WESẸDOTẸN INTẸNẸT JI TỌN Watchtower Tọn
WESẸDOTẸN INTẸNẸT JI TỌN
Watchtower Tọn
Gungbe
ẹ,ọ,ṣ
  • á
  • à
  • é
  • è
  • Ẹ
  • ẹ
  • ẹ́
  • ẹ̀
  • í
  • ì
  • ó
  • ò
  • Ọ
  • ọ
  • ọ́
  • ọ̀
  • Ṣ
  • ṣ
  • ú
  • ù
  • BIBLU
  • OWE LẸ
  • OPLI LẸ
  • w05 15/1 w. 28-29
  • Yẹwhehodidọ Saulu Tọn Fọ́n Nukundiọsọmẹ Dote

Video de ma tin na adà ehe

Jaale, nuhahun de wá aimẹ gando video lọ go.

  • Yẹwhehodidọ Saulu Tọn Fọ́n Nukundiọsọmẹ Dote
  • Atọ̀họ̀-Nuhihọ́ lọ Tọn He To Ahọluduta Jehovah Tọn Lá—2005
  • Hóvila Lẹ
  • Hosọ Mọnkọtọn
  • Agọjẹdomẹtọ Lẹzun Godonọnamẹtọ
  • Sébibla Mẹhuhu Tọn Gboawupo
  • Nuhe Dona Yin Pinplọn sọn E Mẹ
  • Jesu De Saulu
    Nuplọnmẹ Delẹ sọn Biblu Mẹ
  • To Aliji Jei Damasku
    Owe Ṣie He Bẹ Otàn Biblu Tọn lẹ Hẹn
  • Homẹkẹndomẹtọ lọ Mọ Hinhọ́n Daho De
    Atọ̀họ̀-Nuhihọ́ lọ Tọn He To Ahọluduta Jehovah Tọn Lá—2000
  • Agun lọ “Biọ Ojlẹ Jijọho Tọn de Mẹ”
    ‘Dekunnu Mlẹnmlẹn’ Gando Ahọluduta Jiwheyẹwhe Tọn Go
Pọ́n Nudevo Lẹ
Atọ̀họ̀-Nuhihọ́ lọ Tọn He To Ahọluduta Jehovah Tọn Lá—2005
w05 15/1 w. 28-29

Yẹwhehodidọ Saulu Tọn Fọ́n Nukundiọsọmẹ Dote

JUVI he tin to Damasku lẹ ma sọgan mọnukunnujẹ nuhe to jijọ mẹ. Nawẹ mẹhe nọ yiavunlọ na nuyise aṣa tọn lẹ po zohunhun po sọgan lẹzun atẹṣitọ gbọn? Saulu yin yinyọnẹn taidi dawe de he ko vannukundo mẹhe to oyín Jesu tọn ylọ lẹ to Jelusalẹm. E wá Damasku nado dohomẹkẹn devi lẹ to finẹ. Ṣigba todin ewọ lọsu to lilá dọ Jesu, he nọ yin pinpọnhlan taidi danuwatọ he yin whiwhedo núgo na nùzinzan wutu, wẹ Mẹssia lọ! Be Saulu ko hùnalẹ̀ wẹ ya?—Owalọ lẹ 9:1, 2, 20-22.

Vlavo nujijọ ehe tindo zẹẹmẹ. Mẹhe zingbejizọnlin sọn Jelusalẹm to pọmẹ hẹ Saulu lẹ sọgan ko dọ nuhe jọ to aliji lọ. Dile yé sẹpọ Damasku, hinhọ́n sisẹ́ de họ́n lẹdo yé to ajijimẹ, bọ yemẹpo jai jẹ kọmẹ. Ogbè de sọ dọnú. Mẹdepope ma yin awugblena adavo Saulu. E mlọnai to ali lọ ji. To whenuena e fọnṣite to godo mẹ, gbejizọnlinzintọ devo lẹ dona hẹn alọ na ẹn wá Damasku, na e ma sọgan mọnu wutu.—Owalọ lẹ 9:3-8; 26:13, 14.

