podọ to owhé dopodopo gbè, yé ma nọ omẹ ma plọn, yé masọ nọ yẹwheho Jesu Klisti tọn ma dọ.’—Owalọ lẹ 5:40-42; 13:50-52.

Apọsteli Pita tá hinhọ́n do kanṣiṣa he tin to vlẹko po ayajẹ po ṣẹnṣẹn ji yinukọn dogọ. E wlan dọmọ: “Eyin yè to mì vlẹ na oyín Klisti tọn wutu, [ayajẹnọ] wẹ mì: na gbigbọ gigo tọn po Jiwheyẹwhe tọn po jẹ do mì ji.” (1 Pita 4:14) Mọwẹ, dile etlẹ yindọ yajiji ma yin awuvivinu de, yajiji Klistiani de tọn na nuhe sọgbe wiwà wutu nọ hẹn ayajẹ wá, yèdọ ayajẹ he nọ wá sọn yinyọnẹn mẹ dọ yè mọ gbigbọ wiwe Jiwheyẹwhe tọn yí. Nawẹ gbigbọ wiwe Jiwheyẹwhe tọn tindo kanṣiṣa hẹ ayajẹ gbọn?

Azọ́n Agbasalan Tọn lẹ Kavi Sinsẹ́n Gbigbọ Tọn?

Mẹhe nọ setonuna Jiwheyẹwhe taidi gandutọ lẹ kẹdẹ ji wẹ gbigbọ wiwe Jiwheyẹwhe tọn nọ yinuwa do. (Owalọ lẹ 5:32) Jehovah ma nọ na gbigbọ etọn hlan mẹhe nọ wà “azọ́n agbasalan tọn lẹ” gba. Azọ́n ehelẹ wẹ “ayọdide, ogalilọ, mawé, wantuntun, boṣiọ-sinsẹ̀n, owọ́n, okẹ̀n, atẹ̀, plọngiglọ, nuvẹun, ahànnumu, gbẹduzẹjlẹgo, po onú mọhunkọ lẹ po.” (Galatianu lẹ 5:19-21) Nugbo wẹ dọ, to aihọn egbehe tọn mẹ, “azọ́n agbasalan tọn lẹ” wẹ gbayipe hugan. Etomọṣo, mẹhe nọ doalọ to yé mẹ lẹ ma nọ duvivi ayajẹ nujọnu tọn podọ tẹgbẹ̀ tọn gba. Kakatimọ, onú ehelẹ wiwà nọ hẹn haṣinṣan dagbe he mẹde tindo hẹ hẹnnumẹ, họntọn po mẹyinyọnẹn lẹ po gble. Humọ, Ohó Jiwheyẹwhe tọn dọ dọ mẹhe “nọ wà onú nẹlẹ nkọ ma to ogú ahọludu Jiwheyẹwhe tọn na dù.”

To alọ devo mẹ, Jiwheyẹwhe nọ na gbigbọ etọn hlan mẹhe nọ wleawuna ‘sinsẹ́n gbigbọ tọn.’ Jẹhẹnu he sinsẹ́n ehe bẹhẹn lẹ wẹ “owanyi, ayajẹ, jijọho, linsinyẹn, homẹdagbe, dagbewà, [yise], walọmimiọn, mawazẹjlẹgo.” (Galatianu lẹ 5:22, 23) Eyin mí do jẹhẹnu ehelẹ hia, mí nọ jla aimẹ do nado tindo haṣinṣan jijọho tọn hẹ mẹdevo lẹ podọ hẹ Jiwheyẹwhe, ehe nọ dekọtọn do ayajẹ nujọnu tọn mẹ. (Pọ́n apotin.) Hú popolẹpo, gbọn owanyi, homẹdagbe, dagbewà, po jẹhẹnu Jiwheyẹwhe tọn devo lẹ po didohia dali, mí nọ hẹn homẹhun Jehovah bo nọ tindo todido ayajẹnọ ogbẹ̀ madopodo tọn to aihọn yọyọ dodowiwa Jiwheyẹwhe tọn mẹ.

Nudide de Wẹ Ayajẹ Yin

To whenuena Wolfgang po asi etọn Brigitte po, he nọ nọ̀ Allemagne, bẹ Biblu pinplọn jẹeji po zohunhun po, yé tindo agbasanu susu he gbẹtọ lẹ nọ pọnhlan taidi dandannu nado yin ayajẹnọ. Yé yin jọja bosọ tindo agbasalilo. Yé nọ do avọ̀ akuẹgegenu lẹ, nọ nọ̀ owhé whanpẹnọ de gbè, bo tindo agbasazọ́n dagbe de. Yé nọ yí suhugan whenu yetọn tọn zan nado doafọna agbasanu susu dogọ, ṣogan ehe ma hẹn ayajẹ nujọnu tọn wá na yé. Ṣigba, to madẹnmẹ, Wolfgang po Brigitte po basi nudide sinsinyẹn de. Yé jẹ whenu susu dedovo ji bo dovivẹnu dogọ nado doafọna gbigbọnu lẹ bosọ dín aliho lẹ nado dọnsẹpọ Jehovah dogọ. To madẹnmẹ, nudide yetọn hẹn diọdo wá walọyizan yetọn mẹ, podọ taidi kọdetọn de, ehe whàn yé nado hẹn gbẹzan yetọn bọawu bo wadevizọn taidi gbehosọnalitọ, kavi wẹndagbe-jlatọ whenu-gigọ́ Ahọluduta tọn. Todin, yé to devizọnwa taidi mẹdezejotọ́ to alahọ Kunnudetọ Jehovah tọn lẹ tọn mẹ to Allemagne. Humọ, yé to ogbè Asia tọn de plọn nado sọgan gọalọna jonọ lẹ nado plọn nugbo he tin to Ohó Jiwheyẹwhe tọn, Biblu mẹ.

