Kanbiọ lẹ sọn Wehiatọ lẹ Dè

To whenuena e yindọ Ahọlu Sọlọmọni Islaeli hohowhenu tọn hẹn nugbonọ-yinyin etọn hlan Jiwheyẹwhe bu to yọnhowhe mẹ, be mí sọgan wá tadona kọ̀n dọ e ma na yin finfọnsọnku wẹ ya?—1 Ahọlu lẹ 11:3-9.

Dile etlẹ yindọ Biblu slẹ yinkọ sunnu po yọnnu yisenọ delẹ po tọn he ayihaawe ma tin dọ yé na yin finfọnsọnku, e ma dọhodo todido fọnsọnku dopodopo mẹhe go e donù lẹ tọn ji tlọlọ gba. (Heblu lẹ 11:1-40) Ṣigba, to whẹho Sọlọmọni tọn mẹ, mí sọgan yọ́n whẹdida Jiwheyẹwhe tọn gbọn yíyí nuhe jọ do e go to okú etọn whenu jlẹdo nuhe jọ do nugbonọ delẹ go to whenuena yé kú go dali.

Yọnbasi awe gee ji wẹ Biblu dọhodo gando ninọmẹ oṣiọ lẹ tọn go—ninọmẹ matintọ-yinyin na ojlẹ de tọn po ninọmẹ okú kakadoi tọn po. Mẹhe ma yin hihia jẹ nado yin finfọnsọnku lẹ nọ yin dindlan do ‘Gẹhẹnna,’ kavi ‘agbàdo miyọ́n tọn’ mẹ. (Matiu 5:22, nudọnamẹ odò tọn; Osọhia 20:14) Delẹ to yé mẹ wẹ asu po asi po tintan lọ, Adam po Evi po, Juda Iskaliọti mẹdehiatọ lọ, gọna mẹdelẹ he kú to whenuena Jiwheyẹwhe hẹn whẹdida ṣẹ do yé ji, taidi mẹhe nọgbẹ̀ to azán Noa tọn gbè lẹ podọ tòmẹnu Sọdọmi po Gọmọla po tọn lẹ.a To whenuena mẹhe na mọaleyi sọn fọnsọnku mẹ lẹ kú, yé nọ yì yọdò paa gbẹtọvi lẹ tọn mẹ he nọ yin yiylọdọ Ṣeol kavi Hadẹs to ogbè dowhenu Biblu tọn lẹ mẹ. Biblu dọ gando sọgodo yetọn go dọmọ: “Ohù hẹn oṣiọ he to e mẹ lẹ jẹage; okú po kutomẹ [kavi Hadẹs] po hẹn oṣiọ he tin to yé mẹ lẹ jẹage: yè sọ dawhẹna yé dopodopo kẹdẹdi azọ́n yetọn lẹ.”—Osọhia 20:13.

Enẹwutu, nugbonọ he yin nùdego to Heblu lẹ weta 11 mẹ lẹ tin to Ṣeol, kavi Hadẹs mẹ, bo to tenọpọn fọnsọnku. Delẹ to devizọnwatọ nugbonọ Jiwheyẹwhe tọn ehelẹ mẹ wẹ Ablaham, Mose, po Davidi po. Todin, pọ́n lehe Biblu dọho gando okú yetọn go do. “Hiẹ nasọ yì otọ́ towe lẹ dè to jijọho mẹ,” wẹ Jehovah dọna Ablaham, “yè nasọ diṣiọ towe to yọnhopipo dagbedagbe mẹ.” (Gẹnẹsisi 15:15) Jehovah dọna Mose dọmọ: “Doayi e go, hiẹ na damlọn po otọ́ towe lẹ po.” (Deutelonomi 31:16) Gando Davidi he yin otọ́ Sọlọmọni tọn go, Biblu dọmọ: “Davidi sọ damlọn hẹ otọ́ etọn lẹ, yè sọ dì i do tòdaho Davidi tọn mẹ.” (1 Ahọlu lẹ 2:10) Gbọnmọ dali, hodidọ lọ dọ ‘mẹde mlọnai hẹ otọ́ etọn lẹ’ yin aliho devo nado dọ dọ mẹlọ yì Ṣeol mẹ.

Etẹwẹ jọ do Sọlọmọni go to whenuena e kú? Biblu na gblọndo dọmọ: “Ojlẹ he Sọlọmọni do duahọlu to Jelusalẹm mẹ to Islaeli lẹpo ji yin owhe kande. Sọlọmọni sọ damlọn po otọ́ etọn lẹ po, yè sọ dì i to tòdaho Davidi otọ́ etọn tọn mẹ.” (1 Ahọlu lẹ 11:42, 43) Enẹwutu, e taidi nuhe sọgbe hẹ lẹnpọn dagbe nado wá tadona kọ̀n dọ Sọlọmọni yì Ṣeol, kavi Hadẹs mẹ, bo to tenọpọn fọnsọnku.

Tadona ehe zẹẹmẹdo dọ yọnbasi fọnsọnku tọn hùndonuvo na mẹdevo lẹ he Owe-wiwe dlẹnalọdo tlọlọ dọ, ‘yé mlọnai hẹ otọ́ yetọn lẹ.’ Na nugbo tọn, susu ahọlu he bọdo Sọlọmọni go lẹ tọn yin hodọ gandego to aliho ehe mẹ, dile etlẹ yindọ yé ma yin nugbonọ. Ehe ma jẹagọdo lẹnpọn dagbe gba, na “fọnsọnku dodonọ lẹ tọn, po mawadodonọ lẹ po tọn de na tin.” (Owalọ lẹ 24:15) E họnwun dọ whenue “mẹhe tin to yọdò [oflin] tọn mẹ lẹpo” na ko fọ́n godo kẹdẹ wẹ mí na yọ́n mẹhe mọaleyi sọn fọnsọnku mẹ lẹ na taun tọn. (Johanu 5:28, 29) Enẹwutu, kakati nado tẹdo pọndohlan de go majomajo gando fọnsọnku mẹdepope he ko nọgbẹ̀ to hohowhenu tọn go, mí ni nọte, bo dejido nudide pipé Jehovah tọn go.

[Nudọnamẹ odò tọn]