Agọjẹdomẹtọ Lẹzun Godonọnamẹtọ

Etẹwẹ jọ do Saulu go to aliho Damasku tọn ji? Be gbejizọnlin gaa lọ kavi yozò owhè ṣádada tọn wẹ na ko hẹn ẹn bà ede mẹ pò ya? To vivẹnudido mẹ nado do nujijọ lọ hia taidi jọwamọ tọn, ayihaawe tindotọ egbezangbe tọn lẹ dọ dọ bẹwlu apọ̀nmẹ tọn, odlọ nukle tọn, apọ̀nmẹzọ̀n sinsinyẹn he wá sọn ayihadawhẹnamẹnu Saulu tọn he to whẹgbledo e mẹ, apọṣimẹ sinsinyẹn, po adingbè-zọ̀n he tin to lanmẹ na Saulu po wẹ na ko hẹn ninọmẹ lọ wá.

Nugbo lọ wẹ yindọ Jesu Klisti sọawuhia Saulu to hinhọ́n sisẹ́ mlanmlan enẹ mẹ, bo hẹn ẹn kudeji dọ Ewọ wẹ Mẹssia lọ. Yẹdide nujijọ ehe tọn delẹ do Saulu hia taidi mẹhe jai sọn osọ́ ji. Dile etlẹ yindọ enẹ yọnbasi, nuhe Biblu dọ poun wẹ yindọ e “jai jẹ kọmẹ.” (Owalọ lẹ 22:6-11, NW) Depope he aijijẹ Saulu tọn na sinyẹn sọ to agbasa-liho, e ma sọtẹ́n eyin mí yí ì jlẹdo aijijẹ winyandomẹ tọn sọn ogántẹn etọn mẹ go gba. Todin e dona kẹalọyi dọ nugbo wẹ nuhe hodotọ Jesu tọn lẹ to lilá. Onú dopo gee he pò bọ Saulu sọgan wà wẹ nado kọnawudopọ hẹ yé. Saulu he gbẹwanna owẹ̀n Jesu tọn jẹ otẹn godo tọn mẹ dai, wá lẹzun dopo to godonọnamẹtọ akonka etọn lẹ mẹ. To whenuena nukun etọn hùn bọ e yin bibaptizi pó godo, “huhlọn Saulu tọn to e ji jẹ, e sọ doflu Ju he nọ nọ̀ Damasku lẹ, bosọ sọhia dọ ehe wẹ Klisti lọ.”—Owalọ lẹ 9:22.

Sébibla Mẹhuhu Tọn Gboawupo

Fie wẹ Saulu, he wá yin yiylọdọ Paulu to godo mẹ, yì to whenuena e lẹzun Klistiani godo? To wekanhlanmẹ etọn hlan Galatianu lẹ mẹ, e dọmọ: “Yẹn yì Alabia, bosọ lẹgọwa Damasku.” (Galatianu lẹ 1:17) Hogbe lọ “Alabia” sọgan yin yiyizan na gbejizọnlin zinzin yì adà Lopo Alabianu lẹ tọn depope ji. Weyọnẹntọ delẹ dọ dọ Paulu sọgan ko yì Danfafa Silia tọn ji kavi fidevo to ahọluduta Nabatéen Aleta IV tọn mẹ. E yọnbasi taun dọ Saulu yì fihe to abọẹ de nado lẹnayihamẹpọn to baptẹm etọn godo, kẹdẹdile Jesu yì zungbo mẹ to baptẹm etọn godo do.—Luku 4:1.

To whenuena Saulu lẹkọwa Damasku, “Ju lẹ to ayiha kàn nado hù i.” (Owalọ lẹ 9:23) Togán he yin afọzedaitọ Ahọlu Aleta tọn to Damasku de awhànvipẹ lẹdo tòdaho lọ nado wle Saulu. (2 Kọlintinu lẹ 11:32) Ṣigba to ojlẹ he mẹ kẹntọ lẹ to sébla nado hù Saulu, devi Jesu tọn lẹ wleawuna aliho he mẹ e na họ̀ngán te.

