A Dike Nuṣikọna We to Dagbe Wiwà mẹ Blo

“NA WALỌ mìtọn ni yin dagbe to Kosi lẹ ṣẹnṣẹn,” wẹ apọsteli Pita dotuhomẹna mí dọ. (1 Pita 2:12) Hogbe Glẹkigbe tọn he yin lilẹdo “dagbe” dlẹnalọdo nuhe “yọnwhanpẹ, gọ́ na yẹyi, jẹna gbégbò, yọ́n tlala.” To egbezangbe, e sọgan taidi nuhe ma sọgbe hẹ lẹnpọn dagbe nado donukun walọ he gọ́ na yẹyi kavi jẹna gbégbò sọn gbẹtọ lẹ si to paa mẹ. Ṣigba, omẹ Jehovah tọn lẹ ko tindo kọdetọn dagbe taidi pipli de to ayinamẹ Pita tọn hihodo mẹ to egbehe. Na nugbo tọn yé yin yinyọnẹn lẹdo aihọn pé na jijọ dagbe yetọn.

Ehe jẹna ayidonugo titengbe eyin mí lẹnnupọndo ayimajai po nuhahun he mí to pipehẹ to “ojlẹ awusinyẹn tọn” ehelẹ mẹ lẹ ji. (2 Timoti 3:1) Awusinyẹnnamẹnu lẹ yin adà gbẹzan mítọn egbesọ tọn, bọ mẹsusu sọ nọ diọnukunsọ aliho gbẹninọ Klistiani tọn. To yidogọmẹ, dile etlẹ yindọ whlepọn delẹ yin ojlẹ gli tọn, devo lẹ nọ gbọṣi aimẹ, bo tlẹ nọ to sinsinyẹn deji. Ṣigba, apọsteli Paulu na avase dọmọ: “Mì dike nuṣikọna mí to dagbe wiwà mẹ blo: na míwlẹ na gbẹ̀n to whenuena ojlẹ sọ, eyin mí ma wàdidọ.” (Galatianu lẹ 6:9) Nalete, nawẹ e sọgan yọnbasi nado wà dagbe, bosọ zindonukọn to mọwiwà mẹ, to whlepọn sinsinyẹn lẹ po nukundiọsọmẹ madoalọte lẹ po glọ gbọn?

Alọgọnamẹnu lẹ Nado Nọ Wà Dagbe

Nado “gọ́ na yẹyi, jẹna gbégbò, [kavi] yọ́n tlala” yin ninọmẹ gbẹtọ homẹ tọn, yèdọ jẹhẹnu ahun mẹ tọn de. Enẹwutu, walọ dagbe go hinhẹn to whlepọn lẹ po awusinyẹnnamẹnu lẹ po glọ ma yin nude he nọ wá domọ poun gba, kakatimọ, e nọ yin awuwlena gbọn nunọwhinnusẹ́n Biblu tọn lẹ hihodo podọ yíyí yé do yizan mẹ egbesọegbesọ to adà gbẹzan mítọn tọn lẹpo mẹ dali. Etẹlẹ wẹ sọgan gọalọ to ehe wiwà mẹ? Lẹnnupọndo nuhe bọdego helẹ ji.

Wleawuna ayilinlẹn Klisti tọn. E nọ biọ whiwhẹ nado doakọnna nuhe sọgan taidi nuyiwa mawadodo tọn lẹ. Eyin mẹde nọ ze ede daga zẹjlẹgo, e sọgan vẹawu na ẹn nado doakọnna nuyiwahẹmẹ agọ̀. Ṣigba, Jesu “whiwhẹ ede, bosọ lẹzun tonusetọ kakajẹ okú.” (Filippinu lẹ 2:5, 8) Gbọn apajlẹ etọn hihodo dali, mí ma na tindo numọtolanmẹ ‘nuṣikọ kavi agbọ́pemẹ’ tọn to sinsẹ̀nzọn wiwe mítọn mẹ gba. (Heblu lẹ 12:2, 3) Nọ do tonusise whiwhẹ tọn hia gbọn gbekinkọndopọ hẹ mẹhe to anademẹtọ yin to agun towe mẹ lẹ dali. (Heblu lẹ 13:17) Plọn nado nọ pọ́n mẹdevo lẹ hlan taidi dọ yé ‘hugan’ we, bo nọ hò dagbemẹninọ yetọn pọ́n jẹnukọnna towe titi.—Filippinu lẹ 2:3, 4.

Flindọ Jehovah yiwanna we. Mí dona tindo nujikudo dọ Jehovah “tin, podọ ewọ wẹ ahọsutọ yé he whesọ do dín in lẹ tọn.” (Heblu lẹ 11:6) E to tukla mítọn jẹ nugbonugbo bosọ jlo dọ mí ni mọ ogbẹ̀ madopodo. (1 Timoti 2:4; 1 Pita 5:7) Eyin mí flindọ nudepope ma sọgan súnsún owanyi he Jiwheyẹwhe tindo na mí sẹ, ehe na gọalọna mí ma nado gbọjọ to whlepọn glọ.—Lomunu lẹ 8:38, 39.

