Whanpẹ Nudida Jehovah Tọn lẹ Tọn
“Na Azọ́n Towe Sù Dole, Oklunọ E!”
VLAVO mí nọ nọ̀ gbétatò kavi tòdaho mẹ, aga pete to osó lẹ ji kavi dokọ̀ to huto, mí nọ yin lilẹdo gbọn whanpẹ mẹhẹnjọsi nudida tọn dali. Abajọ Calendrier des Témoins de Jéhovah 2004 bẹ yẹdide lẹdo tọn de hẹn he do alọnuzọn jiawu Jehovah Jiwheyẹwhe tọn hia.
Gbẹtọvi pinpẹn-nutọn-yọnẹntọ lẹ nọ do ojlo hia to azọ́n Jiwheyẹwhe tọn lẹ mẹ to whepoponu. Di apajlẹ, lẹnnupọndo Sọlọmọni ji, mẹhe nuyọnẹn etọn “hugan nuyọnẹn ovi whèzẹtẹn tọn lẹpo tọn.” Biblu dọ dọ: “E dọho atin lẹ tọn, sọn Kedali he tin to Lẹbanọni mẹ yèdọ jẹ hisọpi he tọ́nkun jẹgbonu sọn adó mẹ de: e dọho gbekanlin lẹ tọn ga, po ohẹ̀ tọn po, po onú he nọ tintlin lẹ tọn po, po whèvi lẹ tọn po.” (1 Ahọlu lẹ 4:30, 33) Otọ́ Sọlọmọni tọn, Ahọlu Davidi, nọ saba lẹnnupọndo anazọ́n Jiwheyẹwhe tọn lẹ ji. E yin whinwhàn nado dọ hlan Mẹdatọ etọn dọmọ: “Na azọ́n towe sù dole, OKLUNỌ E! Nuyọnẹn mẹ wẹ hiẹ basi yé omẹ pó te: aigba gọ́ na nutindo towe.”—Psalm 104:24.a
Míwlẹ lọsu na wadagbe nado nọ pọ́n bo nọ lẹnnupọndo nudida lẹ ji. Di apajlẹ, mí sọgan nọ “ze nukun [mítọn] daga” bo kanse dọ, “mẹnu wẹ dá onú helẹ”? Na nugbo tọn, Jehovah Jiwheyẹwhe wẹ, mẹhe tindo ‘huhlọn susu’ bosọ “sinyẹn to huhlọn mẹ”!—Isaia 40:26.
Nawẹ ayihamẹlinlẹnpọn do azọ́n nudida Jehovah tọn ji dona yinuwa do mí ji gbọn? E whè gbau to aliho atọ̀n mẹ. E sọgan (1) flin mí nado yí nukun nujọnu tọn do pọ́n ogbẹ̀ mítọn, (2) whàn mí nado gọalọna mẹdevo lẹ nado plọnnu sọn nudida lẹ mẹ, bosọ (3) whàn mí nado yọ́n Mẹdatọ mítọn ganji bo do pinpẹn-nutọn-yinyọnẹn hia ẹ dogọ.
Gbẹzan mítọn, he yiaga hugan ‘kanlin he ma nọ lẹnnupọn lẹ’ tọn, nọ hẹn mí penugo nado doayi whanpẹ nudida tọn lẹ go bo yọ́n pinpẹn yetọn. (2 Pita 2:12) Nukun mítọn lẹ sọgan mọ lẹdo whanpẹnọ de. Otó mítọn lẹ sọgan sè hàngbe vivi ohẹ̀ lẹ tọn. Podọ nugopipe mítọn nado yọ́n ojlẹ po lẹdo he mẹ mí tin te po nọ gọalọna mí nado flinnu. Dile etlẹ yindọ mí ma ko lẹzun mẹpipe todin, gbẹzan mítọn dintọn nọ hẹn pekọwa na nugbo tọn!
Mẹjitọ lẹ sọgan duvivi ojlo jọwamọ tọn he ovi yetọn lẹ nọ dohia to nudida lẹ mẹ tọn. Lehe ovi lẹ nọ tin to jejeji nado mọ aṣapán lẹ to huto, nado daihun hẹ kanlin de, podọ nado hẹ́ atin de ji do sọ! Mẹjitọ lẹ na jlo nado gọalọna ovi yetọn lẹ nado mọ kanṣiṣa he tin to nudida lẹ po Mẹdatọ lọ po ṣẹnṣẹn. Obu po sisi he ovi lọ lẹ na wleawuna na nudida Jehovah tọn lẹ po sọgan gbọṣi ahun yetọn mẹ to gbẹzan yetọn blebu mẹ.—Psalm 111:2, 10.
