Be Hiẹ Sọgan Deanana Sọgodo Towe Ya?
BE SỌGODO mavọmavọ mítọn ko yin kinkàndai jẹnukọn wẹ ya? Be nudide mítọn lẹ to gbẹ̀mẹ ma nọ tindo nugandomẹgo depope do sọgodo mítọn ji wẹ ya?
Mí ni dọ dọ gbẹtọ tindo nugopipe lọ nado deanana sọgodo ede tọn. To whẹho ehe mẹ, be mẹde sọgan yin dide jẹnukọn nado wà azọ́n tangan de kavi nado nọ̀ otẹn azọngban tọn de mẹ ya? Podọ nawẹ Jiwheyẹwhe sọgan hẹn ojlo etọn na aigba di gbọn eyin gbẹtọvi lẹ tindo mẹdekannujẹ nado deanana sọgodo yetọn? Biblu na gblọndo pekọhẹnwanamẹ tọn lẹ hlan kanbiọ ehelẹ.
Sinsẹ̀n-Nuplọnmẹ Sẹ́gbè Tọn Jẹagọdo Mẹdekannujẹ Nudide Bibasi Tọn
Lẹnnupọndo aliho he mẹ Jehovah Jiwheyẹwhe dá mí te ji. “To boṣiọ Jiwheyẹwhe tọn mẹ wẹ e dá [gbẹtọ] do: asu de asi de wẹ e dá yé,” wẹ Biblu dọ. (Gẹnẹsisi 1:27) Na mí yin didá to boṣiọ kavi apajlẹ Jiwheyẹwhe tọn mẹ wutu, mí tindo nugopipe lọ nado do jẹhẹnu etọn lẹ hia, taidi owanyi, whẹdida dodo, nuyọnẹn, po huhlọn po. Jiwheyẹwhe ko sọ na mí mẹdekannujẹ nudide bibasi tọn. Na nugbo tọn, ehe hẹn mí gbọnvo na nudida etọn devo he tin to aigba ji lẹ. Mí sọgan basi dide vlavo nado hodo anademẹ Jiwheyẹwhe tọn do walọ dagbe ji kavi lala. Nuhe zọ́n niyẹn bọ yẹwhegán Mose sọgan dọmọ: “Yẹn ylọ olọn po aigba po nado dekunnu do mì ji to egbehe, dọ yẹn ko ze ogbẹ̀ po okú po, dona lọ po dẹhodo lọ po do nukọn towe: enẹwutu de ogbẹ̀, na hiẹ nido gán, hiẹ po okún towe po: nado nọ yiwanna OKLUNỌ lọ Jiwheyẹwhe towe, nado nọ setonuna ogbè etọn, podọ nado nọ dọnsẹpọ jẹ e dè.”—Deutelonomi 30:19, 20.
Ṣigba, mẹdekannujẹ nudide bibasi tọn ehe ma zẹẹmẹdo mẹdekannujẹ mlẹnmlẹn gba. E ma de mí sọn osẹ́n jọwamọ tọn po walọ dagbe tọn he Jiwheyẹwhe wleawuna na dolilo podọ dagbemẹninọ wẹkẹ lọ tọn lẹ po glọ gba. Osẹ́n ehelẹ yin awuwlena na dagbe mítọn, podọ depope to yé mẹ gbigbà sọgan hẹn kọdetọn ylankan lẹ wá. Di apajlẹ, lẹnnupọndo nuhe na jọ ji eyin mí de nado gbẹkọ osẹ́n huhlọn nudọnwado tọn go bo lọ́n sọn họta he yiaga taun de ji!—Galatianu lẹ 6:7.
Mẹdekannujẹ nudide bibasi tọn sọ ze dogbó delẹ dai na mí ehe ma yin dandannu na nudida he ma tindo mẹdekannujẹ mọnkọtọn lẹ. Wekantọ Corliss Lamont kanse dọ: “Naegbọn mí sọgan dosẹ́n walọ dagbe tọn na gbẹtọ lẹ, bosọ sayana yé na ylanwiwa wutu, eyin mí kẹalọyi . . . dọ nudide po nuyiwa yetọn lẹ po ko yin kinkàndai jẹnukọn?” Na nugbo tọn, ehe ma sọgbe hẹ lẹnpọn dagbe gba. Kanlin he ma nọ lẹnnupọn lẹ ma nọ yin whẹgbledo na nuhe yé wà lẹ, mọjanwẹ ọdinatẹẹ lẹ ma nọ yin whẹgbledo na nuhe yé ko yin tito basina nado wà lẹ gba. Enẹwutu, mẹdekannujẹ nudide bibasi tọn nọ ze azọngban daho de do mí ji bosọ nọ hẹn mí nado dogbè nuhe mí wà lẹ tọn.
