Mì Họ́ Mìde Sọta “Ogbè Jonọ lẹ Tọn”
“Jonọ wẹ yé ma nọ hodo ṣigba bo na họnyi sọn e dè: na yé ma yọ́n ogbè jonọ lẹ tọn wutu.”—JOHANU 10:5.
1, 2. (a) Etẹwẹ yin nuyiwa Malia tọn to whenuena Jesu ylọ yinkọ etọn, podọ nuhe Jesu dọ jẹnukọn tẹwẹ nujijọ ehe dohia? (b) Etẹwẹ nọ gọalọna mí nado gbọṣi Jesu dè?
JESU he ko yin finfọnsọnku to pinpọ́n nawe he ṣite to yọdò etọn he ko jẹvọ́ lọ kọ̀n. E yọ́n nawe lọ ganji. Malia Magdaleni wẹ. Nudi owhe awe jẹnukọn, Jesu ko tún in dote sọn nuyiwadomẹji aovi tọn si. Sọn whenẹnu gbọ́n wẹ e ko to Jesu po apọsteli etọn lẹ po hodo, bo nọ penukundo nuhudo egbesọ tọn yetọn lẹ go. (Luku 8:1-3) Ṣigba todin, Malia to avivi bo to awubla na Jesu ko yin hùhù to nukun etọn mẹ bọ dehe sọ ylan hugan, oṣiọ etọn lọsu ma tin to finẹ ba! Enẹwutu Jesu kanse e dọmọ: “Nawe, etẹwutu hiẹ to avivi? Mẹnu wẹ hiẹ to dindin?” Malia lẹndọ opá-họ́tọ lọ wẹ, enẹwutu e gblọn na ẹn dọ: “Mẹdaho, eyin hiẹ ko ze e sọn ofi, dọ ofi he hiẹ tẹ́ ẹ do na mi, yẹn nasọ ze e sẹ.” Enẹgodo Jesu dọmọ: “Malia”! To afọdopolọji, e yọ́n aliho he mẹ Jesu ko nọ dọho na ẹn te. “Mẹplọntọ”! wẹ e dawhá dọ po ayajẹ po bo tẹdo e go.—Johanu 20:11-18.
2 Kandai ehe do nuhe Jesu ko dọ jẹnukọn hia to aliho he whànmẹ de mẹ. Gbọn ede yiyijlẹdo lẹngbọhọtọ de go podọ hodotọ etọn lẹ do lẹngbọ lẹ go dali, e dọ dọ lẹngbọhọtọ nọ ylọ oyín lẹngbọ etọn lẹ tọn podọ yé yọ́n ogbè etọn. (Johanu 10:3, 4, 14, 27, 28) Na nugbo tọn, dile lẹngbọ nọ yọ́n lẹngbọhọtọ etọn do, mọwẹ Malia yọ́n Klisti, Lẹngbọhọtọ etọn do niyẹn. Nudopolọ sọ yin nugbo gando hodotọ Jesu tọn lẹ go to egbehe. (Johanu 10:16) Kẹdẹdile otó lẹngbọ tọn nọ hẹn ẹn penugo nado tunwun ogbè lẹ go bo gbọṣi lẹngbọhọtọ etọn dè do, mọwẹ wuntuntun gbigbọmẹ tọn mítọn na gọalọna mí nado nọ zinzọnlin afọsu-afọsi to afọdòmẹ Lẹngbọhọtọ Dagbe mítọn, Jesu Klisti tọn mẹ do niyẹn.—Johanu 13:15; 1 Johanu 2:6; 5:20.
