Kanbiọ lẹ sọn Wehiatọ lẹ Dè

Deutelonomi 14:21 dọmọ: “Mìwlẹ ma na dù sọn onú he kú ededenu depope mẹ gba.” Be ehe jẹagọdo Levitiku 11:40, he dọmọ: “Ewọ he dù sọn oṣiọ etọn mẹ na yàn avọ̀ etọn lẹ, bo yin mawé kakajẹ whèjai lọ” wẹ ya?

Wefọ awe ehelẹ ma jẹagọdo yede gba. Wefọ tintan lọ to osẹ́n he yin didó sọta kanlin he kú ededenu de dùdù vọdọ poun wẹ, vlavo kanlin de he gbekanlin ylankan lẹ hù. (Eksọdusi 22:31; Levitiku 22:8) Wefọ awetọ basi zẹẹmẹ nuhe Islaelivi de sọgan ko wà eyin e gbà osẹ́n enẹ, vlavo to mayọnẹn mẹ.

Nugbo lọ dọ Osẹ́n gbẹ́ nude ma dohia dọ nulọ ma na wá yin wiwà to gbèdopo gba. Di apajlẹ, osẹ́n lẹ tin he gbẹ́ ajojijẹ, mẹhuhu, kunnudide lalo, po mọmọ po sọyi. To ojlẹ dopolọ mẹ, obá lẹ tin he na hò mẹhe gbà osẹ́n he yin nina sọn olọn mẹ wá enẹlẹ. Yasanamẹ mọnkọtọn nọ na huhlọn osẹ́n lọ lẹ bo nọ do lehe yé yin nujọnu sọ hia.

Mẹhe gbà osẹ́n he gbẹ́ dọ kanlin he kú ededenu ma dona yin dùdù na yin mawé to nukun Jehovah tọn mẹ bosọ dona jugbọn tito lẹ̀wé tọn he sọgbe delẹ mẹ. Eyin e gboawupo nado lẹ̀ ede wé ganji, whenẹnu e na “ze ylanwa etọn hẹn.”—Levitiku 17:15, 16.