Lehe Jehovah Jiwheyẹwhe na yin kanylantọ po mawadodonọ po do sọ eyin ewọ ko kàn nuhe mí na wà to gbẹzan mẹ lẹpo dai jẹnukọnna jiji mítọn bo nọ wá gblewhẹdo mí to enẹgodo na nuhe mí wà lẹ! Ewọ ma wàmọ gba, na “Jiwheyẹwhe wẹ owanyi,” podọ “whẹdida [dodo] wẹ ali etọn lẹpo.” (1 Johanu 4:8; Deutelonomi 32:4) Jiwheyẹwhe ma na mí mẹdekannujẹ nudide bibasi tọn podọ to ojlẹ dopolọ mẹ ‘magbe sọn dowhenu do mẹhe ewọ na whlẹngán po mẹhe ewọ na vasudo lẹ po ji,’ dile mẹhe yí sinsẹ̀n-nuplọnmẹ sẹ́gbè tọn sè lẹ nọ dọ do gba. Mẹdekannujẹ nudide bibasi tọn jẹagọdo sinsẹ̀n-nuplọnmẹ sẹ́gbè tọn.
Biblu dohia hezeheze dọ nudide he mí basi lẹ na diọ sọgodo mítọn. Di apajlẹ, Jiwheyẹwhe dotuhomẹna ylanwatọ lẹ dọmọ: “Mì lẹgọ dinvie omẹ dopodopo sọn aliho ylanylan etọn mẹ, podọ sọn oylan wiwà mìtọn lẹ tọn mẹ . . . ; yẹn masọ to nugbleawu de na wà hlan mì gba.” (Jẹlemia 25:5, 6) Tudohomẹnamẹ ehe ma na tindo zẹẹmẹ depope eyin Jiwheyẹwhe ko kàn sọgodo mẹdopodopo tọn dai jẹnukọn. Ohó Jiwheyẹwhe tọn sọ dọmọ: “Mì lẹnvọjọ na enẹwutu, na yè ni diọ mì, na yè nido súnsún ylando mìtọn sẹ, to whenuena ojlẹ awumimiọn tọn na sọn nukun [Jehovah] tọn mẹ wá.” (Owalọ lẹ 3:19) Naegbọn Jehovah na biọ to gbẹtọ lẹ si nado lẹnvọjọ bo diọ eyin ewọ ko yọnẹn jẹnukọn dọ nude ma tin ehe yé sọgan wà nado diọ sọgodo yetọn?
Owe-wiwe donù mẹdelẹ go he Jiwheyẹwhe basi oylọna nado dugán hẹ Jesu Klisti taidi ahọlu lẹ to olọn mẹ. (Matiu 22:14; Luku 12:32) Ṣigba, Biblu dọ dọ yé na hẹn lẹblanulọkẹyi enẹ bu eyin yé ma doakọnna kakajẹ opodo. (Osọhia 2:10) Naegbọn Jiwheyẹwhe na tlẹ do basi oylọna yé eyin ewọ ko magbe jẹnukọn dọ yé ma na yin dide? Lẹnnupọndo nuhe apọsteli Paulu dọna yisenọ hatọ etọn lẹ ji ga. E wlan dọmọ: “Eyin míwlẹ yọnẹn gan an bo wà oylan whenuena míwlẹ ko mọ oyọnẹn nugbo tọn yí godo, avọ́ na ylando ma tin ba gba.” (Heblu lẹ 10:26) Avase ehe ma na tindo nuhọakuẹ-yinyin depope ba eyin Jiwheyẹwhe ko kàn sọgodo yetọn dai jẹnukọn. Ṣigba be nugbo ma wẹ dọ Jiwheyẹwhe ko de mẹdopodopo delẹ jẹnukọn nado dugán hẹ Jesu Klisti ya?
Be Mẹdopodopo lẹ Wẹ Yin Dide Jẹnukọn Ya Kavi Pipli De?
“[Jiwheyẹwhe ko] yí dona gbigbọnọ lẹpo to otẹn he tin to olọn lẹ mẹ do dona mí to Klisti mẹ,” wẹ apọsteli Paulu wlan, “yèdọ dile e ko de mí to e mẹ jẹnukọnna dòdó aihọn tọn . . . mẹhe ko de mí na sọdodovi ovi lẹ tọn gbọn Jesu Klisti mẹ na ede.” (Efesunu lẹ 1:3-5) Etẹwẹ Jiwheyẹwhe ko de jẹnukọn, podọ etẹwẹ yinyin dide “jẹnukọnna dòdó aihọn tọn” zẹẹmẹdo?