3. Kanbiọ tẹlẹ wẹ apajlẹ Jesu tọn gando lẹngbọ lẹ go fọndote?
3 Nalete, sọgbe hẹ apajlẹ enẹ dopolọ, e mayin dọ nugopipe lẹngbọ tọn nado yọ́n ogbè gbẹtọ tọn lẹ nọ hẹn ẹn penugo nado yọ́n họntọn etọn lẹ kẹdẹ wẹ gba, ṣigba e sọ nọ gọalọna ẹn nado yọ́n kẹntọ etọn lẹ ga. Ehe yin nujọnu na mí tindo kẹntọ ayiha gigẹdẹnọ lẹ wutu. Mẹnu wẹ yé? Nawẹ yé nọ yinuwa gbọn? Nawẹ mí sọgan basi hihọ́na mídelẹ gbọn? Nado dindona, mì gbọ mí ni pọ́n onú devo he Jesu dọ to apajlẹ lẹngbọ lẹ tọn he e na mẹ.
‘Mẹhe Ma Biọ E Mẹ Gbọn Họngbo Ji’
4. Sọgbe hẹ apajlẹ lẹngbọhọtọ tọn, mẹnu wẹ lẹngbọ lẹ hodo, podọ mẹnu wẹ yé ma hodo?
4 Jesu dọmọ: “Mẹhe biọ e mẹ gbọn họngbo ji, ewọ wẹ lẹngbọhọtọ lẹngbọ lẹ tọn de. Ewọ lọ wẹ họ̀njidetọ hùnhọ̀n na; lẹngbọ lẹ sọ sè ogbè etọn: ewọ sọ ylọ oyín lẹngbọ etọn lẹ tọn, bosọ plan yé jẹgbonu. Whenuena e hẹn etọn titi lẹ jẹgbonu, e yí nukọn na yé, lẹngbọ lẹ sọ hodo e, na yé yọ́n ogbè etọn wutu. Jonọ wẹ yé ma nọ hodo ṣigba bo na họnyi sọn e dè: na yé ma yọ́n ogbè jonọ lẹ tọn wutu.” (Johanu 10:2-5) Doayi e go dọ whlaatọ̀n wẹ Jesu yí hogbe lọ “ogbè” zan. E dlẹnalọdo ogbè lẹngbọhọtọ de tọn whlaawe, ṣigba alọdlẹndonu atọ̀ntọ lọ yin hlan “ogbè jonọ lẹ tọn.” Jonọ nankọtọn wẹ Jesu to alọdlẹndo?
5. Naegbọn mí ma nọ do johẹmẹ hia jonọ wunmẹ heyin nùdego to Johanu weta 10 mẹ?
5 Jesu ma to hodọdo jonọ he johẹmẹ kavi owanyi nọ yin didohia ji gba. (Heblu lẹ 13:2) To apajlẹ Jesu tọn mẹ, jonọ lọ mayin oylọ-basina gba. E “ma biọ apó lẹngbọ tọn mẹ gbọn họngbo ji, ṣigba hẹji gbọn aliho devo, ajotọ de wẹ ewọ podọ whébẹtọ.” (Johanu 10:1) Mẹnu wẹ omẹ tintan he Ohó Jiwheyẹwhe tọn dlẹnalọdo taidi ajotọ podọ whébẹtọ? Satani Lẹgba wẹ. Mí mọ kunnudenu ehe tọn to owe Gẹnẹsisi tọn mẹ.
Whla Tintan He Ogbè Jonọ Tọn Yin Sisè
6, 7. Naegbọn Satani sọgan yin yiylọdọ jonọ podọ ajotọ?
6 Gẹnẹsisi 3:1-5 basi zẹẹmẹ lehe ogbè jonọ tọn yin sisè to aigba ji to tintan whenu do tọn. Kandai lọ dọ dọ Satani yí odàn de zan do dọnsẹpọ yọnnu tintan lọ, Evi, bo dọho na ẹn to aliho oklọ tọn mẹ. Nugbo wẹ dọ Satani mayin yiylọdọ “jonọ” to kandai ehe mẹ. Etomọṣo, nuyiwa etọn lẹ dohia dọ to aliho susu mẹ, e tin taidi jonọ heyin alọdlẹndo to apajlẹ Jesu tọn heyin kinkàndai to Johanu weta 10 mẹ. Mì gbọ mí ni gbadopọnna aliho he mẹ nuyiwa yetọn lẹ sọzẹn te delẹ.
