Kanbiọ lẹ sọn Wehiatọ lẹ Dè

Be aihundida danuwiwa tọn to ọdinatẹẹ ji sọgan yinuwado haṣinṣan mẹtọn hẹ Jehovah ji ya?

“OKLUNỌ to dodonọ lẹ whlepọn”, wẹ Davidi Ahọlu Islaeli hohowhenu tọn wlan, “ṣigba mẹylankan po mẹhe yiwanna [danuwiwa, NW] po ayiha etọn gbẹwanna.” (Psalm 11:5) Hogbe dowhenu tọn heyin lilẹdogbedevomẹ dọ “gbẹwanna” sọgan sọ zẹẹmẹdo “mẹhe yin kẹntọ de.” Enẹwutu, mẹdepope he yiwanna danuwiwa to ede yí do basi kẹntọ Jiwheyẹwhe tọn wẹ. Kanbiọ he mí dona gbadopọnna todin lọ wẹ yindọ: Be aihundida ọdinatẹẹ ji tọn delẹ sọgan fọ́n ojlo wanyina danuwiwa tọn dote ya?

Aihundida danuwiwa tọn lẹ to ọdinatẹẹ ji nọ na gigo awhànfunnu lẹ yiyizan. Yé nọ saba plọn awhànfunfun mẹhe nọ yí yé zan lẹ. Linlinwe The Economist dọmọ: “Awhànpa Amelika tọn nọ ganjẹ aihundida ọdinatẹẹ ji tọn lẹ go titengbe taidi azọ́nwanu azọ́nplọnmẹ tọn de. Delẹ to aihundida he awhànpa lọ nọ yizan lẹ mẹ ko gbayipe taun todin.”

Nugbo wẹ dọ, mẹhe nọ daihun danuwiwa tọn to ọdinatẹẹ ji lẹ ma nọ gbleawu gbẹtọ-jọ-gbẹtọ de gba. Ṣigba etẹwẹ nudide aihundida ehe tọn nọ dohia gando nuhe sọgan to jijọ do ahun yẹhiadonu tọn yetọn lẹ go? (Matiu 5:21, 22; Luku 6:45) Tadona tẹ kọ̀n wẹ hiẹ sọgan wá gando mẹhe nọ duvivi ohí sọ mẹ, sòdedo mẹ, awugblenamẹ, po mẹhùhù po tọn to yẹhiadonu-liho go? Etẹwẹ na jọ eyin mẹlọ nọ yí ganmẹ susu zan to sẹmẹsẹmẹ nado to mahẹ tindo to aihundida danuwiwa tọn ehelẹ mẹ, bo wá lẹzun aihun mọnkọ datọ akonka de? E whè gbau, hiẹ na wá tadona lọ kọ̀n dọ ewọ to awuwlena owanyina danuwiwa wẹ, kẹdẹdile mẹhe nọ pọ́n yẹdide fẹnnuwiwa tọn lẹ nọ to awuwlena ojlo mawé lẹ do.—Matiu 5:27-29.

Nawẹ Jehovah gbẹwanna mẹhe nọ yiwanna danuwiwa do sọ? Davidi dọ dọ Jehovah “gbẹwanna” ẹn. To azán Noa tọn gbè, Jehovah dohia lehe wangbẹnamẹ etọn na mẹhe yiwanna danuwiwa lẹ sinyẹn sọ. Jehovah dọna Noa dọmọ: “Opodo nútẹgbẹ̀ lẹpo tọn ko wá nukọn ṣie; na aigba gọ́ na [danuwiwa] gbọn dali yetọn; bo doayi e go, yẹn na gbidi yé po aigba po.” (Gẹnẹsisi 6:13) Jiwheyẹwhe nugbo lọ và aihọn gbẹtọvi lẹ tọn pete sudo na danuwiwa yetọn wutu. E basi hihọ́na Noa po whẹndo etọn po—yèdọ omẹ ṣinatọ̀n he ma yiwanna danuwiwa lẹ.—2 Pita 2:5.

Mẹhe tindo ojlo nado jihọntọn hẹ Jehovah lẹ na “yí ohí yetọn do tùn agbogọdọẹ.” Kakati nado plọn owanyi na danuwiwa, yé “ma to na plọn awhànfunfun ba.” (Isaia 2:4) Nado gbọṣi họntọn Jiwheyẹwhe tọn yinyin mẹ bo ma na lẹzun kẹntọ etọn, mí dona “gbẹ́ oylan dai, bosọ nọ wadagbe.” Mí dona nọ “dín jijọho, bosọ nọ doafọna ẹn.”—1 Pita 3:11.

Etẹwẹ mí na wà eyin mí ko to mahẹ tindo to aihundida danuwiwa tọn lẹ mẹ? Eyin mọwẹ mí dona magbe gligli nado hẹn homẹhun Jehovah gbọn nuyiwa he ewọ gbẹwanna lẹ gbigbẹdai dali. Na jide tọn mí dona hodẹ̀ bo biọ alọgọ gbigbọ wiwe Jiwheyẹwhe tọn nado doalọtena nuyiwa he nọ hẹn owù wá to gbigbọ-liho ehe. Mí sọgan doalọtena ẹn eyin mí na dotẹnmẹ jẹhẹnu lẹ taidi jijọho, dagbewà, po mawazẹjlẹgo po nado hẹn gbẹzan mítọn sọgbe hẹ aliho Jiwheyẹwhe tọn.—Luku 11:13; Galatianu lẹ 5:22, 23.