Wefọ ehe dọ dọ Jiwheyẹwhe ko de kúnkan sunnu tintan lọ, Adam tọn delẹ, nado dugán hẹ Klisti to olọn mẹ. (Lomunu lẹ 8:14-17, 28-30; Osọhia 5:9, 10) Ṣigba, linlẹn lọ dọ Jehovah Jiwheyẹwhe de omẹ tangan dopodopo lẹ nado mọ lẹblanulọkẹyi ehe yí owhe fọtọ́n susu whẹpo yé do yin jiji jẹagọdo nugbo lọ dọ gbẹtọvi lẹ yin nina mẹdekannujẹ nudide bibasi tọn. Pipli gbẹtọ lẹ tọn wẹ Jiwheyẹwhe de jẹnukọn, e ma yin mẹdopodopo lẹ gba.
Di dohia: Mí ni dọ dọ gandudu de basi dide nado ze pipli tangan de dai. E basi dide jẹnukọn do nuhe pipli lọ na wà lẹ ji, lehe e na yí huhlọn zan sọ, podọ obá he mẹ e na gbloada jẹ. Pipli lọ bẹ azọ́n jẹeji whenu vude to whenuena e yin didoai godo, bọ hagbẹ etọn lẹ zín hodidọ de jẹgbonu dọmọ: “Gandudu lọ ko dọ azọ́n he mí na wà sọn owhe susu die wayi. Todin mí ko bẹ azọ́n he yin didena mí lọ jẹeji.” Be a na wá tadona kọ̀n dọ gandudu lọ dona ko de mẹhe pipli enẹ na bẹhẹn lẹ dopodopo to owhe susu die jẹnukọn wẹ ya? Na nugbo tọn, lala wẹ. Mọdopolọ, Jehovah basi dide jẹnukọn nado ze pipli vonọtaun de dai he na hẹn pọngbọ wá na nugandomẹgo ylando Adam tọn lẹ. E de pipli lọ jẹnukọn—e ma yin mẹhe pipli lọ na bẹhẹn lẹ dopodopo gba. Dopodopo yetọn na yin dide to nukọn mẹ, podọ nudide he yé basi to gbẹzan mẹ lẹ na dohia eyin yé yin alọkẹyi to godo mẹ kavi lala.
Aihọn tẹwẹ apọsteli Paulu tindo to ayiha mẹ to whenuena e dọmọ: “[Jiwheyẹwhe] de mí to e mẹ jẹnukọnna dòdó aihọn tọn”? Aihọn he hodọ Paulu te tofi ma yin aihọn he Jiwheyẹwhe wleawuna to whenuena e dá Adam po Evi po gba. Aihọn enẹ “yọ́n tlala”—bo vò mlẹnmlẹn sọn ylando po hẹnflu po si. (Gẹnẹsisi 1:31) E ma tindo nuhudo ‘tundote’ tọn sọn ylando si gba.—Efesunu lẹ 1:7.
Aihọn tangan he Paulu to alọdlẹndo wẹ dehe wá aimẹ to atẹṣiṣi Adam po Evi po tọn godo to Edẹni—aihọn de he gbọnvo tlala na dehe Jiwheyẹwhe dá to whẹwhẹwhenu. Aihọn he bẹjẹeji po ovi Adam tọn lẹ po wẹ. Aihọn enẹ bẹ mẹhe ko jẹla na Jiwheyẹwhe bo yin afanumẹ ylando po hẹnflu po tọn lẹ hẹn. Aihọn de wẹ ehe mẹhe tin to e mẹ lẹ sọgan yin fifligọ na yé ma wà ylando sọn ojlo mẹ wá di Adam po Evi po wutu.—Lomunu lẹ 5:12; 8:18-21.
To afọdopolọji, Jehovah Jiwheyẹwhe didẹ ninọmẹ he dekọtọn sọn atẹṣiṣi lọ mẹ to Edẹni. Tlolo he nuhudo lọ fọ́n, e de nuyizan vonọtaun de jẹnukọn—yèdọ Ahọluduta Mẹssia tọn to alọ Jesu Klisti tọn mẹ—he na yí adà de wà to gbẹtọvi lẹ fifligọ sọn ylando Adam tọn mẹ. (Matiu 6:10) Jiwheyẹwhe wà ehe “jẹnukọnna dòdó aihọn” gbẹtọvi he sọgan yin fifligọ lẹ tọn, yèdọ whẹpo Adam po Evi po he yin atẹṣitọ ji ovi lẹ.
