Azọ́nwanu Lẹdogbedevomẹ Tọn Dagbe De
DOWATỌ Biblu tọn, Jehovah Jiwheyẹwhe, jlo dọ wẹndagbe Ahọluduta etọn tọn ni yin lilá “hlan akọta lẹpo, hlan hẹnnu lẹpo, hlan ogbè lẹpo, hlan gbẹtọ lẹpo.” (Osọhia 14:6) Ojlo etọn wẹ yindọ Ohó etọn ni tin-to-aimẹ na gbẹtọvi lẹpo. Enẹwutu, Biblu ko yin lilẹdo ogbè susu mẹ hugan owe devo depope to aihọn mẹ. Lẹdogbedevomẹ-basitọ fọtọ́n susu lẹ ko jẹtukla bo yí whenu susu zan nado lilẹ́ linlẹn Jiwheyẹwhe tọn lẹ do ogbè devo mẹ.
Ṣigba, na lẹdogbedevomẹ-basitọ lẹ, Biblu ma yin owe he dona yin lilẹdogbedevomẹ de poun gba. Whlasusu wẹ Biblu lọsu ko yin yiyizan taidi azọ́nwanu de nado lilẹ́ kandai devo lẹ do ogbè devo mẹ. Lẹdogbedevomẹ-basitọ susu ko yí lẹdogbedevomẹ hogbe Biblu tọn lẹ tọn jlẹdo lẹdogbedevomẹ Biblu ogbè voovo lẹ tọn go nado yọ́n aliho dagbe hugan he mẹ yé sọgan lilẹ́ hogbe delẹ te. Aliho dagbe he mẹ Biblu yin lilẹdogbedevomẹ te nọ yin yiyizan todin to lẹdogbedevomẹ he ọdinatẹẹ nọ basi lẹ mẹ.
Nado dọ hójọhó, e vẹawu taun na ọdinatẹẹ de nado basi lẹdogbedevomẹ. Azọ́nyọnẹntọ delẹ tlẹ ko dọ dọ lẹdogbedevomẹ yin nude he zẹ̀ nugopipe ọdinatẹẹ tọn go. Etẹwutu? Whẹwhinwhẹ́n lọ wẹ yindọ ogbè ma yin todohukanji hogbe lẹ tọn poun gba. Ogbè dopodopo tindo aliho vonọtaun he mẹ hogbe etọn lẹ nọ yin kinkọndopọ te lẹ, osẹ́n lẹ, fie osẹ́n ehelẹ ma dona yin hihodo te lẹ, hogbe gigẹdẹ lẹ po alọdlẹndonu tọn lẹ po. Vivẹnudido nado plọn ehe lẹpo ọdinatẹẹ de ma ko hẹn kọdetọn dagbe wá sọmọ. E nọ vẹawu taun nado mọnukunnujẹ suhugan lẹdogbedevomẹ he ọdinatẹẹ basi lẹ mẹ.
Ṣigba, sọgbe hẹ nuhe Franz Josef Och, he yin azọ́nyọnẹntọ nukundeji lẹdogbedevomẹ ọdinatẹẹ tọn de dọ, lẹnunnuyọnẹntọ ọdinatẹẹ tọn lẹ to dodinna aliho yọyọ lẹ nado basi lẹdogbedevomẹ todin. Mí ni dọ dọ hiẹ jlo na basi lẹdogbedevomẹ sọn ogbè Hindi mẹ yì Glẹnsigbe mẹ. Tintan whẹ́, dín kandai he ko tin-to-aimẹ to ogbè awe lọ lẹ mẹ delẹ mọ. Enẹgodo bẹ yé do ọdinatẹẹ de mẹ. Ọdinatẹẹ lọ nọ yí kandai lọ lẹ jlẹdo yedelẹ go. Di apajlẹ, eyin ọdinatẹẹ lọ mọdọ fisusu he e mọ hogbe Hindi tọn dopolọ te lẹ wẹ e nọ mọ hogbe Glẹnsigbe tọn lọ he nọtena “owhé” te, e na wá tadona kọ̀n dọ hogbe Hindi tọn enẹ wẹ sọgbe hẹ hogbe lọ “owhé.” Podọ e yọnbasi dọ hogbe he sẹpọ ẹ lẹ ni yin hogbe zẹẹmẹ-bibasi tọn lẹ taidi “daho,” “pẹvi,” “hoho,” kavi “yọyọ.” Gbọnmọ dali, ọdinatẹẹ lọ nọ wleawuna todohukanji hogbe he sọgbe hẹ yedelẹ tọn po aliho hogbe kinkọndopọ tọn lẹ po. To “azọ́npinplọn” mọnkọtọn he sọgan dẹ̀n na azán kavi osẹ vude poun godo, ọdinatẹẹ lọ sọgan yí nuhe e ko “plọn” lẹ zan na kandai yọyọ lẹ. Dile etlẹ yindọ lẹdogbedevomẹ ọdinatẹẹ lọ tọn sọgan nọma yọ́n sọmọ na nuhe dù yizan hogbe lẹ tọn po whanpẹ wekinkan tọn po, e nọ saba họnwun jẹ obá de mẹ nado do zẹẹmẹ po nuagokun tangan lẹ po hia.
Na taun tọn, lehe kandai he yin bibẹ do ọdinatẹẹ lọ mẹ jẹnukọn lẹ sù bosọ gọ́ na zẹẹmẹ do sọ, mọwẹ lẹdogbedevomẹ lọ nọ pọnte dogọ do. Fie nujọnu-yinyin Biblu tọn sọawuhia te niyẹn. E ko yin lilẹdogbedevomẹ po sọwhiwhe po to ogbè susu mẹ, bo sọgan yin mimọ po awubibọ po, podọ kandai susugege wẹ e bẹhẹn. Nuhe zọ́n niyẹn bọ Biblu wẹ dodinnanutọ lọ de jẹnukọn nado plọnazọ́n ọdinatẹẹ lọ gando ogbè yọyọ de go.