Ze jidide towe lẹpo do Jehovah mẹ. Jidide do Jehovah go yin nujọnu taun, titengbe to whenuena whlepọn lẹ taidi nuhe ma na doalọte kavi ze ogbẹ̀ mítọn do owù mẹ. Mí dona deji mlẹnmlẹn dọ Jehovah ma na dike mí ni yin whiwhlepọn ‘hú ehe mí sọgan hẹn,’ podọ ‘e na nọ deali de’ na mí to whepoponu. (1 Kọlintinu lẹ 10:13) Mí tlẹ sọgan duto budonamẹ okú tọn ji eyin mí dotudo Jehovah go.—2 Kọlintinu lẹ 1:8, 9.

Gbọṣi odẹ̀ mẹ. Odẹ̀ ahundopo tọn yin onú titengbe. (Lomunu lẹ 12:12) Odẹ̀ he wá sọn ahun mẹ yin dopo to aliho he mí nọ yizan nado dọnsẹpọ Jehovah lẹ mẹ. (Jakobu 4:8) Sọn numimọ mítọn titi mẹ, mí yọnẹn dọ “eyin mí biọ nudepope . . . , e [nọ] sè mítọn.” (1 Johanu 5:14) Eyin Jehovah jotẹnna nuhahun de nado zindonukọn taidi whlepọn tenọgli mítọn tọn, mí nọ hodẹ̀ bo nọ biọ alọgọ etọn nado doakọnna. (Luku 22:41-43) Odẹ̀ nọ gọalọna mí nado yọnẹn dọ Jehovah ma nọ jo mí do gbede, podọ dọ mí na nọ gbawhàn to whepoponu na ewọ tin to adà mítọn mẹ wutu.—Lomunu lẹ 8:31, 37.

Azọ́n Dagbe lẹ—‘Asisa Pipà po Gigo po’ Tọn

Klistiani lẹpo wẹ nọ “tin to awubla mẹ gbọn whlepọn susu dali” sọn ojlẹ de mẹ jẹ devo mẹ. Ṣigba mí ma dona ‘dike onú ni ṣikọna mí to dagbe wiwà mẹ.’ Eyin hiẹ tin to kọgbidinamẹnu glọ, nọ mọ huhlọn yí sọn yinyọnẹn mẹ dọ nugbonọ-yinyin towe na wá lẹzun ‘asisa pipà, yẹyi po gigo po tọn’ to godo mẹ. (1 Pita 1:6, 7) Nọ mọaleyi to gigọ́mẹ sọn awuwledainanu gbigbọmẹ tọn he Jehovah basi tito etọn nado hẹnwe lodo lẹ mẹ. Eyin hiẹ tindo nuhudo nukunpedomẹgo vonọtaun de tọn, lẹhlan mẹhe to devizọnwa taidi lẹngbọhọtọ, mẹplọntọ, podọ ayinamẹtọ to agun Klistiani tọn mẹ lẹ dè. (Owalọ lẹ 20:28) Nọ yì opli agun tọn he nọ ‘jlahomẹdona mí to owanyi po azọ́n dagbe lẹ po mẹ’ lẹ to gbesisọ mẹ. (Heblu lẹ 10:24) Tito Biblu hihia egbesọ tọn po oplọn mẹdetiti tọn po na gọalọna we nado gbọṣi nukle bo lodo to gbigbọ-liho; nuyiwadomẹji dopolọ wẹ mahẹ gbesisọ tọn tintindo to lizọnyizọn Klistiani tọn mẹ nasọ tindo do jiwe.—Psalm 1:1-3; Matiu 24:14.

Lehe hiẹ to numimọ owanyi po nukunpedomẹgo Jehovah tọn po tindo sọ, mọwẹ ojlo towe nado yin “vivẹnudotọ azọ́n dagbe lẹ tọn” na to susudeji do niyẹn. (Titu 2:14) Flindọ “mẹhe doakọnna kakajẹ opodo, mẹdopolọ wẹ yè na whlẹn gán.” (Matiu 24:13) Mọwẹ, magbe ma nado ‘dike onú ni ṣikọna we to dagbe wiwà mẹ’!

[Apotin to weda 29]

Mí dona deji mlẹnmlẹn dọ Jehovah ma na dike mí ni yin whiwhlepọn ‘hú ehe mí sọgan hẹn,’ podọ ‘e na nọ deali de’ na mí to whepoponu

[Yẹdide lẹ to weda 30]

Alọnu hinhẹn ján to nuwiwa yẹwhehọluduta tọn lẹ mẹ sọgan gọalọna mí nado pehẹ whlepọn lẹ