To paa mẹ, gbẹtọvi lẹ nọ tindo nuhudo tito nuyiwa de tọn nado sọgan basi wadotana nuhe yé jlo na wà tọn. Nuplọnmẹ sẹ́gbè tọn nọ de linlẹn lọ tọ́n dọ Jiwheyẹwhe dona ko tindo tito vonọtaun de na wẹkẹ lọ to ehe mẹ onú lẹpo yin kinkàndai jẹnukọn te. Roy Weatherford wlan dọmọ: “Tamẹnuplọnmẹtọ susu lẹndọ nudepope he ma bẹ zẹẹmẹ gigọ́ nujijọ lẹpo tọn hẹn ma na sọgbe hẹ jẹhẹnu Jiwheyẹwhe Ganhunupotọ lọ tọn gba.” Be Jiwheyẹwhe tin to dandannu glọ nugbonugbo nado basi zẹẹmẹ gigọ́ nujijọ lẹpo tọn jẹnukọn wẹ ya?
Na ewọ yin huhlọnnọ podọ nuyọnẹntọ hugan to wẹkẹ mẹ wutu, Jehovah sọgan didẹ nujijọ kosọ tọn depope he dekọtọn dile nudida etọn lẹ to mẹdekannujẹ nudide bibasi tọn yetọn yizan. (Isaia 40:25, 26; Lomunu lẹ 11:33) E sọgan wà ehe to afọdopolọji matin tito depope bibasi jẹnukọn. To vogbingbọnmẹ na gbẹtọ mapenọ he nugopipe yetọn tindo dogbó lẹ, Jiwheyẹwhe Ganhunupotọ ma tindo nuhudo linlẹn kavi tito vonọtaun he yin bibasi jẹnukọn he bẹ zẹẹmẹ gigọ́ nuhe na jọ do mẹhe tin to aigba ji dopodopo go hẹn tọn gba. (Howhinwhẹn lẹ 19:21) To lẹdogbedevomẹ Biblu tọn susu mẹ, Efesunu lẹ 3:11 dlẹnalọdo Jiwheyẹwhe taidi mẹhe tindo “lẹndai madopodo” kakati nido yin tito hẹngogo tọn de.
Lehe Hiẹ Sọgan Yinuwado Sọgodo Towe Ji Do
Jiwheyẹwhe tindo lẹndai de na aigba, podọ lẹndai enẹ ko yin didehia jẹnukọn. Osọhia 21:3, 4 dọmọ: “Doayi e go, gòhọ Jiwheyẹwhe tọn tin to gbẹtọ lẹ dè, ewọ nasọ nọhẹ yé, yé na yin omẹ etọn, Jiwheyẹwhe lọsu nasọ nọhẹ yé, bo nasọ yin Jiwheyẹwhe yetọn. Jiwheyẹwhe nasọ súnsún dasin lẹpo sẹ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” Mọwẹ, aigba na lẹzun paladisi, kẹdẹdile Jehovah ko lẹndai to whẹwhẹwhenu do. (Gẹnẹsisi 1:27, 28) Kanbiọ lọ todin wẹ yindọ, Be hiẹ na tin to finẹ ya? Enẹ sinai do nudide he hiẹ nọ basi todin lẹ ji. Jehovah ma ko kàn sọgodo towe dai jẹnukọn gba.
Avọ́sinsan ofligọ Ovi Jiwheyẹwhe tọn, Jesu Klisti tọn, hùn dotẹnmẹ dote na mẹdepope he yí yise zan to ewọ mẹ nado tindo ogbẹ̀ madopodo. (Johanu 3:16, 17; Owalọ lẹ 10:34, 35) “Mẹhe yise to Ovi mẹ tindo ogbẹ̀ madopodo,” wẹ Biblu dọ. “Mẹhe ma yise to Ovi mẹ ma to na mọ ogbẹ̀.” (Johanu 3:36) Hiẹ sọgan de ogbẹ̀ gbọn nupinplọn gando Jiwheyẹwhe, Ovi etọn, po ojlo Etọn po go to Biblu mẹ dali podọ gbọn nuhe hiẹ plọn lẹ yíyí-do-yizan mẹ dali. Mẹhe yinuwa sọgbe hẹ nuyọnẹn nugbo he tin to Ohó Jiwheyẹwhe tọn mẹ yin hinhẹn deji dọ ewọ “na tin mahanú, bo nasọ nọ̀ blẹo matin obudi oylan tọn.”—Howhinwhẹn lẹ 1:20, 33.
[Yẹdide to weda 5]
To vogbingbọnmẹ na kanlin lẹ, gbẹtọvi lẹ nọ yin whẹgbledo na nuhe yé wà lẹ
[Asisa Yẹdide tọn]
Eagle: Foto: Cortesía de GREFA