7 Jesu dọ dọ jonọ lọ gbọ̀n aliho gigẹdẹ lẹ do dọnsẹpọ lẹngbọ he e jlo na wle to apó lọ mẹ lẹ. Mọdopolọ, Satani dọnsẹpọ Evi gbọ̀n aliho oklọ tọn mẹ bo yí odàn de zan. Mẹdọnsẹpọ oklọ tọn ehe do mẹhe Satani yin na nugbo tọn hia—yèdọ danuwatọ ayiha gigẹdẹnọ de. Humọ, linlẹn jonọ he biọ apó lọ mẹ tọn wẹ nado fìn lẹngbọ núnọ lọ tọn lẹpo. Na nugbo tọn, e ylan hú ajotọ, na e sọ to ayiha kàn nado “hù, bo vasudo.” (Johanu 10:10) To aliho dopolọ mẹ, Satani lọsu yin ajotọ. Gbọn kiklọ Evi dali, e fìn mẹdezejo pete etọn sọn Jiwheyẹwhe si. Humọ, Satani sọ hẹn okú plá whẹndo gbẹtọvi tọn. Enẹwutu, mẹhutọ wẹ e yin.
8. Nawẹ Satani slokọna ohó po mẹwhinwhàn Jehovah tọn lẹ po gbọn?
8 Nugbonọ-mayin Satani tọn sọawuhia to aliho he mẹ e slokọna ohó po mẹwhinwhàn Jehovah tọn lẹ po te. ‘Ojé, Jiwheyẹwhe ko dọmọ mì ma na dù to atin lẹ mẹ depope?’ wẹ e kanse Evi. Satani doyẹklọmẹ taidi mẹhe jọsi, he to tintẹnpọn nado dọmọ: ‘Naegbọn Jiwheyẹwhe ka na yin hẹngogonọ sọmọ?’ E yidogọ dọ: “Jiwheyẹwhe yọnẹn dọ azán he gbè mìwlẹ dù to e mẹ te, whenẹnu wẹ yè na hùn nukun mìtọn.” Doayi nuhe e dọ go: “Jiwheyẹwhe yọnẹn.” Satani gbọnmọ dali to didọmọ: ‘Nuhe Jiwheyẹwhe yọnẹn lẹpo wẹ n’yọnẹn. N’yọ́n linlẹn etọn lẹ, podọ oylan dódó wẹ.’ (Gẹnẹsisi 2:16, 17; 3:1, 5) E blawu dọ Evi po Adam po ma họ̀nna ogbè jonọ ehe tọn. Kakatimọ, yé dotoaina ẹn bo hẹn dindọ̀n plá yedelẹ po kúnkàn yetọn lẹ po.—Lomunu lẹ 5:12, 14.
9. Naegbọn mí dona donukun nado sè ogbè jonọ lẹ tọn to egbehe?
9 To egbehe, Satani nọ yí aliho mọnkọtọn lẹ zan nado klọ omẹ Jiwheyẹwhe tọn lẹ. (Osọhia 12:9) Ewọ wẹ ‘otọ́ lalo tọn,’ podọ mẹhe taidi ewọ bo nọ tẹnpọn nado klọ devizọnwatọ Jiwheyẹwhe tọn lẹ, yin ovi etọn lẹ. (Johanu 8:44) Mì gbọ mí ni gbadopọnna aliho delẹ he mẹ ogbè jonọ ehelẹ tọn nọ yin sisè te to egbehe.
