Kanbiọ lẹ sọn Wehiatọ lẹ Dè
To Islaeli hohowhenu tọn mẹ, etẹwẹ hinhọ́n he nọ yin yiylọ to whedelẹnu dọ Ṣekina bo nọ sọawuhia to azọ́njiawu-liho to Fiwiwe Gbaugbau gòhọtúntún lọ tọn mẹ podọ to tẹmpli lọ mẹ nọtena?
Jehovah, Otọ́ owanyinọ lọ he nọ basi hihọ́na omẹ etọn lẹ, dike Islaelivi lẹ ni mọ dọ ewọ tin to gblagbla yetọn mẹ. Aliho he mẹ e wà enẹ te dopo wẹ yin gbọn aslọ sisẹ́ de gblamẹ he tindo kanṣiṣa pẹkipẹki hẹ nọtẹn sinsẹ̀n-bibasi etọn tọn.
Hinhọ́n ayidego tọn enẹ nọtena tintin to finẹ mayinukundomọ Jehovah tọn. E nọ sọawuhia to Fiwiwe Gbaugbau gòhọtúntún lọ tọn po tẹmpli he Sọlọmọni gbá lọ tọn po mẹ. Hinhọ́n he nọ sọawuhia to azọ́njiawu-liho enẹ ma zẹẹmẹdo dọ Jehovah na ede sẹtẹn wá finẹ gba. Jiwheyẹwhe ma sọgan nọ̀ ohọ̀ depope he gbẹtọ lẹ gbá mẹ. (2 Otannugbo lẹ 6:18; Owalọ lẹ 17:24) Hinhọ́n jiawu he tin to fiwiwe Jiwheyẹwhe tọn mẹ ehe nọ hẹn yẹwhenọ daho deji bosọ nọ hẹn Islaelivi lẹpo deji gbọn ewọ gblamẹ dọ Jehovah tin to finẹ to yẹhiadonu-liho nado họ́ yé bo penukundo yewlẹ po nuhudo yetọn lẹ po go.
To ojlẹ he mẹ Biblu yin kinkàn te godo, hinhọ́n ehe nọ yin yiylọ to Alamaiki-gbè mẹ dọ Ṣekina (shekhi·nahʹ), he zẹẹmẹdo “enẹ he nọ nọ̀,” kavi “fininọ lọ.” Dile etlẹ yindọ hogbe ehe ma sọawuhia to Biblu mẹ, e yin mimọ to lẹdogbedevomẹ Owe-wiwe Heblu tọn to Alamaiki-gbè mẹ, he sọ nọ yin yiylọdọ Targums.
To whenuena Jehovah to anademẹ lẹ na gando gbigbá gòhọtúntún lọ tọn go, e dọna Mose dọmọ: “Hiẹ nasọ yí aisintẹn-lẹblanu tọn [kavi nùsu] lọ do aga aki lọ tọn ji; podọ to aki lọ mẹ wẹ hiẹ na yí kunnuhó he yẹn na na we lọ do. Finẹ yẹn na nọ pli hẹ we te, yẹn bo nasọ nọ dọho hẹ we sọn aga aisintẹn-lẹblanu tọn lọ mẹ, sọn ṣẹnṣẹn kelubimi lẹ lọ tọn he tin to aki kunnuhó lọ tọn mẹ.” (Eksọdusi 25:21, 22) Aki he yin nùdego lọ yin apotin he go sika yin kinkọ̀n do de he tin to Fiwiwe Gbaugbau lọ mẹ. Kelubimi sikanọ awe tin to nùsu Aki lọ tọn ji.
Fie wẹ Jehovah na dọho sọn? E na gblọndo lọ to whenuena e dọna Mose dọ: “Yẹn na sọawuhia to aslọ lọ mẹ to [nùsu] lọ ji.” (Levitiku 16:2) Aslọ ehe nọ tì do Aki wiwe lọ ji gbọ̀n kelubimi sikanọ awe lọ lẹ ṣẹnṣẹn. Biblu ma dọ lehe aslọ lọ nọ yiaga sọ kavi obá he mẹ e nọ yiaga zẹ̀ kelubimi lẹ go jẹ na mí gba.
Aslọ sisẹ́ ehe wẹ nọ tá hinhọ́n do Fiwiwe Gbaugbau lọ. Na nugbo tọn, asisa hinhọ́n tọn dopo akàn he tin to abò lọ mẹ niyẹn. Yẹwhenọ daho na mọaleyi sọn hinhọ́n mọnkọtọn mẹ to whenuena e biọ otẹn wiwe gbaugbau lọ mẹ to Azán Ovẹsè tọn gbè. Ewọ ṣite to Jehovah nukọn.
Be hinhọ́n he nọ sọawuhia to azọ́njiawu-liho ehe tindo zẹẹmẹ depope na Klistiani lẹ ya? Apọsteli Johanu mọ tòdaho de to numimọ mẹ ehe mẹ “ozanku ma tin” te. Tòdaho lọ wẹ Jelusalẹm Yọyọ lọ, he bẹ Klistiani yiamisisadode he yin finfọnsọnku nado dugán hẹ Jesu lẹ hẹn. Hinhọ́n tòdaho yẹhiadonu tọn ehe tọn ma wá sọn owhè kavi osun mẹ gba. Gigo Jehovah Jiwheyẹwhe tọn lọsu wẹ nọ tá hinhọ́n do titobasinanu ehe ji, kẹdẹdile aslọ Ṣekina tọn nọ tá hinhọ́n do Fiwiwe Gbaugbau lọ do. Humọ, Lẹngbọvu lọ, Jesu Klisti, wẹ “hinhọ́n” kavi miyọ́ngbán tòdaho lọ tọn. Taidi kọdetọn de, “tòdaho” ehe nọ tá hinhọ́n po nukundagbe gbigbọmẹ tọn etọn po do gbẹtọ he yin fifligọ sọn akọta lẹpo mẹ ji nado deanana yé.—Osọhia 21:22-25.
Na sinsẹ̀n-basitọ Jehovah tọn lẹ nọ mọ dona susugege mọnkọtọn yí sọn olọn mẹ wutu, yé sọgan deji dọ Jehovah wẹ Lẹngbọhọtọ hihọ́-basinamẹtọ yetọn podọ Otọ́ owanyinọ yetọn.