Numamọ hlan nukọn wẹ e na yin eyin nudida lẹ nọ hẹn awuji mí ṣigba bọ mí nọ gboawupo nado do pinpẹn-nutọn-yinyọnẹn hia Mẹdatọ lọ. Dọdai Isaia tọn gọalọna mí nado lẹnnupọndo whẹho ehe ji to whenuena e dọmọ: “Hiẹ ma ko yọnẹn? Hiẹ ma ko sè, dọ Jiwheyẹwhe madopodo, OKLUNỌ, Nudatọ aigba pòdo lẹpo tọn [ma] nọ yọ́n nudikọ mọ onú ma nọ dikọna ẹn? Dòmọna zìnzìn etọn tọn ma tin.”—Isaia 40:28.
Mọwẹ, azọ́n Jehovah tọn lẹ nọ do nuyọnẹn matin awetọ etọn, huhlọn mayọnjlẹ etọn, po owanyi sisosiso he e tindo na mí po hia. To whenuena mí mọ whanpẹ nuhe lẹdo mí lẹ tọn bo mọnukunnujẹ jẹhẹnu Mẹhe dá onú enẹ lẹpo tọn lẹ mẹ, mí dona yin whinwhàn nado vọ́ ohó Davidi tọn lẹ dọ dọmọ: “[Jehovah] E, . . . ehe taidi hiẹ de ma tin; mọ azọ́n he di azọ́n towe de ma tin.”—Psalm 86:8.
Mí sọgan deji dọ azọ́n nudida Jehovah tọn na zindonukọn nado to nuyiwa do gbẹtọvi tonusetọ lẹ ji. Mí na tindo dotẹnmẹ hundote madosọha lẹ nado to nuplọn dogọ gando Jehovah go kakadoi. (Yẹwhehodọtọ 3:11) Podọ dile mí to nuplọn gando Mẹdatọ mítọn go sù sọ, mọwẹ mí na to wanyina ewọ dogọ do niyẹn.
[Nudọnamẹ Odò Tọn]
a Pọ́n Calendrier des Témoins de Jéhovah 2004 osun novembre po décembre po tọn.
[Apotin to weda 9]
Pipà Hlan Mẹdatọ Lọ
Lẹnunnuyọnẹntọ pinpẹn-nutọn-yọnẹntọ susu nọ mọ alọ Mẹdatọ lọ tọn to nudida lẹ mẹ. Apajlẹ delẹ die:
“Adà lẹnunnuyọnẹn ṣie tọn nọ hẹn pekọ po ayajẹ po wá to whedelẹnu to whenuena yẹn tindo nukunnumọjẹnumẹ yọyọ de bo dọna dee dọ, ‘Ẹn-hẹn ẹn, aliho he mẹ Jiwheyẹwhe dá ehe te die.’ Yanwle ṣie wẹ nado mọnukunnujẹ tito Jiwheyẹwhe tọn mẹ jẹ obá de mẹ.”—Henry Schaefer, mẹplọntọ chimie tọn.
“Na nuhe gando whẹwhinwhẹ́n he wutu Wẹkẹ lọ do gbloada sọmọ go, wehiatọ dopodopo wẹ dona wá tadona etọn kọ̀n, ṣigba zẹẹmẹ pipé de ma sọgan yin bibasi matin Ewọ [Jiwheyẹwhe].”—Edward Milne, dodinnanutọ wẹkẹ tọn heyin Angleterre-nu de.
“Mí yọnẹn dọ lẹnunnuyọnẹn nulinlẹn tọn (mathématique) dagbe hugan he tin-to-aimẹ nọ basi zẹẹmẹ jọwamọnu lẹ tọn na Jiwheyẹwhe wẹ dá yé wutu.”—Alexander Polyakov, lẹnunnuyọnẹntọ nulinlẹn tọn heyin Russie-nu de.
“To dodindinna onú jọwamọ lẹ tọn mẹ, mí to linlẹn Mẹdatọ lọ tọn keje pọ́n, to akọjẹhẹ linlẹn etọn lẹ, bo to zẹẹmẹ basi na tito heyin Etọn, e mayin mítọn gba.”—Louis Agassiz, lẹnunnuyọnẹntọ nutogbẹ̀ lẹ tọn heyin Amelikanu de.
[Yẹdide to weda 8]
Manchots papous, Lopo Antarctique tọn
[Yẹdide to weda 9]
Jipa Grand Teton tọn, Wyoming, États-Unis
[Asisa Yẹdide tọn]
Jack Hoehn/Index Stock Photography