Anania po nuplọntọ he nọpọ́ hẹ apọsteli lọ to Klistiani lilẹzun etọn godo tlolo lẹ po tin to mẹhe gọalọna Saulu nado họ̀ngán lẹ mẹ.a (Owalọ lẹ 9:17-19) Mẹdelẹ he lẹzun yisenọ na yẹwhehodidọ Saulu tọn to Damasku wutu sọgan ko gọalọ ga, na Owalọ lẹ 9:25 dọ dọ: “Nuplọntọ etọn lẹ hẹn ẹn to ozán mẹ, bosọ zlọ́n ẹn dai gbọn dòkọ́ ji to ohà mẹ.” Hogbe lọ “nuplọntọ etọn lẹ” sọgan dlẹnalọdo mẹhe Saulu plọnnu lẹ. Depope he whẹho lọ na yin, kọdetọn dagbe lizọnyizọn etọn tọn yidogọna okẹ̀n he ko yin didó e dai.

Nuhe Dona Yin Pinplọn sọn E Mẹ

Dogbigbapọnna delẹ to nujijọ he lẹdo Klistiani lilẹzun Saulu tọn po baptẹm etọn po lẹ mẹ dohia hezeheze dọ nuhe mẹdevo lẹ lẹn gando ewọ go ma duahunmẹna ẹn zẹjlẹgo gba; mọjanwẹ e ma jogbe na nukundiọsọmẹ sinsinyẹn wutu. Nuhe yin nujọnu hugan na Saulu wẹ azọ́ndenamẹ yẹwhehodidọ tọn he e mọyi lọ.—Owalọ lẹ 22:14, 15.

Be hiẹ ṣẹṣẹ mọ nujọnu-yinyin wẹndagbe lilá tọn wẹ ya? Eyin mọwẹ, hiẹ yọnẹn dọ Klistiani nugbo lẹpo wẹ dona yin yẹwhehodọtọ Ahọluduta tọn lẹ. E ma dona paṣa we eyin lizọnyizọn towe nọ fọ́n nuyiwa kanyinylan tọn lẹ dote to whedelẹnu. (Matiu 24:9; Luku 21:12; 1 Pita 2:20) Saulu ze apajlẹ dagbe dai to lehe e pehẹ nukundiọsọmẹ do mẹ. Klistiani he doakọnna whlepọn bo ma jogbe lẹ na mọ nukundagbe Jiwheyẹwhe tọn. Jesu dọna devi etọn lẹ dọ: “Yè na gbẹwanna mì sọn gbẹtọ lẹpo dè na oyín ṣie tọn wutu.” Ṣogan, e na yé jide dọmọ: “To homẹfa [kavi akọndonanu] mìtọn mẹ, mì na yí ayiha mìtọn whlá.”—Luku 21:17-19.

[Nudọnamẹ Odò Tọn]

a Sinsẹ̀n Klistiani tọn sọgan ko wá Damasku vlavo bọdo yẹwhehodidọ Jesu tọn to Galili go kavi to Pẹntikọsti owhe 33 W.M. godo.—Matiu 4:24; Owalọ lẹ 2:5.

[Yẹdide to weda 28]

Saulu “jai jẹ kọmẹ” to whenuena Jesu sọawuhia ẹ

[Yẹdide to weda 29]

Saulu họ̀ngán sọn sébibla mẹhuhu tọn mẹ to Damasku

    Gun Publications | (1976-2025)
    Ṣí Adà Towe
    Hùn Adà Towe
    • Gungbe
    • Dohlan
    • Nujlomẹ Lẹ
    • Copyright © 2025 Watch Tower Bible and Tract Society of Pennsylvania
    • Osẹ́n Nọtẹn lọ Tọn Lẹ
    • Osẹ́n Nudọnamẹ Mẹdetiti Tọn
    • De Osẹ́n Nudọnamẹ Tọn Lẹ
    • JW.ORG
    • Hùn Adà Towe
    Dohlan