Lehe Ogbè Jonọ lẹ Tọn Nọ Yin Sisè Gbọn to Egbehe
10. Etẹwẹ yin dopo to aliho he mẹ ogbè jonọ lẹ tọn to yinyin sisè te?
10 Linlẹn oklọ tọn lẹ. Apọsteli Paulu dọmọ: “Mì yin omẹ yè yí oplọn wunmẹ devo he jẹagọ do dọ̀n danpé blo.” (Heblu lẹ 13:9) Oplọn kavi nuplọnmẹ nankọtọn lẹ wẹ? To whenuena e yindọ yé sọgan ‘hẹn mí danpé,’ e họnwun dọ Paulu to alọdlẹndo nuplọnmẹ he nọ dekanpona jlẹkajininọ gbigbọmẹ tọn mítọn lẹ. Onù mẹnu lẹ tọn mẹ wẹ nuplọnmẹ wunmẹ devo mọnkọtọn lẹ nọ tọ́nsọn? Paulu dọna pipli mẹho Klistiani lẹ tọn de dọmọ: “To mìlọsu mẹ wẹ sunnusi lẹ na fọ́n sọn bo na to onú agọ̀ dọ, nado dọ̀n nuplọntọ lẹ do godo yetọn.” (Owalọ lẹ 20:30) Na nugbo tọn, dile e te do to azán Paulu tọn gbè, mẹdelẹ he ko yin apadewhe agun Klistiani tọn dai to tintẹnpọn todin nado klọ lẹngbọ lẹ gbọn “onú agọ̀” lẹ didọ dali—yèdọ nugbo daa po lalo mlẹnmlẹn lẹ po. Dile apọsteli Pita dọ do, yé nọ yí “ohó oklọ tọn” lẹ zan—ohó he nọ jlo na taidi nugbo ṣigba heyin nuvọ́ mlẹnmlẹn lẹ.—2 Pita 2:3.
11. Nawẹ nuhe yin didọ to 2 Pita 2:1, 3 mẹ de aliho nuyiwa po yanwle atẹṣitọ lẹ tọn po gbà gbọn?
11 Pita de aliho nuyiwa atẹṣitọ lẹ tọn gbà yinukọn dogọ to whenuena e dọ dọ yé na “gbọn nuglọ hẹn aliho plọngiglọ dindọ̀n tọn biọ mì mẹ.” (2 Pita 2:1, 3) Kẹdẹdile ajotọ heyin alọdlẹndo to apajlẹ Jesu tọn mẹ ma biọ apó lẹngbọ lẹ tọn mẹ “gbọn họngbo ji, ṣigba hẹji gbọn aliho devo” do, mọwẹ atẹṣitọ lẹ nọ dọnsẹpọ mí to aliho wlẹnwin tọn lẹ mẹ do. (Galatianu lẹ 2:4; Juda 4) Etẹwẹ yin yanwle yetọn? Pita yidogọ dọmọ: ‘Yé na yí mì zan.’ Na nugbo tọn, mahopọnna nudepope he atẹṣitọ lẹ sọgan dọ nado suwhẹna yede, yanwle tangan danuwatọ lẹ tọn wẹ nado “fìnnú bo hù, bo vasudo.” (Johanu 10:10) Mì họ́ mìde sọta jonọ enẹlẹ!
12. (a) Nawẹ ogbè jonọ lẹ tọn sọgan yin sisè gbọn mẹhe mí nọ dogbẹ́ hẹ lẹ gblamẹ gbọn? (b) Nawẹ ayiha wintinwintin he jonọ lẹ nọ yizan to egbehe taidi Satani tọn lẹ gbọn?
