Lilatọ Ahọluduta Tọn lẹ Na Linlin

Nugbonọ lẹ Nọ Pagigona Jehovah

KUNNUDETỌ JEHOVAH TỌN LẸ—jọja po mẹho po—yin yinyọnẹn na nugbonọ-yinyin yetọn lẹdo aihọn pé. Gbadopọnna apajlẹ delẹ sọn adà voovo atọ̀n aihọn tọn lẹ mẹ.

Olusola, owhe 17 mẹvi, he nọ nọ̀ Nigeria, tọ́nsọn wehọmẹ jei whégbè to gbèdopo bo mọ akuẹ-hẹnnu de to aigba. E ze e yì na wehọmẹ-gán lọ, mẹhe hia akuẹ lọ bọ lẹndopọ etọn yin nudi 6 200 naira (nudi 23 000F CFA). Wehọmẹ-gán lọ gọ̀ akuẹ lọ jo na mẹplọntọ he hẹn ẹn bu lọ. Nado do pinpẹn-nutọn-yinyọnẹn etọn hia, mẹplọntọ lọ na Olusola 1 000 naira (nudi 3 500F CFA) bo dọna ẹn dọ e ni yí ì do sú wehọmẹ-kuẹ etọn. Wehọmẹvi he pò lẹ ṣàn Olusola kò to whenuena yé sè nuhe jọ. To osẹ delẹ godo, wehọmẹvi de dọ dọ akuẹ emitọn bu, enẹwutu e yin bibiọ to mẹplọntọ lẹ si nado keje wehọmẹvi lẹpo pọ́n. “Hiẹ jẹ apadopo tofi,” wẹ mẹplọntọ lọ dọna Olusola. “N’yọnẹn dọ taidi Kunnudetọ Jehovah tọn de, a ma sọgan jajo.” Akuẹ lọ yin mimọ to dẹpẹ awe he ko ṣàn Olusola kò dai lẹ si, bọ yé mọ mẹplọnlọ sinsinyẹn yí. Olusola wlan dọmọ: “Homẹ ṣie hùn dọ yè yọ́n mi taidi Kunnudetọ Jehovah tọn, he ma na jajo pọ́n gbede, bo gbọnmọ dali hẹn pipà wá na Jehovah.”

Marcelo he yin Argentine-vi jiji tọ́nsọn whégbè to gbèdopo bo mọ saki pẹvi de to aigba sẹpọ họ̀godo etọn. E ze saki lọ biọ họmẹ bọ ewọ po asi etọn po hùn in. Yé ma yí nukun yetọn lẹ sè to whenuena yé mọ akuẹ sọha daho de, gọna kalti akuẹ-yíyí tọn lẹ, po akuẹyiwema he ko yin alọdo e mẹ voovo lẹ po, ehe dopo to e mẹ bẹ pesos livi dopo hẹn [nudi 164 000 000F CFA]. Yé mọ sọha alokan tọn de to saki pẹvi lọ mẹ bo tẹkan hlan núnọ lọ bosọ basi tito nado gọ̀ saki lọ po nuhe tin to e mẹ lẹ po jo to azọ́nwatẹn Marcelo tọn. To whenuena núnọ lọ wá, ayiha etọn ma jai paali. Azọ́nmẹyimẹdotọ lọ dọna ẹn nado wle-agbọ́-mi, na Kunnudetọ Jehovah tọn de wẹ Marcelo yin wutu. Nado do pinpẹn-nutọn-yinyọnẹn hia na saki pẹvi etọn he yin mimọ lọ, núnọ lọ na Marcelo pesos 20 poun (nudi 3 000F CFA). Ehe doadi na azọ́nmẹyimẹdotọ lọ na nugbonọ-yinyin Marcelo tọn ko yinuwadeji taun. Ehe hùn dotẹnmẹ dote na Marcelo nado basi zẹẹmẹ dọ taidi Kunnudetọ Jehovah tọn de, ewọ jlo na yin nugbonọ to ojlẹ lẹpo mẹ.

Numimọ he bọdego ehe wá sọn Kyrgyzstan. Rinat, visunnu owhe ṣidopo mẹvi de, mọ akuẹ-hẹnnu de he nawe he nọ nọ̀ lẹdo dopolọ mẹ hẹ ẹ de ko hẹnbu. Akuẹ som 1 100 (nudi 12 500F CFA) wẹ tin to akuẹ-hẹnnu lọ mẹ. To whenuena Rinat gọ̀ akuẹ-hẹnnu lọ jo na nawe lọ, e hia akuẹ lọ bo dọna onọ̀ Rinat tọn dọ som 200 [nudi 2 500F CFA) whè sọn akuẹ lọ mẹ. Rinat dọ dọ emi ma doalọ akuẹ lọ go gba. Enẹgodo yemẹpo tọ́n jẹ gbonu nado dín akuẹ he pò lọ podọ yé mọ ẹn sẹpọ fie akuẹ-hẹnnu lọ yin mimọ te dai. E paṣa nawe lọ taun. E dopẹ́ na Rinat po onọ̀ etọn po, tintan na akuẹ he bu lọ gigọjo podọ awetọ, na oplọn Klistiani tọn he yin nina Rinat.