Kanbiọ lẹ sọn Wehiatọ lẹ Dè
To whenuena apọsteli Paulu dọ to Tohodọtọ Ju lẹ tọn nukọn dọ “Falesi de wẹ yẹn,” be e ma taidi dọ e mọ́n yise Klistiani tọn etọn ya?
E jẹ dọ mí ni gbadopọnna lẹdo hodidọ lọ tọn nado mọnukunnujẹ hogbe Paulu tọn he tin to Owalọ lẹ 23:6 mẹ lẹ mẹ.
To whenuena gbẹtọgun de fọ́n do Paulu ji to Jelusalẹm, e dọho hlan yé. E donù e go dọ emi yin mẹhe “yè plọn to [Jelusalẹm] to afọ Gamalieli tọn go, he yè plọn to osẹ́n otọ́ lẹ tọn mẹ mlẹnmlẹn.” Mahopọnna dọ gbẹtọgun lọ dotoaina hodidọ avùnlọyiyi tọn etọn na ojlẹ de, yé sọ wá fọnadán to godo mẹ, bọ awhàngán daho lọ plan Paulu yì síngbo awhànfuntọ lẹ tọn mẹ. To whenuena yè jlo na jẹ hihò e ji, Paulu dọmọ: “E tin jẹ na mì nado hò mẹhe yin Lomunu de whẹmagbledo?”—Owalọ lẹ 21:27–22:29.
To wunkẹngbe etọn, awhàngán lọ plan Paulu yì Tohodọtọ Ju lẹ tọn nukọn, yèdọ whẹdatẹn daho Ju lẹ tọn. Paulu pọ́n mẹhe tin to pipli Tohodọtọ Ju lẹ tọn lọ mẹ lẹ tlintlin bo mọdọ Sadusi lẹ po Falesi lẹ po wẹ yé. To enẹgodo, e dọmọ: “Mẹho, mẹmẹsunnu emi, Falesi de wẹ yẹn, ovi Falesi tọn de: na todido po fọnsọnku oṣiọ lẹ tọn po wutu wẹ yè do ylọ mi wá kannuse.” Enẹ hẹn nudindọn de wá Falesi lẹ po Sadusi lẹ po ṣẹnṣẹn, “na Sadusi lẹ dọmọ, fọnsọnku de ma tin, kavi angẹli, kavi gbigbọ; ṣigba Falesi lẹ yí [ehe lẹpo] sè.” Delẹ to mẹhe tin to ogbẹ́ Falesi lẹ tọn mẹ lẹ dọnnu po adì po dọmọ: “Míwlẹ ma mọ onú ylankan de to dawe he go gba.”—Owalọ lẹ 23:6-10.
Na Paulu ko yin yinyọnẹn taidi Klistiani zohunhunnọ de wutu, e ma sọgan hẹn Tohodọtọ Ju lẹ tọn yise dọ emi gbẹsọ yin Falesi nujọnu tọn de gba. Falesi he tin to otẹn lọ mẹ lẹ ma na kẹalọyi mẹhe ma tindo yise to nuplọnmẹ yetọn lẹpo mẹ gba. Enẹwutu, Paulu ma to didohia gbọn hogbe etọn lẹ dali dọ emi yin Falesi de to gigọ́mẹ gba, podọ Falesi he tin to finẹ lẹ na ko mọnukunnujẹ hogbe Paulu tọn lẹ mẹ to ninọmẹ enẹlẹ mẹ.
Gbọn didọ dali dọ emi to yinyin whẹdana na todido fọnsọnku oṣiọ lẹ tọn wutu, Paulu to didohia to aliho he họnwun mẹ dọ to whẹho enẹ mẹ, emi taidi Falesi lẹ. Eyin nudindọn depope fọndote do whẹho fọnsọnku tọn ehe ji, Paulu na yin hihia do adà Falesi lẹ tọn mẹ kakati nido yin do Sadusi he ma yise to fọnsọnku mẹ lẹ tọn mẹ.
Nuhe Paulu yise taidi Klistiani de ma jẹagọdo nuyise Falesi lẹ tọn na nuhe dù whẹho lẹ taidi fọnsọnku, angẹli lẹ, po nuagokun Osẹ́n tọn delẹ po gba. (Filippinu lẹ 3:5) Enẹwutu, to kọndopọmẹ hẹ nuyise enẹlẹ, Paulu sọgan ylọ ede dọ Falesi de, podọ dodonu enẹ ji wẹ hagbẹ Tohodọtọ Ju he tin to finẹ lẹ tọn mọnukunnujẹ hogbe etọn lẹ mẹ te. E họnwun todin dọ dotẹnmẹ hundote he e tindo nado wá sọn whẹndo Ju de mẹ wẹ e to yiyizan nado yiavunlọna ede to hagbẹ whẹdatẹn daho hugan Ju lẹ tọn he gọ́ na nuvẹun lẹ nukọn.
Ṣigba, kunnudenu daho hugan he dohia dọ Paulu ma mọ́n yise etọn wẹ yindọ e zindonukọn nado to nukundagbe Jehovah tọn tindo. To ozán he jẹgodona gbeegbe Paulu dọ ohó enẹlẹ mẹ, Jesu dọna ẹn dọ: “Dotu, Paulu, na le hiẹ dekunnuna mi to Jelusalẹm do, mọwẹ hiẹ nasọ dekunnu to Lomu ga.” To whenuena e yindọ Paulu mọ nukundagbe Jiwheyẹwhe tọn, mí sọgan wá tadona kọ̀n dọ e ma mọ́n yise etọn gba.—Owalọ lẹ 23:11.