12 Gbẹdido ylankan. Ogbè jonọ lẹ tọn sọgan yin sisè gbọn mẹhe mí nọ dogbẹ́ hẹ lẹ gblamẹ. Na taun tọn, gbẹdido ylankan sọgan ze jọja lẹ do owù mẹ. (1 Kọlintinu lẹ 15:33) Flindọ Evi wẹ Satani dọnsẹpọ jẹnukọn—na e yọnẹn dọ owhe po numimọ etọn po whè hugan Adam tọn. E diọlinlẹn na ẹn dọ Jehovah ko gbọn hẹngogo dali glọnalina mẹdekannujẹ etọn. Na nugbo tọn, lalo pete wẹ ehe yin. Jehovah yiwanna gbẹtọvi he e dá lẹ bosọ nọ penukundo dagbemẹ-ninọ yetọn go. (Isaia 48:17) Mọdopolọ to egbehe, jonọ lẹ nọ tẹnpọn nado diọlinlẹn na mì jọja lẹ dọ mẹjitọ Klistiani mìtọn lẹ to aliglọnna mẹdekannujẹ mìtọn. Nawẹ jonọ mọnkọtọn lẹ sọgan yinuwado mì ji gbọn? Viyọnnu Klistiani de yigbe dọmọ: “Na ojlẹ de, klasigbẹ́ ṣie lẹ dekanpona yise ṣie jẹ obá de mẹ. Yé nọ to didọna mi gbọzangbọzan dọ sinsẹ̀n ṣie nọ dosẹ́n namẹ zẹjlẹgo bosọ nọ biọ nususu to mẹsi.” Ṣogan, nugbo lọ wẹ yindọ mẹjitọ mìtọn lẹ yiwanna mì. Enẹwutu eyin wehọmẹvigbẹ́ mìtọn lẹ to tintẹnpọn nado diọlinlẹn na mì nado hẹn jidide bu to mẹjitọ mìtọn lẹ mẹ, mì họ́ mìde ma nado yin kiklọ taidi Evi.
13. Nudide nuyọnẹn tọn tẹwẹ Davidi basi, podọ aliho tẹ mẹ wẹ mí sọgan hodo apajlẹ etọn te?
13 Psalm-kantọ Davidi dọ gando gbẹdido ylankan go dọmọ: “Yẹn ma sinai hẹ mẹvọ́nu lẹ, mọ yẹn ma na biọ họmẹ hodo [yé he nọ whlá nuhe yé yin lẹ, NW ] gba.” (Psalm 26:4) Be a sọ doayi jijọ ylankan he jonọ lẹ tindo go ya? Yé nọ whlá nuhe yé yin—kẹdẹdile Satani whlá ede gbọn odàn de yiyizan dali do. To egbehe, gbẹtọ gblewanọ delẹ nọ whlá yede po linlẹn yetọn lẹ po gbọn Internet yiyizan dali. To hodọdopọ Internet ji tọn lẹ mẹ, gblewanọ he tindo owhe to ota lẹ sọgan doyẹklọ mì bo yinuwa taidi jọja lẹ nado dọ̀n mì biọ omọ̀ mẹ. Jọja lẹ emi, mì jaale bo họ́ mìde tlala ma nado gbleawuna mìde to gbigbọ-liho.—Psalm 119:101; Howhinwhẹn lẹ 22:3.
14. Nawẹ linlinnamẹnu lẹ nọ hẹn ogbè jonọ lẹ tọn gbayipe to whedelẹnu gbọn?
14 Whẹsadokọnamẹ lalo lẹ. Dile etlẹ yindọ linlin delẹ nọ dọ hójọhó gando Kunnudetọ Jehovah tọn lẹ go, to whedelẹnu linlinnamẹnu lẹ nọ yin yiyizan nado hẹn ogbè mẹhẹngble jonọ lẹ tọn gbayipe. Di dohia, to otò de mẹ, linlin de dolalo dokọna Kunnudetọ lẹ dọ yé nọgodona gandudu Hitler tọn to Wẹkẹ Whàn II whenu. To otò devo mẹ, linlin de sawhẹdokọna Kunnudetọ lẹ dọ yé nọ hẹn ṣọṣi-họ̀ lẹ gble sọn ojlo mẹ wá. To otò susu mẹ, linlin lẹ sawhẹdokọna Kunnudetọ lẹ dọ yé ma nọ dike ovi yetọn lẹ ni yin nukunpedego to dotowhé podọ dọ yé nọ miyọnnukundo ylando sinsinyẹn yisenọ hatọ yetọn lẹ tọn. (Matiu 10:22) Etomọṣo, ahundoponọ he yọ́n mí ganji lẹ yọnẹn dọ lalo pete wẹ whẹsadokọnamẹ mọnkọtọn lẹ yin.