Be asu po asi po ehe mọ ayajẹ nujọnu tọn ya? Wolfgang dọmọ: “Sọn whenue gbọ́n mí hẹn alọnu ján dogọ to afọdidona gbigbọnu lẹ mẹ, ayajẹ mítọn ko sudeji podọ mí ko duvivi pekọ susu dogọ tọn. Sinsẹ̀n-bibasi hlan Jehovah po ahun lẹpo po sọ hẹn alọwle mítọn lodo. Mí ko tindo alọwle ayajẹnọ de dai, ṣigba azọngban po yanwle mítọn lẹ po gbọnvo. Todin, mí to afọdona yanwle dopolọ to kọndopọmẹ.”

Etẹwẹ E Nọ Biọ Nado Yin Ayajẹnọ?

Nado dọ ẹ doglido: Dapana “azọ́n agbasalan tọn lẹ,” bo wleawuna ‘sinsẹ́n gbigbọ Jiwheyẹwhe tọn.’ Nado yin ayajẹnọ, mí dona jlo vẹkuvẹku nado tindo haṣinṣan pẹkipẹki hẹ Jiwheyẹwhe. Mẹhe nọ vánkan nado jẹ yanwle ehe kọ̀n na sọgbe hẹ zẹẹmẹ he Jesu basi gando gbẹtọ ayajẹnọ go.

Enẹwutu, ma gbọn nuṣiwa dali wá tadona kọ̀n dọ e ma yọnbasi na we nado yin ayajẹnọ blo. Nugbo wẹ dọ, hiẹ sọgan nọma tindo agbasalilo dagbe todin kavi hiẹ tlẹ sọgan to pipehẹ nuhahun lẹ to alọwle towe mẹ. Vlavo hiẹ masọ sọgan duvivi ale mẹjitọ-yinyin tọn lẹ ba, kavi hiẹ sọgan to tuklajẹ nado mọ agbasazọ́n dagbe de. E sọgan yindọ apò towe masọ nọ pẹn di dai ba. Mahopọnna ehe lẹpo, gboadọ; whẹwhinwhẹ́n depope matin dọ hiẹ ni hẹn todido bu! Gandudu Ahọluduta Jiwheyẹwhe tọn na hẹn pọngbọ wá na nuhahun ehelẹ podọ na susu devo lẹ. Na nugbo tọn, to madẹnmẹ, Jehovah Jiwheyẹwhe na hẹn opagbe etọn he psalm-kantọ lọ kandai di dọmọ: “Ahọludu madopodo de wẹ ahọludu towe, . . . Hiẹ kẹ̀ alọ towe, bosọ hẹnnupekọna ojlo [nutogbẹ̀] lẹpo tọn.” (Psalm 145:13, 16) Dile devizọnwatọ Jehovah tọn livi susu lẹdo aihọn pé sọgan dekunnu etọn do, opagbe jidenamẹ Jehovah tọn ehe hinhẹn do ayiha mẹ na yidogọna ayajẹ towe tlala to egbehe.—Osọhia 21:3.

[Nudọnamẹ Odò Tọn]

[Apotin/Yẹdide to weda 6]

Nuhe Nọ Yidogọna Ayajẹ Lẹ

Owanyi didohia na whàn mẹdevo lẹ nado yiwanna hiẹ lọsu.

Jijọho na gọalọna we nado dapana gbemanọpọ to haṣinṣan towe lẹ mẹ.

Linsinyẹn nọ gọalọnamẹ nado gbọṣi ayajẹ mẹ etlẹ yin to whlepọn glọ.

Homẹdagbe na dọ̀n mẹdevo lẹ sẹpọ we.

Dagbewà didohia na whàn mẹdevo lẹ nado gọalọna we to whenuena hiẹ tin to nuhudo mẹ.

Yise na hẹn we dejido anademẹ owanyinọ Jiwheyẹwhe tọn go.

Walọmimiọn na hẹn vivomẹninọ ahun, ayiha po agbasa mẹ tọn po wá na we.

Mawazẹjlẹgo na zọ́n bọ nuṣiwa towe lẹ na depò.

[Yẹdide to weda 7]

Nado yin ayajẹnọ, hiẹ dona hẹn pekọwa na nuhudo gbigbọmẹ tọn towe lẹ