15. Naegbọn e do yin nulunu nado yí nuhe yin zizedonukọnnamẹ to linlinnamẹnu mẹ lẹpo sè?
15 Etẹwẹ mí dona wà eyin whẹsadokọnamẹ he ogbè jonọ mọnkọtọn lẹ tọn to hinhẹn gbayipe jẹ otó mítọn mẹ? Mí dona flin ayinamẹ Howhinwhẹn lẹ 14:15 tọn he dọmọ: “Wunvinọ yí ohó popo sè: ṣigba omẹ zinzin jlẹ aliho ede tọn pọ́n tlala.” Nulunu wẹ e yin nado yí nuhe yin zizedonukọnnamẹ taidi nugbo to linlinnamẹnu mẹ lẹpo sè. Dile etlẹ yindọ e mayin nudọnamẹ aihọn tọn lẹpo wẹ mí nọ gbẹ́ dai, mí yọnẹn dọ ‘aihọn lẹpo mlọnai to mẹylankan lọ mẹ.’—1 Johanu 5:19.
‘Mì Nọ Tẹ́n Ohó Gbọdo lẹ Pọ́n’
16. (a) Nawẹ nuyiwa lẹngbọ lẹ tọn do nugbo-yinyin nuhe Jesu dọ to Johanu 10:4 mẹ tọn hia gbọn? (b) Etẹwẹ Biblu na tuli mí nado nọ wà?
16 Ṣigba, nawẹ mí na wagbọn do yọnẹn nugbonugbo eyin họntọn kavi kẹntọ de wẹ mí to nuyiwahẹ? Mí dona flin nuhe Jesu dọ, dọ lẹngbọ lẹ nọ hodo lẹngbọhọtọ lọ “na yé yọ́n ogbè etọn wutu.” (Johanu 10:4) E mayin awusọhia lẹngbọhọtọ lọ tọn wẹ nọ zọ́n bọ lẹngbọ lẹ nọ hodo e gba; ogbè etọn wẹ nọ zọ́n. Owe de he dọho do aigba Biblu tọn lẹ ji dọ dọ jonọ de tẹkudeji to ojlẹ de mẹ wayi dọ avọ̀ he lẹngbọhọtọ dó wẹ nọ gọalọna lẹngbọ lẹ nado yọ́n ẹn, e mayin ogbè etọn gba. Lẹngbọhọtọ de gblọn dọ ogbè lọ wẹ yé nọ yọnẹn. Nado do nugbo-yinyin ehe tọn hia, e diọ awu etọn hẹ jonọ lọ. Todin he jonọ lọ ko dó awu lẹngbọhọtọ lọ tọn, e ylọ lẹngbọ lẹ, ṣigba yé ma yigbe. Yé ma yọ́n ogbè etọn. Ṣogan, to whenuena lẹngbọhọtọ lọ ylọ yé, lẹngbọ lẹ họ̀nwezun wá e dè to afọdopolọji dile etlẹ yindọ awu devo wẹ e dó. Enẹwutu, mẹde sọgan tindo awusọhia lẹngbọhọtọ tọn, ṣigba na lẹngbọ lẹ, enẹ ma dohia dọ lẹngbọhọtọ wẹ e yin na nugbo tọn gba. To aliho de mẹ, lẹngbọ lẹ nọ tẹ́n ogbè he ylọ yé pọ́n, bo nọ yí ì jlẹdo ogbè lẹngbọhọtọ lọ tọn go. Ohó Jiwheyẹwhe tọn na tuli mí nado nọ wà nudopolọ—nado ‘tẹ́n ohó gbọdo lẹ pọ́n nado yọnẹn eyin yé jọ sọn Jiwheyẹwhe dè.’ (1 Johanu 4:1; 2 Timoti 1:13) Etẹwẹ na gọalọna mí nado wà ehe?
17. (a) Nawẹ mí sọgan jẹakọhẹ ogbè Jehovah tọn gbọn? (b) Etẹwẹ oyọnẹn Jehovah tọn tintindo na hẹn mí penugo nado wà?
17 Na nugbo tọn, eyin mí yọ́n ogbè, kavi owẹ̀n Jehovah tọn ganji, mí na nọ yawu yọ́n ogbè jonọ lẹ tọn. Biblu zinnudo lehe mí sọgan wleawuna oyọnẹn mọnkọtọn do ji. E dọmọ: “Otó towe na sè ohó de to godo towe dọmọ, Ehe wẹ aliho, mì zinzọnlin to e mẹ.” (Isaia 30:21) “Ohó” he mí na sè to godo mítọn enẹ nọ wá sọn Ohó Jiwheyẹwhe tọn mẹ. Nado dọ ẹ to yẹhiadonu-liho, whedepopenu he mí to Ohó Jiwheyẹwhe tọn hia, mí nọ sè ogbè Lẹngbọhọtọ Daho mítọn, Jehovah tọn. (Psalm 23:1) Enẹwutu, eyin mí plọn Biblu ganji dogọ, mí na jẹakọhẹ ogbè Jiwheyẹwhe tọn dogọ. Taidi kọdetọn de, oyọnẹn sisosiso enẹ na hẹn mí penugo nado nọ yọ́n ogbè jonọ lẹ tọn to afọdopolọji.—Galatianu lẹ 1:8.
18. (a) Etẹwẹ ogbè Jehovah tọn yinyọnẹn bẹhẹn? (b) Sọgbe hẹ Matiu 17:5, naegbọn mí dona setonuna ogbè Jesu tọn?
18 Etẹwẹ ogbè Jehovah tọn yinyọnẹn sọ bẹhẹn? Gbọnvona todidoai na ogbè lọ, mí sọ dona setonuna ẹn. Flin nuhe Isaia 30:21 dọ. Ohó Jiwheyẹwhe tọn dọmọ: “Ehe wẹ aliho [lọ].” Mọwẹ, gbọn Biblu pinplọn gblamẹ, mí nọ sè anademẹ Jehovah tọn lẹ. Enẹgodo, e degbè dọmọ: “Mì zinzọnlin to e mẹ.” Jehovah jlo dọ mí ni yí nuhe mí sè kavi nuhe mí plọn lẹ do yizan mẹ. Eyin mí wàmọ, mí na dohia dọ e mayin dọ mí dotoaina ogbè Jehovah tọn kẹdẹ wẹ gba ṣigba mí sọ setonuna ẹn ga. (Deutelonomi 28:1) Tonusisena ogbè Jehovah tọn sọ zẹẹmẹdo tonusisena ogbè Jesu tọn, na Jehovah lọsu wẹ biọ dọ mí ni wàmọ. (Matiu 17:5) Etẹwẹ Jesu, Lẹngbọhọtọ Dagbe lọ, biọ to mí si? E dotuhomẹna mí nado hẹn gbẹtọ lẹ zun devi bo dejido “afanumẹ nugbonọ, nuyọnẹntọ” lọ go. (Matiu 24:45; 28:18-20) Tonusisena ogbè etọn na dekọtọn do ogbẹ̀ mavọmavọ mẹ na mí.—Owalọ lẹ 3:23.
‘Yé Na Họnyi sọn E Dè’
19. Nawẹ mí dona yinuwa hlan ogbè jonọ lẹ tọn gbọn?
19 Eyin mọwẹ, nawẹ mí dona yinuwa hlan ogbè jonọ lẹ tọn gbọn? Pẹpẹ dile lẹngbọ lẹ nọ wà do. Jesu dọmọ: “Jonọ wẹ yé ma nọ hodo ṣigba bo na họnyi sọn e dè.” (Johanu 10:5) Onú awe wẹ mí dona wà dopọ. Tintan, mí ‘ma na hodo’ jonọ. Mọwẹ, mí dona gbẹ́ jonọ dai gbidigbidi. Na nugbo tọn, to Glẹkigbe he yè yí do kàn Biblu mẹ, wefọ ehe yí aliho hodidọ tọn he sinyẹn hugan zan nado do mẹgbigbẹdai hia to ogbè enẹ mẹ. Awetọ, mí “na họnyi sọn e dè.” Aliho he sọgbe dopo akàn lọ niyẹn nado yinuwa hlan mẹhe nuplọnmẹ yetọn lẹ ma tin to kọndopọmẹ hẹ ogbè Lẹngbọhọtọ Dagbe lọ tọn.
20. Nawẹ mí na yinuwa gbọn eyin mí pannukọn (a) atẹṣitọ mẹklọtọ lẹ, (b) gbẹdido ylankan, (c) linlin mẹhẹngble tọn lẹ?
20 Enẹwutu, eyin mí dukosọ hẹ mẹhe nọ jla linlẹn atẹṣitọ tọn lẹ, mí dona wà nuhe Ohó Jiwheyẹwhe tọn dọ: ‘Mì nọ payi yé he nọ hẹn kinklan po ahlìda po wá lẹ, ehe jẹagọ do oplọn he mì plọn go; bo nọ nọla na yé.’ (Lomunu lẹ 16:17; Titu 3:10) Mọdopolọ, jọja Klistiani he to pipehẹ owù gbẹdido ylankan tọn lẹ dona yí ayinamẹ Paulu tọn hlan jọja Timoti do yizan mẹ dọmọ: ‘Nọ họ̀n na wantuntun yọpọ whenu tọn.’ Podọ eyin mí sè whẹsadokọnamẹ lalo lẹ to linlinnamẹnu lẹ mẹ, mí dona flin ayinamẹ he Paulu na Timoti yinukọn dogọ dọ: ‘Yé [mẹhe dotoaina ogbè jonọ lẹ tọn] nasọ gọ̀ do otàn ovọ́ kọ̀n. Ṣigba nọ họ́ dewe to onú popo mẹ.’ (2 Timoti 2:22; 4:3-5) Mahopọnna lehe ogbè jonọ lẹ tọn sọgan taidi nuhe vivi sisè do, mí dona họ̀n na nuhe na hẹn yise mítọn gblezọn lẹpo.—Psalm 26:5; Howhinwhẹn lẹ 7:5, 21; Osọhia 18:2, 4.
21. Ale tẹwẹ tin to sẹdotẹnmẹ na mẹhe nọ gbẹ́ ogbè jonọ lẹ tọn dai lẹ?
21 Gbọn ogbè jonọ lẹ tọn gbigbẹdai dali, Klistiani yiamisisadode lẹ yigbena ohó Lẹngbọhọtọ Dagbe lọ tọn heyin mimọ to Luku 12:32 mẹ. To wefọ enẹ mẹ, Jesu dọna yé dọ: “Mì dibu blo, lẹngbọpa pẹvi; na homẹvivi Otọ́ mìtọn tọn wẹ nado yí ahọludu na mì.” Mọdopolọ, “lẹngbọ devo” lẹ tin to jejeji bo to nukundo nado sè hogbe Jesu tọn lẹ dọmọ: “Mì wá, mì donanọ Otọ́ ṣie tọn, mì dugu ahọludu he yè ko wleawu etọn dai na mì sọn dòdó aihọn tọn wá.” (Johanu 10:16; Matiu 25:34) Ale kọfanamẹ tọn nankọtọn die he tin to sẹdotẹnmẹ na mí eyin mí gbẹ́ “ogbè jonọ lẹ tọn” dai!
Be Hiẹ Flin Ya?
• Nawẹ Satani sọgbe hẹ zẹẹmẹ jonọ heyin nùdego to apajlẹ Jesu tọn gando lẹngbọ lẹ go mẹ gbọn?
• Nawẹ ogbè jonọ lẹ tọn nọ yin sisè to egbehe gbọn?
• Nawẹ mí sọgan yọ́n ogbè jonọ lẹ tọn gbọn?
• Etẹwẹ dona yin nuyiwa mítọn hlan ogbè jonọ lẹ tọn?
[Yẹdide to weda 15]
Malia yọ́n Klisti
[Yẹdide to weda 16]
Jonọ ma nọ dọnsẹpọ lẹngbọ lẹ tlọlọ gba
[Yẹdide to weda 18]
Nawẹ mí nọ yinuwa hlan ogbè jonọ lẹ tọn gbọn?